ತೆಲಂಗಾಣದಲ್ಲಿ ಜಗತ್ತಿನ ಪ್ರಥಮ 3ಡಿ ದೇವಸ್ಥಾನ

                 ಹೈದರಾಬಾದ್: ಜಗತ್ತಿನ ಪ್ರಥಮ 3ಡಿ ಮುದ್ರಿತ ಹಿಂದು ದೇವಾಲಯವೊಂದನ್ನು ತೆಲಂಗಾಣದಲ್ಲಿ ನಿರ್ವಿುಸಲಾಗುತ್ತಿದೆ. ನಗರದ ಸಿದ್ದಪೇಟೆಯ ಬುರುಗಪಲ್ಲಿಯಲ್ಲಿರುವ ಗೇಟೆಡ್ ವಿಲ್ಲಾ ಕಮ್ಯುನಿಟಿ 'ಚರ್ವಿತ ಮೀಡೋಸ್'ನಲ್ಲಿ ಈ ಮೂರು ಹಂತದ ಪ್ರಿಂಟೆಡ್ ಮಂದಿರವನ್ನು ಅಪ್ಸುಜಾ ಇನ್​ಫ್ರಾಟೆಕ್ ಸಂಸ್ಥೆ ನಿರ್ವಿುಸುತ್ತಿದೆ.

                     3,800 ಚದರ ಅಡಿ ಪ್ರದೇಶದಲ್ಲಿ ಈ ವಿಶಿಷ್ಟ ಮಂದಿರ ನಿರ್ವಣಗೊಳ್ಳಲಿದೆ. ದೇವಸ್ಥಾನ ನಿರ್ವಣಕ್ಕಾಗಿ 3ಡಿ-ಪ್ರಿಂಟೆಡ್ ನಿರ್ಮಾಣ ಕಂಪನಿಯಾದ ಸಿಂಪ್ಲಿಫೋರ್ಜ್ ಕ್ರಿಯೇಷನ್ಸ್​ನೊಂದಿಗೆ ಅಪ್ಸುಜಾ ಇನ್​ಫ್ರಾಟೆಕ್ ಒಪ್ಪಂದ ಮಾಡಿಕೊಂಡಿದೆ.

                                            ಸೇತುವೆ ನಿರ್ವಣ

                ಹೈದರಾಬಾದ್​ನ ಭಾರತೀಯ ತಂತ್ರಜ್ಞಾನ ಸಂಸ್ಥೆಯ (ಐಐಟಿ) ಸಹಯೋಗದೊಂದಿಗೆ ಸಿಂಪ್ಲಿ ಫೋರ್ಜ್ ಕ್ರಿಯೇಷನ್ಸ್ ಇದೇ ಮಾರ್ಚ್​ನಲ್ಲಿ ಕೇವಲ 2 ಗಂಟೆಯೊಳಗೆ ಸೇತುವೆಯ ಮೂಲಮಾದರಿ ನಿರ್ವಿುಸಿತ್ತು. ಅದು ಭಾರತದ ಆ ಬಗೆಯ ಮೊದಲ ಸೇತುವೆಯಾಗಿದೆ. ಆ ಸೇತುವೆಯನ್ನು ಕೂಡ ಚರ್ವಿತ ಮೀಡೋಸ್​ನಲ್ಲೇ ಜೋಡಿಸಲಾಗಿತ್ತು. ಐಐಟಿ ಹೈದರಾಬಾದ್​ನ ಸಿವಿಲ್ ಇಂಜಿನಿಯರಿಂಗ್ ವಿಭಾಗದ ಕೆ.ವಿ.ಎಲ್. ಸುಬ್ರಮಣಿಯಂ ಮತ್ತವರ ಸಂಶೋಧನಾ ತಂಡ ಅದರ ಪರಿಕಲ್ಪನೆ ಹಾಗೂ ವಿನ್ಯಾಸ ರೂಪಿಸಿತ್ತು. ಭಾರ ಹೊರುವ ಸಾಮರ್ಥ್ಯದ ಪರೀಕ್ಷೆ ಹಾಗೂ ಬಳಕೆಯ ಮೌಲ್ಯಮಾಪನದ ನಂತರ ಈ ಸೇತುವೆಯನ್ನು ಪಾದಚಾರಿಗಳ ಬಳಕೆಗೆ ಮುಕ್ತಗೊಳಿಸಲಾಗಿದೆ. ಪ್ರಸ್ತಾಪಿತ ಮಂದಿರದ ಸುತ್ತ ಇರುವ ಗಾರ್ಡನ್​ಗೆ ಪಾದಚಾರಿಗಳ ಸಂಚಾರಕ್ಕೆ ಅದು ಬಳಕೆಯಾಗಲಿದೆ ಎಂದು ಸಿಂಪ್ಲಿಫೋರ್ಜ್ ಕ್ರಿಯೇಷನ್ಸ್​ನ ಸಿಇಒ ಧ್ರುವ ಗಾಂಧಿ ಹೇಳಿದ್ದಾರೆ.

                                         3 ಗರ್ಭಗುಡಿ

                    ದೇವಸ್ಥಾನದಲ್ಲಿ 3 ಗರ್ಭಗುಡಿ ಇರುತ್ತವೆ. ಗಣಪತಿಗೆ ಸಮರ್ಪಿತವಾದ 'ಮೋದಕ' ಆಕಾರದ ಗರ್ಭಗುಡಿ, ಶಂಕರನಿಗೆ ಚೌಕಾಕಾರ ಮತ್ತು ದೇವಿ ಪಾರ್ವತಿಗೆ ಕಮಲಾಕಾರದ ಗರ್ಭಗುಡಿಗಳು ಮಂದಿರದಲ್ಲಿರುತ್ತವೆ ಎಂದು ಅಪ್ಸುಜಾ ಇನ್​ಫ್ರಾಟೆಕ್​ನ ಆಡಳಿತ ನಿರ್ದೇಶಕ ಹರಿ ಕೃಷ್ಣ ಜೇಡಪಲ್ಲಿ ತಿಳಿಸಿದ್ದಾರೆ.