ಪ್ಲಸ್ ಒನ್ ತರಗತಿಗಳ ಆರಂಭ: ಮಲಬಾರ್‍ನಲ್ಲಿ 43,000 ಮಕ್ಕಳು ಇನ್ನೂ ಪ್ರವೇಶ ಪಡೆಯಲಾಗದೆ ಸಂಕಷ್ಟದಲ್ಲಿ

                 ತಿರುವನಂತಪುರಂ: ಪ್ಲಸ್ ಒನ್ ಪ್ರವೇಶದ ಮೂರನೇ ಹಂಚಿಕೆ, ಉಳಿದ ಸೀಟುಗಳು ಮತ್ತು ವಿಎಚ್‍ಎಸ್‍ಇ ಪ್ರವೇಶಗಳನ್ನು ಪರಿಗಣಿಸಿದರೆ, ಪಾಲಕ್ಕಾಡ್‍ನಿಂದ ಕಾಸರಗೋಡುವರೆಗಿನ ಮಲಬಾರ್ ಜಿಲ್ಲೆಗಳಲ್ಲಿ ಇನ್ನೂ 43,000 ಸೀಟುಗಳ ಅಗತ್ಯವಿದೆ.

             ಮಲಪ್ಪುರಂ ಜಿಲ್ಲೆಯಲ್ಲಿ ಹೆಚ್ಚಿನ ಸೀಟುಗಳ ಅಗತ್ಯವಿದೆ. ಇಲ್ಲಿ ಅರ್ಜಿ ಸಲ್ಲಿಸಿದ್ದರೂ 29,104 ಮಂದಿ ಹೈಯರ್ ಸೆಕೆಂಡರಿ ಅಥವಾ ವಿಎಚ್‍ಎಸ್‍ಇಗೆ ಪ್ರವೇಶ ಪಡೆದಿಲ್ಲ.

          ಜಿಲ್ಲೆಯಲ್ಲಿ ಮೆರಿಟ್ ಕೋಟಾದಲ್ಲಿ 5,007 ಸೀಟುಗಳು ಉಳಿದಿವೆ. ಸಮುದಾಯ, ಮ್ಯಾನೇಜ್‍ಮೆಂಟ್ ಮತ್ತು ಕ್ರೀಡಾ ಕೋಟಾಗಳನ್ನು ಒಳಗೊಂಡಂತೆ ಜಿಲ್ಲೆಯಲ್ಲಿ ಒಟ್ಟು 8,859 ಸೀಟುಗಳು ಉಳಿದಿವೆ. ಮುಂದಿನ ಪೂರಕ ಹಂಚಿಕೆ ಹಂತದಲ್ಲಿ ಪ್ರವೇಶ ನೀಡಿದರೂ 20,248 ಮಂದಿಗೆ ಸೀಟು ಇರುವುದಿಲ್ಲ. ಜಿಲ್ಲೆಯ ವಿಎಚ್‍ಎಸ್‍ಇಗಳ ಎಲ್ಲಾ 2808 ಸೀಟುಗಳಿಗೆ ಈಗಾಗಲೇ ಪ್ರವೇಶ ಪೂರ್ಣಗೊಂಡಿದೆ.

                   ಜಿಲ್ಲೆಯಲ್ಲಿ ಈವರೆಗೆ 51,915 ಮಂದಿ ಅನುದಾನ ರಹಿತರು ಸೇರಿ ಪ್ರವೇಶ ಪಡೆದಿದ್ದಾರೆ. ಮಲಪ್ಪುರಂ ನಂತರ ಪಾಲಕ್ಕಾಡ್ ಅತ್ಯಂತ ಕಡಿಮೆ ಸೀಟುಗಳನ್ನು ಹೊಂದಿದೆ. ವಿಎಚ್‍ಎಸ್‍ಇಯಲ್ಲಿ 1,787 ಸೀಟುಗಳು ಸೇರಿದಂತೆ ಜಿಲ್ಲೆಯಲ್ಲಿ 27,922 ಅಭ್ಯರ್ಥಿಗಳು ಪ್ರವೇಶ ಪಡೆದಿದ್ದಾರೆ. ಮೆರಿಟ್, ಮ್ಯಾನೇಜ್‍ಮೆಂಟ್, ಸಮುದಾಯ ಮತ್ತು ಕ್ರೀಡಾ ಕೋಟಾಗಳಲ್ಲಿ 4,534 ಸೀಟುಗಳು ಉಳಿದಿವೆ. ಈ ಸೀಟಿಗೂ ಪ್ರವೇಶ ನೀಡಿದರೆ ಪಾಲಕ್ಕಾಡ್ ಜಿಲ್ಲೆಯಲ್ಲಿ 9,987 ಮಂದಿಗೆ ಸೀಟು ಸಿಗುವುದಿಲ್ಲ.

                    ಕೋಝಿಕ್ಕೋಡ್ ಜಿಲ್ಲೆಯ ವಿದ್ಯಾರ್ಥಿಗಳೂ ಸೀಟು ಬಿಕ್ಕಟ್ಟಿಗೆ ಸಿಲುಕಿದ್ದಾರೆ. ಜಿಲ್ಲೆಯಲ್ಲಿ ವಿಎಚ್‍ಎಸ್‍ಇಯಲ್ಲಿ 2532 ಸೀಟುಗಳು ಸೇರಿದಂತೆ ಒಟ್ಟು 34,119 ಅಭ್ಯರ್ಥಿಗಳು ಇಲ್ಲಿಯವರೆಗೆ ಪ್ರವೇಶ ಪಡೆದಿದ್ದಾರೆ. ವಿವಿಧ ಕೋಟಾಗಳಲ್ಲಿ 5,780 ಸೀಟುಗಳು ಉಳಿದಿವೆ. ಇದನ್ನು ಪರಿಗಣಿಸಿದರೂ ಒಟ್ಟು 47,182 ಅರ್ಜಿದಾರರಲ್ಲಿ 7,283 ಮಂದಿಗೆ ಸೀಟು ಸಿಗುವುದಿಲ್ಲ. ಇನ್ನುಳಿದ ಸ್ಥಾನಗಳನ್ನೂ ಪರಿಗಣಿಸಿದರೆ ಕಣ್ಣೂರಿನಲ್ಲಿ 2,791, ಕಾಸರಗೋಡಿನಲ್ಲಿ 2,374 ಮತ್ತು ವಯನಾಡಿನಲ್ಲಿ 727 ಅಭ್ಯರ್ಥಿಗಳಿಗೆ ಸೀಟು  ಸಿಗುವುದಿಲ್ಲ. ಈ ಜಿಲ್ಲೆಗಳಲ್ಲಿ ಅನುದಾನರಹಿತ ಶಾಲೆಗಳಲ್ಲಿ ಸೀಟುಗಳಿದ್ದರೂ ಅಪಾರ ಶುಲ್ಕ ಪಾವತಿಸಬೇಕಾಗಿರುವುದರಿಂದ ವಿದ್ಯಾರ್ಥಿಗಳು ಪ್ರವೇಶ ಪಡೆಯುತ್ತಿಲ್ಲ. ಸಮುದಾಯ, ಮ್ಯಾನೇಜ್‍ಮೆಂಟ್ ಮತ್ತು ಕ್ರೀಡಾ ಕೋಟಾಗಳಲ್ಲಿ ಉಳಿದಿರುವ ಸೀಟುಗಳನ್ನು ಮುಂದಿನ ಹಂತಗಳಲ್ಲಿ ಮೆರಿಟ್‍ಗೆ ಪರಿವರ್ತಿಸಿದಾಗ ಮಾತ್ರ ಉಳಿದ ಶೇಕಡಾ 25 ರಷ್ಟು ಮಕ್ಕಳು ಪ್ರವೇಶ ಪಡೆಯುತ್ತಾರೆ.

                      ಮುಖ್ಯವಾಗಿ ಮಲಪ್ಪುರಂ, ಪಾಲಕ್ಕಾಡ್ ಮತ್ತು ಕೋಯಿಕ್ಕೋಡ್ ಜಿಲ್ಲೆಗಳಲ್ಲಿ ಸೀಟು ಬಿಕ್ಕಟ್ಟು ಉತ್ತುಂಗದಲ್ಲಿದೆ. ಕಳೆದ ವರ್ಷಗಳಲ್ಲಿ ಸೀಟುಗಳಿಲ್ಲದ ಓಪನ್ ಶಾಲೆಗಳಲ್ಲಿ ಹೆಚ್ಚಿನ ವಿದ್ಯಾರ್ಥಿಗಳು ಪ್ರವೇಶ ಪಡೆದಿರುವುದು ಈ ಜಿಲ್ಲೆಗಳಿಂದಲೇ.

              ಮೂರನೆ ಹಂಚಿಕೆ ನಂತರ ಪರಿಸ್ಥಿತಿ ಅವಲೋಕಿಸಿ ಸೀಟು ಕೊರತೆ ನೀಗಿಸಲು ಕ್ರಮ ಕೈಗೊಳ್ಳುವುದಾಗಿ ಭರವಸೆ ನೀಡಿದ ಶಿಕ್ಷಣ ಸಚಿವರು ಇದೀಗ ಮೊದಲ ಪೂರಕ ಹಂಚಿಕೆ ನಂತರ ಪರಿಸ್ಥಿತಿ ಅವಲೋಕಿಸಿ ಕ್ರಮ ಕೈಗೊಳ್ಳುವುದಾಗಿ ತಮ್ಮ ನಿಲುವು ಬದಲಿಸಿದ್ದಾರೆ. ಜುಲೈ 5ರಂದು ಪ್ಲಸ್ ಒನ್ ತರಗತಿಗಳು ಆರಂಭವಾಗಿದ್ದು,  ವಿದ್ಯಾರ್ಥಿಗಳ ಆತಂಕ ಹೆಚ್ಚಾಗುತ್ತಿದೆ. ಮುಂದಿನ ದಿನಗಳಲ್ಲಿ ಅನುದಾನ ರಹಿತ ಶಾಲೆಗಳಲ್ಲಿ ಪ್ರವೇಶ ಪಡೆಯುವ ಮಕ್ಕಳ ಸಂಖ್ಯೆಯೂ ಕಡಿಮೆಯಾಗಲಿದೆ.