ಇಂದಿನಿಂದ ಬಸ್‍ಗಳು ಚೆರ್ಕಳ ನಿಲ್ದಾಣ ಪ್ರವೇಶಿಸಲು ಸೂಚನೆ: ಚೆರ್ಕಳ ಬಸ್ ನಿಲ್ದಾಣಕ್ಕೆ ಭೇಟಿ ನೀಡಿದ ಶಾಸಕ ಹಾಗೂ ಜಿಲ್ಲಾಧಿಕಾರಿ

            ಕಾಸರಗೋಡು: ಚೆರ್ಕಳ ಹೊಸ ಬಸ್ ನಿಲ್ದಾಣಕ್ಕೆ ಬಸ್ ಗಳು ಪ್ರವೇಶಿಸದಿರುವ ಸಮಸ್ಯೆ ಬಗೆಹರಿಸಲು ಶಾಸಕ ಎನ್.ಎ.ನೆಲ್ಲಿಕುನ್ನು ಹಾಗೂ ಜಿಲ್ಲಾಧಿಕಾರಿ ಕೆ.ಇಂನ್ಬಾ ಶೇಖರ್ ನೇತೃತ್ವದ ತಂಡ ನಿನ್ನೆ ಚೆರ್ಕಳ ಹೊಸ ಬಸ್ ನಿಲ್ದಾಣ ಆವರಣಕ್ಕೆ ಭೇಟಿ ನೀಡಿದರು. 

          ಹೊಸ ಬಸ್ ನಿಲ್ದಾಣಕ್ಕೆ ಬಾರದ ಬಸ್ ಗಳನ್ನು ಗುರುತಿಸಿ ಸುರಕ್ಷತೆಗಾಗಿ ಕ್ಯಾಮೆರಾ ಅಳವಡಿಸುವಂತೆ ಜಿಲ್ಲಾಧಿಕಾರಿ ಚೆಂಗಳ ಗ್ರಾಮ ಪಂಚಾಯಿತಿ ಅಧ್ಯಕ್ಷ ಖಾದರ್ ಬದ್ರಿಯಾಗೆ ಸೂಚನೆ ನೀಡಿದ್ದಾರೆ. ಬಸ್‍ಗಳನ್ನು ಹಿಮ್ಮುಖವಾಗಿ ತಿರುಗಿಸುವ ಬದಲು ಬ್ಯಾರಿಕೇಡ್‍ಗಳನ್ನು ಹಾಕಿ ಹಿಂತಿರುಗುವಂತೆ ಜಿಲ್ಲಾಧಿಕಾರಿ ಸೂಚಿಸಿದರು. ಇದಕ್ಕಾಗಿ ಮೂಲಸೌಕರ್ಯಗಳನ್ನು ಸಿದ್ಧಪಡಿಸುವಂತೆ ಸಂಬಂಧಪಟ್ಟವರಿಗೆ ಸೂಚಿಸಲಾಗಿದೆ. ಬಸ್ ನಿಲ್ದಾಣಕ್ಕೆ ಪ್ರವೇಶಿಸುವ ಎರಡೂ ಬದಿಯ ರಸ್ತೆಗಳ ತುರ್ತು ದುರಸ್ತಿಗೆ ಪಿಡಬ್ಲ್ಯುಡಿಗೆ ವಹಿಸಲಾಗಿದೆ. ಜಿಲ್ಲಾ ಪೋಲೀಸ್ ವರಿಷ್ಠಾಧಿಕಾರಿಗಳಿಗೆ ಸಂಬಂಧಿಸಿದಂತೆ ಬಸ್ ನಿಲ್ದಾಣದಲ್ಲಿ ಪೋಲೀಸ್ ಏಡ್ ಪೋಸ್ಟ್ ಆರಂಭಿಸಲು ಕಾಮಗಾರಿಗೆ ವೇಗ ನೀಡುವುದಾಗಿ ಜಿಲ್ಲಾಧಿಕಾರಿ ತಿಳಿಸಿದರು. 

               ಇಂದಿನಿಂದ (ಜುಲೈ 21) ಎಲ್ಲ ಬಸ್ ಗಳನ್ನು ನಿಲ್ದಾಣದೊಳಕ್ಕೆ ತರುವಂತೆ ಬಸ್ ಮಾಲೀಕರ ಪ್ರತಿನಿಧಿಗಳಿಗೆ ಜಿಲ್ಲಾಧಿಕಾರಿ ಸೂಚಿಸಿದರು. ಚೆರ್ಕಳ ಹೊಸ ಬಸ್ ನಿಲ್ದಾಣಕ್ಕೆ ಬಸ್‍ಗಳು ಬಾರದಿರುವ ಕುರಿತು ಬೆಳಗ್ಗೆ ಬಸ್ ಮಾಲೀಕರ ಪ್ರತಿನಿಧಿಗಳೊಂದಿಗೆ ಚರ್ಚೆ ನಡೆಸಿ ನಂತರ ಶಾಸಕ ಎನ್.ಎ.ನೆಲ್ಲಿಕುನ್ನು  ಸಮ್ಮುಖದಲ್ಲಿ ಬಸ್ ನಿಲ್ದಾಣ ಪ್ರದೇಶಕ್ಕೆ ಭೇಟಿ ನೀಡುವುದಾಗಿ ಜಿಲ್ಲಾಧಿಕಾರಿ ತಿಳಿಸಿದರು. 

             ಜಿಲ್ಲಾ ಪಂಚಾಯತ್ ಉಪಾಧ್ಯಕ್ಷ ಶಾನವಾಜ್ ಪಾದೂರು, ಚೆಂಗಳ ಪಂಚಾಯತ್ ಅಧ್ಯಕ್ಷ ಖಾದರ್ ಬದ್ರಿಯಾ, ಉಪಾಧ್ಯಕ್ಷೆ ಸಫಿಯಾ ಹಾಶಿಮ್, ಕಾರ್ಯದರ್ಶಿ ಹರಿಕುಮಾರ್, ಉಪ ಯೋಜನಾಧಿಕಾರಿ ನಿನೋಜ್ ಮೇಪಿಡಿಯಾತ್, ಸಂಶೋಧನಾ ಸಹಾಯಕಿ ಶೀಜಾ, ಪಿಡಬ್ಲ್ಯೂಡಿ ರಸ್ತೆಗಳ ಕಾರ್ಯನಿರ್ವಾಹಕ ಅಭಿಯಂತರ ರಾಜೀವ್, ಮೋಟಾರು ವಾಹನ ನಿರೀಕ್ಷಕ ವಿ.ಪ್ರಜಿತ್, ಸಹಾಯಕ ಮೋಟಾರು ವಾಹನ ನಿರೀಕ್ಷಕ ಕೆ.ವಿ. , ವಿದ್ಯಾನಗರ ಎಸ್‍ಐ ವಿಜಯನ್ ಮೇಲೋತ್,  ಕೆಎಸ್‍ಆರ್‍ಟಿಸಿ ಪ್ರತಿನಿಧಿಗಳು ಹಾಗೂ ಬಸ್ ಮಾಲೀಕರ ಪ್ರತಿನಿಧಿಗಳೂ ಜಿಲ್ಲಾಧಿಕಾರಿ ಜೊತೆಗಿದ್ದರು.