ರಾಜ್ಯದಲ್ಲಿ ಮತ್ತೊಬ್ಬ ವ್ಯಕ್ತಿಗೆ ನಿಪಾ ದೃಢ: ನಾಲ್ಕಕ್ಕೇರಿದ ಸೋಂಕಿತರ ಸಂಖ್ಯೆ: ಮಲಪ್ಪುರಂನ ವ್ಯಕ್ತಿಗೆ ನೆಗೆಟಿವ್

                      ತಿರುವನಂತಪುರಂ: ರಾಜ್ಯದಲ್ಲಿ ಮತ್ತೊಬ್ಬರಿಗೆ ನಿಪಾ ಸೋಂಕು ದೃಢಪಟ್ಟಿದೆ. ಕೋಝಿಕ್ಕೋಡ್ ನಲ್ಲೇ ಹೊಸ ಪ್ರಕರಣವೊಂದು ವರದಿಯಾಗಿದೆ.

                      ಆಸ್ಪತ್ರೆಯಲ್ಲಿ ನಿಗಾದಲ್ಲಿರುವ 39 ವರ್ಷದ ವ್ಯಕ್ತಿಗೆ ನಿಪಾ ವೈರಸ್ ಇರುವುದು ಪತ್ತೆಯಾಗಿದೆ. ಸೋಂಕಿತರು ಚಿಕಿತ್ಸೆಗಾಗಿ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು. ಇದರಿಂದಾಗಿ ಅವರು ನಿಗಾದಲ್ಲಿಯೇ ಇದ್ದರು. ಇದರೊಂದಿಗೆ ರಾಜ್ಯದಲ್ಲಿ ನಿಪಾ ಬಾಧಿತರ ಸಂಖ್ಯೆ ನಾಲ್ಕಕ್ಕೆ ಏರಿಕೆಯಾಗಿದೆ. 

                      ಏತನ್ಮಧ್ಯೆ, ನಿಪಾ ತಡೆಗಟ್ಟುವ ಚಟುವಟಿಕೆಗಳ ಮೌಲ್ಯಮಾಪನದ ಭಾಗವಾಗಿ ಶುಕ್ರವಾರ ಕೋಝಿಕ್ಕೋಡ್‍ನಲ್ಲಿ ಉನ್ನತ ಮಟ್ಟದ ಸಭೆ ನಡೆಯಿತು. ಜಿಲ್ಲೆಯಲ್ಲಿ ಕೇಂದ್ರ ತಂಡ ಸೋಂಕುಪೀಡಿತ ಪ್ರದೇಶಗಳಿಗೆ ಭೇಟಿ ನೀಡಿದೆ. ಕೋಝಿಕ್ಕೋಡ್ ಮೆಡಿಕಲ್ ಕಾಲೇಜಿನಲ್ಲಿ ಸ್ಥಾಪಿಸಲಾದ ಮೊಬೈಲ್ ವೈರಾಲಜಿ ಲ್ಯಾಬ್‍ನ ಕಾರ್ಯಾಚರಣೆ ಶುಕ್ರವಾರ  ಪ್ರಾರಂಭವಾಗಿದೆ. 

                                          ಮಲಪ್ಪುರಂನ ಹಿರಿಯ ಮಹಿಳೆಗೆ ನಿಪಾ ನೆಗೆಟಿವ್ 

                     ಮಲಪ್ಪುರಂ: ರೋಗಲಕ್ಷಣಗಳೊಂದಿಗೆ ಮಂಚೇರಿಯ ವೈದ್ಯಕೀಯ ಕಾಲೇಜು ಆಸ್ಪತ್ರೆಯಲ್ಲಿ 82 ವರ್ಷದ ಮಹಿಳೆಯನ್ನು ಪರೀಕ್ಷಿಸಲಾಗಿದ್ದು, ನಿಪಾ ಪರೀಕ್ಷೆಯ ಫಲಿತಾಂಶ ನೆಗೆಟಿವ್ ಬಂದಿದೆ.

                    ನಿಪಾ ಸೋಂಕು ತಗುಲಿದವರೊಂದಿಗೆ ಸಂಪರ್ಕ ಹೊಂದಿಲ್ಲದಿದ್ದರೂ, ರೋಗಲಕ್ಷಣಗಳು ಆತಂಕಕ್ಕೆ ಕಾರಣವಾಗಿವೆ. ಅರೀಕೋಡು ಕ್ಯಾವನೂರಿನ ಎಳಯೂರಿನ ನಿವಾಸಿಯಾಗಿರುವ ವೃದ್ಧೆಯೊಬ್ಬರು ಬುಧವಾರ ಬೆಳಗ್ಗೆ ತೀವ್ರ ಜ್ವರ ಹಾಗೂ ಮೂರ್ಛೆ ರೋಗದಿಂದ ಬಳಲುತ್ತಿದ್ದು ಚಿಕಿತ್ಸೆಗಾಗಿ ಆಸ್ಪತ್ರೆಗೆ ಬಂದಿದ್ದರು.

                   ನಂತರ, ಅವರನ್ನು ವಿವರವಾದ ಪರೀಕ್ಷೆಗಳಿಗಾಗಿ ವಿಶೇಷವಾಗಿ ಸ್ಥಾಪಿಸಲಾದ ಪ್ರತ್ಯೇಕ ವಾರ್ಡ್‍ಗೆ ಸ್ಥಳಾಂತರಿಸಲಾಯಿತು. ಅವರ ರಕ್ತ ಮತ್ತು ದ್ರವದ ಮಾದರಿಗಳನ್ನು ಸಂಗ್ರಹಿಸಿ ಕೋಝಿಕ್ಕೋಡ್ ವೈದ್ಯಕೀಯ ಕಾಲೇಜಿಗೆ ಕಳುಹಿಸಲಾಗಿತ್ತು. ಶುಕ್ರವಾರ  ಫಲಿತಾಂಶ ಪ್ರಕಟಗೊಂಡಿದ್ದು, ನೆಗೆಟಿವ್ ಆಗಿದೆ. ಪ್ರಸ್ತುತ ಕೋಝಿಕ್ಕೋಡ್ ನಲ್ಲಿ ಮಾತ್ರ ನಿಪಾ ದೃಢಪಟ್ಟಿದೆ.