ವಿಮಾನ ಸಂಚಾರ ಸ್ಥಗಿತ: 18ರ ವರೆಗೆ ವಿಸ್ತರಣೆ

             ನವದೆಹಲಿ (PTI): ಭಾರತ ಮತ್ತು ಇಸ್ರೇಲ್‌ನ ಟೆಲ್‌ ಅವೀವ್‌ ನಡುವಿನ ವಿಮಾನ ಸಂಚಾರ ಸ್ಥಗಿತವನ್ನು ಅಕ್ಟೋಬರ್‌ 18ರ ವರೆಗೆ ವಿಸ್ತರಿಸುವುದಾಗಿ ಏರ್‌ ಇಂಡಿಯಾ ತಿಳಿಸಿದೆ.

               ಆದರೆ, ಇಸ್ರೇಲ್‌ನಲ್ಲಿರುವ ಭಾರತೀಯರನ್ನು ಸ್ವದೇಶಕ್ಕೆ ಕರೆತರುವ ಕಾರ್ಯಾಚರಣೆ ಭಾಗವಾಗಿ ಸಂಸ್ಥೆಯ ವಿಮಾನಗಳು ಸಂಚಾರ ನಡೆಸುತ್ತಿವೆ ಎಂದು ಏರ್‌ ಇಂಡಿಯಾದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

             ಇಸ್ರೇಲ್‌ ಮತ್ತು ಹಮಾಸ್‌ ನಡುವಿನ ಯುದ್ಧದ ಕಾರಣ ವಿಮಾನ ಸಂಚಾರವನ್ನು ಅ.14ರ ವರೆಗೆ ಸ್ಥಗಿತಗೊಳಿಸಲಾಗಿದೆ ಎಂದು ಏರ್‌ ಇಂಡಿಯಾ ಇದಕ್ಕೂ ಮೊದಲು ತಿಳಿಸಿತ್ತು.

               ಸಾಮಾನ್ಯವಾಗಿ ಭಾರತದಿಂದ ಟೆಲ್‌ ಅವೀವ್‌ಗೆ ವಾರದಲ್ಲಿ ಐದು ದಿವಸ ಏರ್‌ ಇಂಡಿಯಾ ವಿಮಾನಗಳು ಸಂಚರಿಸುತ್ತವೆ.