ಮಹುವಾ ಮೊಯಿತ್ರಾ ಜತೆಗಿನ ಫೋಟೋ ವೈರಲ್; ಇದು ಕೀಳುಮಟ್ಟದ ರಾಜಕೀಯ ಎಂದ ಶಶಿ ತರೂರ್

              ಕೊಟ್ಟಾಯಂ: ತೃಣಮೂಲೆ ಕಾಂಗ್ರೆಸ್​ ಸಂಸದೆ ಮಹುವಾ ಮೊಯಿತ್ರಾ ಜತೆಗೆ ಪಾರ್ಟಿ ಮಾಡುತ್ತಿರುವ ಫೋಟೋ ಹಾಗೂ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ ಆದ ಬೆನಲ್ಲೇ ಪ್ರತಿಕ್ರಿಯಿಸಿರುವ ಕಾಂಗ್ರೆಸ್​ ನಾಯಕ ಶಶಿ ತರೂರ್ ಇದು ಕೀಳುಮಟ್ಟದ ರಾಜಕೀಯ ಎಂದು ಕಿಡಿಕಾರಿದ್ದಾರೆ.

             ಇದು ಸಂಸದೆ ಮಹುವಾ ಮೊಯಿತ್ರಾ ಅವರ ಜನುಮದಿನದಂದು ತೆಗೆಸಿಕೊಳ್ಳಲಾದ ಫೋಟೋಗಳು, ಕೆಲವರು ಇದು ರಹ್ಯಸ ಸಭೆ ಎಂದು ತಿರುಚಿ ಅದನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹರಿಬಿಟ್ಟಿದ್ದಾರೆ. ಈ ರೀತಿಯ ಕೊಳಕು ರಾಜಕಾರಣವನ್ನು ಹಿಂದೆಂದು ನೋಡಿರಲಿಲ್ಲ ಎಂದು ಶಶಿ ತರೂರ್ ಹೇಳಿದ್ದಾರೆ.

                ಈ ಕುರಿತು ಕೇರಳದ ಕೊಟ್ಟಾಯಂನಲ್ಲಿ ಪ್ರತಿಕ್ರಿಯಿಸಿದ ಸಂಸದ ಶಶಿ ತರೂರ್, ಇದು ಕೀಳು ಮಟ್ಟದ ರಾಜಕಾರಣದ ಸ್ಪಷ್ಟ ನಿದರ್ಶನವಾಗಿದ್ದು, ನಾನು ಅಂದು ಆ ಮಗುವಿನ (ಮಹುವಾ ಮೊಯಿತ್ರಾ) ಹುಟ್ಟುಹಬ್ಬಕ್ಕೆ ತೆರಳಿದೆ. ಆಕೆ ನನಗಿಂತ 10-20 ವರ್ಷ ಚಿಕ್ಕವಳು. ಅವರ ಹುಟ್ಟುಹಬ್ಬದ ದಿನದಂದು 15 ಮಂದಿ ಹಾಜರಿದ್ದೆವು.

                 ಆ ಪಾರ್ಟಿಯಲ್ಲಿ ನನ್ನ ಸಹೋದರಿಯನ್ನು ಸಹ ಆಹ್ವಾನಿಸಲಾಗಿತ್ತು. ಅವರು ಸಹ ಅಲ್ಲಿ ಹಾಜರಿದ್ದರು. ಅದಾಗ್ಯೂ, ಕೆಲವರು ಉದ್ದೇಶಪೂರ್ವಕವಾಗಿ ಕ್ರಾಪ್​ ಮಾಡಿರುವ ಫೋಟೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. ಅದನ್ನು ರಹಸ್ಯ ಸಭೆ ಎಂದು ಬಿಂಬಿಸಿದ್ದಾರೆ. ಈ ರೀತಿಯ ಸುದ್ದಿಗಳಿಗೆ ನಾನು ಅಷ್ಟಾಗಿ ಪ್ರಾಮುಖ್ಯತೆಯನ್ನು ನೀಡುವುದಿಲ್ಲ. ಜನರಿಗಾಗಿ ಕೆಲಸ ಮಾಡುವುದು ನಮ್ಮ ಆದ್ಯತೆಯಾಗಿದೆ. ಈ ರೀತಿಯ ಸುಳ್ಳು ಸುದ್ದಿಗಳಿಗೆ ಅಲ್ಲಾ ಎಂದು ಕಾಂಗ್ರೆಸ್​ ಸಂಸದ ಶಶಿ ತರೂರ್​ ವೈರಲ್​ ಫೋಟೋ ಕುರಿತು ಪ್ರತಿಕ್ರಿಯಿಸಿದ್ದಾರೆ.