'ಆಲ್ಟ್‌ ನ್ಯೂಸ್‌' ಸಹ ಸಂಸ್ಥಾಪಕ ಜುಬೈರ್‌ಗೆ 'ಕೋಮು ಸೌಹಾರ್ದ' ಪ್ರಶಸ್ತಿ ಪ್ರದಾನ

                ಚೆನ್ನೈ: ತಮಿಳುನಾಡು ಸರ್ಕಾರ ಕೊಡಮಾಡುವ 'ಕೋಟ್ಟೈ ಅಮೀರ್‌ ಕೋಮು ಸೌಹಾರ್ದ ಪ್ರಶಸ್ತಿ'ಯನ್ನು ಫ್ಯಾಕ್ಟ್‌ ಚೆಕ್ಕರ್‌ ಮೊಹಮ್ಮದ್‌ ಜುಬೈರ್‌ ಅವರಿಗೆ ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್‌ ಅವರು ಶುಕ್ರವಾರ ಪ್ರದಾನ ಮಾಡಿದರು.

                ತಮಿಳುನಾಡಿನಲ್ಲಿ ವಲಸೆ ಕಾರ್ಮಿಕರ ಮೇಲೆ ಹಲ್ಲೆ ನಡೆದಿದೆ ಎಂದು ಸಾಮಾಜಿಕ ಮಾಧ್ಯಮಗಳಲ್ಲಿ ಹರಿದಾಡಿದ್ದ ವದಂತಿಯ ಹಿಂದಿನ ಸತ್ಯವನ್ನು ಬಯಲು ಮಾಡಿರುವುದಕ್ಕಾಗಿ ಜುಬೈರ್‌ ಅವರಿಗೆ ಈ ಪ್ರಶಸ್ತಿ ನೀಡಲಾಗಿದೆ ಎಂದು ಸರ್ಕಾರದ ಮೂಲಗಳು ಹೇಳಿವೆ.

                 'ಆಲ್ಟ್‌ ನ್ಯೂಸ್‌' ಸಹ ಸಂಸ್ಥಾಪಕರಾಗಿರುವ ಜುಬೈರ್‌ ಅವರಿಗೆ ಸ್ಟಾಲಿನ್‌ ಅವರು ಗಣರಾಜ್ಯೋತ್ಸವ ಕಾರ್ಯಕ್ರಮದಲ್ಲಿ ಈ ಪ್ರಶಸ್ತಿಯನ್ನು ಪ್ರದಾನ ಮಾಡಿದ್ದಾರೆ. ಪ್ರಶಸ್ತಿಯು ₹ 25 ಸಾವಿರ ನಗದನ್ನು ಒಳಗೊಂಡಿದೆ.

                 ವಲಸೆ ಕಾರ್ಮಿಕರ ಮೇಲೆ ಹಲ್ಲೆ ನಡೆದಿದೆ ಎಂದು ಬಿಂಬಿಸಿರುವ ವಿಡಿಯೊವೊಂದು ಕಳೆದ ಮಾರ್ಚ್‌ನಲ್ಲಿ ಸಾಮಾಜಿಕ ಮಾಧ್ಯಮಗಳಲ್ಲಿ ಹರಿದಾಡಿತ್ತು. ವಿಡಿಯೊದ ಕುರಿತು ಫ್ಯಾಕ್ಟ್‌ ‌ಚೆಕ್‌ ಮಾಡಿದ್ದ ಜುಬೈರ್‌, ಇದೊಂದು ನಕಲಿ ವಿಡಿಯೊ ಎಂದಿದ್ದರು.