ಕಾಲುವೆಗೆ ಬಿದ್ದ ಕಾರು: ಒಂದೇ ಕುಟುಂಬದ 7 ಮಂದಿ ಸಾವು

         ಕೈಥಲ್  (PTI): ಹರಿಯಾಣದ ಕೈಥಲ್‌ನಲ್ಲಿ ಕಾರೊಂದು ಕಾಲುವೆಗೆ ಬಿದ್ದ ಪರಿಣಾಮ ಒಂದೇ ಕುಟುಂಬದ ಏಳು ಮಂದಿ ಶನಿವಾರ ಮೃತಪಟ್ಟಿದ್ದಾರೆ ಎಂದು ಪೊಲೀಸರು ತಿಳಿಸಿದರು.

         ಒಂದೇ ಕುಟುಂಬದ ಎಂಟು ಮಂದಿ ಸೇರಿ ಒಟ್ಟು ಒಂಬತ್ತು ಜನರು ಕಾರಿನಲ್ಲಿ ಇದ್ದರು. ದಸರಾ ಪ್ರಯುಕ್ತ ಏರ್ಪಡಿಸುವ ಬಾಬಾ ರಾಜ್‌ಪುರಿ ಮೇಳಕ್ಕೆ ಅವರೆಲ್ಲ ತೆರಳುತ್ತಿದ್ದರು ಎಂದು ಹೇಳಿದರು.

          'ಚಾಲಕನ ನಿಯಂತ್ರಣ ತಪ್ಪಿ ಕಾರು ನಾಲೆಗೆ ಬಿದ್ದಿದೆ. ಚಾಲಕನನ್ನು ರಕ್ಷಿಸಲಾಗಿದೆ. 12 ವರ್ಷದ ಬಾಲಕಿ ಕೋಮಲ್‌ ನಾಪತ್ತೆಯಾಗಿದ್ದು ಶೋಧ ಮುಂದುವರಿದಿದೆ' ಎಂದು ಪೊಲೀಸರು ತಿಳಿಸಿದರು.

            ದುರಂತದ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ ದುಃಖ ವ್ಯಕ್ತಪಡಿಸಿ, 'ಇದೊಂದು ಹೃದಯ ವಿದ್ರಾವಕ ಘಟನೆ' ಎಂದಿದ್ದಾರೆ. ಮೃತರಲ್ಲಿ ನಾಲ್ವರು ಬಾಲಕಿಯರು ಮತ್ತು ಮೂವರು ಮಹಿಳೆಯರಿದ್ದಾರೆ.