36 ವರ್ಷಗಳ ಬಳಿಕ ರಶ್ದಿ ಅವರ 'ಸಟಾನಿಕ್ ವರ್ಸಸ್‌' ಪುಸ್ತಕ ದೆಹಲಿಯಲ್ಲಿ ಮಾರಾಟ

 ನವದೆಹಲಿ: ಲೇಖಕ ಸಲ್ಮಾನ್ ರಶ್ದಿ ಅವರ 'ಸಟಾನಿಕ್ ವರ್ಸಸ್‌' ಪುಸ್ತಕವು 36 ವರ್ಷಗಳ ಬಳಿಕ ಮತ್ತೊಮ್ಮೆ ಭಾರತದ ಪುಸ್ತಕ ಜಗತ್ತನ್ನು ಹೊಕ್ಕಿದೆ. ರಾಜೀವ್‌ ಗಾಂಧಿ ಅವರ ಸರ್ಕಾರವಿದ್ದ ಅವಧಿಯಲ್ಲಿ ಈ ಪುಸ್ತಕಕ್ಕೆ ನಿಷೇಧ ಹೇರಲಾಗಿತ್ತು.

'ರಶ್ದಿ ಅವರು ಇಸ್ಲಾಂ ಅನ್ನು ಅವಹೇಳನ ಮಾಡಿದ್ದಾರೆ' ಎಂದು ಆಕ್ರೋಶ ವ್ಯಕ್ತಪಡಿಸಿ ಜಗತ್ತಿನ್ನೆಲ್ಲೆಡೆ ಮುಸ್ಲಿಂ ಸಂಘಟನಗೆಳು ಈ ಪುಸ್ತಕ ಕುರಿತು ಭಾರಿ ವಿರೋಧ ಮಾಡಿದ್ದರು.

ಈಗ ಕೆಲವು ದಿನಗಳಿಂದ ಈ ಪುಸ್ತಕವು ದೆಹಲಿ ಬಾರಿಸನ್ಸ್‌ ಪುಸ್ತಕ ಮಳಿಗೆಯಲ್ಲಿ ಮಾರಾಟವಾಗುತ್ತಿದೆ.

'ಕೆಲವು ದಿನಗಳಿಂದ ನಾವು ಈ ಪುಸ್ತಕವನ್ನು ಮಾರಾಟ ಮಾಡುತ್ತಿದ್ದೇವೆ. ಜನರಿಂದ ಉತ್ತಮ ಪ್ರತಿಕ್ರಿಯೆ ಲಭ್ಯವಾಗಿದೆ' ಎಂದು ಬಾರಿಸನ್ಸ್‌ ಪುಸ್ತಕ ಮಳಿಗೆ ಹೇಳಿದೆ. ₹1,999ಕ್ಕೆ ಪುಸ್ತಕವು ಮಾರಾಟವಾಗುತ್ತಿದೆ. ಇಷ್ಟೊಂದು ದೊಡ್ಡ ಮೊತ್ತದ ಕುರಿತು ಕೆಲ ಪುಸ್ತಕ ಪ್ರೇಮಿಗಳು ಬೇಸರ ವ್ಯಕ್ತಪಡಿಸಿದ್ದಾರೆ.

ರಾಜೀವ್‌ ಗಾಂಧಿ ಅವರ ಸರ್ಕಾರವು ಪುಸ್ತಕಕ್ಕೆ ನಿಷೇಧ ಹೇರಿದ್ದನ್ನು ಪ್ರಶ್ನಿಸಿ ಸಲ್ಲಿಸಲಾಗಿದ್ದ ಅರ್ಜಿಯ ವಿಚಾರಣೆಯನ್ನು ದೆಹಲಿ ಹೈಕೋರ್ಟ್‌ ಇದೇ ನವೆಂಬರ್‌ನಲ್ಲಿ ಮುಕ್ತಾಯ ಮಾಡಿತ್ತು.