ಮಕರ ಬೆಳಕು ತಯಾರಿ: ಸ್ಪಾಟ್‍ಬುಕಿಂಗ್ 5,000 ಕ್ಕೆ ಇಳಿಕೆ, ವರ್ಚುವಲ್ ಸರತಿಯ ಮೇಲೂ ನಿಯಂತ್ರಣ

ಪತ್ತನಂತಿಟ್ಟ: ಮಕರ ಬೆಳಕು ಉತ್ಸವ ಸಂಬಂಧಿಸಿದ ಭದ್ರತಾ ಸಿದ್ಧತೆಗಳ ಭಾಗವಾಗಿ ಶಬರಿಮಲೆಯಲ್ಲಿ ಸ್ಪಾಟ್ ಬುಕ್ಕಿಂಗ್ ಸಂಖ್ಯೆಯನ್ನು ಇಂದಿನಿಂದ(ಜ.8) ರಿಂದ ಜನವರಿ 15 ರವರೆಗೆ ದಿನಕ್ಕೆ 5,000 ಕ್ಕೆ ಮಿತಿಗೊಳಿಸಲಾಗಿದೆ.

ದಟ್ಟಣೆ ನಿಯಂತ್ರಣಕ್ಕೆ ಕ್ರಮಕೈಗೊಳ್ಳುವಂತೆ ಹೈಕೋರ್ಟ್‍ನ ಆದೇಶಾನುಸಾರ ಈ ಕ್ರಮ ಕೈಗೊಳ್ಳಲಾಗಿದೆ. 

ದೇವಸ್ವಂ ಮಂಡಳಿಯು ವರ್ಚುವಲ್ ಸರತಿ ಸಾಲುಗಳನ್ನು ಜನವರಿ 12 ರಂದು 60,000, ಜನವರಿ 13 ರಂದು 50,000 ಮತ್ತು ಜನವರಿ 14 ರಂದು 40,000 ಕ್ಕೆ ನಿಯಂತ್ರಿಸಿದೆ.  ಸನ್ನಿಧಾನಕ್ಕೆ ಬರುವ ಭಕ್ತರಿಗೆ ದರ್ಶನದ ನಂತರ ಅಲ್ಲಿ ತಂಗಲು ಅವಕಾಶವಿಲ್ಲ. ಜನವರಿ 14 ರಂದು ಮಕರ ಬೆಳಕು ದರ್ಶನಕ್ಕೆ ಬರುವ ಭಕ್ತರು ದೇವಾಲಯ ಆವರಣದಲ್ಲಿ ಪರ್ಣಶಾಲೆಗಳನ್ನು ನಿರ್ಮಿಸಿ ಜ್ಯೋತಿ ದರ್ಶನಕ್ಕೆ ಕಾಯುತ್ತಾರೆ. ಇದರಿಂದಾಗಿ ಅನಿಯಂತ್ರಿತ ವಾಹನ ದಟ್ಟಣೆ ಸಾಧ್ಯತೆಯನ್ನು ಪರಿಗಣಿಸಿ ನಿರ್ಬಂಧ ಹೇರಲಾಗಿದೆ.

ಸ್ಪಾಟ್ ಬುಕ್ಕಿಂಗ್ ನಿಯಂತ್ರಣದೊಂದಿಗೆ ನಿಲ್ದಾಣವನ್ನು ಪರಿಶೀಲಿಸಿದ ನಂತರವೇ ಭಕ್ತರಿಗೆ ಪಂಬಾ ಪ್ರವೇಶಿಸಲು ಅವಕಾಶ ನೀಡಲಾಗುತ್ತದೆ. ಮುಂದಿನ ದಿನಗಳಲ್ಲಿ ಸನ್ನಿಧಾನವನ್ನು ನಿಯಂತ್ರಣದಲ್ಲಿಡಲು ಕ್ರಮ ಕೈಗೊಳ್ಳಲಾಗಿದ್ದು, ಭಕ್ತರಿಗೆ ಸುರಕ್ಷಿತ ಜ್ಯೋತಿ ದರ್ಶನಕ್ಕೆ ವಿವಿಧೆಡೆ ಸೌಲಭ್ಯ ಕಲ್ಪಿಸಲಾಗಿದೆ.

ಜನವರಿ 12 ರಂದು ಮಧ್ಯಾಹ್ನ 1 ಗಂಟೆಗೆ ಪಂದಳಂ ವಲಿಯ ಕೊಯಿಕಲ್ ದೇವಸ್ಥಾನದಿಂದ ಪವಿತ್ರ ಆಭರಣ ಮೆರವಣಿಗೆ ಹೊರಟು ವಿವಿಧ ದೇವಾಲಯಗಳಿಗೆ ಭೇಟಿ ನೀಡಿದ ನಂತರ ಜನವರಿ 14 ರಂದು ಐರೂರ್ ಪುತ್ತಿಕಾವ್ ದೇವಸ್ಥಾನದ ಮೂಲಕ ಶಬರಿಮಲೆಗೆ ಆಗಮಿಸಲಿದೆ. ಪವಿತ್ರ ಆಭರಣ ಮೆರವಣಿಗೆ ಸುರಕ್ಷಿತವಾಗಿ ಸಾಗಲು ಬಿಗಿ ಭದ್ರತೆ ಕೈಗೊಳ್ಳಲಾಗಿದೆ.

ಇದುವರೆಗಿನ ಅಂಕಿ ಅಂಶಗಳ ಪ್ರಕಾರ, ಈ ಉತ್ಸವದಲ್ಲಿ 39,02,610 ಭಕ್ತರು ಶಬರಿಮಲೆಗೆ ಭೇಟಿ ನೀಡಿದ್ದಾರೆ. ಕಳೆದ ವರ್ಷ ಇದೇ ವೇಳೆಗೆ 35,12,691 ಮಂದಿ ಆಗಮಿಸಿದ್ದರು ಎಂದು ಅಂದಾಜಿಸಲಾಗಿದೆ. ಯಾತ್ರಾರ್ಥಿಗಳ ಭಾರೀ ಹೆಚ್ಚಳದ ನಡುವೆಯೂ ಸುರಕ್ಷಿತ ದರ್ಶನ ಮತ್ತು ಸಂಬಂಧಿತ ಸೌಲಭ್ಯಗಳಿಗಾಗಿ ಪೋಲೀಸರು ಮಾಡಿದ ವ್ಯವಸ್ಥೆಗಳು ಎಲ್ಲರಿಗೂ ಸುರಕ್ಷಿತ ದರ್ಶನವನ್ನು ಖಾತ್ರಿಪಡಿಸಿದೆ.