ಕ್ಲೀನ್ ಕೇರಳ ಕಂಪನಿಗೆ 50,000 ಕೆಜಿ ಇ-ತ್ಯಾಜ್ಯ. ಕೈಟ್‍ನ ಇ-ತ್ಯಾಜ್ಯ ನಿರ್ವಹಣಾ ವ್ಯವಸ್ಥೆ ಭಾರಿ ಯಶ

ಕಾಸರಗೋಡು: ತ್ಯಾಜ್ಯ ಮುಕ್ತ ನವ ಕೇರಳ ಅಭಿಯಾನದ ಭಾಗವಾಗಿ ಕ್ಲೀನ್ ಕೇರಳ ಕಂಪನಿ, ಸಾಮಾನ್ಯ ಶಿಕ್ಷಣ ಇಲಾಖೆ ಮತ್ತು ಕೈಟ್ ಜಂಟಿಯಾಗಿ ನಡೆಸಿದ ಶಾಲಾ ಮಟ್ಟದ ಇ-ತ್ಯಾಜ್ಯ ಸಂಗ್ರಹ ಅಭಿಯಾನದ ಧ್ವಜಾರೋಹಣ ಸಮಾರಂಭವನ್ನು ಕಾಸರಗೋಡು ಡಿಡಿಇ ಟಿವಿ ಮಧುಸೂದನನ್ ನಿನ್ನೆ ನೆರವೇರಿಸಿದರು.

ಕಾಸರಗೋಡು ನಗರಸಭೆ ವ್ಯಾಪ್ತಿಯಲ್ಲಿರುವ ಶಾಲೆಗಳಿಂದ ಬಂದ ಇ-ತ್ಯಾಜ್ಯವನ್ನು ಕ್ಲೀನ್ ಕೇರಳ ಕಂಪನಿಯ ಜಿಲ್ಲಾ ವ್ಯವಸ್ಥಾಪಕ ಮಿಥುನ್ ಗೋಪಿ ಅವರು ನಗರಸಭೆ ಅಧ್ಯಕ್ಷೆ ಅಬ್ಬಾಸ್ ಬೇಗಂ ಅವರಿಂದ ಸ್ವೀಕರಿಸಿದರು.

ಕೈಟ್ ಸಿದ್ಧಪಡಿಸಿದ ಇ-ತ್ಯಾಜ್ಯ ನಿರ್ವಹಣೆ ಮತ್ತು ವಿಲೇವಾರಿ ಪೋರ್ಟಲ್‍ಗೆ ಕಾಸರಗೋಡು ಜಿಲ್ಲೆಯಿಂದ ಮಾತ್ರ 50 ಟನ್ ಎಲೆಕ್ಟ್ರಾನಿಕ್ ತ್ಯಾಜ್ಯವನ್ನು ಅಪ್‍ಲೋಡ್ ಮಾಡಲಾಗಿದೆ. ಇವುಗಳನ್ನು ವಿಲೇವಾರಿ ಮಾಡುವ ಮೂಲಕ ಕಾಸರಗೋಡು ಜಿಲ್ಲೆಯ ಎಲ್ಲಾ ಶಾಲೆಗಳನ್ನು ಹಸಿರು ಶಾಲೆಗಳ ಸ್ಥಾನಮಾನಕ್ಕೆ ಏರಿಸಲಾಗುತ್ತದೆ. ಪ್ರತಿ ಸ್ಥಳೀಯಾಡಳಿತದ  ಒಂದು ಶಾಲೆಯನ್ನು ಸಂಗ್ರಹಣಾ ಕೇಂದ್ರವಾಗಿ ಗೊತ್ತುಪಡಿಸಲಾಗಿದೆ. ಮೊದಲ ದಿನ ಕ್ಲೀನ್ ಕೇರಳ ಕಂಪನಿಯು ಕಾಸರಗೋಡು ನಗರಸಭೆ ವ್ಯಾಪ್ತಿಯ 19 ಶಾಲೆಗಳಿಂದ 2916 ಕೆಜಿ ಇ-ತ್ಯಾಜ್ಯವನ್ನು ಮತ್ತು ಮಧೂರು ಪಂಚಾಯತಿ ವ್ಯಾಪ್ತಿಯ 6 ಶಾಲೆಗಳಿಂದ 746 ಕೆಜಿ ಇ-ತ್ಯಾಜ್ಯವನ್ನು ಸಂಗ್ರಹಿಸಿದ್ದು, ಒಟ್ಟು 3662 ಕೆಜಿ ಇ-ತ್ಯಾಜ್ಯವನ್ನು ಸಂಗ್ರಹಿಸಿದೆ. ಮೊದಲ ಹಂತದ ಸಂಗ್ರಹಣೆಯಲ್ಲಿ, ಕ್ಲೀನ್ ಕೇರಳ ಕಂಪನಿಯು ಕಾಞಂಗಾಡ್ ನಗರಸಭೆ, ಮಡಿಕೈ ಗ್ರಾಮ ಪಂಚಾಯತಿ, ಕುಂಬಳೆ ಗ್ರಾಮ ಪಂಚಾಯತಿ, ಮೊಗ್ರಾಲ್ ಪುತ್ತೂರು ಗ್ರಾಮ ಪಂಚಾಯತಿ, ಪಳ್ಳಿಕ್ಕೆರೆ ಗ್ರಾಮ ಪಂಚಾಯತಿ ಮತ್ತು ಉದುಮ ಗ್ರಾಮ ಪಂಚಾಯತಿಗಳ ಸ್ಥಳೀಯಾಡಳಿತ ಸಂಸ್ಥೆಗಳ ಮಿತಿಯಲ್ಲಿರುವ ಶಾಲೆಗಳಿಂದ ಇ-ತ್ಯಾಜ್ಯವನ್ನು ಸಂಗ್ರಹಿಸಲಿದೆ. ಬಳಿಕ ಜಿಲ್ಲೆಯ ಉಳಿದ ಸ್ಥಳೀಯಾಡಳಿತದ ಸರ್ಕಾರಿ ಶಾಲೆಗಳಿಂದ ಇ-ತ್ಯಾಜ್ಯವನ್ನು ಸಂಗ್ರಹಿಸಲಾಗುತ್ತದೆ.

ಅಭಿಯಾನ ಕಾರ್ಯಕ್ರಮದಲ್ಲಿ ಕೈಟ್ ಜಿಲ್ಲಾ ಸಂಯೋಜಕಿ ರೋಜಿ ಜೋಸೆಫ್, ಸುಚಿತ್ವಾ ಮಿಷನ್ ಜಿಲ್ಲಾ ಸಂಯೋಜಕ ಪಿ. ಜಯನ್, ಸಂಯೋಜಕ ಎಚ್. ಕೃಷ್ಣನ್, ಕೈಟ್ ಮಾಸ್ಟರ್ ಟ್ರೈನರ್ ಅಬ್ದುಲ್ ಖಾದರ್, ಮತ್ತು ಕ್ಲೀನ್ ಕೇರಳ ಕಂಪನಿ ವಲಯ ಸಂಯೋಜಕ ಅಬ್ದುಲ್ ಹಕೀಮ್ ಭಾಗವಹಿಸಿದ್ದರು.