ಶಬರಿಮಲೆ ಪ್ರಾಧಿಕಾರ ರಚನೆ: ಅನ್ಯಧರ್ಮೀಯರನ್ನು ನೇಮಿಸಬಾರದು, ಅಭಿವೃದ್ಧಿಗೂ ಮುನ್ನ ದೇವರ ಇಚ್ಛೆಯನ್ನು ತಿಳಿದುಕೊಳ್ಳಬೇಕು: ವಿಎಚ್‍ಪಿ

ಕೊಚ್ಚಿ: ಶಬರಿಮಲೆಯಲ್ಲಿ ನಿರ್ಮಾಣ ಮತ್ತು ಅಭಿವೃದ್ಧಿ ಚಟುವಟಿಕೆಗಳಿಗಾಗಿ ರಚಿಸಲಾಗುತ್ತಿರುವ ಅಭಿವೃದ್ಧಿ ಪ್ರಾಧಿಕಾರದಲ್ಲಿ ಅನ್ಯಧರ್ಮೀಯರನ್ನು ನೇಮಿಸಬಾರದು ಎಂದು ವಿಶ್ವ ಹಿಂದೂ ಪರಿಷತ್ ಹೇಳಿದೆ.

ಪ್ರಾಧಿಕಾರವನ್ನು ರಚಿಸುವ ಮೊದಲು, ಹಿಂದೂ ಸಂಘಟನೆ ನಾಯಕರ ಕಳವಳಗಳನ್ನು ಗಮನಿಸಿ  ಪರಿಹರಿಸಬೇಕು. ಈ ವಿಷಯವನ್ನು ವಿವಿಧ ಸಂಸ್ಥೆಗಳೊಂದಿಗೆ ಚರ್ಚಿಸಬೇಕು. ಆಧ್ಯಾತ್ಮಿಕ ವಿಷಯಗಳಲ್ಲಿ ಆಸಕ್ತಿ ಇಲ್ಲ ಎಂಬಂತೆ ಬಹಿರಂಗವಾಗಿ ಹೇಳುವ ಮತ್ತು ವರ್ತಿಸುವ ಮುಖ್ಯಮಂತ್ರಿ ಮತ್ತು ದೇವಸ್ವಂ ಸಚಿವರ ನಿಲುವಿನ ಬಗ್ಗೆ ವಿಎಚ್‍ಪಿ ಅನುಮಾನ ವ್ಯಕ್ತಪಡಿಸುತ್ತಿದೆ. ಆದ್ದರಿಂದ, ಪ್ರಾಧಿಕಾರದಲ್ಲಿ ಹಿಂದೂ ನಾಯಕರು ಮತ್ತು ಆಧ್ಯಾತ್ಮಿಕ ಮುಖ್ಯರನ್ನು ಸೇರಿಸಿಕೊಳ್ಳುವುದು ಅತ್ಯಗತ್ಯ. ದೇವರ ಇಚ್ಛೆಯನ್ನು ಅರಿತು, ವಾಸ್ತುಶಿಲ್ಪವನ್ನು ಗಣನೆಗೆ ತೆಗೆದುಕೊಂಡು, ಪರಿಸರ ಸ್ನೇಹಿಯಾಗಿರುವ ಅಭಿವೃದ್ಧಿಯನ್ನು ಮಾತ್ರ ಶಬರಿಮಲೆಯಲ್ಲಿ ಜಾರಿಗೆ ತರಬೇಕು. ರೋಪ್‍ವೇಯಂತಹ ಸೌಲಭ್ಯಗಳ ಅನುಷ್ಠಾನಕ್ಕೆ ಸಂಬಂಧಿಸಿದಂತೆ ಭಕ್ತ ಸಮುದಾಯದ ಕಳವಳಗಳನ್ನು ಪರಿಹರಿಸಲು ಸರ್ಕಾರ ಮತ್ತು ದೇವಸ್ವಂ ಮಂಡಳಿ ಸಿದ್ಧರಾಗಿರಬೇಕು ಎಂದು ವಿಎಚ್‍ಪಿ ನಾಯಕರು ಒತ್ತಾಯಿಸಿದ್ದಾರೆ. 

ಅಧಿಕಾರದಲ್ಲಿ ಸೇರಿಸಿಕೊಳ್ಳಲು ಉದ್ದೇಶಿಸಿರುವ ರಾಜಕೀಯ ಮತ್ತು ಅಧಿಕಾರಶಾಹಿ ಪಡೆಗಳಿಗೆ ಭ್ರಷ್ಟಾಚಾರವನ್ನು ತಡೆಗಟ್ಟುವ ಮತ್ತು ಹಿಂದೂ ಆಚರಣೆಗಳಿಗೆ ಸಂಬಂಧಿಸಿದ ವಿಷಯಗಳ ಬಗ್ಗೆ ಅಭಿಪ್ರಾಯಗಳನ್ನು ವ್ಯಕ್ತಪಡಿಸುವ ಜ್ಞಾನ ಮತ್ತು ಸಾಮಥ್ರ್ಯ ಅತ್ಯಗತ್ಯ. ಇಲ್ಲದಿದ್ದರೆ, ಅದು ಭವಿಷ್ಯದಲ್ಲಿ ಬಹಳಷ್ಟು ದುಃಖ ಮತ್ತು ತೊಂದರೆಗಳನ್ನು ಸೃಷ್ಟಿಸುತ್ತದೆ ಎಂದು ವಿಎಚ್‍ಪಿ ರಾಜ್ಯ ಅಧ್ಯಕ್ಷ ವಿಜಿ ತಂಬಿ, ಹೇಳಿರುವರು.  ಕಾರ್ಯದರ್ಶಿ ಅಡ್ವ. ಅನಿಲ್ ವಿಳಾಯಿಲ್ ಕೂಡ ಇದೇ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.