ಅಂತಿಮ ಹಂತದಲ್ಲಿ ಹೆದ್ದಾರಿ ಕಾಮಗಾರಿ-ರಕ್ಷಣಾ ಗೋಡೆ ಇಲ್ಲದೆ ಅಪಘಾತ ಭೀತಿ-ಪರಿಹಾರಕ್ಕೆ ಆಗ್ರಹ

ಕುಂಬಳೆ: ರಾಷ್ಟ್ರೀಯ ಹೆದ್ದಾರಿ ತಲಪಾಡಿ-ಕಾಲಿಕ್ಕಡವಿನ ಚತುಷ್ಪಥ ಕಾಮಗಾರಿ ಇದೀಗ ಬಹುತೇಕ ಪೂರ್ಣಗೊಳ್ಳುತ್ತಿದ್ದು, ವ್ಯಾಪಕ ಅವ್ಯವಸ್ಥೆಯ ಕಾರಣ ಆತಂಕ ಮೂಡಿಸಿದೆ. ಕುಂಬಳೆ ಮತ್ತು ಶಿರಿಯಾ ಸೇತುವೆಗಳ ಬಳಿ ರಕ್ಷಣಾ ಗೋಡೆ ನಿರ್ಮಿಸದಿರುವುದು ಭಾರೀ ಅನಾಹುತಗಳಿಗೆ ದಾರಿ ಮಾಡಿಕೊಡಲಿದೆ. 

ಕುಂಬಳೆ ಕಣಿಪುರ ಶ್ರೀಗೋಪಾಲಕೃಷ್ಣ ದೇವಸ್ಥಾನದ ಬಳಿಯ ಕುಂಬಳೆ ಸೇತುವೆಯಿಂದ ಅರಿಕ್ಕಾಡಿ ತಂಙಳ್ ಮನೆ ಬಳಿಯ ಒಳಯಂ ಬಸ್ ನಿಲ್ದಾಣದವರೆಗೆ ರಕ್ಷಣಾ ಗೋಡೆ ನಿರ್ಮಿಸದೆ ರಾಷ್ಟ್ರೀಯ ಹೆದ್ದಾರಿಯನ್ನು ತೆರೆಯಲಾಗಿದೆ. ಮೊದಲ ಹಂತದ ಕೆಲಸದಲ್ಲಿ, ಎಲ್ಲೆಡೆ ರಕ್ಷಣಾತ್ಮಕ ಗೋಡೆಗಳ ನಿರ್ಮಾಣ ಪೂರ್ಣಗೊಂಡ ನಂತರವಷ್ಟೇ ರಸ್ತೆ ವಾಹನ ಸಂಚಾರಕ್ಕೆ ತೆರೆದುಕೊಡಲಾಗುತ್ತಿತ್ತು. ಆದರೆ ಇದೀಗ ಈ ಹೆಚ್ಚಿನ ಅಪಾಯದ ಪ್ರದೇಶದಲ್ಲಿ ಯಾವುದೇ ರಕ್ಷಣಾ ವ್ಯವಸ್ಥೆಗಳಿಲ್ಲದೆ ರಸ್ತೆಯನ್ನು ತೆರೆಯಲಾಗಿದೆ. ವಾಹನಗಳ ಅತಿಯಾದ ಚಲನೆಯಿಂದ ಅಪಘಾತಗಳು ಸಂಭವಿಸುತ್ತಿರುವುದು ಕಳೆದ ಕೆಲವು ವಾರಗಳಲ್ಲಿ ಸಂಭವಿಸಿರುವ ನಿರಂತರ ಅವಘಡಗಳು ತೋರಿಸುತ್ತಿವೆ. 

ರಸ್ತೆಯ ಬದಿಯಲ್ಲಿ ಟಾರ್ ಬ್ಯಾರೆಲ್‍ಗಳನ್ನು ಇರಿಸಿ ತಾತ್ಕಾಲಿಕ ಎಚ್ಚರಿಕೆ ಫಲಕ ಅಳವಡಿಸಿ ವ್ಯವಸ್ಥೆಯನ್ನು ಸ್ಥಾಪಿಸಲಾಗಿದೆ. ಅಪಘಾತ ಸಂಭವಿಸಿದಾಗ, ವಾಹನಗಳು ಸುಮಾರು ಹತ್ತು ಅಡಿಗಳಷ್ಟು ಕೆಳಗೆ ಬೀಳುತ್ತವೆ. ಕಳೆದ ವಾರ ಬಿದ್ದ ಬೇಸಿಗೆ ಮಳೆಯಿಂದಾಗಿ ರಸ್ತೆ ಬದಿಯ ಪ್ರದೇಶ ಕೆಸರುಮಯವಾಗಿ ಮತ್ತಷ್ಟು ಸಮಸ್ಯೆಗೆ ಕಾರಣವಾಯಿತು. ಇದು ರಸ್ತೆ ಸುರಕ್ಷತೆಗೆ ಅಪಾಯವನ್ನುಂಟುಮಾಡುತ್ತದೆ ಎಂಬ ಆತಂಕವೂ ಇದೆ.

ವಾಹನ ಚಾಲಕರಿಗೆ ಸುರಕ್ಷತೆ ಒದಗಿಸಲು ಈ ಪ್ರದೇಶಗಳಲ್ಲಿ ರಕ್ಷಣಾ ಗೋಡೆಗಳನ್ನು ಆದಷ್ಟು ಶೀಘ್ರ ನಿರ್ಮಿಸಬೇಕೆಂದು ಸ್ಥಳೀಯರು ಒತ್ತಾಯಿಸುತ್ತಿದ್ದಾರೆ. ರಾಷ್ಟ್ರೀಯ ಹೆದ್ದಾರಿ ಕಾಮಗಾರಿಯನ್ನು ತರಾತುರಿಯಲ್ಲಿ ಪೂರ್ಣಗೊಳಿಸುವ ಪ್ರಯತ್ನಗಳ ನಡುವೆ, ಇಂತಹ ಅವೈಜ್ಞಾನಿಕ ನಿರ್ಮಾಣಕ್ಕಾಗಿ ಗುತ್ತಿಗೆ ಕಂಪನಿ ಅಧಿಕಾರಿಗಳ ವಿರುದ್ಧ ವ್ಯಾಪಕ ಟೀಕೆಗಳು ವ್ಯಕ್ತವಾಗಿವೆ.