Fiscal Deficit: 2024-25ರಲ್ಲಿ ಶೇ. 4.8 ವಿತ್ತೀಯ ಕೊರತೆ; ಸರ್ಕಾರದ ಗುರಿ ಈಡೇರಿಕೆ

ನವದೆಹಲಿ, ಮೇ 30: ಭಾರತದ ವಿತ್ತೀಯ ಕೊರತೆ 2024-25ರಲ್ಲಿ ಜಿಡಿಪಿಯ ಶೇ. 4.8ರಷ್ಟಿದೆ. ಸರ್ಕಾರ ತನ್ನ ಪರಿಷ್ಕೃತ ಅಂದಾಜಿನಲ್ಲಿ ಇಷ್ಟೇ ಗುರಿ ನಿಗದಿ ಮಾಡಿತ್ತು. ಆ ಗುರಿ ಸರಿಯಾಗಿ ಈಡೇರಿದೆ. ಇಂದು ಶುಕ್ರವಾರ ಮಹಾಲೇಖಪಾಲರು (Comptroller General of Accounts) ಬಿಡುಗಡೆ ಮಾಡಿದ ದತ್ತಾಂಶದ ಪ್ರಕಾರ, 2024-25ರ ಹಣಕಾಸು ವರ್ಷದಲ್ಲಿ ಸರ್ಕಾರದ ವಿತ್ತೀಯ ಕೊರತೆ 15.77 ಲಕ್ಷ ಕೋಟಿ ರೂನಷ್ಟಿದೆ.

ಇದು ಜಿಡಿಪಿಯ ಶೇ. 4.8ರಷ್ಟಾಗುತ್ತದೆ.

2024-25ರಲ್ಲಿ ಸರ್ಕಾರಕ್ಕೆ ತೆರಿಗೆ ಮತ್ತು ತೆರಿಗೆಯೇತರ ಆದಾಯ ಸೇರಿ ಒಟ್ಟಾರೆ ಆದಾಯ 30.36 ಲಕ್ಷ ಕೋಟಿ ರೂ ಬಂದಿದೆ. ಬಜೆಟ್​​​ನಲ್ಲಿ ಮಾಡಲಾಗಿದ್ದ ಅಂದಾಜಿಗಿಂತ ತುಸು ಕಡಿಮೆ ತೆರಿಗೆ ಆದಾಯ ಸಿಕ್ಕಿದೆ.

ಇನ್ನು, ಆ ವರ್ಷ ಸರ್ಕಾರ ಮಾಡಿರುವ ವೆಚ್ಚ 46.56 ಲಕ್ಷ ಕೋಟಿ ರೂ. ಇದೆ. ಇದು ಸರ್ಕಾರ ಮಾಡಿದ ಅಂದಾಜಿಗೆ ಶೇ. 98.7ರಷ್ಟಾಗುತ್ತದೆ. ಒಟ್ಟಾರೆ 15.77 ಲಕ್ಷ ಕೋಟಿ ರೂ ಕೊರತೆ ಕಂಡುಬಂದಿದೆ.

ಭಾರತದಲ್ಲಿ 2024-25ರಲ್ಲಿ ನೇರ ತೆರಿಗೆ ಸಂಗ್ರಹ 27.02 ಲಕ್ಷ ಕೋಟಿ ರೂ ಇದೆ. ಹಿಂದಿನ ವರ್ಷದಕ್ಕೆ ಹೋಲಿಸಿದರೆ ಇದು ಶೇ. 15.59ರಷ್ಟು ಹೆಚ್ಚಳ ಆಗಿದೆ.

ಸರ್ಕಾರವು ಆಹಾರ, ರಸಗೊಬ್ಬರ, ಪೆಟ್ರೋಲಿಯಂ ಇತ್ಯಾದಿಯ ಸಬ್ಸಿಡಿಗಳಿಗೆ 4.14 ಲಕ್ಷ ಕೋಟಿ ರೂ ವ್ಯಯಿಸಿದೆ. ಇದು ಅಂದಾಜಿಗಿಂತ ತುಸು ಹೆಚ್ಚಿದೆ.

ಸರ್ಕಾರದ ಬಂಡವಾಳ ವೆಚ್ಚ 10.52 ಲಕ್ಷ ಕೋಟಿ ರೂನಷ್ಟಿದೆ. ಮೂಲಸೌಕರ್ಯ ಅಭಿವೃದ್ಧಿಗೆ ಇದು ಹೆಚ್ಚು ವಿನಿಯೋಗವಾಗಿದೆ. ಈ ಬಂಡವಾಳ ವೆಚ್ಚವು ನಿಗದಿತ ಗುರಿಗಿಂತ ಮೇಲೆ ಹೋಗಿದೆ.

2023-24ರಲ್ಲಿ ಆರ್​​ಬಿಐ 2.11 ಲಕ್ಷ ಕೋಟಿ ರೂ ಡಿವಿಡೆಂಡ್ ಅನ್ನು ಸರ್ಕಾರಕ್ಕೆ ನೀಡಿತ್ತು. ಸರ್ಕಾರಕ್ಕೆ ಇದು ಬಹಳ ಸಹಾಯಕವಾಗಿದೆ. ಹಾಗೆಯೇ, 2024-25ರ ವರ್ಷದಲ್ಲೂ ಆರ್​​ಬಿಐ ಬರೋಬ್ಬರಿ 2.69 ಲಕ್ಷ ಕೋಟಿ ರೂನಷ್ಟು ಡಿವಿಡೆಂಡ್ ಅನ್ನು ಸರ್ಕಾರಕ್ಕೆ ಕೊಟ್ಟಿದೆ.