ಇನ್ನು ಪಿಎಸ್‍ಸಿ ನೇಮಕಾತಿ ಶಿಫಾರಸುಗಳು ಸಂಪೂರ್ಣ ಡಿಜಿಟಲ್ ವ್ಯವಸ್ಥೆಗೆ: ಜುಲೈ 1 ರಿಂದ ಜಾರಿ: ಅಂಚೆ ಮೂಲಕ ನಿಲುಗಡೆ

ತಿರುವನಂತಪುರಂ: ಕೇರಳ ಸಾರ್ವಜನಿಕ ಸೇವಾ ಆಯೋಗ(ಪಿ.ಎಸ್.ಸಿ.)ದ ನೇಮಕಾತಿ ಶಿಫಾರಸುಗಳನ್ನು ಸಂಪೂರ್ಣವಾಗಿ ಡಿಜಿಟಲ್ ವ್ಯವಸ್ಥೆಗೆ ಪರಿವರ್ತಿಸಲಾಗುತ್ತಿದೆ.

ನೇಮಕಾತಿಗೆ ಶಿಫಾರಸು ಮಾಡಲಾದ ಅಭ್ಯರ್ಥಿಗಳು ವಿಳಂಬವಿಲ್ಲದೆ ಸಲಹಾ ಮೆಮೊವನ್ನು ಪಡೆಯುವುದನ್ನು ಖಚಿತಪಡಿಸಿಕೊಳ್ಳಲು ಮತ್ತು ಸಲಹಾ ಮೆಮೊವನ್ನು ಹೆಚ್ಚು ಸುರಕ್ಷಿತವಾಗಿಸಲು ಇದು ನೆರವಾಗಲಿದೆ. ಸೋಮವಾರ ನಡೆದ ಸಭೆಯಲ್ಲಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ.

ಜುಲೈ 1 ರಿಂದ, ಎಲ್ಲಾ ನೇಮಕಾತಿ ಶಿಫಾರಸುಗಳನ್ನು ಅಭ್ಯರ್ಥಿಗಳ ಪ್ರೊಫೈಲ್‍ನಲ್ಲಿ ಲಭ್ಯವಾಗುವಂತೆ ಮಾಡಲಾಗುತ್ತದೆ. ಕ್ಯೂಆರ್ ಕೋಡ್ ಸೇರಿಸುವ ಮೂಲಕ ಸುರಕ್ಷಿತ ನೇಮಕಾತಿ ಶಿಫಾರಸುಗಳು ಪ್ರೊಫೈಲ್‍ನಲ್ಲಿ ಲಭ್ಯವಿರುತ್ತವೆ. ಡಿಜಿಟಲ್ ವ್ಯವಸ್ಥೆಗೆ ಪರಿವರ್ತನೆಯೊಂದಿಗೆ, ಅಂಚೆ ಮೂಲಕ ಕಳುಹಿಸುವ ವಿಧಾನವನ್ನು ನಿಲ್ಲಿಸಲಾಗುತ್ತದೆ.