ಬದಲಾದ ಭಾರತದ ನಕ್ಷೆ, ಕರಾವಳಿ ಈಗ 7516 ಕಿಮೀ ಅಲ್ಲ, 11,098 ಕಿಮೀ! ಶೇ.48ರಷ್ಟು ಹೆಚ್ಚಿದ್ದು ಹೇಗೆ? ಕಾರಣ ಏನು?

ನವದೆಹಲಿ: ನಮ್ಮ ದೇಶದ ಬಗ್ಗೆ ಒಂದು ಅಚ್ಚರಿ ವಿಷಯವನ್ನು ನಾನು ನಿಮಗೆ ಈಗ ಹೇಳ್ತೀನಿ.. ಅದನ್ನು ನಂಬ್ತಿರೋ, ಬಿಡ್ತಿರೋ ನಿಮಗೆ ಬಿಟ್ಟಿದ್ದು.. ಬಟ್‌ ಇದು ಸತ್ಯ.. ಯಾವುದೇ ಯುದ್ಧವಿಲ್ಲದೇ, ಒಂದಿಂಚು ಭೂಮಿಯನ್ನು ವಶಪಡಿಸಿಕೊಳ್ಳದೆ, ನಮ್ಮ ಭಾರತದ ಗಡಿಗಳು ವಿಸ್ತಾರಗೊಂಡಿವೆ.

ನಮ್ಮ ದೇಶದ ಕರಾವಳಿ ತೀರದ ಉದ್ದವು ಈಗ ಶೇ.50ರಷ್ಟು ಹೆಚ್ಚಾಗಿದೆ. ಇದು ಹೇಗೆ ಸಾಧ್ಯ ಅಂತೀರಾ? ಇದು ಯಾವುದೋ ಮಾಯೆಯಲ್ಲ, ಮಂತ್ರವೂ ಅಲ್ಲ. ಇದು ವಿಜ್ಞಾನ ಮತ್ತು ತಂತ್ರಜ್ಞಾನದ ಕರಾಮತ್ತು. ಭಾರತದ ಹೊಸ ನಕ್ಷೆ, ಹೊಸ ದ್ವೀಪದ ಸಂಖ್ಯೆಗಳು ಇದನ್ನು ಸಾಧ್ಯವಾಗಿಸಿವೆ. ನಾವು ನೀವೆಲ್ಲಾ ಶಾಲೆಯಲ್ಲಿ ಓದುವಾಗ ಭಾರತದ ಕರಾವಳಿ ತೀರದ ಉದ್ದ 7,516 ಕಿಮೀ ಎಂದು ಓದಿರ್ತಿವಿ.. ಆದರೆ, ಈಗ ಆ ಉದ್ದ 11,098 ಕಿಮೀ ಆಗಿದೆ. ಅಂದ್ರೆ ಬರೋಬ್ಬರಿ 3,582 ಕಿಲೋ ಮೀಟರ್‌ಗಳಷ್ಟು ಹೆಚ್ಚಾಗಿದೆ ಎಂದರೇ ನೀವು ನಂಬಲೇಬೇಕು. ಅದು ಹೇಗೆ ಸಾಧ್ಯ ಆಯ್ತು.. ಈ ಸಂಖ್ಯೆಗಳ ಹಿಂದಿರುವ ರೋಚಕ ಕಥೆಯನ್ನು ನಾವು ಇವತ್ತು ನೋಡೋಣ.. ವಾಸ್ತವದಲ್ಲಿ ಗ್ರೌಂಡ್‌ನಲ್ಲಿ ನೆಲದ ಮೇಲೆ ಏನೂ ಬದಲಾಗಿಲ್ಲ. ಆದರೆ, ಈಗ ಆಗಿರುವ ಬದಲಾವಣೆ ನಮ್ಮ ದೇಶದ ಭಿವಿಷ್ಯದ ಮೇಲೆ ಭಾರೀ ಪರಿಣಾಮ ಬೀರಲಿದೆ.. ಬನ್ನಿ ಅದೇನು ಅಂತಾ ನೋಡೋಣ..

ಹೌದು, ಭಾರತದ ಕರಾವಳಿ ತೀರ ಎಷ್ಟಿದೆ ಅಂದ್ರೇ, ನಮಗೆ ಶಾಲೆಯಲ್ಲಿ ಕಲಿಸಿದ್ದು, 7,516 ಕಿಲೋ ಮೀಟರ್‌ ಅಂತಾ.. ನಾವು ಕೂಡ ಅದನ್ನು ಈಗಲೂ ಹೇಳ್ತಿದೀವಿ.. ಎಲ್ಲ ಕಡೆನೂ ಬಳಸ್ತಿದೀವಿ.. ಆದರೆ, ಇದು 1970ರ ದಶಕದಲ್ಲಿನ ಮಾಹಿತಿ ಅವತ್ತು ಅಳೆದಾಗ ದೇಶದ ಕರಾವಳಿ 7,516 ಕಿಮೀ ಇತ್ತು. ಆದರೆ, ಇತ್ತೀಚೆಗೆ ನಡೆಸಿದ ಅತ್ಯಾಧುನಿಕ ಮಾಪನದ ಪ್ರಕಾರ, ನಮ್ಮ ಕರಾವಳಿ ತೀರದ ಉದ್ದ ಈಗ 11,098 ಕಿಲೋ ಮೀಟರ್‌ ಆಗಿದೆ. ಅಂದರೆ, ಬರೋಬ್ಬರಿ 3,582 ಕಿಲೋ ಮೀಟರ್‌ಗಳಷ್ಟು ಕರಾವಳಿ ಹೆಚ್ಚಾಗಿದೆ. ಮೊದಲಿಗಿಂತ ಸುಮಾರು ಶೇ.48ರಷ್ಟು ಜಾಸ್ತಿಯಾಗಿದೆ. ಈ ಹಿಂದೆ ಕರ್ನಾಟಕದ ಕರಾವಳಿ 320 ಕಿಲೋ ಮೀಟರ್‌ ಇತ್ತು. ಈಗ ಅದು 343 ಕಿಲೋ ಮೀಟರ್‌ಗೆ ಏರಿಕೆಯಾಗಿದೆ. ಅದೇ ರೀತಿ ಬಹುತೇಕ ಎಲ್ಲ ರಾಜ್ಯಗಳು, ಕೇಂದ್ರಾಡಳಿತ ಪ್ರದೇಶಗಳ ಕರಾವಳಿಯ ಉದ್ದ ಹೆಚ್ಚಳವಾಗಿದೆ.

ಭಾರತದ ಕರಾವಳಿ ಉದ್ದ ಹೆಚ್ಚಾಗಲು ಕಾರಣ ಏನು?

• ಭಾರತದ ಕರಾವಳಿ ಉದ್ದ ಹೆಚ್ಚಾಗಿ, ಈ ದೊಡ್ಡ ವ್ಯತ್ಯಾಸಕ್ಕೆ ಮುಖ್ಯ ಕಾರಣ ಏನೆಂದರೆ ಮಾಪನಕ್ಕೆ ಬಳಸಿದ ಡೇಟಾದ ಸ್ಕೇಲ್ ಅಥವಾ ನಿಖರತೆ.
• ಈ ಹಿಂದೆ 1 ಅನುಪಾತ 45,00,000 ಲಕ್ಷ.. ಅಂದ್ರೇ ಒಂದಕ್ಕೆ ನಲವತ್ತೈದು ಲಕ್ಷ ಸ್ಕೇಲ್‌ನ ಡೇಟಾವನ್ನು ಬಳಸಿ ಮಾಡಲಾಗಿತ್ತು. ಇದು ಕಡಿಮೆ ರೆಸಲ್ಯೂಷನ್‌ ಅನ್ನು ಹೊಂದಿತ್ತು.
• ಆದರೆ, ಕಾಲ ಬದಲಾದಂತೆ, ತಂತ್ರಜ್ಞಾನ ಮುಂದುವರೆದಂತೆ, ಅತ್ಯುತ್ತಮ ರೆಸಲ್ಯೂಶನ್ ಡೇಟಾ ಲಭ್ಯವಾಗಿದೆ. ಇತ್ತೀಚಿನ ಮಾಪನವನ್ನು 1 ಅನುಪಾತ 2,50,000 ಸ್ಕೇಲ್‌ನ ಡೇಟಾ ಬಳಸಿ ಮಾಡಲಾಗಿದೆ.
• ಇದನ್ನು ಸುಲಭವಾಗಿ ಅರ್ಥಮಾಡಿಕೊಳ್ಳೋಣ.. ಕರಾವಳಿ ತೀರಗಳು ನೇರವಾಗಿ ರೇಖೆಗಳ ರೀತಿ ಇರಲ್ಲ. ಅವು ಅಸಂಖ್ಯಾತ ತಿರುವುಗಳಿಂದ, ಅಂಕುಡೊಂಕುಗಳಿಂದ ಕೂಡಿರುತ್ತವೆ.
• ನಾವು ಬಳಸುವ ಅಳತೆಗೋಲು ಅಥವಾ ಸ್ಕೇಲ್‌ ಚಿಕ್ಕದಾದಷ್ಟು, ಅಳತೆ ನಿಖರವಾಗುತ್ತದೆ ಮತ್ತು ಉದ್ದ ಹೆಚ್ಚಾಗುತ್ತದೆ. ಉದಾಹರಣೆಗೆ, ಒಂದು ಕಿಲೋ ಮೀಟರ್ ಉದ್ದದ ಅಳತೆಗೋಲು ಬಳಸಿ ಅಳೆದರೆ, ಅದು ನೂರಾರು ಮೀಟರ್‌ಗಳ ಸಣ್ಣಪುಟ್ಟ ತಿರುವುಗಳನ್ನು ಕಡೆಗಣಿಸಿ, ನೇರ ರೇಖೆಯಂತೆ ತೋರಿಸುತ್ತದೆ.
• ಆದರೆ, ಒಂದು ಮೀಟರ್ ಅಳತೆಗೋಲನ್ನು ಬಳಸಿದರೆ, ಆ ಎಲ್ಲಾ ಸಣ್ಣಪುಟ್ಟ ತಿರುವುಗಳೂ ಲೆಕ್ಕಕ್ಕೆ ಬರುತ್ತವೆ. ಆಗ ಉದ್ದ ಸಹಜವಾಗಿಯೇ ಹೆಚ್ಚಾಗುತ್ತದೆ. ಹಿಂದೆ, ಕಡಿಮೆ ರೆಸಲ್ಯೂಶನ್ ಡೇಟಾದಲ್ಲಿ ಈ ತಿರುವುಗಳೆಲ್ಲಾ ಮಸುಕಾಗಿ, ನೇರ ರೇಖೆಗಳಂತೆ ಕಾಣುತ್ತಿದ್ದವು. ಇದರಿಂದ ಉದ್ದ ಕಡಿಮೆಯಾಗಿತ್ತು. ಈಗಿನ ಹೈ-ರೆಸಲ್ಯೂಶನ್ ಡೇಟಾವು ಕರಾವಳಿಯ ಪ್ರತಿಯೊಂದು ಸಣ್ಣ ತಿರುವನ್ನು ಕೂಡ ದಾಖಲಿಸುತ್ತದೆ.
• ಅದಲ್ಲದೆ, ಹಿಂದಿನ ಲೆಕ್ಕಾಚಾರಗಳು ಸಾಂಪ್ರದಾಯಿಕ ಮತ್ತು ಮಾನವಚಾಲಿತವಾಗಿದ್ದವು. ಈಗ, ಆಧುನಿಕ GIS ಅಂದ್ರೇ ಜಿಯೋಗ್ರಾಫಿಕ್‌ ಇನ್ಫರ್ಮೇಷನ್‌ ಸಿಸ್ಟಮ್‌ ಸಾಫ್ಟವೇರ್‌ ಬಳಸಿ ಈ ಪ್ರಕ್ರಿಯೆಯನ್ನು ನಡೆಸಲಾಗಿದೆ. ಇದು ಭೂಮಿಯ ಅನಿಯಮಿತ ರಚನೆಗಳನ್ನು ಹೆಚ್ಚು ಹೆಚ್ಚು ನಿಖರವಾಗಿ ಸೆರೆಹಿಡಿಯುಯತ್ತದೆ.
• ಇದರ ಜೊತೆ ಉದ್ದ ಹೆಚ್ಚಾಗಲು ಮತ್ತೊಂದು ಪ್ರಮುಖ ಕಾರಣ ಏನೆಂದರೆ, 1970ರಲ್ಲಿ ಅಳತೆ ಮಾಡುವಾಗ ಹಲವು ಕಡಲಾಚೆಯ ದ್ವೀಪಗಳ ಕರಾವಳಿ ತೀರವನ್ನು ಸೇರಿಸಿದ್ದಿಲ್ಲ.
• ಹಿಂದಿನ ಕಡಿಮೆ ಸ್ಕೇಲ್ ಡೇಟಾದಲ್ಲಿ ಈ ದ್ವೀಪಗಳು ಕಾಣಿಸುತ್ತಿರಲಿಲ್ಲ ಅಥವಾ ಮಾನವಚಾಲಿತ ಮಾಪನದ ಮಿತಿಗಳಿಂದ ಅವುಗಳನ್ನು ಕೈಬಿಡಲಾಗಿತ್ತು. ಈಗ ಅವುಗಳನ್ನೆಲ್ಲಾ ಅಳತೆ ಮಾಡುವಾಗ ಸೇರಿಸಲಾಗಿದ್ದು, ಭಾರತದ ಕರಾವಳಿಯ ಉದ್ಧ ಸಹಜವಾಗಿಯೇ ಹೆಚ್ಚಾಗಿದೆ. ಅದಲ್ಲದೇ ಕರಾವಳಿಯ ಉದ್ದವನ್ನು 'ಹೈ-ವಾಟರ್ ಲೈನ್' ಆಧಾರದ ಮೇಲೆ ಅಳೆಯಲಾಗಿದೆ.

ಯಾವ ರಾಜ್ಯದ ಕರಾವಳಿ ಹೇಗಿದೆ?

ಕ್ರ.ಸಂ.	ರಾಜ್ಯ/ಕೇಂದ್ರಾಡಳಿತ ಪ್ರದೇಶ	ಕರಾವಳಿಯ ಉದ್ದ (ಕಿ.ಮೀ. ಗಳಲ್ಲಿ)
1.	ಗುಜರಾತ್	2,340.62
2.	ಮಹಾರಾಷ್ಟ್ರ	877.97
3.	ಗೋವಾ	193.95
4.	ಕರ್ನಾಟಕ	343.30
5.	ಕೇರಳ	600.15
6.	ತಮಿಳುನಾಡು	1,068.69
7.	ಆಂಧ್ರಪ್ರದೇಶ	1,053.07
8.	ಒಡಿಶಾ	574.71
9.	ಪಶ್ಚಿಮ ಬಂಗಾಳ	721.02
10.	ದಮನ್ ಮತ್ತು ದಿಯು	54.38
11.	ಪಾಂಡಿಚೇರಿ	42.65
12.	ಲಕ್ಷದ್ವೀಪ ದ್ವೀಪಗಳು	144.80
13.	ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳು	3,083.50
	ಒಟ್ಟು ಉದ್ದ	11,098.81

ಇನ್ನು, ರಾಜ್ಯ ಮತ್ತು ಕೇಂದ್ರಾಡಳಿತ ಪ್ರದೇಶಗಳ ಕರಾವಳಿಯ ಉದ್ದ ನೋಡಿದರೆ. ಗುಜರಾತ್ 2,340.62 ಕಿ.ಮೀ., ಮಹಾರಾಷ್ಟ್ರ 877.97 ಕಿ.ಮೀ., ಗೋವಾ 193.95 ಕಿ.ಮೀ., ಕರ್ನಾಟಕ 343.30 ಕಿ.ಮೀ., ಕೇರಳ 600.15 ಕಿ.ಮೀ., ತಮಿಳುನಾಡು 1,068.69 ಕಿ.ಮೀ., ಆಂಧ್ರಪ್ರದೇಶ 1,053.07 ಕಿ.ಮೀ., ಒಡಿಶಾ 574.71 ಕಿ.ಮೀ., ಪಶ್ಚಿಮ ಬಂಗಾಳ 721.02 ಕಿ.ಮೀ., ದಮನ್ ಮತ್ತು ದಿಯು 54.38 ಕಿ.ಮೀ., ಪಾಂಡಿಚೇರಿ 42.65 ಕಿ.ಮೀ., ಲಕ್ಷದ್ವೀಪ ದ್ವೀಪಗಳು 144.80 ಕಿ.ಮೀ., ಮತ್ತು ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳು 3,083.50 ಕಿ.ಮೀ. ಆಗಿದೆ. ರಾಜ್ಯದಲ್ಲಿ ಗುಜರಾತ್‌, ಕೇಂದ್ರಾಡಳಿತ ದ್ವೀಪದಲ್ಲಿ ಅಂಡಮಾನ್‌ ಮತ್ತು ನಿಕೋಬಾರ್‌ನ ಕರಾವಳಿಯ ಉದ್ದ ಹೆಚ್ಚಿದೆ. ಈ ಎಲ್ಲವನ್ನು ಸೇರಿ, ಭಾರತದ ಕರಾವಳಿಯ ಒಟ್ಟು ಉದ್ದ ಪ್ರಸ್ತುತ 11,098.81 ಕಿ.ಮೀ. ಆಗಿದೆ.

ಕರಾವಳಿಯ ನಿಜವಾದ ಉದ್ದ ಅಳೆಯಲು ಆಗಲ್ಲ!

ಆದರೆ, ಭಾರತದ ಕರಾವಳಿಯ ಹೊಸ ಉದ್ದವು ಹೆಚ್ಚು ನಿಖರವಾಗಿದ್ದರೂ ಇದುವೇ ಕರಾವಳಿಯ ಅಂತಿಮ ಅಥವಾ ನಿಜವಾದ ಉದ್ದವಲ್ಲ. ವಾಸ್ತವವಾಗಿ, ಯಾವುದೇ ದೇಶದ ಕರಾವಳಿಯ ನಿಜವಾದ ಉದ್ದವನ್ನು ಅಳೆಯಲು ಸಾಧ್ಯವೇ ಇಲ್ಲ ಎನ್ನಲಾಗುತ್ತದೆ. ಇದನ್ನೇ ಕರಾವಳಿಯ ವಿರೋಧಾಭಾಸ ಅಥವಾ ಕೋಸ್ಟ್‌ಲೈನ್‌ ಪ್ಯಾರಾಡಾಕ್ಸ್‌ ಎಂದು ಕರೆಯಲಾಗುತ್ತದೆ. ಕರಾವಳಿಯಂತಹ ಅತ್ಯಂತ ಅನಿಯಮಿತ ರಚನೆಗಳಿಗೆ ಒಂದು ನಿರ್ದಿಷ್ಟವಾದ, ಅಂತಿಮವಾದ ಉದ್ದ ಎಂಬುದೇ ಇರುವುದಿಲ್ಲ. ಅವುಗಳ ಉದ್ದವು ನಾವು ಯಾವ ಸ್ಕೇಲ್ ಅಥವಾ ರೆಸಲ್ಯೂಶನ್‌ನಲ್ಲಿ ಅಳೆಯುತ್ತಿದ್ದೇವೆ ಎಂಬುದರ ಮೇಲೆ ಅವಲಂಬಿತವಾಗಿರುತ್ತದೆ. ನಾವು ಇನ್ನಷ್ಟು ಸೂಕ್ಷ್ಮವಾಗಿ, ಇನ್ನಷ್ಟು ವಿವರವಾಗಿ ಅಳೆದಷ್ಟೂ, ಅದರ ಉದ್ದ ಹೆಚ್ಚುತ್ತಲೇ ಹೋಗುತ್ತದೆ. ಈ ವಿರೋಧಾಭಾಸವು ನದಿಗಳು ಮತ್ತು ಪರ್ವತ ಶ್ರೇಣಿಗಳಂತಹ ಇತರ ನೈಸರ್ಗಿಕ ರಚನೆಗಳಿಗೂ ಅನ್ವಯಿಸುತ್ತದೆ. ನದಿಯ ದಡಗಳು ನೇರವಾಗಿ ಇರಲ್ಲ.. ಅವುಗಳ ಉದ್ದವನ್ನು ಅಳೆಯಲು ಹೊರಟರೆ ಇದೇ ಸಮಸ್ಯೆ ಎದುರಾಗುತ್ತದೆ. ಅದಕ್ಕಾಗಿಯೇ, ನದಿಗಳ ಉದ್ದವನ್ನು ಸಾಮಾನ್ಯವಾಗಿ ದಡಗಳ ಬದಲು, ಅದರ ಮುಖ್ಯ ಪ್ರವಾಹದ ಹರಿವಿನ ಹಾದಿಯಲ್ಲಿ ಅಳೆಯಲಾಗುತ್ತದೆ.

ಹಾಗಾಗಿ, ಭಾರತದ ಕರಾವಳಿ ತೀರದ ಉದ್ದ ಬದಲಾಗಿರುವುದರಲ್ಲಿ ಆಶ್ಚರ್ಯವೇನಿಲ್ಲ. ತಂತ್ರಜ್ಞಾನ ಮುಂದುವರೆದಂತೆ, ನಿಖರತೆ ಹೆಚ್ಚಾಗುತ್ತದೆ. ಇದರಿಂದ ಕರಾವಳಿ ತೀರದ ಉದ್ದವು ಭವಿಷ್ಯದಲ್ಲಿ ಮತ್ತೆ ಬದಲಾಗಬಹುದು. ಇದೇ ಕಾರಣಕ್ಕೆ, ಇನ್ನು ಮುಂದೆ ಪ್ರತಿ ಹತ್ತು ವರ್ಷಗಳಿಗೊಮ್ಮೆ ಈ ಮಾಪನವನ್ನು ನಡೆಸಲು ಕೇಂದ್ರ ಸರ್ಕಾರ ಮುಂದಾಗಿದೆ. ಅದಲ್ಲದೇ ಕಡಲ್ಗೊರೆತ ಮತ್ತು ಭೂಸ್ವಾಧೀನದಿಂದಲೂ ಕೂಡ ಕರಾವಳಿ ತೀರ ಬದಲಾಗುತ್ತಿದೆ. ಈ ಹಿನ್ನೆಲೆ ಕಾಲ ಕಾಲಕ್ಕೆ ಕರಾವಳಿ ತೀರದ ಮರು-ಅಳತೆ ಅಗತ್ಯವಾಗುತ್ತದೆ. ಇದನ್ನು ಇತರೆ ದೇಶಗಳು ಕೂಡ ಕಾಲ ಕಾಲಕ್ಕೆ ಮಾಡುತ್ತಿವೆ.

ಭಾರತದಲ್ಲಿ ಎಷ್ಟು ಕಡಲಾಚೆ ದ್ವೀಪ ಇವೆ ಗೊತ್ತಾ?

ಇದು ಒಂದು ಕಡೆ ಆಯ್ತು.. ದೇಶಕ್ಕೆ ಹೊಂದಿಕೊಂಡಂತೆ ಕರಾವಳಿ ತೀರದಲ್ಲಿ ಅಳತೆ ಸಮಸ್ಯೆಯಿತ್ತು. ಆದರೆ, ದ್ವೀಪಗಳಲ್ಲಿ ಬೇರೆಯದ್ದೇ ರೀತಿಯ ಗೊಂದಲಗಳಿವೆ. ಉದಾಹರಣೆಗೆ, ಒಂದು ನಿರ್ದಿಷ್ಟ ಸ್ಥಳವು ಒಂದೊಂದು ಸಲ ದ್ವೀಪವಾಗಿರುತ್ತದೆ.. ಕೆಲವೊಂದು ಸಲ ಭೂಮಿಗೆ ಸೇರಿಕೊಂಡಿರುತ್ತದೆ. ಇದನ್ನು ಕರಾವಳಿಯೆಂದು ಗುರುತಿಸುವುದೇ ಕಷ್ಟ ದ ಕೆಲಸ. 2016ರಲ್ಲಿ, ಭಾರತದ ಸರ್ವೇಯರ್ ಜನರಲ್ ಕಚೇರಿ ನಡೆಸಿದ ಸಮೀಕ್ಷೆಯು ದೇಶದಲ್ಲಿ 1,382 ಕಡಲಾಚೆಯ ದ್ವೀಪಗಳಿವೆ ಎಂದು ಪಟ್ಟಿ ಮಾಡಿತ್ತು. ಆದರೆ, ರಾಜ್ಯ ಸರ್ಕಾರಗಳು, ಕೋಸ್ಟ್ ಗಾರ್ಡ್ ಮತ್ತು ಭಾರತೀಯ ನೌಕಾಪಡೆಯಂತಹ ಇತರ ಸಂಸ್ಥೆಗಳು 1,334 ದ್ವೀಪಗಳಿವೆ ಎಂದು ಹೇಳಿತ್ತು. ಇದರಿಂದ ಗೊಂದಲ ಸೃಷ್ಟಿಯಾಗಿತ್ತು. ಅದನ್ನು ನಿವಾರಿಸಲು ಡೇಟಾವನ್ನು ಸಮನ್ವಯಗೊಳಿಸಲಾಯಿತು. ದ್ವೀಪಗಳ ವ್ಯಾಖ್ಯಾನಗಳನ್ನು ಸ್ಪಷ್ಟಪಡಿಸಿ, ವರ್ಗೀಕರಣವನ್ನು ಪ್ರಮಾಣೀಕರಿಸಿ, ದೇಶದಲ್ಲಿನ ಕಡಲಾಚೆಯ ದ್ವೀಪಗಳ ಹೊಸ ಸಂಖ್ಯೆಯನ್ನು 1,298 ಎಂದು ಅಂತಿಮಗೊಳಿಸಲಾಯಿತು. ಇದಲ್ಲದೆ, ಈ ಸಮೀಕ್ಷೆಯು 91 ಒಳನಾಡಿನ ದ್ವೀಪಗಳನ್ನು ಸಹ ಪಟ್ಟಿ ಮಾಡಿದೆ. ಹೀಗಾಗಿ, ಭಾರತದಲ್ಲಿನ ಒಟ್ಟು ದ್ವೀಪಗಳ ಸಂಖ್ಯೆ ಈಗ 1,389 ಆಗಿದೆ. ಅಸ್ಸಾಂ ಮತ್ತು ಪಶ್ಚಿಮ ಬಂಗಾಳದಂತಹ ರಾಜ್ಯಗಳಲ್ಲಿರುವ ಅಸಂಖ್ಯಾತ ನದಿ ದ್ವೀಪಗಳನ್ನು ಈ ಲೆಕ್ಕಕ್ಕೆ ಸೇರಿಸಿಲ್ಲ.

ಹೊಸ ಕರಾವಳಿ ಉದ್ದದಿಂದ ಏನೆಲ್ಲಾ ಆಗುತ್ತೆ?

ಇದೆಲ್ಲಾ ಆಯ್ತು… ಭೂಮಿ ಏನು ಜಾಸ್ತಿ ಬಂದಿಲ್ಲವಲ್ಲ.. ಈ ಹೊಸ ಸಂಖ್ಯೆಗಳಿಂದ ಏನು ಪ್ರಯೋಜನ ಎಂದು ನೀವು ಕೇಳಬಹುದು. ಇದು ಕೇವಲ ಪುಸ್ತಕದಲ್ಲಿ ಬದಲಾಗುವ ಅಂಕಿ-ಸಂಖ್ಯೆಯಲ್ಲ.. ಇದು ನಮ್ಮ ದೇಶದ ಭೂಪ್ರದೇಶ ಮತ್ತು ಭೂ ರಚನೆಯ ಬಗ್ಗೆ ನಮಗಿರುವ ತಿಳುವಳಿಕೆಯನ್ನು ಮತ್ತಷ್ಟು ಆಳವಾಗಿಸುತ್ತದೆ. ಅದರ ಜೊತೆ ಈ ಹೊಸ, ನಿಖರವಾದ ಸಂಖ್ಯೆಗಳು ಆಡಳಿತಾತ್ಮಕ, ಅಭಿವೃದ್ಧಿ ಮತ್ತು ಮುಖ್ಯವಾಗಿ ನಮ್ಮ ದೇಶದ ಭದ್ರತೆಯ ದೃಷ್ಟಿಯಿಂದ ಮಹತ್ವದ ಪಾತ್ರವನ್ನು ವಹಿಸುತ್ತವೆ. ಉದಾಹರಣೆಗೆ ಹೊಸ ಕರಾವಳಿ ತೀರದ ಅಳತೆಯು ಕರಾವಳಿ ವಲಯ ನಿಯಮಗಳ ವ್ಯಾಪ್ತಿಯ ಮೇಲೆ ಪರಿಣಾಮ ಬೀರುತ್ತದೆ. ಇದರ ಜೊತೆಗೆ ಕರಾವಳಿ ಸವೆತವನ್ನು ತಡೆಯುವ ಮತ್ತು ಹವಾಮಾನ ಬದಲಾವಣೆಯ ಅಪಾಯಗಳಿಂದ ನಮ್ಮ ಕರಾವಳಿಯನ್ನು ರಕ್ಷಿಸುವ ಯೋಜನೆಗಳನ್ನು ಮತ್ತಷ್ಟು ಪರಿಣಾಮಕರಿಯಾಗಿ ರೂಪಿಸಲು ಇದು ಸಹಾಯ ಮಾಡುತ್ತದೆ. ಅದರ ಜೊತೆ ಪ್ರವಾಸೋದ್ಯಮ ಮತ್ತು ಮೂಲಸೌಕರ್ಯ ಅಭಿವೃದ್ಧಿ ಯೋಜನೆಗಳಿಗೂ ಇದು ಹೊಸ ದಿಕ್ಕು ತೋರಿಸಲಿದೆ ಎನ್ನಲಾಗುತ್ತಿದೆ.

ಒಟ್ಟಿನಲ್ಲಿ, ಈ ಹೊಸ ಸಂಖ್ಯೆಗಳು ಕೇವಲ ಅಂಕಿ-ಅಂಶಗಳಲ್ಲ. ಇದು ತಂತ್ರಜ್ಞಾನದ ಮೂಲಕ ನಮ್ಮನ್ನೇ ನಾವು ಚೆನ್ನಾಗಿ ಅರಿತುಕೊಳ್ಳುತ್ತಿರುವ ಪರಿ.. ಈ ಹೊಸ ಜ್ಞಾನ, ನಮ್ಮ ದೇಶವನ್ನು ಮತ್ತಷ್ಟು ಸದೃಢವಾಗಿ, ಸುರಕ್ಷಿತವಾಗಿ ಮತ್ತು ಸಮೃದ್ಧವಾಗಿ ರೂಪಿಸಲು ಒಂದು ಸ್ಪಷ್ಟ ಬುನಾದಿಯಾಗಿದೆ. ಇದು ಕೇವಲ ಬದಲಾದ ಸಂಖ್ಯೆಯಲ್ಲ, ಬದಲಾಗುತ್ತಿರುವ ಭಾರತದ ಶಕ್ತಿಯ ಸಂಕೇತ. ಈಗ ಭಾರತದ ಕರಾವಳಿ 7,516 ಕಿಲೋ ಮೀಟರ್‌ ಅಲ್ಲ.. 11,098 ಕಿಲೋ ಮೀಟರ್‌ ಎಂಬುದನ್ನು ನೆನಪಲ್ಲಿಟ್ಟುಕೊಳ್ಳಿ..