ಭಾರತದ ಪರ ಬೇಹುಗಾರಿಕೆ ಆರೋಪ; ಪಾಕಿಸ್ತಾನದಲ್ಲಿ ನಾಲ್ವರ ಬಂಧನ

ಕರಾಚಿ: ಭಾರತದ ಪರ ಬೇಹುಗಾರಿಕೆ ಚಟುವಟಿಕೆಯಲ್ಲಿ ಭಾಗಿಯಾಗಿದ್ದ ಆರೋಪದಡಿ ಕರಾಚಿಯಲ್ಲಿ ನಾಲ್ವರನ್ನು ಬಂಧಿಸಲಾಗಿದೆ ಎಂದು ಪಾಕಿಸ್ತಾನದ ಸಿಂಧ್‌ ಪೊಲೀಸರು ಗುರುವಾರ ತಿಳಿಸಿದ್ದಾರೆ.

ಶಂಕಿತರನ್ನು ಖೈದಾಬಾದ್ ಪ್ರದೇಶದಲ್ಲಿ ಬಂಧಿಸಲಾಗಿದೆ. ಆರೋಪಿಗಳು ದೇಶಕ್ಕೆ ಸಂಬಂಧಿಸಿದ ಸೂಕ್ಷ್ಮ ಮಾಹಿತಿಗಳ ವಿಡಿಯೊ ಮತ್ತು ಫೋಟೊಗಳನ್ನು ಸೆರೆಹಿಡಿದಿದ್ದರು.

ಅವರ ಮೊಬೈಲ್‌ ಫೋನ್‌ಗಳನ್ನು ವಶಕ್ಕೆ ಪಡೆದು, ವಿಧಿವಿಜ್ಞಾನ ಪರೀಕ್ಷೆಗೆ ಕಳುಹಿಸಲಾಗಿದೆ ಎಂದು ಹಿರಿಯ ಪೊಲೀಸ್ ವರಿಷ್ಠಾಧಿಕಾರಿ ಶೊಯೆಬ್ ಮಹ್ಮೂದ್ ಮೆಮನ್ ತಿಳಿಸಿದ್ದಾರೆ.

'ಶಂಕಿತರಿಂದ ಗ್ರೆನೇಡ್‌ಗಳು, ಒಂದು ಕಲಾಶ್ನಿಕೋವ್ ಬಂದೂಕು, ಒಂದು ರೈಫಲ್‌ ಮತ್ತು ಎರಡು ಪಿಸ್ತೂಲ್‌ ಮತ್ತು ಮೊಬೈಲ್‌ ಫೋನ್‌ಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಶಂಕಿತರು ಭಾರತೀಯ ಗುಪ್ತಚರ ಇಲಾಖೆಯ ಪರ ಕೆಲಸ ಮಾಡುತ್ತಿದ್ದರು' ಎಂದು ತಿಳಿಸಿದ್ದು, ಅದಕ್ಕೆ ಪೂರಕವಾದ ಯಾವುದೇ ಸಾಕ್ಷ್ಯವನ್ನು ಒದಗಿಸಿಲ್ಲ.