ಕಿಸಾನ್ ಸೇನೆ ಪುತ್ತಿಗೆ ಪಂಚಾಯತಿ ಸಮಿತಿ ಸಭೆ-ಪ್ರತಿಭಟನೆಗೆ ನಿರ್ಧಾರ

ಕುಂಬಳೆ: ಪುತ್ತಿಗೆ ಕೃಷಿ ಭವನ ತನ್ನ ವ್ಯಾಪ್ತಿಯ 200 ಕ್ಕೂ ಹೆಚ್ಚು ರೈತರ ಉಚಿತ ವಿದ್ಯುತ್ ಮೋಟಾರ್ ಮೊತ್ತ ಕೃಷಿ ಭವನ ಪಾವತಿಸದ ಕಾರಣ ವಿದ್ಯುತ್ ಬಿಲ್ ದೀರ್ಘಾವಧಿಯ ಬಾಕಿಯಾಗಿದೆ. ಮೂವತ್ತು ಸಾವಿರದಿಂದ ಎಪ್ಪತ್ತು ಸಾವಿರ ರೂ.ಗಳಿಗಿಂತ ಹೆಚ್ಚಿನ ಬಿಲ್ ಪಾವತಿಸದವರ ವಿದ್ಯುತ್ ಸಂಪರ್ಕ ಕಡಿತಗೊಳಿಸಲಾಗುವುದು ಎಂದು ಕೆಎಸ್‍ಇಬಿ ರೈತರಿಗೆ ಬೆದರಿಕೆ ಹಾಕುತ್ತಿದೆ. ಇದು ದೊಡ್ಡ ಮೊತ್ತವಾಗಿರುವುದರಿಂದ, ರೈತರು ಬಿಕ್ಕಟ್ಟಿನಲ್ಲಿದ್ದಾರೆ. ದುಬಾರಿ ಮೊತ್ತ ಏಕಾಏಕಿ ಪಾವತಿಸದ ಸ್ಥಿತಿಯಲ್ಲಿದ್ದಾರೆ. ವಿಶೇಷವಾಗಿ ಅಡಕೆ  ಬೆಳೆಯನ್ನು ಬಾಧಿಸಿರುವ ಅಪರಿಚಿತ ರೋಗದಿಂದಾಗಿ ರೈತರು ಜೀವನ ನಿರ್ವಹಣೆಗೆ ಕಷ್ಟಪಡುತ್ತಿದ್ದಾರೆ.

ಆದ್ದರಿಂದ, ರೈತರ ಸಂಪೂರ್ಣ ಬಾಕಿ ಹಣವನ್ನು ಕೃಷಿ ಭವನವೇ ಪಾವತಿಸಬೇಕು ಮತ್ತು ವಿನಾಯಿತಿ ಪಡೆದ ರೈತರ ಬಿಲ್‍ಗಳನ್ನು ಕೃಷಿ ಭವನವೇ ಪಾವತಿಸುವುದನ್ನು ಮುಂದುವರಿಸಬೇಕು. ಹಣವನ್ನು ಪಾವತಿಸಿದವರಿಗೆ ಹಿಂತಿರುಗಿಸಬೇಕು ಮತ್ತು ಪಂಚಾಯತ್‍ನ ಸ್ವಂತ ಹಣವನ್ನು ಬಳಸಿಕೊಂಡು ಅಜ್ಞಾತ ರೋಗದಿಂದ ನಾಶವಾಗುತ್ತಿರುವ ಅಡಕೆ ಬೆಳೆಗೆ ಉಚಿತವಾಗಿ ಔಷಧ ಸಿಂಪಡಿಸಬೇಕೆಂದು ಪುತ್ತಿಗೆ ಪಂಚಾಯತಿ ಕಿಸಾನ್ ಸೇನೆಯು ಶುಕ್ರವಾರ ನಡೆಸಿದ ಸಭೆಯಲ್ಲಿ ಒತ್ತಾಯಿಸಿತು. ಈ ನಿಟ್ಟಿನಲ್ಲಿ ಜು. 9 ರಂದು ಬೆಳಿಗ್ಗೆ 10.30 ಕ್ಕೆ ಪುತ್ತಿಗೆ ಕೃಷಿ ಭವನಕ್ಕೆ ಮೆರವಣಿಗೆ ನಡೆಸಿ ಪ್ರತಿಭಟಿಸಲು ತೀರ್ಮಾನಿಸಲಾಯಿತು. ರೈತರ ಮೇಲಿನ ಅನ್ಯಾಯದ ವಿರುದ್ಧ ಹೋರಾಟದಲ್ಲಿ ಎಲ್ಲಾ ರೈತರನ್ನು ತೊಡಗಿಸಿಕೊಳ್ಳಲು ಮತ್ತು ಅದನ್ನು ಯಶಸ್ವಿಗೊಳಿಸಲು ನಿರ್ಧರಿಸಲಾಯಿತು.

ಕಿಸಾನ್ ಸೇನೆಯ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಶುಕ್ಕೂರ್ ಕಾನಾಜೆ ಸಭೆ ಉದ್ಘಾಟಿಸಿದರು. ಬಾಲಸುಬ್ರಹ್ಮ ಭಟ್ ಚೆಕ್ಕಿಣಿಕೆ ಸಭೆಯ ಅಧ್ಯಕ್ಷತೆ ವಹಿಸಿದ್ದರು. ಮುಹಮ್ಮದ್ ಹಾಜಿ ಕಂಡತ್ತಿಲ್, ಪ್ರಸಾದ್ ಕನಕಪಾಡಿ, ಡಾ. ರಾಜಶೇಖರ್, ಗಣಪತಿ ಭಟ್ ಅಡ್ಕತ್ತೊಟ್ಟಿ, ಎಂ. ಇಸ್ಮಾಯಿಲ್ ಹಾಜಿ, ಸುರೇಶ್ ರೈ ಗುತ್ತು, ಶ್ಯಾಮ್ ಭಟ್, ಅಬ್ದುಲ್ಲ ಕಂಡತ್ತಿಲ್, ನಾರಾಯಣ ಭಟ್ ಕೋಡಿಮೂಲೆ ಮತ್ತು ಅಲಿ ಕಾನಾಜೆ ಮಾತನಾಡಿದರು. ಸುರೇಶ್ ಅಡ್ಕತ್ತೊಟ್ಟಿ ಸ್ವಾಗತಿಸಿ, ಸುಬ್ಬಣ್ಣ ರೈ ಗುತ್ತು ವಂದಿಸಿದರು.