World Emoji Day 2025: ಎಮೋಜಿ ಸೃಷ್ಟಿಕರ್ತ ಯಾರು? ವಿಶ್ವದ ಟಾಪ್ ಎಮೋಜಿ ಯಾವುದು? ನೀವು ಊಹೆ ಮಾಡಿರಲ್ಲ

 ಕೋಪ, ಸಂತೋಷ, ನಗು, ಅಳು ಎಲ್ಲವನ್ನೂ ತಿಳಿಸಲು ಕೇವಲ ಒಂದು ಎಮೋಜಿ ಸಾಕು. ನೂರಾರು ಪದಗಳ ಟೆಕ್ಸ್ಟ್ ಮೆಸೇಜ್‌ಗಿಂತ ಒಂದು ಎಮೋಜಿ ಭಾವನೆಗಳನ್ನು ವ್ಯಕ್ತಪಡಿಸುತ್ತದೆ. ಎಮೋಜಿಗಳು ಇಂದು ಎಲ್ಲರ ನೆಚ್ಚಿನ ಆಯ್ಕೆ. ಹೌದು, ವಿಶ್ವ ಎಮೋಜಿ ದಿನ 2025 (​World Emoji Day 2025). ಫೋನ್‌ನಲ್ಲಿ ಬಳಸುವ ಎಮೋಜಿಗಳನ್ನು ಆಚರಿಸಲು ಸಹ ಒಂದು ದಿನವನ್ನು ಮೀಸಲಿಡಲಾಗಿದೆ. ಪಠ್ಯದಲ್ಲಿರುವ ನಮ್ಮೆಲ್ಲರ ಸಂಭಾಷಣೆಯಲ್ಲಿ ಈ ಎಮೋಜಿಗಳು ಪದಗಳಂತೆಯೇ ಶಕ್ತಿಯನ್ನು ಹೊಂದಿವೆ. ಹಾಗಿದ್ರೆ, ಹೆಚ್ಚು ಬಳಸುವ ಎಮೋಜಿ ಯಾವುದು ಗೊತ್ತಾ? ಈ ಎಮೋಜಿ ಪ್ರಾರಂಭವಾಗಿದ್ದು ಯಾವಾಗ? ಇದರ ಇತಿಹಾಸವೇನು? ಎಂಬ ಮಾಹಿತಿ ಇಲ್ಲಿದೆ.

ಇಂದಿನ ಡಿಜಿಟಲ್ ಜಗತ್ತಿನಲ್ಲಿ ಭಾವನೆಗಳನ್ನು ವ್ಯಕ್ತಪಡಿಸಲು ಎಮೋಜಿಗಳನ್ನು ಬಳಸಲಾಗುತ್ತಿದೆ. ಫೇಸ್‌ಬುಕ್, ವಾಟ್ಸಾಪ್, ಇನ್​ಸ್ಟಾಗ್ರಾಮ್, ಟೆಲಿಗ್ರಾಮ್​ಗಳಲ್ಲಿ ಪದಗಳ ಮೂಲಕ ವ್ಯಕ್ತಪಡಿಸಲು ಸಾಧ್ಯವಾಗದ ಭಾವನೆಗಳನ್ನು ಎಮೋಜಿಗಳ ಮೂಲಕ ತಿಳಿಸುತ್ತೇವೆ. ಎಮೋಜಿಗಳ ಮೂಲಕ ದೀರ್ಘ ವಿಷಯಗಳನ್ನು ಸಹ ಹೇಳಲಾಗುತ್ತದೆ. ಎಮೋಜಿಗಳು ಸಣ್ಣ ಐಕಾನ್‌ಗಳಾಗಿವೆ. ಇವು ವಿಭಿನ್ನ ರೀತಿಯ ಭಾವನೆಗಳನ್ನು ವ್ಯಕ್ತಪಡಿಸುತ್ತವೆ. ಇವುಗಳ ಆಕಾರವು ವಿಭಿನ್ನವಾಗಿರುತ್ತದೆ. ಇದು ಆನ್‌ಲೈನ್ ಸಂವಹನವನ್ನು ಸುಲಭಗೊಳಿಸುತ್ತದೆ. ಅಳಲು ಅಳುವ ಎಮೋಜಿ, ನಗಲು ನಗುವ ಎಮೋಜಿಯನ್ನು ಕಳುಹಿಸಲು ಒಂದು ಸೆಕೆಂಡಿಗಿಂತ ಕಡಿಮೆ ಸಮಯ ಸಾಕು.

ಪ್ರಸ್ತುತ ಬಹುತೇಕರು ಸುದೀರ್ಘ ವಿಷಯಗಳನ್ನು ಬರೆಯುವುದನ್ನು ಅಥವಾ ತಮ್ಮ ಭಾವನೆಗಳನ್ನು ಬರೆಯುವ ಮೂಲಕ ವ್ಯಕ್ತಪಡಿಸುವುದನ್ನು ನಿಲ್ಲಿಸಿದ್ದಾರೆ. ಬದಲಾಗಿ, ಎಮೋಜಿಗಳ ಮೂಲಕ ತಮ್ಮ ಭಾವನೆ ವ್ಯಕ್ತಪಡಿಸುತ್ತಿದ್ದಾರೆ. ಈ ಎಮೋಜಿಗಳನ್ನು ಆಚರಿಸಲು ಪ್ರತಿ ವರ್ಷ ಜುಲೈ 17 ರಂದು ವಿಶ್ವ ಎಮೋಜಿ ದಿನವನ್ನು (World Emoji Day) ಆಚರಿಸಲಾಗುತ್ತದೆ. ಪ್ರಸ್ತುತ, ಪ್ರತಿಯೊಂದು ಬಣ್ಣ, ಮರ, ಹೂವು, ನದಿ, ಕೊಳ, ವೈದ್ಯರು, ಮನೆ, ಹೃದಯ, ತರಕಾರಿ, ಮೊಟ್ಟೆ, ಪ್ರಾಣಿ ಮತ್ತು ಇನ್ನೂ ಅನೇಕ ವಿಷಯಗಳ ಎಮೋಜಿಗಳು ಕೀಬೋರ್ಡ್‌ನಲ್ಲಿ ಲಭ್ಯವಿದೆ. ಆದರೆ, ಹೆಚ್ಚು ಬಳಕೆಯಾಗುವ ಎಮೋಜಿ ಯಾವುದು ಅಂತ ನಿಮಗೆ ಗೊತ್ತಿದ್ಯಾ?

ವರ್ಲ್ಡ್ ಎಮೋಜಿ ಡೇ ಇತಿಹಾಸ

1980ರಲ್ಲಿ ಎಮೋಜಿಗಳಿಗಿಂತ ಮೊದಲು ಎಮೋಟಿಕಾನ್‌ಗಳು ಪ್ರಾರಂಭವಾದವು. ಜಪಾನಿನ ವಿನ್ಯಾಸಕರು ಈ ಎಮೋಟಿಕಾನ್‌ಗಳನ್ನು ರಚಿಸಿದರು. ಇದರಲ್ಲಿ ಪಠ್ಯದಲ್ಲಿ ಅಸ್ತಿತ್ವದಲ್ಲಿರುವ ಕೀಬೋರ್ಡ್‌ನಿಂದಲೇ ಈ ಎಮೋಟಿಕಾನ್‌ಗಳನ್ನು ರಚಿಸಲಾಗುತ್ತಿತ್ತು. ಉದಾಹರಣೆಗೆ, ನಗಲು :), ದುಃಖವನ್ನು ತೋರಿಸಲು :( ಮತ್ತು ಪ್ರೀತಿಯನ್ನು ಕಳುಹಿಸಲು

2011ರಲ್ಲಿ ಆಪಲ್ iOS ನಲ್ಲಿ ಎಮೋಜಿ ಕೀಬೋರ್ಡ್ ಅನ್ನು ಸೇರಿಸಿತು. ಬಳಿಕ ಅನೇಕ ದೇಶಗಳಲ್ಲಿ ಎಮೋಜಿಗಳನ್ನು ಬಳಸಲು ಆರಂಭಿಸಲಾಯಿತು. ಈಗ ಪ್ರತಿಯೊಂದು ಫೋನ್ ಎಮೋಜಿ ಕೀಬೋರ್ಡ್‌ನೊಂದಿಗೆ ಬರುತ್ತದೆ. ಸೋಶಿಯಲ್ ಮೀಡಿಯಾದ ಈ ಯುಗದಲ್ಲಿ ಎಮೋಜಿಗಳು ವಿಶಿಷ್ಟ ಮಹತ್ವವನ್ನು ಹೊಂದಿವೆ. ಅವುಗಳಿಲ್ಲದೆ ಪ್ರತಿಯೊಂದು ವಿಷಯವೂ ಅಪೂರ್ಣ ಎನಿಸುತ್ತದೆ. ಹೀಗಾಗಿ, ಈ ಎಮೋಜಿಗಳು ಸಂಭಾಷಣೆ ಅಥವಾ ನಮ್ಮ ಭಾವನೆಗಳನ್ನು ಸುಲಭಗೊಳಿಸುತ್ತವೆ.

ಅತಿ ಹೆಚ್ಚು ಬಳಕೆಯಾಗುವ ಎಮೋಜಿ

ಎಮೋಜಿಪೀಡಿಯಾ ಡಾಟ್ ಆರ್ಗ್ ಪ್ರಕಾರ, ಹೆಚ್ಚು ಬಳಕೆಯಾಗುವ ಎಮೋಜಿ ಎಂದರೆ ಹೃದಯದ (ಹಾರ್ಟ್) ಎಮೋಜಿ. ಈ ಹೃದಯದ ಎಮೋಜಿಯನ್ನು ಜನರು ಅತಿ ಹೆಚ್ಚು ಬಳಸುತ್ತಾರೆ. ಇದರ ನಂತರ ಹಸಿರು ಬಾಕ್ಸ್‌ನಲ್ಲಿ ಬಿಳಿ ಚೆಕ್ ಮಾರ್ಕ್ ಇರುವ ಎಮೋಜಿ ಬರುತ್ತದೆ. ನಂತರದ ಸ್ಥಾನ ಸ್ಪಾರ್ಕಲ್ ಎಮೋಜಿಗೆ ಮತ್ತು ಅದರ ನಂತರ ಫೈರ್ ಎಮೋಜಿಗೆ ಇದೆ. ಎಲ್ಲರ ನೆಚ್ಚಿನ ಜೋರಾಗಿ ಅಳುವ ಮುಖದ ಎಮೋಜಿ ಮತ್ತು ಸಂತೋಷದ ಕಣ್ಣೀರಿನಿಂದ ನಗುವ ಎಮೋಜಿ ಹತ್ತಿರದಲ್ಲೇ ಇವೆ. ಈ ಎಮೋಜಿಗಳನ್ನು ಜನರು ಕಾಮೆಂಟ್‌ಗಳಲ್ಲಿ ಹೆಚ್ಚಾಗಿ ಬಳಸುತ್ತಾರೆ.

ಎಮೋಜಿಯ ಪಿತಾಮಹ ಯಾರು?

ಶಿಗೇತಾಕ ಕುರಿಟಾ ಅವರು ಮೊದಲ ಎಮೋಜಿಯನ್ನು ರಚಿಸಿದರು. ಇವರು ಎನ್‌ಟಿಟಿ ಡೊಕೊಮೊ ಸಂಸ್ಥೆಯಲ್ಲಿ ಕೆಲಸ ಮಾಡುತ್ತಿದ್ದರು. ಅವರನ್ನು ಎಮೋಜಿಗಳ ಪಿತಾಮಹ ಎಂದು ಕರೆಯಲಾಗುತ್ತದೆ. ಬಳಿಕ ಎಮೋಜಿಗಳನ್ನು ಹೆಚ್ಚು ಬಳಕೆಗೆ ತಂದ ಕೀರ್ತಿ ಎನ್‌ಟಿಟಿ ಡೊಕೊಮೊ, ವೊಡಾಫೋನ್‌ನಂಥ ಕಂಪನಿಗಳಿಗೆ ಸಲ್ಲುತ್ತದೆ. 2000 ರಲ್ಲಿ 1,000ಕ್ಕೂ ಹೆಚ್ಚು ಗ್ರಾಫಿಕಲ್‌ ಸ್ಮೈಲಿಗಳನ್ನು ಪರಿಚಯಿಸಲಾಯಿತು. ಸದ್ಯ ಕಾಲಕಾಲಕ್ಕೆ ಹೊಸ ಹೊಸ ಎಮೋಜಿಗಳು ಅಭಿವೃದ್ಧಿ ಹೊಂದುತ್ತಿವೆ.

ಒಟ್ಟಾರೆಯಾಗಿ, ಎಮೋಜಿಗಳು ಆಧುನಿಕ ಡಿಜಿಟಲ್ ಸಂವಹನದ ಅವಿಭಾಜ್ಯ ಅಂಗವಾಗಿ ಮಾರ್ಪಟ್ಟಿವೆ. ಭಾವನೆಗಳನ್ನು ವ್ಯಕ್ತಪಡಿಸಲು ಮತ್ತು ಸಂದೇಶಗಳನ್ನು ಇನ್ನಷ್ಟು ಪರಿಣಾಮಕಾರಿಯಾಗಿ ತಲುಪಿಸಲು ಇವು ಸಹಾಯ ಮಾಡುತ್ತವೆ. ಎಮೋಜಿಗಳ ಬಳಕೆಯು ನಿರಂತರವಾಗಿ ಹೆಚ್ಚುತ್ತಿದ್ದು, ಇವುಗಳಿಲ್ಲದೆ ಆನ್‌ಲೈನ್ ಸಂವಹನ ಕಲ್ಪಿಸಿಕೊಳ್ಳುವುದು ಕಷ್ಟ.