ಇರಿಯಣ್ಣಿಯಲ್ಲಿ ಸ್ವಾಗತಿಸಲು ಸಿದ್ದಗೊಂಡ ರಸ್ತೆಬದಿಯ ಅಲಂಕಾರಿಕ ಗಿಡಗಳು

ಕಾಸರಗೋಡು: ಇರಿಯಣ್ಣಿಯ ಸುಂದರೀಕರಣದ ಭಾಗವಾಗಿ ರಸ್ತೆಯ ಎರಡೂ ಬದಿಗಳನ್ನು ಅಲಂಕರಿಸಲು ಲೋಕೋಪಯೋಗಿ ಇಲಾಖೆ ಹಸಿರು ನಿಶಾನೆ ತೋರಿಸಿರುವುದರಿಂದ ಇರಿಯಣ್ಣಿಗೆ ವಸಂತ ಕಾಲಿರಿಸಿದೆ. 

ರಾಜ್ಯ ಸರ್ಕಾರದ ತ್ಯಾಜ್ಯ ಮುಕ್ತ ಕಾರ್ಯಕ್ರಮದ ಭಾಗವಾಗಿ ನಗರವು ನವೀಕರಣಕ್ಕೆ ಸಿದ್ಧವಾಗುತ್ತಿದೆ. ಮೊದಲ ಹಂತದಲ್ಲಿ, ಇರಿಯಣ್ಣಿಯ ಬೋವಿಕ್ಕಾನ-ಕುತ್ತಿಕೋಲ್ ರಸ್ತೆಯಲ್ಲಿ ಸುಮಾರು ಒಂದೂವರೆ ಕಿಲೋಮೀಟರ್ ಉದ್ದವನ್ನು ಒಳಗೊಂಡಂತೆ ರಸ್ತೆಯ ಎರಡೂ ಬದಿಗಳಲ್ಲಿ ವಿವಿಧ ರೀತಿಯ ಹೂವಿನ ಗಿಡಗಳನ್ನು ಅಲಂಕರಿಸಲಾಗುವುದು. ಅಧಿಕಾರಿಗಳು ಇದಕ್ಕಾಗಿ ಐದು ನೂರಕ್ಕೂ ಹೆಚ್ಚು ಹೂವಿನ ಕುಂಡಗಳನ್ನು ಸಿದ್ಧಪಡಿಸಿದ್ದಾರೆ ಮತ್ತು ಸ್ಥಳೀಯರ ಬೆಂಬಲ ಮತ್ತು ಸಹಕಾರವು ಉಲ್ಲೇಖನೀಯವಾಗಿದೆ ಎಂದು ಮುಳಿಯಾರ್ ಪಂಚಾಯತಿ ಅಧ್ಯಕ್ಷೆ ಪಿ.ವಿ. ಮಿನಿ ಹೇಳಿರುವರು.

ಮುಳಿಯಾರ್ ಗ್ರಾಮ ಪಂಚಾಯತಿ ಅಧ್ಯಕ್ಷೆ ಮತ್ತು ಇರಿಯಣ್ಣಿಯ ನಿವಾಸಿ ಕೆ. ಶ್ರೀನಿವಾಸನ್ ಸಂಚಾಲಕರಾಗಿ, ಪಂಚಾಯತಿ ಆಡಳಿತ ಸಮಿತಿಯ ಸದಸ್ಯರು ಮತ್ತು ಸ್ಥಳೀಯರನ್ನು ಒಳಗೊಂಡ ಜನಪರ ಕ್ರಿಯಾಸಮಿತಿಯ ಸಾಮೂಹಿಕ ಯತ್ನದ ಮೂಲಕ ಸುಂದರೀಕರಣ ಸಾಧ್ಯವಾಗಿದೆ. ಮೊದಲ ಹಂತದ ಚಟುವಟಿಕೆಗಳಿಗಾಗಿ ಆಡಳಿತ ಸಮಿತಿಯು ಒಂದು ಲಕ್ಷ ರೂಪಾಯಿಗಳನ್ನು ನಿಗದಿಪಡಿಸಿದೆ. ಇದಲ್ಲದೆ, ಸ್ಥಳೀಯರ ಪ್ರಯತ್ನದ ಮೂಲಕ ಹಣವನ್ನು ಸಂಗ್ರಹಿಸಲಾಗುತ್ತಿದೆ. ಎರಡೂ ಬದಿಗಳಲ್ಲಿ ವಿಶೇಷ ಉಕ್ಕಿನ ಸ್ಟ್ಯಾಂಡ್‍ಗಳನ್ನು ಅಳವಡಿಸಲಾಗುವುದು. ಅವುಗಳ ಒಳಗೆ ಗಿಡಗಳ ಕುಂಡಗಳನ್ನು ಇರಿಸಲಾಗುವುದು. 

ಯೋಜನೆಯ ಮುಂದಿನ ಹಂತವಾಗಿ ವೃದ್ಧರಿಗೆ ಆಸನ ಸೌಲಭ್ಯಗಳನ್ನು ಸಹ ಒದಗಿಸಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಇದರ ಜೊತೆಗೆ, ಇರಿಯಣ್ಣಿಯ ಸುಂದರೀಕರಣದ ಭಾಗವಾಗಿ, ನಗರದಿಂದ ಪೂವಾಳ ರಸ್ತೆಯವರೆಗಿನ ಎಲ್ಲಾ ವಿದ್ಯುತ್ ಕಂಬಗಳ ಮೇಲೆ ಬೀದಿ ದೀಪಗಳನ್ನು ಅಳವಡಿಕೆ ಮತ್ತು ನಗರದ ಬಳಿ ಬೇಸಿಗೆಯಲ್ಲಿಯೂ ಒಣಗದ ಶತಮಾನಗಳಷ್ಟು ಹಳೆಯದಾದ ಪಾರಂಪರಿಕ ಹಳ್ಳದ ಸುತ್ತಮುತ್ತಲಿನ ಗೋಡೆ ಮತ್ತು ಕಲ್ಲಿನ ಮೆಟ್ಟಿಲುಗಳನ್ನು ರಕ್ಷಿಸುವ ಚಟುವಟಿಕೆಗಳನ್ನು ಕೈಗೊಳ್ಳಲಾಗುವುದು ಎಂದು ಮುಳಿಯಾರ್ ಪಂಚಾಯತಿ ಆಡಳಿತ ಸಮಿತಿ ತಿಳಿಸಿದೆ. ಪೇಟೆಯ ಬಳಿಯ 'ಐ ಲವ್ ಯು ಇರಿಯಣ್ಣಿ' ಎಂಬ ಬೃಹತ್ ಬ್ಯಾನರ್ ಹಿನ್ನೆಲೆಯಲ್ಲಿ ಪೋಟೋ ತೆಗೆಯಲು ಸೆಲ್ಫಿ ಪಾಯಿಂಟ್‍ಗಳನ್ನು ಮುಂದಿನ ಹಂತಗಳಲ್ಲಿ ವ್ಯವಸ್ಥೆ ಮಾಡಲಾಗುವುದು ಎಂದು ಮುಳಿಯಾರ್ ಗ್ರಾ.ಪಂ.ಅಧ್ಯಕ್ಷ ಪಿ.ವಿ. ಮಿನಿ ಹೇಳಿರುವರು.