ಭೂ ಕಬಳಿಕೆ ವಿರುದ್ಧ ಧ್ವನಿ ಎತ್ತಿದ ಹಗೆ- ಕುಂಬಳೆಯ ಆರ್‍ಟಿಐ ಕಾರ್ಯಕರ್ತನಿಗೆ ಕೊಲೆ ಬೆದರಿಕೆ

ಕುಂಬಳೆ: ಸ್ಥಳೀಯ ಮಟ್ಟದಲ್ಲಿ ಕಾನೂನುಬಾಹಿರ ಚಟುವಟಿಕೆಗಳ ವಿರುದ್ಧ ನಿರಂತರವಾಗಿ ಕಾನೂನು ಹೋರಾಟಗಳನ್ನು ಎತ್ತಿಕೊಳ್ಳುತ್ತಿರುವ ತನಗೆ ಕೊಲೆ ಬೆದರಿಕೆ ಇದೆ ಎಂದು ಆರ್.ಟಿ.ಐ. ಕಾರ್ಯಕರ್ತ ಎನ್. ಕೇಶವ ನಾಯಕ್ ಕುಂಬಳೆ ಪ್ರೆಸ್ ಪೋರಂನಲ್ಲಿ ಶುಕ್ರವಾರ ಸಂಜೆ ನಡೆಸಿದ ಪತ್ರಿಕಾಗೋಷ್ಠಿಯಲ್ಲಿ ಮಾಹಿತಿ ನೀಡಿದರು. 

ಮಂಜೇಶ್ವರ ತಾಲೂಕು ಬಾಯಾರು ಪಾದೆಕಲ್ಲಿನಿಂದ ತಮಿಳುನಾಡಿನ ಸಿಮೆಂಟ್ ಕಾರ್ಖಾನೆಗಳಿಗೆ ಅಕ್ರಮವಾಗಿ ಮಣ್ಣನ್ನು ಸಾಗಿಸಲಾಗುತ್ತಿದೆ. ಕರ್ನಾಟಕ ಸರ್ಕಾರದ ಅನುಮತಿ ಪತ್ರವನ್ನು ದುರುಪಯೋಗಪಡಿಸಿಕೊಂಡು ಕೇರಳ-ಕರ್ನಾಟಕ ಗಡಿಯಲ್ಲಿರುವ ಪಾದೆಕಲ್ಲಿನಿಂದ ಮಣ್ಣು ಸಾಗಿಸಲಾಗುತ್ತಿದೆ. ಜೊತೆಗೆ, ಕುಂಬಳೆ ಅನಂತಪುರದಿಂದ ಮಣ್ಣು ಮತ್ತು ಕೆಂಪು ಕಲ್ಲುಗಳನ್ನು ಸಾಗಿಸಲಾಗುತ್ತಿದೆ. ಪ್ರಕೃತಿಯ ಇಂತಹ ಶೋಷಣೆಯ ವಿರುದ್ಧ ಕೇಶವ ನಾಯಕ್ ಕೇಂದ್ರ ಮತ್ತು ರಾಜ್ಯ ಸಚಿವರು, ಉನ್ನತ ಅಧಿಕಾರಿಗಳು ಮತ್ತು ಸಾರ್ವಜನಿಕ ಪ್ರತಿನಿಧಿಗಳಿಗೆ ದೂರುಗಳನ್ನು ಸಲ್ಲಿಸಿದ್ದರು. ಈ ದೂರುಗಳ ಆಧಾರದ ಮೇಲೆ ತನಿಖೆಗಳನ್ನು ಸಹ ನಡೆಸಲಾಯಿತು.

ಇದರಿಂದ ಕೆರಳಿದ ಮಾಫಿಯಾಗಳು ಕೇಶವ ನಾಯಕ್ ವಿರುದ್ಧ ಕೊಲೆ ಬೆದರಿಕೆ ಹಾಕಿದೆ.

ಕಳೆದ ವಾರ, ಭೂ ಮಾಫಿಯಾದೊಂದಿಗೆ ಸಂಬಂಧ ಹೊಂದಿರುವ ಮಹಾಲಿಂಗ ಅಲಿಯಾಸ್ ಪಚು ಪ್ರಸಾದ್ ಮತ್ತು ಕೋಟೆಕ್ಕಾರ್ ಮೂಲದ ರಾಜಾ ಅವರು ತನ್ನ ಮನೆಗೆ ಬಂದು ಹಣ ನೀಡುವ ಮೂಲಕ ಪ್ರಭಾವ ಬೀರಲು ಪ್ರಯತ್ನಿಸಿದರು ಮತ್ತು ತಾನು ಮಣಿಯದಿದ್ದಾಗ, ಅವರು ತನ್ನನ್ನು ಕೊಲ್ಲುವುದಾಗಿ ಬೆದರಿಕೆ ಹಾಕಿದರು ಎಂದು ಅವರು ಹೇಳಿದರು. ಮಂಜೇಶ್ವರ ಕ್ಷೇತ್ರದಲ್ಲಿ ನಡೆಯುತ್ತಿರುವ ಈ ಬೃಹತ್ ಭೂಕಬಳಿಕೆಯ ವಿರುದ್ಧ ಶಾಸಕರಾದ ಎಕೆಎಂ ಅಶ್ರಫ್ ಸೂಕ್ತ ಕ್ರಮಗಳೊಂದಿಗೆ ಮುಂದೆಬರುವಂತೆ ಅವರು ವಿನಂತಿಸಿದರು.