ಕೇರಳಕ್ಕೆ ವಿಶ್ವ ಬ್ಯಾಂಕ್ ನಿಂದ $280 ಮಿಲಿಯನ್ ಸಾಲ ಅನುಮೋದನೆ: ವೃದ್ಧರ ಜೀವಿತಾವಧಿ ಮತ್ತು ಗುಣಮಟ್ಟ ಸುಧಾರಿಸಲು ಮೊತ್ತ

ನವದೆಹಲಿ: ಜೀವಿತಾವಧಿ ಮತ್ತು ಜೀವನದ ಗುಣಮಟ್ಟವನ್ನು ಸುಧಾರಿಸಲು ವಿಶ್ವ ಬ್ಯಾಂಕ್ ಕೇರಳಕ್ಕೆ $280 ಮಿಲಿಯನ್ ಸಾಲವನ್ನು ಅನುಮೋದಿಸಿದೆ.

1.10 ಕೋಟಿ ವೃದ್ಧರ ಗುಂಪಿನ ಆರೋಗ್ಯ ಯೋಜನೆಗೆ ಈ ಮೊತ್ತವನ್ನು ಅನುಮೋದಿಸಲಾಗಿದೆ. ಸಾಲ ಮರುಪಾವತಿ ಅವಧಿ 25 ವರ್ಷಗಳು. ಐದು ವರ್ಷಗಳ ಗ್ರೇಸ್ ಅವಧಿಯೂ ಲಭ್ಯವಿರುತ್ತದೆ. 

ಈ ಯೋಜನೆಯು ರಾಜ್ಯದಲ್ಲಿ ಅಧಿಕ ರಕ್ತದೊತ್ತಡ ಮತ್ತು ಮಧುಮೇಹ ಹೊಂದಿರುವ ಶೇ. 90 ಕ್ಕಿಂತ ಹೆಚ್ಚು ರೋಗಿಗಳಿಗೆ ಎಲೆಕ್ಟ್ರಾನಿಕ್ ಟ್ರ್ಯಾಕಿಂಗ್ ವ್ಯವಸ್ಥೆಗಳನ್ನು ಬಳಸಿಕೊಂಡು ಚಿಕಿತ್ಸೆ ನೀಡುವ ಗುರಿಯನ್ನು ಹೊಂದಿದೆ.ಹಾಸಿಗೆ ಹಿಡಿದವರು ಮತ್ತು ದುರ್ಬಲರಿಗೆ ಮನೆ ಆರೈಕೆಯ ಮಾದರಿಯನ್ನು ಜಾರಿಗೆ ತರುವುದು ಸಹ ಗುರಿಯಾಗಿದೆ.

'ಕೇರಳದಲ್ಲಿ 1.10 ಕೋಟಿ ವೃದ್ಧರು ಮತ್ತು ದುರ್ಬಲ ಜನರ ಜೀವಿತಾವಧಿ ಮತ್ತು ಜೀವನದ ಗುಣಮಟ್ಟವನ್ನು ಸುಧಾರಿಸುವ ಯೋಜನೆಯನ್ನು ವಿಶ್ವ ಬ್ಯಾಂಕ್ ಕಾರ್ಯನಿರ್ವಾಹಕ ಮಂಡಳಿ ಅನುಮೋದಿಸಿದೆ' ಎಂದು ವಿಶ್ವ ಬ್ಯಾಂಕ್ ಹೇಳಿಕೆಯಲ್ಲಿ ತಿಳಿಸಿದೆ.

ಇದು ಇ-ಆರೋಗ್ಯ ಸೇವೆಗಳು, ಸಂಯೋಜಿತ ದತ್ತಾಂಶ ವೇದಿಕೆಗಳು ಮತ್ತು ವರ್ಧಿತ ಸೈಬರ್ ಭದ್ರತೆಯ ಮೂಲಕ ಕೇರಳದ ಡಿಜಿಟಲ್ ಆರೋಗ್ಯ ವ್ಯವಸ್ಥೆಗಳನ್ನು ಬಲಪಡಿಸುತ್ತದೆ.

ಈ ಯೋಜನೆಯು ಮಹಿಳೆಯರಿಗೆ ರಕ್ತದೊತ್ತಡ ನಿಯಂತ್ರಣ ಮತ್ತು ಗರ್ಭಕಂಠ ಮತ್ತು ಸ್ತನ ಕ್ಯಾನ್ಸರ್ ತಪಾಸಣೆಯನ್ನು ಖಚಿತಪಡಿಸಿಕೊಳ್ಳಲು ಸಹಾಯ ಮಾಡುತ್ತದೆ ಎಂದು ವಿಶ್ವ ಬ್ಯಾಂಕಿನ ಭಾರತದ ಹಂಗಾಮಿ ನಿರ್ದೇಶಕ ಪಾಲ್ ಪ್ರೊಸಿ ಹೇಳಿದರು.