ಪಾಂಡಿಕೋಟ್ ಹಳ್ಳ ಸಂರಕ್ಷಣೆಗೆ ಕ್ರಮ: ರಕ್ಷಣಾ ಉಪಕ್ರಮದ ಮೂಲಕ ಮಾದರಿಯಾದ ನೀಲೇಶ್ವರ ನಗರಸಭೆ

ಕಾಸರಗೋಡು: ನೀಲೇಶ್ವರ ನಗರಸಭೆಯು ಪಾಂಡಿಕೋಟ್ ಪಾರಂಪರಿಕ ಹಳ್ಳವನ್ನು ಸಂರಕ್ಷಿಸುವ ದೌತ್ಯಕ್ಕೆ ಮುಂದಾಗಿದೆ. ಇಲ್ಲಿ ಅಪೂರ್ವ ಜಲಸಸ್ಯಗಳು ಬೆಳೆಯುತ್ತಿದ್ದು, ಅವನ್ನು ರಕ್ಷಿಸಲು ಬಿಎಂಸಿ ಕೇರಳ ರಾಜ್ಯ ಜೀವವೈವಿಧ್ಯ ಮಂಡಳಿ ಮತ್ತು ನೀಲೇಶ್ವರ ನಗರಸಭೆಯ ಜಂಟಿ ಆಶ್ರಯದಲ್ಲಿ ಯೋಜನೆಯನ್ನು ಜಾರಿಗೆ ತಂದಿತು. ಮಂಡಳಿಯು ನಗರಸಭೆಗೆ 3 ಲಕ್ಷ ರೂ.ಗಳನ್ನು ಆರ್ಥಿಕ ಸಹಾಯವಾಗಿ ಮಂಜೂರು ಮಾಡಿತ್ತು.

ಸುಮಾರು ಅರ್ಧ ಎಕರೆ ವಿಸ್ತೀರ್ಣದಲ್ಲಿರುವ ಹಳ್ಳ ಅನೇಕ ಜೀವಿಗಳಿಗೆ ಆವಾಸಸ್ಥಾನವನ್ನು ಒದಗಿಸುತ್ತಿದ್ದು, ಹತ್ತಿರದ ಪ್ರದೇಶಗಳಲ್ಲಿ ನೀರಿನ ಲಭ್ಯತೆಯ ಮೇಲೆ ಗಮನಾರ್ಹವಾಗಿ ಪರಿಣಾಮ ಬೀರುತ್ತದೆ. ಜಗತ್ತಿನಲ್ಲಿ ಬೇರೆಲ್ಲಿಯೂ ಕಂಡುಬರದ ಅಪೂರ್ವ ಸಸ್ಯಗಳು ಇಲ್ಲಿ ಕಂಡುಬರುತ್ತವೆ ಎಂಬುದು ಪಾಂಡಿಕೋಟ್ ಹಳ್ಳವನ್ನು ವಿಭಿನ್ನವಾಗಿಸುತ್ತಿದೆ. 2016 ರಲ್ಲಿ, ಕಾಸರಗೋಡು ಸರ್ಕಾರಿ ಕಾಲೇಜಿನ ಸಸ್ಯಶಾಸ್ತ್ರ ವಿಭಾಗವು ಕೃಷ್ಣಕೇಸರ ಮುಳ್ಳು ಮತ್ತು ಕಾಸರಗೋಡು ಬ್ಲಿಕ್ಸಾ ಸಸ್ಯಗಳನ್ನು ಇಲ್ಲಿಯ ಹಳ್ಳದಿಂದ ಪತ್ತೆಹಚ್ಚಿತು. 

ಕೃಷ್ಣಕೇಸರ ಮುಳ್ಳು, ನೇರಳೆ ಬಣ್ಣದ ಕೇಸರಗಳನ್ನು ಹೊಂದಿರುವ ಸುಂದರವಾದ ಜಲಸಸ್ಯವಾಗಿದೆ. ಇದರ ವಿಶೇಷವೆಂದರೆ ಬೀಜದ ಎರಡೂ ಬದಿಗಳಲ್ಲಿ ಉದ್ದವಾದ ಮುಳ್ಳುಗಳು ಇರುತ್ತವೆ. ಹೈಡ್ರೋಚಾರಿಟೇಸಿ ಕುಟುಂಬಕ್ಕೆ ಸೇರಿದ ಕಾಸರಗೋಡು ಬ್ಲಿಕ್ಸಾದಲ್ಲಿ ಕಂಡುಬರುವ ನೀರಿನ ಪರಾಗಸ್ಪರ್ಶ ವಿಧಾನವನ್ನು ಈ ಕುಲದಲ್ಲಿ ಮೊದಲ ಬಾರಿಗೆ ದಾಖಲಿಸಲಾಗಿದೆ. 2012 ರಲ್ಲಿ ಜಿಲ್ಲೆಯಲ್ಲಿ ಪತ್ತೆಯಾದ ಮತ್ತೊಂದು ಅಪರೂಪದ ಜಲಸಸ್ಯವಾದ ತುಳುನಾಡು ರೋಟಲಾ ಕೂಡ ಈ ಹಳ್ಳದಲ್ಲಿ ಬೆಳೆಯುತ್ತದೆ.

ಈ ಜೈವಿಕ ಸಂಪತ್ತನ್ನು ರಕ್ಷಿಸಲು ಹಳ್ಳದ ಸುತ್ತಲೂ ತಂತಿ ಬೇಲಿಯನ್ನು ನಿರ್ಮಿಸಲಾಗಿದೆ. ವಾಹನಗಳನ್ನು ತೊಳೆಯುವಂತಹ ಚಟುವಟಿಕೆಗಳಿಂದ ಹಳ್ಳದ ನೀರಿನ ನೈಸರ್ಗಿಕ ಹರಿವಿಗೆ ಅಡ್ಡಿಯಾಗದಂತೆ ವಿಶೇಷ ಮುನ್ನೆಚ್ಚರಿಕೆಗಳನ್ನು ಸಹ ತೆಗೆದುಕೊಳ್ಳಲಾಗಿದೆ. ಪ್ರಕೃತಿಯ ಬಗೆಗಿನ ಕರ್ತವ್ಯವಾಗಿ ಪಾಂಡಿಕೋಟ್ ಹಳ್ಳದ ರಕ್ಷಣೆಯನ್ನು ನಗರಸಭೆ ಗಂಭೀರವಾಗಿ ಪರಿಗಣಿಸುತ್ತಿದೆ ಮತ್ತು ಭವಿಷ್ಯದಲ್ಲಿ ನಗರಸಭೆಯು ಪ್ರಕೃತಿ ಸಂರಕ್ಷಣಾ ಚಟುವಟಿಕೆಗಳಲ್ಲಿ ಮುಂಚೂಣಿಯಲ್ಲಿರುತ್ತದೆ ಎಂದು ನಗರಸಭೆಯ ಅಧ್ಯಕ್ಷೆ ಟಿ.ವಿ. ಶಾಂತಾ ಹೇಳಿದ್ದಾರೆ.