ಅದಾನಿ ಹೂಡಿಕೆಗಳ ಬಗ್ಗೆ ಎಲ್‌ಐಸಿಗೆ ಸರ್ಕಾರ ಸಲಹೆ ನೀಡಲ್ಲ: ನಿರ್ಮಲಾ ಸೀತಾರಾಮನ್‌

ನವದೆಹಲಿ: ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ತಮ್ಮ ಸಚಿವಾಲಯವು ಭಾರತೀಯ ಜೀವ ವಿಮಾ ನಿಗಮಕ್ಕೆ (ಎಲ್‌ಐಸಿ) ತನ್ನ ಹೂಡಿಕೆ ನಿರ್ಧಾರಗಳ ಕುರಿತು ಸಲಹೆ ಅಥವಾ ನಿರ್ದೇಶನಗಳನ್ನು ನೀಡುವುದಿಲ್ಲ ಎಂದು ಹೇಳಿದ್ದಾರೆ. ಜೊತೆಗೆ ಸರ್ಕಾರಿ ಸ್ವಾಮ್ಯದ ವಿಮಾದಾರರು ಅದಾನಿ ಗ್ರೂಪ್‌ನಲ್ಲಿ ಮಾಡಿದ ಹೂಡಿಕೆಗಳು ಸ್ಥಾಪಿತ ಎಸ್‌ಒಪಿಗಳ ಪ್ರಕಾರವೇ ಇವೆ ಎಂದು ಹೇಳಿದ್ದಾರೆ.

ಈ ಭಾರತದ ಅತಿದೊಡ್ಡ ವಿಮಾದಾರ ಕಂಪನಿಯು ವರ್ಷಗಳಲ್ಲಿ, ಮೂಲಭೂತ ಅಂಶಗಳ ಆಧಾರದ ಮೇಲೆ ಕಂಪನಿಗಳಲ್ಲಿ ಹೂಡಿಕೆ ನಿರ್ಧಾರಗಳನ್ನು ತೆಗೆದುಕೊಂಡಿದೆ. ಅಲ್ಲದೆ ಸ್ಥಾಪಿತ ಪ್ರಮಾಣಿತ ಕಾರ್ಯಾಚರಣಾ ಕಾರ್ಯವಿಧಾನಗಳ (ಎಸ್‌ಒಪಿ) ಪ್ರಕಾರವೇ ಅದು ಅದಾನಿ ಗ್ರೂಪ್‌ನ ಪಟ್ಟಿ ಮಾಡಲಾದ ಕಂಪನಿಗಳ ಷೇರುಗಳನ್ನು ಖರೀದಿಸಿದೆ. ಇದರ ಮೌಲ್ಯವು 38,658.85 ಕೋಟಿ ರೂಪಾಯಿಗಳಷ್ಟಿದೆ. ಅಲ್ಲದೆ ಅದಾನಿ ಸಮೂಹದ ಸಾಲ ಸಾಧನಗಳಲ್ಲಿ 9,625.77 ಕೋಟಿ ರೂಪಾಯಿಗಳನ್ನು ಹೂಡಿಕೆ ಮಾಡಿದೆ.

"ಎಲ್‌ಐಸಿ ನಿಧಿಯ ಹೂಡಿಕೆ ವಿಷಯಗಳಿಗೆ ಸಂಬಂಧಿಸಿದಂತೆ ಹಣಕಾಸು ಸಚಿವಾಲಯವು ಎಲ್‌ಐಸಿಗೆ ಯಾವುದೇ ಸಲಹೆ ಅಥವಾ ನಿರ್ದೇಶನವನ್ನು ನೀಡುವುದಿಲ್ಲ" ಎಂದು ಅವರು ನಿರ್ಮಲಾ ಸೀತಾರಾಮನ್‌ ಅವರು ಲೋಕಸಭೆಯಲ್ಲಿ ಪ್ರಶ್ನೆಯೊಂದಕ್ಕೆ ಲಿಖಿತ ಉತ್ತರದಲ್ಲಿ ಹೇಳಿದರು. ಸರ್ಕಾರಿ ಸ್ವಾಮ್ಯದ ವಿಮಾದಾರರ ಹೂಡಿಕೆ ನಿರ್ಧಾರಗಳನ್ನು "ಕಟ್ಟುನಿಟ್ಟಾದ ಶ್ರದ್ಧೆ, ಅಪಾಯದ ಮೌಲ್ಯಮಾಪನ ಮತ್ತು ವಿಶ್ವಾಸಾರ್ಹ ಅನುಸರಣೆಯನ್ನು ಅನುಸರಿಸಿ ಮಾತ್ರ ಎಲ್‌ಐಸಿ ತೆಗೆದುಕೊಳ್ಳುತ್ತದೆ ಎಂದು ಅವರು ಸ್ಪಷ್ಟಪಡಿಸಿದರು.

ಅಂತಹ ನಿರ್ಧಾರಗಳು 1938ರ ವಿಮಾ ಕಾಯ್ದೆಯ ನಿಬಂಧನೆಗಳು ಹಾಗೂ ಭಾರತೀಯ ವಿಮಾ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರ (ಐಆರ್‌ಡಿಎಐ), ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್‌ಬಿಐ) ಮತ್ತು ಭಾರತೀಯ ಭದ್ರತಾ ಪತ್ರಗಳು ಮತ್ತು ವಿನಿಮಯ ಮಂಡಳಿ (ಎಸ್‌ಇಬಿಐ) ಕಾಲಕಾಲಕ್ಕೆ ಹೊರಡಿಸುವ ನಿಯಮಗಳಿಂದ ನಿಯಂತ್ರಿಸಲ್ಪಡುತ್ತವೆ ಎಂದು ಅವರು ಹೇಳಿದರು.

ಅಕ್ಟೋಬರ್‌ನಲ್ಲಿ ವಾಷಿಂಗ್ಟನ್ ಪೋಸ್ಟ್ ವರದಿ ಮಾಡಿದಂತೆ ಈ ವರ್ಷ ಅದಾನಿ ಗುಂಪು ಅಮೆರಿಕಾದ ಪರಿಶೀಲನೆ ಮತ್ತು ಸಾಲ ಒತ್ತಡ ಎದುರಿಸುತ್ತಿದ್ದ ಸಮಯದಲ್ಲಿ, ಹಣಕಾಸು ಸಚಿವಾಲಯದ ಅಧಿಕಾರಿಗಳು ಎಲ್‌ಐಸಿ ಅನ್ನು ಆ ಗುಂಪಿನಲ್ಲಿ ಹೂಡಿಕೆ ಮಾಡಲು ಒತ್ತಾಯಿಸಿದ್ದಾರೆ ಎಂಬ ಆರೋಪ ಹೊರಿಸಲಾಯಿತು. ಈ ವರದಿಯು ಎಲ್‌ಐಸಿಯ ಮೇ 2025 ರ ಅದಾನಿ ಬಂದರುಗಳು ಮತ್ತು ಎಸ್‌ಇಜೆಡ್ (ಎಪಿಎಸ್‌ಇಜೆಡ್) ನಲ್ಲಿ 570 ಮಿಲಿಯನ್ ಯುಎಸ್ ಡಾಲರ್ (ಸುಮಾರು ರೂ. 5,000 ಕೋಟಿ) ಹೂಡಿಕೆಯನ್ನು ಎತ್ತಿ ತೋರಿಸಿದೆ.

"ಎಲ್‌ಐಸಿ ತನ್ನ ಮಂಡಳಿ-ಅನುಮೋದಿತ ನೀತಿಗಳ ಪ್ರಕಾರ ಸ್ಥಾಪಿತ ಪ್ರಮಾಣಿತ ಕಾರ್ಯಾಚರಣಾ ಕಾರ್ಯವಿಧಾನಗಳನ್ನು (ಎಸ್‌ಒಪಿಗಳು) ಅನುಸರಿಸಿ, ಮೇ 2025ರಲ್ಲಿ ಅದಾನಿ ಬಂದರುಗಳ ವಿಶೇಷ ಆರ್ಥಿಕ ವಲಯ (ಎಪಿಎಸ್‌ಇಜೆಡ್) ಹೊರಡಿಸಿದ ಸುರಕ್ಷಿತ ನಾನ್-ಕನ್ವರ್ಟಿಬಲ್ ಡಿಬೆಂಚರ್‌ಗಳಲ್ಲಿ (ಎನ್‌ಸಿಡಿ) 5,000 ಕೋಟಿ ರೂ.ಗಳನ್ನು ಹೂಡಿಕೆ ಮಾಡಿದೆ" ಎಂದು ಸೀತಾರಾಮನ್ ಹೇಳಿದರು.

ಎಲ್‌ಐಸಿ ಎನ್‌ಎಸ್‌ಇ ಮತ್ತು ಬಿಎಸ್‌ಇಯಲ್ಲಿ ಪಟ್ಟಿ ಮಾಡಲಾದ ಟಾಪ್ 500 ಕಂಪನಿಗಳಲ್ಲಿ ಹೂಡಿಕೆ ಮಾಡಿದೆ. ಅದರ ಹೂಡಿಕೆಯ ಬಹುಪಾಲು ಭಾಗವು ಪ್ರಸ್ತುತ ಇವುಗಳಲ್ಲಿ ದೊಡ್ಡ ಕಂಪನಿಗಳಲ್ಲಿದೆ ಎಂದು ಅವರು ಹೇಳಿದರು. "ಸೆಪ್ಟೆಂಬರ್ 30ರ ವೇಳೆಗೆ ನಿಫ್ಟಿ 50 ಕಂಪನಿಗಳಲ್ಲಿ ಎಲ್‌ಐಸಿಯ ಹೂಡಿಕೆಯ ಮೌಲ್ಯವು 4,30,776.97 ಕೋಟಿ ರೂ.ಗಳಾಗಿದ್ದು, ಇದು ಅದರ ಒಟ್ಟು ಷೇರು ಹೂಡಿಕೆಯ ಶೇಕಡಾ 45.85ರಷ್ಟಿದೆ" ಎಂದು ಅವರು ಹೇಳಿದರು.

ಜಾರಿಗೆ ತರಲಾದ ಪರಿಶೀಲನೆಗಳು ಮತ್ತು ಸಮತೋಲನಗಳನ್ನು ವಿವರಿಸುತ್ತಾ, ಎಲ್‌ಐಸಿಯ ಹೂಡಿಕೆ ಕಾರ್ಯಗಳನ್ನು ಸಮಕಾಲೀನ ಲೆಕ್ಕಪರಿಶೋಧಕರು, ಶಾಸನಬದ್ಧ ಲೆಕ್ಕಪರಿಶೋಧಕರು, ಸಿಸ್ಟಮ್ ಲೆಕ್ಕಪರಿಶೋಧಕರು, ಆಂತರಿಕ ಹಣಕಾಸು ನಿಯಂತ್ರಣ (ಐಎಫ್‌ಸಿ) ಲೆಕ್ಕಪರಿಶೋಧಕರು ಮತ್ತು ಆಂತರಿಕ ವಿಜಿಲೆನ್ಸ್ ತಂಡವು ಪರಿಶೀಲಿಸುತ್ತದೆ ಎಂದು ಅವರು ಹೇಳಿದರು. "ಈ ನಿಟ್ಟಿನಲ್ಲಿ ವಲಯ ನಿಯಂತ್ರಕ ಐಆರ್‌ಡಿಎಐನಿಂದ ನಿಯತಕಾಲಿಕ ತಪಾಸಣೆಗಳನ್ನು ಸಹ ಮಾಡಲಾಗುತ್ತದೆ. ಎಲ್‌ಐಸಿ ಮಾಡುವ ಹೂಡಿಕೆಗಳ ಮೇಲೆ ಸರ್ಕಾರಕ್ಕೆ ಯಾವುದೇ ನೇರ ಮೇಲ್ವಿಚಾರಣೆ ಇಲ್ಲ ಎಂದು ಅವರು ಹೇಳಿದರು.

ಪ್ರಮುಖ ಹೂಡಿಕೆಗಳು

ಎಲ್‌ಐಸಿಯ ಪ್ರಮುಖ ಹೂಡಿಕೆಗಳನ್ನು ವಿವರಿಸುತ್ತಾ, ಖಾಸಗಿ ಸಂಸ್ಥೆಗಳಲ್ಲಿ, ವಿಮಾ ಕಂಪನಿಯು ರಿಲಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್‌ನಲ್ಲಿ ಅತಿ ಹೆಚ್ಚು 40,901.38 ಕೋಟಿ ರೂಪಾಯಿ ಈಕ್ವಿಟಿ ಹೂಡಿಕೆ ಹೊಂದಿದೆ ಎಂದು ಅವರು ಹೇಳಿದರು. ನಂತರ ಇನ್ಫೋಸಿಸ್‌ನಲ್ಲಿ 38,846.33 ಕೋಟಿ ರೂಪಾಯಿ, ಟಾಟಾ ಕನ್ಸಲ್ಟೆನ್ಸಿ ಸರ್ವೀಸಸ್‌ನಲ್ಲಿ 31,926.89 ಕೋಟಿ ರೂ., ಎಚ್‌ಡಿಎಫ್‌ಸಿ ಬ್ಯಾಂಕ್‌ನಲ್ಲಿ 31,664.69 ಕೋಟಿ ರೂ. ಮತ್ತು ಹಿಂದೂಸ್ತಾನ್ ಯೂನಿಲಿವರ್‌ನಲ್ಲಿ 30,133.49 ಕೋಟಿ ರೂ. ಹೂಡಿಕೆ ಮಾಡಿದೆ.

ಅದೇ ರೀತಿ, ಖಾಸಗಿ ವಲಯದಲ್ಲಿ ಅದರ ಅತಿದೊಡ್ಡ ಸಾಲವು ಹೆಚ್‌ಡಿಎಫ್‌ಸಿ ಬ್ಯಾಂಕಿನೊಂದಿಗೆ ಆಗಿದ್ದು, ಅಲ್ಲಿ ಅದು ಒಟ್ಟು 49,149.14 ಕೋಟಿ ರೂ.ಗಳ ಬಾಕಿಯನ್ನು ಹೊಂದಿದೆ. ಅದರ ನಂತರ ರಿಲಯನ್ಸ್ ಇಂಡಸ್ಟ್ರೀಸ್‌ನಲ್ಲಿ 14,012.34 ಕೋಟಿ ರೂ., ಐಸಿಐಸಿಐ ಬ್ಯಾಂಕ್‌ನಲ್ಲಿ 13,435 ಕೋಟಿ ರೂ., ಶ್ರೀರಾಮ್ ಫೈನಾನ್ಸ್‌ನಲ್ಲಿ 11,075 ಕೋಟಿ ರೂ. ಮತ್ತು ಅದಾನಿ ಪೋರ್ಟ್ಸ್ ಮತ್ತು ಎಸ್‌ಇಝಡ್‌ ಲಿಮಿಟೆಡ್‌ನಲ್ಲಿ 9,625.77 ಕೋಟಿ ರೂಪಾಯಿ ಇದೆ.

ಅದಾನಿ ಗ್ರೂಪ್ ಸಂಸ್ಥೆಗಳಲ್ಲಿ, ಎಲ್‌ಐಸಿ ಸಿಎನ್‌ಜಿ ಚಿಲ್ಲರೆ ವ್ಯಾಪಾರಿ ಅದಾನಿ-ಟೋಟಲ್ ಗ್ಯಾಸ್ ಲಿಮಿಟೆಡ್‌ನಲ್ಲಿ ಅತಿ ಹೆಚ್ಚು 8,646.82 ಕೋಟಿ ರೂ. ಹೂಡಿಕೆ ಮಾಡಿದೆ. ಎಲ್‌ಐಸಿಯ ಒಟ್ಟಾರೆ ಹೂಡಿಕೆಯಲ್ಲಿ ಇದು 25 ನೇ ಸ್ಥಾನದಲ್ಲಿದೆ ಎಂದು ಅವರು ಹೇಳಿದರು. ಅದಾನಿ ಗ್ರೂಪ್‌ನ ಪ್ರಮುಖ ಸಂಸ್ಥೆಯಾದ ಅದಾನಿ ಎಂಟರ್‌ಪ್ರೈಸಸ್‌ನಲ್ಲಿ ಎಲ್‌ಐಸಿಯ ಹೂಡಿಕೆ 8,470.60 ಕೋಟಿ ರೂ.ಗಳಾಗಿದ್ದು, ಒಟ್ಟಾರೆ ಪಟ್ಟಿಯಲ್ಲಿ 27ನೇ ಸ್ಥಾನದಲ್ಲಿದೆ, ಸಿಮೆಂಟ್ ತಯಾರಕ ಅಂಬುಜಾ ಸಿಮೆಂಟ್ಸ್‌ನಲ್ಲಿ 5,787.73 ಕೋಟಿ ರೂ.ಗಳಿದ್ದು, 40ನೇ ಸ್ಥಾನದಲ್ಲಿದೆ.

ಎಪಿಎಸ್‌ಇಜೆಡ್‌ನಲ್ಲಿ 5,681.10 ಕೋಟಿ ರೂ.ಗಳು ಎಲ್‌ಐಸಿಯ ಒಟ್ಟಾರೆ ಹೂಡಿಕೆ ಪಟ್ಟಿಯಲ್ಲಿ 43ನೇ ಸ್ಥಾನದಲ್ಲಿವೆ. ವಿದ್ಯುತ್ ಪ್ರಸರಣ ಸಂಸ್ಥೆ ಅದಾನಿ ಎನರ್ಜಿ ಸೊಲ್ಯೂಷನ್ಸ್ ಲಿಮಿಟೆಡ್‌ನಲ್ಲಿ 3,729.68 ಕೋಟಿ ರೂ.ಗಳು 65ನೇ ಸ್ಥಾನದಲ್ಲಿವೆ. ಶುದ್ಧ ಇಂಧನ ಕಂಪನಿ ಅದಾನಿ ಗ್ರೀನ್ ಎನರ್ಜಿ ಲಿಮಿಟೆಡ್‌ನಲ್ಲಿ 3,486.10 ಕೋಟಿ ರೂ.ಗಳು 71ನೇ ಸ್ಥಾನದಲ್ಲಿವೆ. ಸಿಮೆಂಟ್ ತಯಾರಕ ಎಸಿಸಿಯಲ್ಲಿ 2,856.82 ಕೋಟಿ ರೂ.ಗಳು 81ನೇ ಸ್ಥಾನದಲ್ಲಿವೆ.

ಸಾರ್ವಜನಿಕ ಪ್ರಕಟಣೆ

"ಎಸ್‌ಇಬಿಐ ಮಾರ್ಗಸೂಚಿಗಳ ಪ್ರಕಾರ, ಎಲ್ಲ ಪಟ್ಟಿ ಮಾಡಲಾದ ಕಂಪನಿಗಳು ಕಂಪನಿಯಲ್ಲಿ ಹೊಂದಿರುವ ಶೇ1 ಅಥವಾ ಅದಕ್ಕಿಂತ ಹೆಚ್ಚಿನ ಷೇರುಗಳನ್ನು ಹೊಂದಿರುವ ಷೇರುದಾರರ ಹೆಸರುಗಳನ್ನು ಬಹಿರಂಗಪಡಿಸಬೇಕು. ಅದರಂತೆ, ಎಲ್‌ಐಸಿ ಶೇ 1 ಅಥವಾ ಅದಕ್ಕಿಂತ ಹೆಚ್ಚಿನ ಷೇರುಗಳನ್ನು ಹೊಂದಿರುವ ಕಂಪನಿಗಳ ಬಗ್ಗೆ ಮಾಹಿತಿಯು ಸಾರ್ವಜನಿಕ ವಲಯದಲ್ಲಿ ಲಭ್ಯವಿದೆ" ಎಂದು ಅವರು ಹೇಳಿದರು.

ವೈವಿಧ್ಯಮಯ ಪೋರ್ಟ್‌ಫೋಲಿಯೊ

ಎಲ್‌ಐಸಿ ಒಂದು ಸಣ್ಣ ಏಕ-ಉದ್ದೇಶ ನಿಧಿಯಲ್ಲ, ಆದರೆ ಭಾರತದ ಅತಿದೊಡ್ಡ ಸಾಂಸ್ಥಿಕ ಹೂಡಿಕೆದಾರರಾಗಿದ್ದು, ರೂ. 41 ಲಕ್ಷ ಕೋಟಿಗೂ ಹೆಚ್ಚು ಆಸ್ತಿಯನ್ನು ಹೊಂದಿದೆ. ಇದು ಸಾರ್ವಜನಿಕವಾಗಿ ಪಟ್ಟಿ ಮಾಡಲಾದ 351 ಷೇರುಗಳಲ್ಲಿ (2025ರ ಆರಂಭದಲ್ಲಿ) ಹೂಡಿಕೆ ಮಾಡುತ್ತದೆ. ಇದು ಪ್ರತಿಯೊಂದು ಪ್ರಮುಖ ವ್ಯಾಪಾರ ಗುಂಪು ಮತ್ತು ವಲಯವನ್ನು ವ್ಯಾಪಿಸಿದೆ. ಭಾರತದ ಅಗ್ರ 500 ಕಂಪನಿಗಳಲ್ಲಿ ಇದರ ಹೂಡಿಕೆ ಮೌಲ್ಯವು 2014ರಿಂದ 1.56 ಲಕ್ಷ ಕೋಟಿಯಿಂದ ರೂ. 15.6 ಲಕ್ಷ ಕೋಟಿಗೆ ಹತ್ತು ಪಟ್ಟು ಹೆಚ್ಚಾಗಿದೆ. ಇದು ಬಲವಾದ ನಿಧಿ ನಿರ್ವಹಣೆಯನ್ನು ಪ್ರತಿಬಿಂಬಿಸುತ್ತದೆ. ಎಲ್‌ಐಸಿ ಗಣನೀಯ ಸರ್ಕಾರಿ ಬಾಂಡ್‌ಗಳು ಮತ್ತು ಕಾರ್ಪೊರೇಟ್ ಸಾಲವನ್ನು ಸಹ ಹೊಂದಿದೆ.

ಆರೋಪಗಳಿಗೆ ಪ್ರತಿಕ್ರಿಯೆ

ಭಾರತದ ಎರಡನೇ ಅತ್ಯಂತ ಶ್ರೀಮಂತ ವ್ಯಕ್ತಿ ಗೌತಮ್ ಅದಾನಿ ನೇತೃತ್ವದ ಅದಾನಿ ಗ್ರೂಪ್‌ನ ಒಟ್ಟು ಸಾಲದ ಶೇಕಡಾ ಎರಡಕ್ಕಿಂತ ಕಡಿಮೆ ಮೊತ್ತವನ್ನು ಎಲ್‌ಐಸಿ ಹೊಂದಿದೆ. ವಾಷಿಂಗ್ಟನ್ ಪೋಸ್ಟ್ ವರದಿಯನ್ನು ಪ್ರಕಟಿಸಿದಾಗ, ಅದಾನಿ ಗುಂಪಿನ ಕಂಪನಿಗಳಲ್ಲಿ ತನ್ನ ಹೂಡಿಕೆಗಳನ್ನು ಸ್ವತಂತ್ರವಾಗಿ ಮಾಡಲಾಗಿದೆ ಮತ್ತು ಅದರ ಮಂಡಳಿ-ಅನುಮೋದಿತ ನೀತಿಗಳನ್ನು ಅನುಸರಿಸಲಾಗಿದೆ ಎಂದು ಎಲ್‌ಐಸಿ ಹೇಳಿತ್ತು.

"ಹಣಕಾಸು ಸೇವೆಗಳ ಇಲಾಖೆ (ಕೇಂದ್ರ ಹಣಕಾಸು ಸಚಿವಾಲಯದಲ್ಲಿ) ಅಥವಾ ಯಾವುದೇ ಇತರ ಸಂಸ್ಥೆಯು ಅಂತಹ ಹೂಡಿಕೆ ನಿರ್ಧಾರಗಳಲ್ಲಿ ಯಾವುದೇ ಪಾತ್ರವನ್ನು ಹೊಂದಿಲ್ಲ" ಎಂದು ಎಲ್‌ಐಸಿ ಎಕ್ಸ್‌ನಲ್ಲಿ ಹೇಳಿಕೆಯಲ್ಲಿ ತಿಳಿಸಿದೆ. "ಹೂಡಿಕೆ ನಿರ್ಧಾರಗಳನ್ನು ಎಲ್‌ಐಸಿ ಮಂಡಳಿ-ಅನುಮೋದಿತ ನೀತಿಗಳ ಪ್ರಕಾರ ಸ್ವತಂತ್ರವಾಗಿ ತೆಗೆದುಕೊಳ್ಳುತ್ತದೆ." "ಎಲ್‌ಐಸಿ ಅತ್ಯುನ್ನತ ಮಟ್ಟದ ಶ್ರದ್ಧೆಯ ಮಾನದಂಡಗಳನ್ನು ಖಚಿತಪಡಿಸಿದೆ. ಅದರ ಎಲ್ಲ ಹೂಡಿಕೆ ನಿರ್ಧಾರಗಳನ್ನು ಅದರ ಎಲ್ಲಾ ಪಾಲುದಾರರ ಹಿತದೃಷ್ಟಿಯಿಂದ ಕಾಯಿದೆಗಳು ಮತ್ತು ನಿಯಂತ್ರಕ ಮಾರ್ಗಸೂಚಿಗಳಲ್ಲಿನ ಅಸ್ತಿತ್ವದಲ್ಲಿರುವ ನೀತಿಗಳ ನಿಬಂಧನೆಗಳಿಗೆ ಅನುಸಾರವಾಗಿ ಕೈಗೊಳ್ಳಲಾಗಿದೆ."