ಮೇಕ್‌ ಇನ್‌ ಇಂಡಿಯಾ ಒಪ್ಪಿಕೊಂಡಿದ್ದಕ್ಕೆ ರಾಹುಲ್‌ಗೆ ಧನ್ಯವಾದ ಹೇಳಿದ ವೈಷ್ಣವ್

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರ 'ಮೇಕ್‌-ಇನ್‌-ಇಂಡಿಯಾ' ಕಾರ್ಯಕ್ರಮದ ಯಶಸ್ಸನ್ನು ಲೋಕಸಭೆ ವಿರೋಧ ಪಕ್ಷದ ನಾಯಕ ರಾಹುಲ್‌ ಗಾಂಧಿ ಅವರು ಒಪ್ಪಿಕೊಂಡಿದ್ದಕ್ಕಾಗಿ ಧನ್ಯವಾದ ಅರ್ಪಿಸುವುದಾಗಿ ಕೇಂದ್ರ ಎಲೆಕ್ಟ್ರಾನಿಕ್ಸ್‌ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವ ಅಶ್ವಿನಿ ವೈಷ್ಣವ್‌ ಹೇಳಿದ್ದಾರೆ.

ಬೆಂಗಳೂರಿನ ದೇವನಹಳ್ಳಿ ಬಳಿಯ ಕಾರ್ಖಾನೆಗೆ 'ಆಯಪಲ್‌' ಕಂಪನಿಯ ಪೂರೈಕೆದಾರ 'ಫಾಕ್ಸ್‌ಕಾನ್‌' ಸಾವಿರಾರು ಕಾರ್ಮಿಕರನ್ನು ನೇಮಿಸಿಕೊಂಡಿದೆ ಎಂದು ಕಾಂಗ್ರೆಸ್‌ ನಾಯಕ ರಾಹುಲ್‌ ಗಾಂಧಿ ಅವರು ಫೇಸ್‌ಬುಕ್‌ನಲ್ಲಿ ಮಾಡಿದ್ದ ಪೋಸ್ಟ್‌ಗೆ ವೈಷ್ಣವ್‌ ಪ್ರತಿಕ್ರಿಯಿಸಿದ್ದಾರೆ.

'ಕೇವಲ ಎಂಟು ತಿಂಗಳಲ್ಲಿ 30,000 ಸಿಬ್ಬಂದಿಯನ್ನು ನೇಮಿಸಿಕೊಳ್ಳಲಾಗಿದೆ. ಈ ಘಟಕ ಹೆಚ್ಚಾಗಿ ಮಹಿಳೆಯರ ನೇತೃತ್ವದಲ್ಲಿದ್ದು, ಸುಮಾರು ಶೇ 80ರಷ್ಟು ಮಹಿಳೆಯರೇ ಕಾರ್ಯನಿರ್ವಹಿಸುತ್ತಿದ್ದಾರೆ. ಇದರಲ್ಲಿ ಹೆಚ್ಚಿನವರು 19ರಿಂದ 24ರ ವಯೋಮಾನದವರು' ಎಂದು ರಾಹುಲ್‌ ಪೋಸ್ಟ್‌ನಲ್ಲಿ ಉಲ್ಲೇಖಿಸಿದ್ದಾರೆ.

'ಕರ್ನಾಟಕವು ಈ ಪ್ರಮಾಣ ಮತ್ತು ವೇಗದಲ್ಲಿ ಉತ್ಪಾದನೆಗೆ ಬೇಕಾದ ಪರಿಸರ ವ್ಯವಸ್ಥೆಯನ್ನು ಸೃಷ್ಟಿಸುವ ಮೂಲಕ ಮಾದರಿಯಾಗಿದೆ. ನಾವು ನಿರ್ಮಿಸಬೇಕಾದ ಭಾರತ ಇದಾಗಿದೆ' ಎಂದು ಅವರು ಹೇಳಿದ್ದಾರೆ.