ಮಕರ ಬೆಳಕು ದಿನದಂದು 30,000 ಜನರಿಗೆ ಮಾತ್ರ ವರ್ಚುವಲ್ ಕ್ಯೂ ಬುಕಿಂಗ್- ಪಾಸ್ ಇಲ್ಲದವರಿಗೆ ಮತ್ತು ದಿನಾಂಕ ಮತ್ತು ಸಮಯ ಮೀರಿದವರಿಗೆ ಪ್ರವೇಶಕ್ಕಿಲ್ಲ ಅವಕಾಶ-ಹೈಕೋರ್ಟ್ ಕಟ್ಟುನಿಟ್ಟಿನ ಸೂಚನೆ

ಕೊಚ್ಚಿ: ಮಕರ ಬೆಳಕು ಸಂದರ್ಭದಲ್ಲಿ ಶಬರಿಮಲೆಯಲ್ಲಿ ಜನದಟ್ಟಣೆಯನ್ನು ನಿಯಂತ್ರಿಸಲು ಹೈಕೋರ್ಟ್ ಕಟ್ಟುನಿಟ್ಟಿನ ಸೂಚನೆಗಳನ್ನು ನೀಡಿದೆ.

ಯಾತ್ರಿಕರಿಗೆ ಕುಡಿಯುವ ನೀರು, ತಿಂಡಿ ಮತ್ತು ಆಹಾರವನ್ನು ಖಚಿತಪಡಿಸಿಕೊಳ್ಳಬೇಕು. 14 ನೇ ತಾರೀಖಿನಂದು ಬೆಳಿಗ್ಗೆ 10 ಗಂಟೆಯ ನಂತರ ನಿಲಕ್ಕಲ್ ನಿಂದ ಪಂಪಾಗೆ ಮತ್ತು ಬೆಳಿಗ್ಗೆ 11 ಗಂಟೆಯ ನಂತರ ಪಂಪಾದಿಂದ ಸನ್ನಿಧಾನಕ್ಕೆ ಯಾತ್ರಿಕರಿಗೆ ಅವಕಾಶವಿರುವುದಿಲ್ಲ. 

ಮಕರ ಬೆಳಕಿನ ದಿನ ಜ.14 ರಂದು ಮಾತ್ರ 30,000 ಜನರಿಗೆ ವರ್ಚುವಲ್ ಕ್ಯೂ ಬುಕಿಂಗ್ ಇರಲಿದೆ. 13 ರಂದು 35,000 ಜನರಿಗೆ, 15 ರಿಂದ 18 ರವರೆಗೆ 50,000 ಜನರಿಗೆ ಮತ್ತು 19 ರಂದು 30,000 ಜನರಿಗೆ ಪಾಸ್‍ಗಳನ್ನು ನೀಡಲಾಗುವುದು. ಸ್ಪಾಟ್ ಬುಕಿಂಗ್ ಅನ್ನು ಈ ಹಿಂದೆ 5,000 ಜನರಿಗೆ ಸೀಮಿತಗೊಳಿಸಲಾಗಿತ್ತು.

ಪಾಸ್ ಗಳಿಲ್ಲದವರಿಗೆ ಮತ್ತು ದಿನಾಂಕ ಮತ್ತು ಸಮಯವನ್ನು ತಪ್ಪಿಸುವವರಿಗೆ ಪ್ರವೇಶವನ್ನು ಅನುಮತಿಸಲಾಗುವುದಿಲ್ಲ. ನ್ಯಾಯಮೂರ್ತಿ ವಿ ರಾಜಾ ವಿಜಯರಾಘವನ್ ಮತ್ತು ನ್ಯಾಯಮೂರ್ತಿ ಕೆ ವಿ ಜಯಕುಮಾರ್ ಅವರನ್ನೊಳಗೊಂಡ ದೇವಸ್ವಂ ಪೀಠವು ಈ ಆದೇಶವನ್ನು ನೀಡಿದೆ.

ಏತನ್ಮಧ್ಯೆ, ಅಯ್ಯಪ್ಪ ವಿಗ್ರಹದ ಮೇಲೆ ಅಲಂಕರಿಸುವ ತಿರುವಾಭರಣ(ಪವಿತ್ರ ಆಭರಣ)ವನ್ನು ಹೊತ್ತ ಮೆರವಣಿಗೆ ಸೋಮವಾರ ಪಂದಳಂ ಅರಮನೆಯಿಂದ ಹೊರಡಲಿದೆ. ಸೋಮವಾರ ಮಧ್ಯಾಹ್ನ 1 ಗಂಟೆಗೆ ಮೆರವಣಿಗೆ ಪ್ರಾರಂಭವಾಗಲಿದೆ.