ಮುರಿದ ಕೈಕಂಬ; ಸ್ವರ್ಣಗಿರಿ ಸೇತುವೆ ಅಪಾಯದಲ್ಲಿ

ಉಪ್ಪಳ: ಮಂಗಲ್ಪಾಡಿ ಪಂಚಾಯತಿಯ ಮುಟ್ಟ ಮಾಣಿಬಿತ್ತಿಲಿನ ಸ್ವರ್ಣಗಿರಿ ಸೇತುವೆಯ ಮುರಿದ ಕೈಕಂಬ ಪ್ರಯಾಣಿಕರಿಗೆ ಅಪಾಯವನ್ನುಂಟುಮಾಡುತ್ತಿದೆ. ವಾಹನಗಳು ಹಾದುಹೋದಾಗ ವಿದ್ಯಾರ್ಥಿಗಳು ಸೇರಿದಂತೆ ಪಾದಚಾರಿಗಳು ಮತ್ತು ಜಾನುವಾರುಗಳಿಗೆ ಅಪಾಯ ಎದುರಾಗಿದೆ. ಸೇತುವೆಯ ಕೆಳಭಾಗವು ಆಳವಾಗಿದೆ. ಈ ಮಾರ್ಗದ ಮೂಲಕ ಸಮುದ್ರ ವೀಕ್ಷಣೆಗಾಗಿ ವಿವಿಧ ಭಾಗಗಳಿಂದ ಅನೇಕ ಜನರು ಆಗಮಿಸುತ್ತಾರೆ. 45 ವರ್ಷಗಳ ಹಿಂದೆ ನಿರ್ಮಿಸಲಾದ ಸೇತುವೆಯ ಕೈಕಂಬವು ಇದೀಗ ಮುರಿದುಹೋಗಿದೆ. ಇತರ ಭಾಗಗಳು ಯಾವುದೇ ಸಮಯದಲ್ಲಿ ಕುಸಿಯುವ ಸಾಧ್ಯತೆಯಿದೆ. ಸೇತುವೆಯ ಬಳಿ ಅಣೆಕಟ್ಟು ಕೂಡ ಇದೆ.

ಕಳೆದ ವರ್ಷ, ಅಣೆಕಟ್ಟಿನ ಬಳಿಯಿಂದ ನದಿ ದಂಡೆಗೆ ಲೋಡ್‍ಗಳಷ್ಟು ಮರಳನ್ನು ಸ್ಥಳಾಂತರಿಸಲಾಯಿತು. ಸ್ಥಳೀಯರು ಅದನ್ನು ತಡೆ ಹಿಡಿದು ನಿಲ್ಲಿಸಿದ ಬಳಿಕ ಮರಳು ಗಣಿಗಾರಿಕೆಯನ್ನು ನಿಲ್ಲಿಸಲಾಯಿತು. ಅಣೆಕಟ್ಟಿನ ಬಳಿಯಿಂದ ಮರಳನ್ನು ತೆಗೆದ ಹಿನ್ನೆಲೆಯಲ್ಲಿ, ಅಣೆಕಟ್ಟಿನ ಕೆಳಭಾಗದಲ್ಲಿರುವ ಕಾಂಕ್ರೀಟ್ ಭಾಗದಲ್ಲಿ ಬಿರುಕು ಉಂಟಾಗಿದ್ದು, ಅಣೆಕಟ್ಟಿನ ಮೇಲೆ ಪರಿಣಾಮ ಬೀರಿದೆ ಎಂದು ಸ್ಥಳೀಯರು ಹೇಳುತ್ತಾರೆ. ಕೈಕಂಬವನ್ನು ನಿರ್ಮಿಸಬೇಕು ಮತ್ತು ಅಣೆಕಟ್ಟಿನ ಕೆಳಭಾಗದಲ್ಲಿರುವ ಬಿರುಕಿಗೆ ಪರಿಹಾರ ಕಲ್ಪಿಸಬೇಕು ಎಂದು ಸ್ಥಳೀಯರು ಒತ್ತಾಯಿಸಿದ್ದಾರೆ.