ಮೈಬಣ್ಣದ ಕೊರತೆ, ಶಿಕ್ಷಣದ ಕೊರತೆ... ತ್ರಿವಳಿ ತಲಾಖ್ ನೀಡಿದ ಪತಿ- ಒಂಬತ್ತು ದಿನಗಳಿಂದ ಮಹಿಳೆ ಮತ್ತು ಪುತ್ರ ವರಾಂಡಾದಲ್ಲಿ ವಾಸ

ಕೋಝಿಕೋಡ್: ಫಾರೋಖ್‌ನಲ್ಲಿ ಪತಿಯಿಂದ ತ್ರಿವಳಿ ತಲಾಖ್ ಪಡೆದ ಮಹಿಳೆ ಮತ್ತು ಆಕೆಯ ಪುತ್ರ ಕಳೆದ ಒಂಬತ್ತು ದಿನಗಳಿಂದ ತನ್ನ ಗಂಡನ ಮನೆಯ ವರಾಂಡಾದಲ್ಲಿ ವಾಸಿಸುತ್ತಿದ್ದಾರೆ. ಹಸೀನಾ ತನ್ನ ಒಂಬತ್ತು ವರ್ಷದ ಮಗನೊಂದಿಗೆ ಕಷ್ಟದ ಪರಿಸ್ಥಿತಿಯಲ್ಲಿದ್ದಾರೆ. 

ಐದು ವರ್ಷಗಳ ಹಿಂದೆ, ಫಾರೋಖ್ ಮೂಲದ ಮೊಹಮ್ಮದ್ ಫಾಸಿಲ್ ಹಸೀನಾಗೆ ತಲಾಖ್ ಉಚ್ಚರಿಸಿದರು. ಕಾನೂನು ಹೋರಾಟದ ನಂತರ, ನ್ಯಾಯಾಲಯವು ತನ್ನ ಪತಿಯೊಂದಿಗೆ ವಾಸಿಸಲು ಆದೇಶಿಸಿತು, ಆದರೆ ಮೊಹಮ್ಮದ್ ಫಾಸಿಲ್ ಮನೆಗೆ ಬೀಗ ಹಾಕಿ ಬೇರೆ ಸ್ಥಳಕ್ಕೆ ತೆರಳಿದ್ದಾರೆ.

ತನ್ನ ಶೈಕ್ಷಣಿಕ ಅರ್ಹತೆ ಮತ್ತು ಮೈಬಣ್ಣದ ಕಾರಣ ತನ್ನ ಪತಿ ತನಗೆ ತಲಾಖ್ ನೀಡಿರುವುದಾಗಿ  ಮಹಿಳೆ ಹೇಳುತ್ತಾರೆ. 2018 ರಲ್ಲಿ ಈದ್ ಆಚರಣೆಗಾಗಿ ತನ್ನ ಮನೆಗೆ ಹೋಗಿದ್ದ ಹಸೀನಾ ಅವರನ್ನು ನಂತರ ಅವರ ಪತಿ ಕರೆದೊಯ್ದಿರಲಿಲ್ಲ. ಆಕೆಗೆ ಮೈಬಣ್ಣದ ಕೊರತೆ ಮತ್ತು ಸಾಕಷ್ಟು ಶೈಕ್ಷಣಿಕ ಅರ್ಹತೆಗಳಿಲ್ಲ ಎಂಬ ಕಾರಣಕ್ಕೆ ಅವರನ್ನು ದೂರವಿಡಲಾಗಿತ್ತು. ಏತನ್ಮಧ್ಯೆ, ತನ್ನ ಪತಿ ಬೇರೆ ಮಹಿಳೆಯನ್ನು ಮದುವೆಯಾಗಿ ಆ ಪತ್ನಿ ಮತ್ತು ಮಗುವಿನೊಂದಿಗೆ ಬೇರೆ ಮನೆಯಲ್ಲಿ ವಾಸಿಸುತ್ತಿದ್ದಾರೆ ಎಂದು ಮಹಿಳೆ ಹೇಳಿದ್ದಾರೆ. ತನ್ನ ಪತಿ ತಲಾಖ್ ಘೋಷಿಸಿರುವುದಾಗಿ ಹೇಳಿಕೊಂಡರೂ, ಕಾನೂನುಬದ್ಧ ವಿಚ್ಛೇದನವಿಲ್ಲ ಎಂದು ಮಹಿಳೆ ಹೇಳಿದ್ದಾರೆ. ಮಹಿಳೆ ತನ್ನ ಪತಿಯೊಂದಿಗೆ ವಾಸಿಸಲು ನ್ಯಾಯಾಲಯದ ಆದೇಶದೊಂದಿಗೆ ಬಂದಿದ್ದರು, ಆದರೆ ಆಕೆಯ ಪತಿ ಮತ್ತು ಕುಟುಂಬಕ್ಕೆ ಈ ವಿಷಯ ತಿಳಿದಾಗ ಅವರು ಮನೆಗೆ ಬೀಗ ಹಾಕಿ ತರಳಿದರು. ಮಹಿಳೆ ಮತ್ತು ಆಕೆಯ ಮಗ ಮನೆಯ ವರಾಂಡಾದಲ್ಲಿ ವಾಸಿಸುತ್ತಿರುವಾಗ ಮೂಲಭೂತ ಕೆಲಸಗಳನ್ನು ಸಹ ಮಾಡದಂತೆ ಅತ್ತೆ-ಮಾವಂದಿರು ತಡೆಯುತ್ತಿದ್ದಾರೆ. ಕುಡಿಯಲು ನಲ್ಲಿಯಿಂದ ನೀರು ತೆಗೆದುಕೊಳ್ಳದಂತೆ ಸಂಪರ್ಕವನ್ನು ಮುಚ್ಚಿದ್ದಾರೆ ಮತ್ತು ಬಾವಿಯಿಂದ ನೀರು ಸೇದದಂತೆ ಹಗ್ಗಗಳು ಮತ್ತು ಇತರ ವಸ್ತುಗಳನ್ನು ಕತ್ತರಿಸಿದ್ದಾರೆ. ಮಹಿಳೆಯ ಸಹೋದರರು ಆಹಾರ ತರದಂತೆ ತಡೆಯಲು ಪ್ರಯತ್ನಿಸುತ್ತಿದ್ದಾರೆ. ಹಸೀನಾ ತನ್ನ ಪತಿಯೊಂದಿಗೆ ವಾಸಿಸಲು ನ್ಯಾಯಾಲಯದ ಆದೇಶವನ್ನು ಹೊಂದಿದ್ದರೂ, ಮನೆಯ ಬೀಗ ಮುರಿದು ಒಳಗೆ ಬಿಡಲು ಕಾನೂನು ಅಡಚಣೆ ಇದೆ ಎಂದು ಪೊಲೀಸರು ಅಭಿಪ್ರಾಯಪಟ್ಟಿದ್ದಾರೆ.