ಭಾರತದ ಅತಿದೊಡ್ಡ QSR ವೇದಿಕೆ ರಚನೆ: ಪಿಜಾ ಹಟ್‌ ಜೊತೆ ವಿಲೀನವಾಗಲಿದೆ KFC ರೆಸ್ಟೋರೆಂಟ್‌!

ನವದೆಹಲಿ: ಭಾರತದಲ್ಲಿ ಕೆಎಫ್‌ಸಿ ಮತ್ತು ಪಿಜ್ಜಾ ಹಟ್‌ನಂತಹ ಕ್ವಿಕ್ ಸರ್ವೀಸ್ ರೆಸ್ಟೋರೆಂಟ್‌ಗಳನ್ನು ನಿರ್ವಹಿಸುತ್ತಿರುವ ಸಫೈರ್ ಫುಡ್ಸ್ ಹಾಗೂ ದೇವಯಾನಿ ಇಂಟರ್‌ನ್ಯಾಷನಲ್ ಕಂಪನಿಗಳು ಜನವರಿ 1ರಂದು ವಿಲೀನದ ಯೋಜನೆಯನ್ನು ಅಧಿಕೃತವಾಗಿ ಘೋಷಿಸಿವೆ. ಈ ವಿಲೀನದ ಮೂಲಕ ದೇಶದ ಅತಿದೊಡ್ಡ ಕ್ವಿಕ್ ಸರ್ವೀಸ್ ರೆಸ್ಟೋರೆಂಟ್ (QSR) ವೇದಿಕೆ ರೂಪುಗೊಳ್ಳಲಿದೆ.

ಈ ವಿಲೀನದೊಂದಿಗೆ ಯಮ್! ಬ್ರಾಂಡ್ಸ್‌ನ ಎರಡು ಪ್ರಮುಖ ಫ್ರ್ಯಾಂಚೈಸಿ ಪಾಲುದಾರರು ಒಂದೇ ಸ್ಕೇಲ್ಡ್ QSR ಪ್ಲಾಟ್‌ಫಾರ್ಮ್ ಅಡಿಯಲ್ಲಿ ಒಟ್ಟುಗೂಡಲಿದ್ದಾರೆ. ಭಾರತದಲ್ಲಿ ಈಗಾಗಲೇ ಕೆಎಫ್‌ಸಿ ಮತ್ತು ಪಿಜ್ಜಾ ಹಟ್ ರೆಸ್ಟೋರೆಂಟ್‌ಗಳನ್ನು ನಿರ್ವಹಿಸುತ್ತಿರುವ ಈ ಎರಡು ಸಂಸ್ಥೆಗಳ ಒಗ್ಗೂಡಿಕೆಯಿಂದ ಕಾರ್ಯಾಚರಣಾ ದಕ್ಷತೆ ಹೆಚ್ಚಲಿದೆ ಎಂದು ನಿರೀಕ್ಷಿಸಲಾಗಿದೆ.

ಷೇರುದಾರರಿಗೆ ಲಾಭ ಏನು?

ವಿಲೀನದ ಭಾಗವಾಗಿ, ಸಫೈರ್ ಫುಡ್ಸ್ ಕಂಪನಿ ಷೇರು ವಿನಿಮಯ ಮಾದರಿಯಲ್ಲಿ ದೇವಯಾನಿ ಇಂಟರ್‌ನ್ಯಾಷನಲ್‌ಗೆ ವಿಲೀನಗೊಳ್ಳಲಿದೆ. ಒಪ್ಪಂದದ ಪ್ರಕಾರ, ಸಫೈರ್ ಫುಡ್ಸ್‌ನ ಪ್ರತಿ 100 ಷೇರುಗಳಿಗೆ ದೇವಯಾನಿ ಇಂಟರ್‌ನ್ಯಾಷನಲ್‌ನ 177 ಷೇರುಗಳನ್ನು ನೀಡಲಾಗುತ್ತದೆ.

ಅಂದರೆ ದಾಖಲೆ ದಿನಾಂಕದಂದು ಸಫೈರ್ ಫುಡ್ಸ್‌ನ 100 ಷೇರುಗಳನ್ನು ಹೊಂದಿರುವ ಷೇರುದಾರರು ವಿಲೀನ ಪೂರ್ಣಗೊಂಡ ಬಳಿಕ ದೇವಯಾನಿ ಇಂಟರ್‌ನ್ಯಾಷನಲ್‌ನ 177 ಷೇರುಗಳನ್ನು ಪಡೆಯಲಿದ್ದಾರೆ. ದಾಖಲೆ ದಿನಾಂಕವನ್ನು ಇನ್ನೂ ಘೋಷಿಸಲಾಗಿಲ್ಲ.

ವಿಲೀನ ಸಮಯರೇಖೆ:

ವಿಲೀನ ಪ್ರಕ್ರಿಯೆಯು 15 ರಿಂದ 18 ತಿಂಗಳೊಳಗೆ ಪೂರ್ಣಗೊಳ್ಳುವ ನಿರೀಕ್ಷೆಯಿದೆ. ವಿಲೀನ ಅನುಮೋದನೆ ಮತ್ತು ಹೆಚ್ಚುವರಿ ಪ್ರದೇಶ ಪರವಾನಗಿ ಶುಲ್ಕಕ್ಕಾಗಿ ದೇವಯಾನಿ ಇಂಟರ್‌ನ್ಯಾಷನಲ್ ಯಮ್! ಇಂಡಿಯಾಗೆ ಒಮ್ಮೆ ಮಾತ್ರ ಶುಲ್ಕ ಪಾವತಿಸಲಿದೆ.

ವಿಲೀನಕ್ಕೂ ಮುನ್ನ ಆರ್ಕ್ಟಿಕ್ ಇಂಟರ್‌ನ್ಯಾಷನಲ್ ಎಂಬ ಸಮೂಹ ಕಂಪನಿ ಸಫೈರ್ ಫುಡ್ಸ್‌ನ ಪಾವತಿಸಿದ ಇಕ್ವಿಟಿ ಬಂಡವಾಳದ ಸುಮಾರು 18.5 ಶೇಕಡಾವನ್ನು ಅಸ್ತಿತ್ವದಲ್ಲಿರುವ ಪ್ರವರ್ತಕರಿಂದ ಸ್ವಾಧೀನಪಡಿಸಿಕೊಳ್ಳಲಿದೆ.

ಯಮ್! ಬ್ರಾಂಡ್ಸ್ ಈ ವಿಲೀನಕ್ಕೆ ತನ್ನ ಅನುಮೋದನೆ ನೀಡಿದೆ. ಜೊತೆಗೆ, ಹೈದರಾಬಾದ್‌ನಲ್ಲಿ ಯಮ್! ಇಂಡಿಯಾ ನಿರ್ವಹಿಸುತ್ತಿದ್ದ 19 ಕೆಎಫ್‌ಸಿ ರೆಸ್ಟೋರೆಂಟ್‌ಗಳನ್ನು ದೇವಯಾನಿ ಇಂಟರ್‌ನ್ಯಾಷನಲ್ ಸ್ವಾಧೀನಪಡಿಸಿಕೊಳ್ಳಲಿದೆ.

ಈ ವಿಲೀನವು ಭಾರತದಲ್ಲಿ QSR ಕ್ಷೇತ್ರದಲ್ಲಿ ಮಾರುಕಟ್ಟೆ ನಾಯಕನನ್ನು ರೂಪಿಸಲಿದೆ ಎಂದು ದೇವಯಾನಿ ತಿಳಿಸಿದ್ದು, ಎರಡನೇ ಪೂರ್ಣ ವರ್ಷದ ಕಾರ್ಯಾಚರಣೆ ವೇಳೆಗೆ ವರ್ಷಕ್ಕೆ 210 ರಿಂದ 225 ಕೋಟಿ ರೂ.ಗಳ ಒಟ್ಟಾರೆ ಸಿನರ್ಜಿಯನ್ನು ನಿರೀಕ್ಷಿಸಲಾಗುತ್ತಿದೆ ಎಂದು ಹೇಳಿದೆ.