ಕೇರಳವು ಕಣ್ಣೂರಿನಲ್ಲಿ ಕೊನೆಗೊಳ್ಳುತ್ತದೆಯೇ? ಗಂಟೆಗಟ್ಟಲೆ ಕಾಯಬೇಕಾಗಿದೆ ರೈಲಿಗಾಗಿ: ಇದು ಬರೀ ರೈಲಲ್ಲ-ವ್ಯವಸ್ಥೆಯ ಸೋಲು

ಕಾಸರಗೋಡು: ಐದೈದು ನಿಮಿಷಗಳ ಅಂತರದಲ್ಲಿ ಸಂಚರಿಸುವ ಮೆಟ್ರೋ ರೈಲುಗಳ ಯುಗದಲ್ಲಿಯೂ, ಕಾಸರಗೋಡಿನ ನಿವಾಸಿಗಳು ರೈಲಿಗಾಗಿ 3 ಗಂಟೆಗಳವರೆಗೆ ಕಾಯಬೇಕಾದ ದುಸ್ಥಿತಿ ಜನರನ್ನು ಹೈರಾಣಗೊಳಿಸುತ್ತಿದೆ. ಆಗಮಿಸುವ ರೈಲುಗಳಲ್ಲಿಯೂ,ಜಿಲ್ಲೆಯ ವಿವಿಧೆಡೆ ತಲುಪುವಾಗ ನಿಲ್ಲಲು ಅಥವಾ ಬೆರಳೂರಲೂ ಸ್ಥಳವಿರುವುದಿಲ್ಲ. ಹತ್ತಿರದ ಪ್ರಮುಖ ನಗರವಾದ ಮಂಗಳೂರು ಅಥವಾ ನೆರೆಯ ಜಿಲ್ಲೆ ಕಣ್ಣೂರು ಎದುರಿಸದ ಈ ದುಃಸ್ಥಿತಿಯನ್ನು ಕಾಸರಗೋಡು ಮಾತ್ರ ಅನುಭವಿಸುತ್ತಿರುವುದು ಯಾರ ಲೋಪವೆಂಬುದೂ ಅರ್ಥವಾಗುತ್ತಿಲ್ಲ. 

ಮಂಗಳೂರು ಮತ್ತು ಕಣ್ಣೂರಿನಲ್ಲಿ ಕೊನೆಗೊಳ್ಳುವ ಕೆಲವು ರೈಲುಗಳನ್ನು ಕಾಸರಗೋಡಿನ ಮೂಲಕ ವಿಸ್ತರಿಸುವುದು ಇದಕ್ಕಿರುವ ಪರಿಹಾರವಾಗಿದೆ. ಅದಕ್ಕೆ ಯಾವುದೇ ಕ್ರಮ ಕೈಗೊಳ್ಳುತ್ತಿಲ್ಲ. ಮಂಗಳೂರಿನಿಂದ ಕಾಸರಗೋಡಿಗೆ ಬರಲು ಬಯಸಿದರೆ, ರೈಲುಗಳ ನಡುವಿನ ಮಧ್ಯಂತರವು ಹೆಚ್ಚಾಗಿ 3 ಗಂಟೆಗಳಿರುತ್ತದೆ. ಮತ್ತೊಂದೆಡೆ, ಕೋಝಿಕ್ಕೋಡ್‍ನಿಂದ, ಸಂಜೆ 6 ಗಂಟೆಯ ನಂತರ, ಸಾಮಾನ್ಯ ಜನರು ಗಂಟೆಗಳಷ್ಟು ಕಾಲ ಕಾಯಬೇಕಾಗುತ್ತಿದೆ. 

ಮಧ್ಯ ಮತ್ತು ದಕ್ಷಿಣ ಜಿಲ್ಲೆಗಳೊಂದಿಗೆ ರೈಲುಗಳ ಸಂಖ್ಯೆ ಮತ್ತು ಅನುಕೂಲಕರ ಸಮಯಗಳನ್ನು ಹೋಲಿಸಿದರೆ, ಉತ್ತರ ಮಲಬಾರ್‍ನಲ್ಲಿ ದಶಕಗಳಿಂದ ಪ್ರಯಾಣಿಕರಿಗೆ ಅಧಿಕಾರಿಗಳು ತೋರಿಸುತ್ತಿರುವ ನಿರ್ಲಕ್ಷ್ಯದ ನಿಜವಾದ ಚಿತ್ರಣ ಹೊರಬರುತ್ತದೆ. ನಾವು ದಕ್ಷಿಣಕ್ಕೆ ಹೋದಂತೆ ರೈಲುಗಳು ನಿಮಿಷಗಳ ಅಂತರದಲ್ಲಿ ಸಂಚರಿಸುತ್ತವೆ, ಆದರೆ ಇಲ್ಲಿ ರೈಲುಗಳು ಗಂಟೆಗಳ ಅಂತರದಲ್ಲಿ ಓಡುತ್ತವೆ.

ದೀರ್ಘ ಅಂತರಗಳು; ಬಿಡುವಿಲ್ಲದ ಪ್ರಯಾಣಗಳು:

ರೈಲು ಸಮಯಗಳಲ್ಲಿನ ನ್ಯೂನತೆಗಳು ಜನರಿಗೆ ಹೆಚ್ಚಿನ ಅನಾನುಕೂಲತೆಯನ್ನುಂಟುಮಾಡುತ್ತಿವೆ. ಮಂಗಳೂರಿನಿಂದ ಬೆಳಿಗ್ಗೆ 11.05 ಕ್ಕೆ ಹೊರಡುವ ಇಂಟರ್‍ಸಿಟಿ ಎಕ್ಸ್‍ಪ್ರೆಸ್ ನಂತರ, ಚೆನ್ನೈ ಮೇಲ್ ಮಧ್ಯಾಹ್ನ 1.55 ಕ್ಕೆ ಹೊರಡುತ್ತದೆ. ಮಧ್ಯಾಹ್ನ 2.20 ಕ್ಕೆ ಹೊರಡುವ ತಿರುವನಂತಪುರಂ ಎಕ್ಸ್‍ಪ್ರೆಸ್ ನಂತರ, ಸಂಜೆ 4.55 ಕ್ಕೆ ಹೊರಡುವ ಚೆನ್ನೈ ಸೂಪರ್‍ಫಾಸ್ಟ್ ವರೆಗೆ ಬೇರೆ ಯಾವುದೇ ರೈಲು ಇಲ್ಲ. ಸಂಜೆ 6.15 ಕ್ಕೆ ಹೊರಡುವ ಮಲಬಾರ್ ಎಕ್ಸ್‍ಪ್ರೆಸ್ ನಂತರ, ಮುಂದಿನ ದೈನಂದಿನ ರೈಲು ರಾತ್ರಿ 11.45 ಕ್ಕೆ ಹೊರಡುವ ವೆಸ್ಟ್ ಕೋಸ್ಟ್ ಎಕ್ಸ್‍ಪ್ರೆಸ್. ಸಂಜೆ 6 ಗಂಟೆಯ ನಂತರ, ತುರ್ತು ಪ್ರಯಾಣಕ್ಕೂ ಖಾಸಗಿ ವಾಹನಗಳನ್ನು ಅವಲಂಬಿಸಬೇಕಾಗಿದೆ.

ಕೇರಳ ಕಣ್ಣೂರಿನಲ್ಲಿ ಕೊನೆಗೊಳ್ಳುತ್ತದೆಯೇ?:

ಕೋಝಿಕ್ಕೋಡ್ ರೈಲು ನಿಲ್ದಾಣದಿಂದ ಕಾಸರಗೋಡಿಗೆ ಹೋಗುವ ನೇತ್ರಾವತಿ ಎಕ್ಸ್‍ಪ್ರೆಸ್ ಸಂಜೆ 6.05 ಕ್ಕೆ ಹೊರಡುತ್ತದೆ. ಅದಾದ ನಂತರ, ಕಾಸರಗೋಡಿಗೆ ದೈನಂದಿನ ಎಕ್ಸ್‍ಪ್ರೆಸ್ ರೈಲು ಇಲ್ಲ. ಹಲವು ವರ್ಷಗಳಿಂದ, ಕಾಸರಗೋಡಿನ ನಿವಾಸಿಗಳು ವಿವಿಧ ಉದ್ದೇಶಗಳಿಗಾಗಿ ಕೋಯಿಕ್ಕೋಡ್ ಮತ್ತು ಕಣ್ಣೂರಿಗೆ ಓಡಾಡುತ್ತಿದ್ದಾರೆ ಮತ್ತು ಸುಮಾರು ಒಂಬತ್ತು ರೈಲುಗಳು ಕಣ್ಣೂರಿನಲ್ಲಿ ತಮ್ಮ ಪ್ರಯಾಣವನ್ನು ಕೊನೆಗೊಳಿಸುತ್ತಿವೆ. ಅವುಗಳಲ್ಲಿ ಕೆಲವನ್ನು ಕಾಸರಗೋಡು ಅಥವಾ ಮಂಗಳೂರಿಗೆ ವಿಸ್ತರಿಸಿದರೆ, ಪ್ರಯಾಣದ ಸಮಸ್ಯೆಯನ್ನು ಪರಿಹರಿಸಬಹುದು.

ಮಂಗಳೂರು ಮತ್ತು ಕಾಸರಗೋಡಿನಲ್ಲಿ ರೈಲುಗಳನ್ನು ನಿಲ್ಲಿಸಲು ಯಾವುದೇ ಸೌಲಭ್ಯವಿಲ್ಲದಿದ್ದರೆ, ವಿಶಾಲವಾದ ಭೂಮಿಯನ್ನು ಹೊಂದಿರುವ ನೀಲೇಶ್ವರ ಮತ್ತು ಉಳ್ಳಾಲದಂತಹ ನಿಲ್ದಾಣಗಳಲ್ಲಿ ರೈಲುಗಳನ್ನು ನಿಲ್ಲಿಸಲು ರೈಲ್ವೆಗಳು ಸೌಲಭ್ಯಗಳನ್ನು ವ್ಯವಸ್ಥೆ ಮಾಡಬಹುದು. ಅಮೃತ್ ಭಾರತ್ ಎಕ್ಸ್‍ಪ್ರೆಸ್ ದಕ್ಷಿಣ ಜಿಲ್ಲೆಗಳಲ್ಲಿ ಕಿಲೋಮೀಟರ್‍ಗಳ ಅಂತರದಲ್ಲಿಯೂ ನಿಲ್ಲಲು ಅವಕಾಶವಿದ್ದರೂ, ಕಣ್ಣೂರು ಬಿಟ್ಟ ನಂತರ ಅದು ಕಾಸರಗೋಡಿನಲ್ಲಿ ಮಾತ್ರ ನಿಲ್ಲುತ್ತದೆ. ಕನಿಷ್ಠ ನಗರ ಪ್ರದೇಶಗಳಾದ ಕಾಞಂಗಾಡ್, ಕುಂಬಳೆ, ಮಂಜೇಶ್ವರ ನಿಲ್ದಾಣಗಳಿಗೆ ಅವಕಾಶ ನೀಡಬೇಕೆಂದು ಪ್ರಯಾಣಿಕರು ಒತ್ತಾಯಿಸುತ್ತಾರೆ.

ಬೇಡಿಕೆಗಳು:

ಮಂಗೂರಿನಿಂದ ಮಧ್ಯಾಹ್ನ 3.30 ಕ್ಕೆ ಹೊಸ ಪ್ಯಾಸೆಂಜರ್ ರೈಲು ಹೊರಡಲು ಅವಕಾಶ ನೀಡಬೇಕು.

ಅಂತ್ಯೋದಯ ಎಕ್ಸ್‍ಪ್ರೆಸ್ ಪ್ರತಿದಿನ ಕಾರ್ಯನಿರ್ವಹಿಸಬೇಕು.

ಪ್ರಸ್ತುತ ಕಣ್ಣೂರಿನಲ್ಲಿ ಕೊನೆಗೊಳ್ಳುವ ಆಲಪ್ಪುಳ-ಕಣ್ಣೂರು ಎಕ್ಸಿಕ್ಯುಟಿವ್ ಎಕ್ಸ್‍ಪ್ರೆಸ್, ಶೋರ್ನೂರು-ಕಣ್ಣೂರು ವಿಶೇಷ ರೈಲು (06031), ಮತ್ತು ಕೊಯಮತ್ತೂರು-ಕಣ್ಣೂರು ಪ್ಯಾಸೆಂಜರ್ (16608) ಗಳನ್ನು ಕನಿಷ್ಠ ಮಂಗಳೂರು ಅಥವಾ ಕಾಸರಗೋಡಿಗೆ ವಿಸ್ತರಿಸಬೇಕು.

ಅಭಿಮತ:

-ಒಂದು ರೈ ತೆರಳಿ ಬಳಿಕ ಮತ್ತೊಂದಕ್ಕೆ ಗಂಟೆಗಟ್ಟಲೆ ಕಾಯುವಿಕೆ ಎಂಬುದು ಈ ಕಾಲಘಟ್ಟದಲ್ಲೂ ನಮ್ಮನ್ನು ಕಾಡುತ್ತಿರುವುದು ಖಂಡನಾರ್ಹ. ಜೊತೆಗೆ ರೈಲಿನ ಬಾಗಿಲುಗಳೆಡೆಯಲ್ಲಿ, ಶೌಚಾಲಯದ ಬಳಿ ಕಿಕ್ಕಿರಿದು ನಿಂತು ಪ್ರಯಾಣಿಸಬೇಕಾದ ದುಸ್ಥಿತಿ ತೀವ್ರ ರೇಜಿಗೆ ಹುಟ್ಟಿಸುತ್ತಿದೆ. ಮಹಿಳೆಯರು, ಮಕ್ಕಳಿಗಂತೂ ಕಣ್ಣೀರು ತರಿಸುತ್ತಿದೆ. ಜನಪ್ರತಿನಿಧಿಗಳು, ಸಂಘಸಂಸ್ಥೆಗಳು ಕೇವಲ ತೋರಿಕೆಗಷ್ಟೇ ಹೇಳಿಕೆ ನೀಡುತ್ತಿದ್ದು, ಯಾವ ಕ್ರಿಯಾತ್ಮಕ ಕೆಲಸಗಳನ್ನೂ ಮಾಡುತ್ತಿಲ್ಲ. ಈ ನಿಟ್ಟಿನಲ್ಲಿ ಕೇಂದ್ರ ರೈಲ್ವೇ ಅಧಿಕೃತರು ಸಹಿತ ಉನ್ನತಾಧಿಕಾರಿಗಳಿಗೆ ನೈಜ ಸಮಸ್ಯೆ ತೋರಿಸಿ ಪರಿಹಾರ ಕಲ್ಪಿಸಲು ಕ್ರಮ ಕೈಗೊಳ್ಳಬೇಕು. ಉನ್ನತಾಧಿಕಾರಿಗಳಿಗೆ ವಿದ್ಯಾವಂತ ಯುವ ಜನರೇ ಟ್ವೀಟ್ ಮಾಡುವ ಮೂಲಕ ಮತ್ತು ಇತರ ವಿಧಾನಗಳನ್ನು ಬಳಸಿ ಸಮಸ್ಯೆ ಪರಿಹಾರಕ್ಕೆ ಮುಂದಾಗಬೇಕು.

-ರೇಷ್ಮಾ ಸುಮೇಶ್ ಕಾಸರಗೋಡು.