2036ರ ವೇಳೆಗೆ ಭಾರತದಲ್ಲಿ 23 ಕೋಟಿ ವೃದ್ಧರು: ವೃದ್ಧಾಪ್ಯದ ಆರೈಕೆಗೆ ತುರ್ತು ನೀತಿ ಬದಲಾವಣೆ ಅಗತ್ಯ

ನವದೆಹಲಿ: 2036ರ ವೇಳೆಗೆ ಭಾರತದಲ್ಲಿನ ವೃದ್ಧರ ಜನಸಂಖ್ಯೆ 23 ಕೋಟಿಗೆ ತಲುಪುವ ನಿರೀಕ್ಷೆ ಇದ್ದು, ಇದು ದೇಶದ ಒಟ್ಟು ಜನಸಂಖ್ಯೆಯ ಶೇ.15ರಷ್ಟಾಗಲಿದೆ. ಹೀಗಾಗಿ ವೃದ್ಧಾಪ್ಯ ಆರೈಕೆಯನ್ನು ಸಹ ಸಾರ್ವಜನಿಕ ಆರೋಗ್ಯದ ಪ್ರಮುಖ ಆದ್ಯತೆಯನ್ನಾಗಿ ಪರಿಗಣಿಸಬೇಕಾಗಿದೆ ಎಂದು ತಜ್ಞರು ಒತ್ತಿ ಹೇಳಿದ್ದಾರೆ.

ಡೆಲ್ಲಿ ಎಲ್ಡರ್ ಫ್ರೆಂಡ್ಲಿ ಉಪಕ್ರಮದ ಅಧ್ಯಯನದ ಪ್ರಕಾರ, ಶೇ.86ರಷ್ಟು ವೃದ್ಧರಿಗೆ ಡಿಜಿಟಲ್ ಸಾಕ್ಷರತೆಯ ಕೊರತೆ ಇದೆ. ಇದರಿಂದಾಗಿ ಆರೋಗ್ಯ ಸೇವೆಗಳು ಮತ್ತು ಆನ್ಲೈನ್ ಸೇವೆಗಳಿಗೆ ಅವರ ಪ್ರವೇಶ ಸೀಮಿತಗೊಂಡಿದೆ. ಇದೇ ರೀತಿ ದಿಲ್ಲಿ ಎನ್ಸಿಆರ್ನಲ್ಲಿ ವಾಸಿಸುತ್ತಿರುವ ಶೇ.85ರಷ್ಟು ವೃದ್ಧರಿಗೆ ಡಿಜಿಟಲ್ ಸಾಕ್ಷರತೆಯ ಕೊರತೆ ಇದೆ ಹಾಗೂ ಸಾಮಾಜಿಕವಾಗಿ ಬಹಿಷ್ಕೃತಗೊಂಡಿದ್ದೇವೆ ಎಂಬ ಭಾವನೆ ಇದೆ ಎಂದು ಏಜ್ ವೆಲ್ ಫೌಂಡೇಶನ್ ಅಧ್ಯಯನದಲ್ಲಿ ತಿಳಿದು ಬಂದಿದೆ.

ಈ ನಡುವೆ, ಭಾರತದಲ್ಲಿನ ಹಿರಿಯ ನಾಗರಿಕರ ಆರೈಕೆ ವಲಯ ಕ್ಷಿಪ್ರವಾಗಿ ವಿಸ್ತರಿಸುತ್ತಿದೆ. 2030ರ ವೇಳೆಗೆ 15,000 ಸೌಲಭ್ಯಗಳು ನಿರ್ಮಾಣವಾಗಲಿವೆ ಎಂದು ಅಂದಾಜಿಸಲಾಗಿದ್ದು, ಇದಕ್ಕಾಗಿ 26,000 ಕೋಟಿ ರೂ.ಹೂಡಿಕೆ ಅಗತ್ಯವಿದೆ. 2030ರ ವೇಳೆಗೆ 20-21 ಲಕ್ಷ ಹಿರಿಯ ನಾಗರಿಕರ ವಸತಿ ಘಟಕಗಳ ಅಗತ್ಯವಿದೆ ಎಂದು ನೈಟ್ ಫ್ರಾಂಕ್ ವರದಿಯಲ್ಲಿ ಅಂದಾಜಿಸಲಾಗಿದೆ. 2013ರಿಂದ ಇಲ್ಲಿಯವರೆಗೆ ಅಂಗಾಂಗ ಕಸಿಯು ನಾಲ್ಕು ಪಟ್ಟು ವೃದ್ಧಿಯಾಗಿದೆ ಎಂದೂ ವರದಿ ಬೆಳಕು ಚೆಲ್ಲಿದೆ.