ನಿಮ್ಮ ಮಕ್ಕಳು ಸೋಷಿಯಲ್ ಮೀಡಿಯಾ ಬಳಸುತ್ತಿದ್ದಾರಾ?..ಈ ಆತಂಕಕಾರಿ ರಿಪೋರ್ಟ್ ನೋಡಿ!

 ಹದಿಹರೆಯ ಯುವಜನತೆಯು ದಿನಕ್ಕೆ ಹೆಚ್ಚು ಸಮಯ ಸಾಮಾಜಿಕ ಜಾಲತಾಣಗಳಲ್ಲಿ ಕಳೆಯುತ್ತಿದ್ದರೆ ಅವರ ಜೀವನದ ತೃಪ್ತಿ ಕುಸಿಯುವ ಸಾಧ್ಯತೆ ಇದೆ ಎಂಬ ಮಹತ್ವದ ಮಾಹಿತಿ ಜಾಗತಿಕ ಮಟ್ಟದ ಅಧ್ಯಯನದಿಂದ ಬಹಿರಂಗವಾಗಿದೆ. World Happiness Report 2026 ನಲ್ಲಿ ಪ್ರಕಟವಾದ ಇಂತಹದೊಂದು ವಿಶ್ಲೇಷಣೆ, OECD ನಡೆಸಿದ 2022ರ PISA ಸಮೀಕ್ಷೆಯ ಡೇಟಾವನ್ನು ಆಧರಿಸಿದ್ದು, 47 ದೇಶಗಳ 15ರಿಂದ 16 ವರ್ಷದ ಸುಮಾರು 2.7 ಲಕ್ಷ ವಿದ್ಯಾರ್ಥಿಗಳ ಸ್ವಯಂ-ಮೌಲ್ಯಮಾಪನದ ಆಧಾರದ ಮೇಲೆ ಈ ಅಧ್ಯಯನ ರೂಪುಗೊಂಡಿದೆ. ಸಾಮಾಜಿಕ ಜಾಲತಾಣ ಬಳಕೆ ಮತ್ತು ಜೀವನ ತೃಪ್ತಿಯ ನಡುವಿನ ನೇರ ಸಂಬಂಧವನ್ನು ತಿಳಿಯುವತ್ತ ಈ ವರದಿ ವಿಶೇಷ ಗಮನ ಹರಿಸಿದೆ. 

ಸಾಮಾನ್ಯವಾಗಿ ಇಂತಹ ಅಧ್ಯಯನಗಳು ಆತಂಕ, ಒತ್ತಡ ಅಥವಾ ಡಿಪ್ರೆಶನ್‌ಗಳಂತಹ ನಕಾರಾತ್ಮಕ ಅಂಶಗಳತ್ತ ಗಮನ ಹರಿಸುತ್ತವೆ. ಆದರೆ ಈ ವರದಿ ಜೀವನ ತೃಪ್ತಿ ಎಂಬ ಧನಾತ್ಮಕ ಅಂಶವನ್ನು ವಿಶ್ಲೇಷಿಸುವ ಮೂಲಕ ವಿಭಿನ್ನ ದೃಷ್ಟಿಕೋನವನ್ನು ನೀಡಿದೆ. ಅಂದರೆ, ಕೇವಲ ಮಾನಸಿಕ ಸಮಸ್ಯೆಗಳಷ್ಟೇ ಅಲ್ಲದೆ, ಹದಿಹರೆಯ ಯುವಜನತೆ ತಮ್ಮ ಜೀವನದ ಬಗ್ಗೆ ಎಷ್ಟು ಸಂತೋಷವಾಗಿದ್ದಾರೆ ಎಂಬುದನ್ನೂ ಸಹ ಇಲ್ಲಿ ಪರಿಗಣಿಸಲಾಗಿದೆ.

ಈ ವರದಿಯಲ್ಲಿ, ಹೆಣ್ಣುಮಕ್ಕಳಲ್ಲಿ ಕಂಡುಬಂದಿರುವ ಪ್ಯಾಟರ್ನ್ ಸ್ಪಷ್ಟವಾಗಿದೆ. ದಿನಕ್ಕೆ ಒಂದು ಗಂಟೆಗೂ ಕಡಿಮೆ ಸಮಯ ಸಾಮಾಜಿಕ ಜಾಲತಾಣ ಬಳಸುವವರು ಅತ್ಯಧಿಕ ಜೀವನ ತೃಪ್ತಿಯನ್ನು ವ್ಯಕ್ತಪಡಿಸಿದ್ದಾರೆ. ಆದರೆ ಬಳಕೆ ಸಮಯ ಹೆಚ್ಚಾದಂತೆ ತೃಪ್ತಿ ಮಟ್ಟ ಕ್ರಮೇಣ ಇಳಿಯುತ್ತದೆ. ವಿಶೇಷವಾಗಿ ದಿನಕ್ಕೆ 5ರಿಂದ 7 ಗಂಟೆಗಳಿಗಿಂತ ಹೆಚ್ಚು ಸಮಯ ಕಳೆಯುವ ಹೆಣ್ಣುಮಕ್ಕಳಲ್ಲಿ ಕಡಿಮೆ ಜೀವನ ತೃಪ್ತಿ ಕಂಡುಬರುವ ಸಾಧ್ಯತೆ ಹೆಚ್ಚು ಎಂಬುದು ಅಧ್ಯಯನ ಹೇಳುತ್ತದೆ.

ಗಂಡುಮಕ್ಕಳಲ್ಲಿ ಫಲಿತಾಂಶಗಳು ಭಾಗಶಃ ಪ್ರದೇಶಾಧಾರಿತವಾಗಿವೆ. ಪಶ್ಚಿಮ ಯುರೋಪ್ ಮತ್ತು ಇಂಗ್ಲಿಷ್ ಮಾತನಾಡುವ ದೇಶಗಳಲ್ಲಿ ಕಡಿಮೆ ಬಳಕೆದಾರರು ಹೆಚ್ಚು ತೃಪ್ತಿಯನ್ನು ವ್ಯಕ್ತಪಡಿಸಿದರೆ, ಇತರ ಪ್ರದೇಶಗಳಲ್ಲಿ ಈ ವ್ಯತ್ಯಾಸ ಹೆಚ್ಚು ಗಮನಾರ್ಹವಾಗಿಲ್ಲ. ಆದರೂ ಒಂದು ಪ್ರಮುಖ ವಿಚಾರವೆಂದರೆ, ಹೆಚ್ಚು ಸಮಯ ಬಳಸುವವರು ಮತ್ತು ಸಂಪೂರ್ಣವಾಗಿ ಬಳಸದೇ ಇರುವವರು ಎರಡೂ ಗುಂಪುಗಳಲ್ಲಿ ಜೀವನ ತೃಪ್ತಿಯ ಅಂಕಗಳಲ್ಲಿ ಹೆಚ್ಚಿನ ವ್ಯತ್ಯಾಸ ಕಂಡುಬಂದಿದೆ. ಅಂದರೆ ಕೆಲವರು ಅತ್ಯಂತ ಸಂತೋಷವಾಗಿದ್ದರೆ, ಕೆಲವರು ಅತ್ಯಂತ ಅಸಂತೃಪ್ತರಾಗಿದ್ದಾರೆ.

ಈ ಅಧ್ಯಯನದಲ್ಲಿ ವಿದ್ಯಾರ್ಥಿಗಳು ತಮ್ಮ ದಿನನಿತ್ಯದ ಸಾಮಾಜಿಕ ಜಾಲತಾಣ ಬಳಕೆಯನ್ನು ಅಂದಾಜು ಮಾಡಿ, 0ರಿಂದ 10ರವರೆಗೆ ತಮ್ಮ ಜೀವನ ತೃಪ್ತಿಯನ್ನು ಅಳೆಯಬೇಕಾಗಿತ್ತು. 0ರಿಂದ 4ರವರೆಗೆ ಅಂಕಗಳನ್ನು ಕಡಿಮೆ ತೃಪ್ತಿಯಾಗಿ ಪರಿಗಣಿಸಲಾಗಿದ್ದು, 10 ಅಂಕವು ಸಂಪೂರ್ಣ ತೃಪ್ತಿಯನ್ನು ಸೂಚಿಸುತ್ತದೆ. ಈ ಸರಳ ವಿಧಾನವು ಬಳಕೆ ಮತ್ತು ಮನಸ್ಥಿತಿಯ ನಡುವಿನ ಸಂಬಂಧವನ್ನು ಸ್ಪಷ್ಟಪಡಿಸಲು ಸಹಾಯ ಮಾಡಿದೆ.
ಭಾರೀ ಬಳಕೆದಾರರಲ್ಲಿ ಕಡಿಮೆ ಜೀವನ ತೃಪ್ತಿ ಕಾಣಿಸಿಕೊಳ್ಳುವ ಸಾಧ್ಯತೆ ಹೆಚ್ಚಿದೆ ಎಂಬುದು ಮತ್ತೊಮ್ಮೆ ದೃಢಪಟ್ಟಿದೆ. ಪಶ್ಚಿಮ ಯುರೋಪ್‌ನಲ್ಲಿ ಹೆಚ್ಚು ಸಮಯ ಸಾಮಾಜಿಕ ಜಾಲತಾಣ ಬಳಸುವ ಹೆಣ್ಣುಮಕ್ಕಳು ಕಡಿಮೆ ತೃಪ್ತಿಯನ್ನು ಹೇಳುವ ಸಾಧ್ಯತೆ 63% ಹೆಚ್ಚಾಗಿದೆ. ಅದೇ ಪ್ರದೇಶದ ಗಂಡುಮಕ್ಕಳಲ್ಲಿ ಈ ಪ್ರಮಾಣ 84%ರವರೆಗೆ ಏರಿದೆ. ಇದೇ ರೀತಿಯ ಟ್ರೆಂಡ್ ಏಷ್ಯಾ ಹಾಗೂ ಮಧ್ಯ ಮತ್ತು ಪೂರ್ವ ಯುರೋಪ್ ಪ್ರದೇಶಗಳಲ್ಲಿಯೂ ಕಂಡುಬಂದಿದೆ. ಅಧ್ಯಯನದ ಪ್ರಕಾರ, ಹೆಚ್ಚಿನ ಹದಿಹರೆಯದವರು ದಿನಕ್ಕೆ ಎರಡು ಗಂಟೆಗಳಿಗಿಂತ ಕಡಿಮೆ ಸಮಯವನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಕಳೆಯುತ್ತಾರೆ ಎಂದು ಹೇಳಿದ್ದಾರೆ. ಆದರೆ ಈ ಅಂಕಿ-ಅಂಶಗಳಲ್ಲಿ ವೀಡಿಯೊ ಪ್ಲಾಟ್‌ಫಾರ್ಮ್‌ಗಳ ಬಳಕೆ ಸಂಪೂರ್ಣವಾಗಿ ಒಳಗೊಂಡಿರದಿರುವ ಸಾಧ್ಯತೆ ಇದೆ. ಲ್ಯಾಟಿನ್ ಅಮೆರಿಕಾ ಮತ್ತು ಮಧ್ಯಪ್ರಾಚ್ಯ-ಉತ್ತರ ಆಫ್ರಿಕಾ ಪ್ರದೇಶಗಳಲ್ಲಿ ಹೆಚ್ಚು ಸಮಯ ಬಳಸುವವರ ಪ್ರಮಾಣ ಹೆಚ್ಚು ಕಂಡುಬಂದಿದೆ. ಜಾಗತಿಕ ಮಟ್ಟದಲ್ಲಿ ಸುಮಾರು 78% ಯುವಜನತೆ ಸಾಮಾಜಿಕ ಜಾಲತಾಣಗಳಲ್ಲಿ ಸಕ್ರಿಯರಾಗಿದ್ದಾರೆ. ವಿಶೇಷವಾಗಿ ಅಮೆರಿಕಾದಲ್ಲಿ ಸರಾಸರಿ ದಿನಕ್ಕೆ 4.8 ಗಂಟೆಗಳ ಕಾಲ Instagram, TikTok ಮತ್ತು YouTube ಪ್ಲಾಟ್‌ಫಾರ್ಮ್‌ಗಳಲ್ಲಿ ಕಳೆಯುತ್ತಿದ್ದಾರೆ. ಇದು ಡಿಜಿಟಲ್ ಬಳಕೆ ಎಷ್ಟು ವ್ಯಾಪಕವಾಗಿದೆ ಎಂಬುದನ್ನು ತೋರಿಸುತ್ತದೆ.ಒಟ್ಟಿನಲ್ಲಿ, ಈ ವರದಿ ಸಾಮಾಜಿಕ ಜಾಲತಾಣ ಬಳಕೆ ಮತ್ತು ಯುವಜನತೆಯ ಜೀವನ ತೃಪ್ತಿಯ ನಡುವೆ ಗಾಢ ಸಂಬಂಧವಿದೆ ಎಂಬುದನ್ನು ಸೂಚಿಸುತ್ತದೆ. You May Also Like

ಸಾಮಾಜಿಕ ಜಾಲತಾಣಗಳ ಸಮತೋಲನಿತ ಬಳಕೆ ಉತ್ತಮ ಪರಿಣಾಮ ನೀಡಬಹುದಾದರೆ, ಅತಿಯಾದ ಬಳಕೆ ಮನಸ್ಥಿತಿ ಮತ್ತು ಸಂತೋಷದ ಮೇಲೆ ನಕಾರಾತ್ಮಕ ಪರಿಣಾಮ ಬೀರುವ ಸಾಧ್ಯತೆ ಇದೆ. ಹಾಗಾಗಿ, ಮಕ್ಕಳ ಸಾಮಾಜಿಕ ಜಾಲತಾಣಗಳ ಬಳಕೆಯ ಮೇಲೆ ಪೋಷಕರು ಜಾಗೃತಿಯಿಂದ ಗಮನ ಹರಿಸುವುದು ಅತ್ಯಂತ ಅಗತ್ಯವಾಗಿದೆ.