ಒಂದು ಲಕ್ಷ ಕೋಟಿ ರೂಪಾಯಿ ಆರ್ಥಿಕ ಸ್ಥಿರತೆ ನಿಧಿ: ನಿರ್ಮಲಾ ಸೀತಾರಾಮನ್

ನವದೆಹಲಿ: ಜಾಗತಿಕ ಸಂಕಷ್ಟದ ಸಮಯದಲ್ಲಿ ಭಾರತಕ್ಕೆ ಆರ್ಥಿಕವಾಗಿ ಚೇತರಿಸಿಕೊಳ್ಳಲು ಒಂದು ಲಕ್ಷ ಕೋಟಿ ರೂಪಾಯಿ ಆರ್ಥಿಕ ಸ್ಥಿರತೆ ನಿಧಿಯು ಸಹಾಯ ಮಾಡುತ್ತದೆ ಎಂದು ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಶುಕ್ರವಾರ ಹೇಳಿದ್ದಾರೆ.

ಲೋಕಸಭೆಯಲ್ಲಿ ಎರಡನೇ ಪೂರಕ ಅನುದಾನ ಬೇಡಿಕೆಗಳ ಕುರಿತ ಚರ್ಚೆಗೆ ಉತ್ತರಿಸಿದ ಸಚಿವೆ, ಈಗಿನ ಪಶ್ಚಿಮ ಏಶ್ಯ ಬಿಕ್ಕಟ್ಟಿನಂಥ ಅನೂಹ್ಯ ಜಾಗತಿಕ ಸವಾಲುಗಳಿಂದ ಉದ್ಭವಿಸುವ ಆಘಾತವನ್ನು ಹೀರಿಕೊಳ್ಳಲು ಈ ನಿಧಿಯು ಸಹಾಯ ಮಾಡುತ್ತದೆ ಎಂದು ಹೇಳಿದರು.

ಎರಡನೇ ಪೂರಕ ಅನುದಾನ ಬೇಡಿಕೆಗಳ ಮೂಲಕ ಸರ್ಕಾರ ಹಾಲಿ ಹಣಕಾಸು ವರ್ಷದಲ್ಲಿ ಒಟ್ಟು 2.81 ಲಕ್ಷ ಕೋಟಿ ರೂ.ಹೆಚ್ಚುವರಿ ಖರ್ಚಿಗೆ ಲೋಕಸಭೆಯ ಅನುಮೋದನೆ ಕೋರಿದೆ. ಈ ಪೈಕಿ 80,000 ಕೋಟಿ ರೂ. ಮೊತ್ತವನ್ನು ಈಗಾಗಲೇ ಹೆಚ್ಚುವರಿ ಖರ್ಚಿಗಾಗಿ ಸ್ವೀಕರಿಸಲಾಗಿದೆ.

ಹಾಲಿ ಹಣಕಾಸು ವರ್ಷ (2025-26)ದ ವಿತ್ತೀಯ ಕೊರತೆಯು ಪರಿಷ್ಕೃತ ಅಂದಾಜಿನ ವ್ಯಾಪ್ತಿಯಲ್ಲಿಯೇ ಇದೆ ಎಂದು ನಿರ್ಮಲಾ ಸೀತಾರಾಮನ್ ಹೇಳಿದರು.

ಲೋಕಸಭೆಯು ನಿವ್ವಳ 2.01 ಲಕ್ಷ ಕೋಟಿ ರೂ. ಎರಡನೇ ಪೂರಕ ಅನುದಾನ ಬೇಡಿಕೆಗೆ ಅನುಮೋದನೆ ನೀಡಿತು.

ಬಳಿಕ ಸದನವನ್ನು ದಿನದ ಮಟ್ಟಿಗೆ ಮುಂದೂಡಲಾಯಿತು.