ಅಪ್ರಾಪ್ತರು ಚಲಾಯಿಸುತ್ತಿದ್ದ ದ್ವಿಚಕ್ರ ವಾಹನಗಳು ವಶಕ್ಕೆ-ಹೆತ್ತವರಿಗೆ ಕೇಸು

ಕುಂಬಳೆ: ಅಪ್ರಾಪ್ತರು ದ್ವಿಚಕ್ರ ವಾಹನ ಚಲಯಿಸಿದ ಪ್ರಕರಣದಲ್ಲಿ ಬಾಲಕರ ಹೆತ್ತವರ ವಿರುದ್ಧ ಕುಂಬಳೆ ಠಾಣೆ ಪೊಲೀಸರು ಎರಡು ಪ್ರತ್ಯೇಕ ಕೇಸು ದಾಖಲಿಸಿಕೊಂಡಿದ್ದಾರೆ. ಎರಡೂ ವಾಹನಗಳನ್ನು ಪೊಲೀಸರು ವಶಕ್ಕೆ ತೆಗೆದುಕೊಂಡಿದ್ದಾರೆ.

ಕುಂಬಳೆ ಪೊಲೀಸ್ ಠಾಣೆ ವ್ಯಾಪ್ತಿಯ ಕಯ್ಯಾರು ಮಂಡೆಕಾಪು ಹಾಗೂ ಮಂಗಲ್ಪಾಡಿಯ ಇಚ್ಲಂಗೋಡಿನಿಂದ ಅಪ್ರಾಪ್ತರು ಚಲಾಯಿಸುತ್ತಿದ್ದ ದ್ವಿಚಕ್ರ ವಾಹನಗಳನ್ನು ವಶಪಡಿಸಿಕೊಂಡಿದ್ದರು. ಇಚ್ಲಂಗೋಡು ಎಲ್‍ಪಿ ಶಾಲಾ ವಠಾರದಲ್ಲಿ ಅಪಾಯಕಾರಿಯಾಗಿ ಚಲಾಯಿಸುತ್ತಿದ್ದ ಬೈಕ್ ತಡೆದು ವಿಚಾರಿಸಿದಾಗ ತಾಯಿ ಬೈಕ್ ನೀಡಿರುವುದಾಗಿ ಬಾಲಕ ಪೊಲೀಸರಿಗೆ ತಿಳಿಸಿದ್ದು, ತಾಯಿ ವಿರುದ್ಧ ಕೇಸು ದಾಖಲಿಸಿಕೊಂಡು, ಬಾಲಕಗೆ ನೋಟೀಸು ನೀಡಿದ್ದಾರೆ. ಇನ್ನೊಂದು ಪ್ರಕರಣದಲ್ಲಿ ಮಂಡೆಕಾಪು ಪ್ರದೇಶದಲ್ಲಿ ಸ್ಕೂಟರ್ ಚಲಾಯಿಸುತ್ತಿದ್ದ ಬಾಲಕನನ್ನು ಸೆರೆಹಿಡಿಯಲಾಗಿದೆ. ಬಾಲಕನ ತಂದೆ ವಿರುದ್ಧ ಕೇಸು ದಾಖಲಿಸಲಾಗಿದ್ದು, ಬಾಲಕನಿಗೆ ನೋಟೀಸು ನೀಡಿದ್ದಾರೆ.