ಕಣ್ಣೂರಿನಲ್ಲಿ ವ್ಯಾಪಕ ಹಿಂಸಾಚಾರ; ಮನೆಗಳ ಮೇಲೆ ದಾಳಿ, ಕಾರಿಗೆ ಬೆಂಕಿ; ಪಯ್ಯನ್ನೂರು ಮತ್ತು ತಳಿಪರಂಬದಲ್ಲಿ ಉದ್ವಿಗ್ನತೆ

ಕಣ್ಣೂರು: ವಿಧಾನಸಭಾ ಚುನಾವಣೆಯ ನಂತರ ಕಣ್ಣೂರು ಜಿಲ್ಲೆಯ ವಿವಿಧ ಭಾಗಗಳಲ್ಲಿ ವ್ಯಾಪಕ ಹಿಂಸಾಚಾರ ಬುಗಿಲೆದ್ದಿದೆ. ಪಯ್ಯನ್ನೂರು ಮತ್ತು ತಳಿಪರಂಬ ಕ್ಷೇತ್ರಗಳಲ್ಲಿ ದಾಳಿಗಳು ಭಾರೀ ಹಾನಿಯನ್ನುಂಟುಮಾಡಿವೆ ಎಂದು ವರದಿಯಾಗಿದೆ. 

ಪಯ್ಯನ್ನೂರಿನಲ್ಲಿ ಯುಡಿಎಫ್ ಅಭ್ಯರ್ಥಿಯನ್ನು ಬೆಂಬಲಿಸಿದ್ದಕ್ಕಾಗಿ ಸಿಪಿಎಂ ಶಾಖೆಯ ಸದಸ್ಯ ಟಿ. ಪುರುಷೋತ್ತಮನ್ ಅವರ ಮನೆಯ ಮೇಲೆ ದಾಳಿ ನಡೆಸಿ ಅಂಗಳದಲ್ಲಿ ನಿಲ್ಲಿಸಿದ್ದ ಕಾರಿಗೆ ಬೆಂಕಿ ಹಚ್ಚಲಾಗಿದೆ.

ಶುಕ್ರವಾರ ಬೆಳಗಿನ ಜಾವ 12.30 ರ ಸುಮಾರಿಗೆ ಈ ಘಟನೆ ನಡೆದಿದೆ. ಸುಮಾರು 5 ಲಕ್ಷ ರೂ. ನಷ್ಟವಾಗಿದೆ ಎಂದು ಅಂದಾಜಿಸಲಾಗಿದೆ. ಇದಲ್ಲದೆ, ಯುಡಿಎಫ್ ಅಭ್ಯರ್ಥಿಗಾಗಿ ಗೋಡೆಯ ಮೇಲೆ ಬರೆದಿದ್ದ ಕಾಂಗ್ರೆಸ್ ಬೆಂಬಲಿಗನ ಮನೆಯ ಗೋಡೆಯನ್ನು ಸಹ ಕೆಡವಲಾಗಿದೆ. ಮಾಜಿ ಸಿಪಿಎಂ ಕೌನ್ಸಿಲರ್ ಮನೆಯ ಮುಂದೆ ಹಾರ ಹಾಕಿದ ಘಟನೆಯೂ ವರದಿಯಾಗಿದೆ.

ತಳಿಪರಂಬ ಕ್ಷೇತ್ರದ ಮಯ್ಯಿಲ್ ಪಟ್ಟಣದಲ್ಲಿರುವ ಕಾಂಗ್ರೆಸ್ ಮಂಡಲ ಸಮಿತಿ ಕಚೇರಿಯನ್ನು ಸಹ ದುಷ್ಕರ್ಮಿಗಳು ಧ್ವಂಸಗೊಳಿಸಿದ್ದಾರೆ. ಪೀಠೋಪಕರಣಗಳು ಮತ್ತು ಕಿಟಕಿ ಗಾಜುಗಳು ಪುಡಿಪುಡಿಯಾಗಿವೆ. ಮುಲ್ಲಕೋಡಿ ಯುಪಿ ಶಾಲೆಯಲ್ಲಿ ಯುಡಿಎಫ್ ಏಜೆಂಟ್ ಭಾಸ್ಕರನ್ ಅವರ ಮನೆಯ ಮೇಲೂ ದಾಳಿ ನಡೆಸಲಾಗಿದೆ.

ಮಾಲೂರಿನಲ್ಲಿ ಬಿಜೆಪಿ ಏಜೆಂಟ್ ಒಬ್ಬರ ಮನೆಯ ಮೇಲೆ ಕಲ್ಲು ತೂರಾಟ ನಡೆಸಲಾಗಿದೆ. ಮಯ್ಯಿಲ್‍ನಲ್ಲಿ ಎಲ್‍ಡಿಎಫ್ ಏಜೆಂಟ್ ಒಬ್ಬರಿಗೆ ಇರಿದ ನಂತರ ಜಿಲ್ಲೆಯಲ್ಲಿ ಉದ್ವಿಗ್ನತೆ ಉಂಟಾಗಿದೆ.

ಸಿಪಿಎಂ ಮತ್ತು ಕಾಂಗ್ರೆಸ್ ಪರಸ್ಪರ ಆರೋಪಗಳನ್ನು ಹೊರಿಸುತ್ತಿರುವಾಗ, ಮತ್ತಷ್ಟು ಅಹಿತಕರ ಘಟನೆಗಳನ್ನು ತಡೆಗಟ್ಟಲು ಜಿಲ್ಲಾ ಪೆÇಲೀಸ್ ಮುಖ್ಯಸ್ಥರ ನೇತೃತ್ವದಲ್ಲಿ ಸ್ಥಳದಲ್ಲಿ ದೊಡ್ಡ ತುಕಡಿಯನ್ನು ನಿಯೋಜಿಸಲಾಗಿದೆ.