ಭಾರತದಲ್ಲಿ ಬಿಸಿಲಾಘಾತಕ್ಕೆ ಪುರುಷರೇ ಹೆಚ್ಚು ಬಲಿಯಾಗಲು ಕಾರಣವೇನು?

ಬಿಸಿಲು ಮತ್ತು ಶಾಖ ಒಂದು ಲಿಂಗದ ಮೇಲೆ ಹೆಚ್ಚು ಪರಿಣಾಮ ಬೀರುತ್ತದೆಯೆ? 2026 ಮೇಯಲ್ಲಿ ಪ್ರಕಟವಾದ ರಾಷ್ಟ್ರೀಯ ಅಪರಾಧ ದಾಖಲೆಗಳ ಬ್ಯೂರೋದ (NCRB) ಭಾರತದಲ್ಲಿ ಅಪಘಾತೀಯ ಸಾವುಗಳು ಮತ್ತು ಆತ್ಮಹತ್ಯೆಗಳು (ADSI) ವರದಿಯಲ್ಲಿ ಇಂತಹ ಆಘಾತಕಾರಿ ಸತ್ಯ ಹೊರಬಂದಿದೆ.

ಪೊಲೀಸ್ ವರದಿಗಳನ್ನು ಆಧರಿಸಿ ರಾಷ್ಟ್ರವ್ಯಾಪಿ ಸಂಭವಿಸಿದ ಅಸಹಜ ಸಾವುಗಳು, ಅಪಘಾತಗಳು ಮತ್ತು ಆತ್ಮಹತ್ಯೆಗಳ ಅಂಕಿ-ಅಂಶಗಳನ್ನು ನೀಡಲಾಗಿದೆ. ಹಠಾತ್ ಸಂಭವಿಸಿದ 7,903 ಸಾವುಗಳಲ್ಲಿ ಶೇ 23.2 ರಷ್ಟು ಅಥವಾ 1,832 ಸಾವುಗಳು 'ಬಿಸಿಲಿನ ತೀವ್ರತೆ'ಯಿಂದ ಮತ್ತು ಶೇ 10.5ರಷ್ಟು ಸಾವುಗಳು 'ಚಳಿ'ಯಿಂದ ಸಂಭವಿಸಿವೆ!

ಗಮನಾರ್ಹವಾಗಿ, ಶಾಖದ ಅಲೆಗಳು ಮತ್ತು ತೀವ್ರ ತಾಪಮಾನದ ನಡುವೆ ಬಿಸಿಲಾಘಾತದಿಂದ ಸಾವುಗಳು ಹೆಚ್ಚಾಗಿವೆ. ಮೇ 2026ರ ವರದಿಯ ಪ್ರಕಾರ 30-44 ವಯಸ್ಸಿನ ಗುಂಪಿನಲ್ಲಿ 515 ಪುರುಷರು ಶಾಖದ ಹೊಡೆತದಿಂದ ಸಾವನ್ನಪ್ಪಿದ್ದಾರೆ ಎಂದು ಗಮನಿಸಿದೆ. 45 ಮತ್ತು 59ರ ವಯಸ್ಸಿನವರಲ್ಲಿ ಇನ್ನೂ ಹೆಚ್ಚು 577 ಸಾವುಗಳು ದಾಖಲಾಗಿವೆ. ಈ ವರ್ಗಗಳಲ್ಲಿ ಮಹಿಳೆಯರ ಸಾವು ಗಮನಾರ್ಹವಾಗಿ ಕಡಿಮೆ ಇದೆ. ಹಾಗಿದ್ದರೆ ಪುರುಷರು ಬಿಸಿಲಾಘಾತಕ್ಕೆ ಹೆಚ್ಚು ಒಳಗಾಗುತ್ತಾರೆಯೆ?

ಮುಂಬೈನ ಗ್ಲೆನೆಗಲ್ಸ್ ಆಸ್ಪತ್ರೆಯ ಆಂತರಿಕ ಔಷಧ ಸಲಹೆಗಾರರಾದ ಡಾ ಮಂಜುಷಾ ಅಗರ್ವಾಲ್ ಪ್ರಕಾರ, ಶಾರೀರಿಕ, ನಡವಳಿಕೆ ಮತ್ತು ಔದ್ಯೋಗಿಕ ಅಂಶಗಳ ಮಿಶ್ರಣದಿಂದಾಗಿ ಪುರುಷರು ಶಾಖದ ಹೊಡೆತಕ್ಕೆ ಹೆಚ್ಚು ಒಳಗಾಗಬಹುದು. "ಪುರುಷರಲ್ಲಿ ಮಸಲ್ ಮಾಸ್ ಮತ್ತು ಬೇಸಲ್ ಮೆಟಬಾಲಿಕ್ ರೇಟ್ ಹೆಚ್ಚಿರುವುದರಿಂದ ದೈಹಿಕ ಚಟುವಟಿಕೆಯ ಸಂದರ್ಭದಲ್ಲಿ ಹೆಚ್ಚು ಶಾಖ ಉತ್ಪತ್ತಿಯಾಗುತ್ತದೆ. ಬೆವರೂ ಹೆಚ್ಚಿರುತ್ತದೆ. ಮುಖ್ಯವಾಗಿ ಬೆವರು ಪರಿಣಾಮಕಾರಿಯಾಗಿ ಆವಿಯಾಗಲು ಸಾಧ್ಯವಾಗದ ಆರ್ದ್ರ ವಾತಾವರಣದಲ್ಲಿ ಅದು ಅವರನ್ನು ರಕ್ಷಿಸುವುದಿಲ್ಲ. ಮತ್ತೊಂದೆಡೆ ಮಹಿಳೆಯರಲ್ಲಿ ಶಾಖ ಹೆಚ್ಚು ಪರಿಣಾಮಕಾರಿಯಾಗಿ ಹರಡುತ್ತದೆ. ಹೀಗಾಗಿ ಪುರುಷರು ಶಾಖದ ಹೊಡೆತದಿಂದ ಬಳಲುವ ಪ್ರಮಾಣ ಹೆಚ್ಚಿರಬಹುದು."

ಹಾರ್ಮೋನ್ಗಳ ಅಂಶಗಳೂ ಸಹ ಕೊಡುಗೆ ನೀಡುತ್ತವೆ. ಈಸ್ಟ್ರೊಜೆನ್ ಥರ್ಮೋಗ್ಯುಲೇಶನ್ ಮೇಲೆ ಕೆಲವು ರಕ್ಷಣಾತ್ಮಕ ಪರಿಣಾಮಗಳನ್ನು ನೀಡುತ್ತದೆ. ವರ್ತನೆಯ ದೃಷ್ಟಿಯಿಂದ ಗಮನಿಸಿದರೂ ಪುರುಷರು ಹೊರಾಂಗಣ ಶಾಖದಲ್ಲಿ ಕಠಿಣ ಕೆಲಸ ಮಾಡುವುದು ಅಥವಾ ವ್ಯಾಯಾಮ ಮಾಡುವ ಸಾಧ್ಯತೆ ಹೆಚ್ಚಿದೆ.

ತಜ್ಞರ ಪ್ರಕಾರ, ನಿರ್ಮಾಣ, ಸಾರಿಗೆ, ಡೆಲಿವರಿ ಸೇವೆಗಳು, ಕಾರ್ಖಾನೆಗಳು, ಕೃಷಿ ಮತ್ತು ದೈಹಿಕ ಶ್ರಮದ ಕೆಲಸಗಳಲ್ಲಿ ಹೊರಾಂಗಣ ಕೆಲಸಗಾರರು ಬಹುತೇಕ ಪುರುಷರೇ ಆಗಿರುವುದರಿಂದ ಹೆಚ್ಚಿನ ತಾಪಮಾನ ಮತ್ತು ಡಿಹೈಡ್ರೇಶನ್ಗೆ ದೀರ್ಘಕಾಲೀನ ಒಡ್ಡಿಕೊಳ್ಳುವಿಕೆಯಿಂದ ಪರಿಣಾಮವಾಗುತ್ತದೆ. ನೇರ ಸೂರ್ಯನ ಬೆಳಕಿನಲ್ಲಿ ನಿರಂತರ ದೈಹಿಕ ಚಟುವಟಿಕೆಯು ದೇಹದ ಆಂತರಿಕ ಶಾಖದ ಹೊರೆಯನ್ನು ಗಮನಾರ್ಹವಾಗಿ ಹೆಚ್ಚಿಸುತ್ತದೆ.

ವಿಶೇಷವಾಗಿ ದೈಹಿಕವಾಗಿ ಬೇಡಿಕೆಯ ಕೆಲಸ, ಮಿಲಿಟರಿ ತರಬೇತಿ ಮತ್ತು ಕ್ರೀಡೆಗಳ ಸಮಯದಲ್ಲಿ ಪುರುಷರು ಹೆಚ್ಚಿನ ಪ್ರಮಾಣದಲ್ಲಿ ಬಿಸಿಲಾಘಾತವನ್ನು ಅನುಭವಿಸಿದ್ದಾರೆ. ಮುಖ್ಯವಾಗಿ ಹೊರಾಂಗಣ ಕೆಲಸವನ್ನು ಮೀರಿ ಡಿಹೈಡ್ರೇಶನ್ ವಿಳಂಬಗೊಳಿಸುವ, ಆರಂಭಿಕ ರೋಗಲಕ್ಷಣಗಳನ್ನು ನಿರ್ಲಕ್ಷಿಸುವ ಅಥವಾ ಅನಾರೋಗ್ಯದ ಹೊರತಾಗಿ ಶ್ರಮದಾಯಕ ಚಟುವಟಿಕೆ ಮುಂದುವರಿಸುವ ಸಾಧ್ಯತೆ ಹೆಚ್ಚು. ತಲೆ ತಿರುಗುವಿಕೆ, ಸ್ನಾಯು ಸೆಳೆತ, ಆಯಾಸ ಅಥವಾ ತಲೆನೋವುಗಳಂತಹ ಎಚ್ಚರಿಕೆ ಚಿಹ್ನೆಗಳನ್ನು ದಿನನಿತ್ಯದ ಆಯಾಸ ಎಂದು ಅನೇಕರು ತಳ್ಳಿ ಹಾಕುತ್ತಾರೆ. ಈ ವಿಳಂಬವು ಶಾಖದ ಹೊಡೆತಕ್ಕೆ ಅನುವು ಮಾಡಿಕೊಟ್ಟು ವೈದ್ಯಕೀಯ ತುರ್ತುಸ್ಥಿತಿ ಎದುರಾಗುತ್ತದೆ.

ಜೀವನಶೈಲಿ ಅಭ್ಯಾಸ ಅಪಾಯವನ್ನು ಹೆಚ್ಚಿಸಬಹುದೆ?

ತಜ್ಞರ ಪ್ರಕಾರ ಹೌದು, "ಮದ್ಯಪಾನ, ಧೂಮಪಾನ ಹೆಚ್ಚಿನ ಕೆಫೀನ್ ಸೇವನೆ, ಕಳಪೆ ನಿದ್ರೆ ಮತ್ತು ಅಸಮರ್ಪಕ ನೀರಿನ ಸೇವನೆಯು ಡಿಹೈಡ್ರೇಶನ್ ಅನ್ನು ಇನ್ನಷ್ಟು ಹದಗೆಡಿಸಬಹುದು. "ಮಧ್ಯಾಹ್ನದ ಗರಿಷ್ಠ ಶಾಖದ ಸಮಯದಲ್ಲಿ ಹೊರಾಂಗಣ ವ್ಯಾಯಾಮಗಳು, ಕ್ರೀಡಾ ಚಟುವಟಿಕೆಗಳು ಮತ್ತು ಜಿಮ್ ಸೆಷನ್ಗಳು ಹೆಚ್ಚಿನ ಒತ್ತಡ ತರಬಹುದು. ದ್ರವ ಮತ್ತು ಎಲೆಕ್ಟ್ರೋಲೈಟ್ ಅಸಮತೋಲನ ಶೀಘ್ರವಾಗಿ ಬೆಳೆಯಬಹುದು ಎನ್ನುವುದನ್ನು ಅನೇಕ ಮಂದಿ ಕಡಿಮೆ ಅಂದಾಜಿಸುತ್ತಾರೆ."

"ಊಟ ಬಿಡುವುದು, ಕ್ರ್ಯಾಶ್ ಡಯಟ್ ಮಾಡುವುದು, ಹೈಡ್ರೇಶನ್ ಇಲ್ಲದೆ ಪ್ರೊಟೀನ್ ಪೂರಕ ಔಷಧಿ ಸೇವನೆ, ಶಾಖಕ್ಕೆ ಒಗ್ಗಿಕೊಳ್ಳುವಿಕೆಯ ಕೊರತೆಯು ದೇಹದ ನಿಭಾಯಿಸುವ ಸಾಮರ್ಥ್ಯವನ್ನು ಕಡಿಮೆಗೊಳಿಸುತ್ತದೆ. ಬೊಜ್ಜು, ಮಧುಮೇಹ, ಅಧಿಕ ರಕ್ತದೊತ್ತಡ, ಹೃದ್ರೋಗ ಅಥವಾ ಕೆಲವು ಔಷಧಿಗಳನ್ನು ತೆಗೆದುಕೊಳ್ಳುವ ವ್ಯಕ್ತಿಗಳು ಇನ್ನೂ ಹೆಚ್ಚಿನ ಅಪಾಯ ಎದುರಿಸಬಹುದು" ಎನ್ನುತ್ತಾರೆ ತಜ್ಞರು.

ನಿರ್ಲಕ್ಷಿಸಬಾರದ ಆರಂಭಿಕ ಚಿಹ್ನೆಗಳು ಯಾವುವು?

ನಿರಂತರ ದೌರ್ಬಲ್ಯ, ಅತಿಯಾಗಿ ಬೆವರುವುದು, ವಾಕರಿಕೆ, ತಲೆತಿರುಗುವುದು, ತಲೆನೋವು, ಸ್ನಾಯು ಸೆಳೆತ, ತ್ವರಿತ ಹೃದಯ ಬಡಿತ, ಗೊಂದಲ ಅಥವಾ ಮೂರ್ಛೆ ಪ್ರಮುಖ ಎಚ್ಚರಿಕೆ ಚಿಹ್ನೆಗಳಾಗಿವೆ. ಗಂಭೀರ ಪ್ರಕರಣಗಳಲ್ಲಿ ದೇಹದ ಉಷ್ಣತೆ ತೀವ್ರವಾಗಿ ಏರುತ್ತದೆ ಮತ್ತು ವ್ಯಕ್ತಿ ದಿಗ್ಭ್ರಮೆಗೊಳ್ಳಬಹುದು. ಬೆವರುವುದನ್ನು ನಿಲ್ಲಿಸಬಹುದು ಅಥವಾ ಪ್ರಜ್ಞಾಹೀನನಾಗಬಹುದು.

ಬೇಸಗೆಯ ತೀವ್ರ ಪರಿಸ್ಥಿತಿಗಳಲ್ಲಿ ಅಪಾಯ ಹೇಗೆ ಕಡಿಮೆ ಮಾಡಬಹುದು?

ಬಾಯಾರಿಕೆಗೆ ಮೊದಲೇ ನಿಯಮಿತವಾಗಿ ನೀರು ಕುಡಿಯಬೇಕು. ಹೊರಾಂಗಣದಲ್ಲಿ ಕೆಲಸ ಮಾಡುವವರು ಆಗಾಗ್ಗೆ ವಿರಾಮ ತೆಗೆದುಕೊಳ್ಳಬೇಕು. ಮಧ್ಯಾಹ್ನ ನೇರ ಸೂರ್ಯನ ಬೆಳಕಿಕಗೆ ಒಡ್ಡಿಕೊಳ್ಳಬಾರದು. ಸಡಿಲವಾದ ಮತ್ತು ಉಸಿರಾಡುವ ಬಟ್ಟೆಗಳನ್ನು ಧರಿಸಬೇಕು. ದೀರ್ಘಕಾಲದ ಬೆವರುವಿಕೆ ಸಮಯದಲ್ಲಿ ಎಲೆಕ್ಟ್ರೋಲೈಟ್ಗಳನ್ನು ಮರುಪೂರಣಗೊಳಿಸಬೇಕು. ಶಾಖ ಸಂಬಂಧಿತ ಲಕ್ಷಣಗಳನ್ನು ನಿರ್ಲಕ್ಷಿಸಬಾರದು.