ಮಿಷನರೀಸ್ ಆಫ್ ಚಾರಿಟಿಗೆ ರುಬಿಯೋ ಭೇಟಿ: ಮತ್ತೆ ಜಾಗತಿಕವಾಗಿ ಚರ್ಚೆಗೀಡಾದ ಮೋದಿ ಸರ್ಕಾರದ 'FCRA' ಕಾಯ್ದೆ

 ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಮಾರ್ಕೊ ರುಬಿಯೋ ಅವರು ಶನಿವಾರ ಕೋಲ್ಕತ್ತಾಗೆ ಆಗಮಿಸಿದ್ದು, ಇಲ್ಲಿನ 'ಮಿಷನರೀಸ್ ಆಫ್ ಚಾರಿಟಿ' ಸಂಸ್ಥೆಯ ಮದರ್ ತೆರೆಸಾ ಹೌಸ್ ಗೆ ಭೇಟಿ ನೀಡಿದ್ದಾರೆ. ಈ ಸಂದರ್ಭದಲ್ಲಿ ಅವರ ಜೊತೆಗೆ ಭಾರತದಲ್ಲಿನ ಅಮೆರಿಕ ರಾಯಭಾರಿ ಸೆರ್ಗಿಯೊ ಗೋರ್ ಮತ್ತು ಇತರ ಉನ್ನತ ಅಧಿಕಾರಿಗಳು ಉಪಸ್ಥಿತರಿದ್ದರು.

ಮದರ್ ಹೌಸ್ ಭೇಟಿಯ ನಂತರ, ವಿದೇಶಾಂಗ ಕಾರ್ಯದರ್ಶಿಯವರು ಮಿಷನರೀಸ್ ಆಫ್ ಚಾರಿಟಿ ಸಂಸ್ಥೆಯು ನಡೆಸುತ್ತಿರುವ ಮಕ್ಕಳ ಆಶ್ರಯ ತಾಣವಾದ 'ನಿರ್ಮಲ ಶಿಶು ಭವನ'ಕ್ಕೂ ಭೇಟಿ ನೀಡಿದ್ದಾರೆ.

ಮಾರ್ಕೊ ರುಬಿಯೋ ಅವರ ಅಧಿಕೃತ ಭಾರತ ಪ್ರವಾಸದ ಮೊದಲ ಭೇಟಿ ಇದಾಗಿದ್ದು, ವಾಷಿಂಗ್ಟನ್ ಮತ್ತು ಭಾರತ ನಡುವೆ ವ್ಯಾಪಾರ, ತಂತ್ರಜ್ಞಾನ, ರಕ್ಷಣೆ, ಇಂಧನ ಭದ್ರತೆ ಹಾಗೂ ಇಂಡೋ-ಪೆಸಿಫಿಕ್ ಕಾರ್ಯತಂತ್ರ ಸೇರಿದಂತೆ ಹಲವು ಪ್ರಮುಖ ಕ್ಷೇತ್ರಗಳಲ್ಲಿ ದ್ವಿಪಕ್ಷೀಯ ಸಹಕಾರವನ್ನು ವಿಸ್ತರಿಸುವ ನಿಟ್ಟಿನಲ್ಲಿ ಈ ಪ್ರವಾಸ ಅತ್ಯಂತ ಮಹತ್ವದ ಹೆಜ್ಜೆಯಾಗಿದೆ.

ಕೋಲ್ಕತ್ತಾದಲ್ಲಿರುವ ಮದರ್ ಹೌಸ್ 'ಮಿಷನರೀಸ್ ಆಫ್ ಚಾರಿಟಿ' ಸಂಸ್ಥೆಯ ಅಂತರರಾಷ್ಟ್ರೀಯ ಪ್ರಧಾನ ಕಚೇರಿಯಾಗಿದೆ. 1950ರಲ್ಲಿ ಮದರ್ ತೆರೆಸಾ ಅವರಿಂದ ಸ್ಥಾಪಿಸಲ್ಪಟ್ಟ ಈ ಕೇಂದ್ರವು ಒಂದು ಕಾನ್ವೆಂಟ್ ಆಗಿ, ಪ್ರಸಿದ್ಧ ಯಾತ್ರಾ ಸ್ಥಳವಾಗಿ ಮತ್ತು ಕಲ್ಕತ್ತಾದ ಸಂತ ತೆರೆಸಾ ಅವರ ಪವಿತ್ರ ಸಮಾಧಿ ಸ್ಥಳವಾಗಿ ಜಾಗತಿಕ ಮನ್ನಣೆ ಪಡೆದಿದೆ.

"ವಿದೇಶಾಂಗ ಕಾರ್ಯದರ್ಶಿ ಮಾರ್ಕೊ ರುಬಿಯೋ ಅವರೊಂದಿಗೆ ಕೋಲ್ಕತ್ತಾದ ಮಿಷನರೀಸ್ ಆಫ್ ಚಾರಿಟಿಗೆ ಭೇಟಿ ನೀಡಲಾಯಿತು. ಇಂತಹ ಕ್ಷಣಗಳು ಭಾರತ ಮತ್ತು ಅಮೆರಿಕ ನಡುವಿನ ಪಾಲುದಾರಿಕೆಯು ಕೇವಲ ದೃಢವಾದ ನೀತಿಗಳ ಮೇಲೆ ಮಾತ್ರವಲ್ಲದೆ, ಗಡಿಗಳನ್ನು ಮೀರಿದ ಪರಸ್ಪರ ಹಂಚಿಕೆಯ ಮೌಲ್ಯಗಳು ಮತ್ತು ನಿಸ್ವಾರ್ಥ ಸೇವೆಯ ಮನೋಭಾವದ ಮೇಲೂ ನಿಂತಿದೆ ಎಂಬುದನ್ನು ನಮಗೆ ನೆನಪಿಸುತ್ತವೆ" ಎಂದು ಭಾರತದಲ್ಲಿನ ಅಮೆರಿಕ ರಾಯಭಾರಿ ಎಕ್ಸ್ನಲ್ಲಿ ಪೋಸ್ಟ್ ಮಾಡಿದ್ದಾರೆ.

ರುಬಿಯೋ ಅವರ ಈ ಭೇಟಿಯು, ವಿದೇಶಿ ಧನಸಹಾಯ ಪಡೆಯುವ ಧಾರ್ಮಿಕ ಮತ್ತು ಮಾನವೀಯ ನೆರವು ನೀಡುವ ಸಂಸ್ಥೆಗಳ ಮೇಲಿನ ಮೋದಿ ಸರ್ಕಾರದ ಕಠಿಣ 'ವಿದೇಶಿ ದೇಣಿಗೆ ನಿಯಂತ್ರಣ ಕಾಯ್ದೆ'ಯನ್ನು (ಈಅಖಂ) ಮತ್ತೊಮ್ಮೆ ಜಾಗತಿಕ ಮಟ್ಟದಲ್ಲಿ ಚರ್ಚೆಗೆ ತಂದಿದೆ.

ಕಾರ್ಯದರ್ಶಿ ರುಬಿಯೋ ಅವರು ಭಾರತಕ್ಕೆ ಬರುವ ಕೆಲವೇ ದಿನಗಳ ಮುನ್ನ, ಅಮೆರಿಕದ ಜಾಗತಿಕ ಮಾನವ ಹಕ್ಕುಗಳ ಉಪಸಮಿತಿಯ ಅಧ್ಯಕ್ಷ ಹಾಗೂ ಸಂಸದ ಕ್ರಿಸ್ ಸ್ಮಿತ್ ಅವರು 'ದಿ ವಾಷಿಂಗ್ಟನ್ ಎಕ್ಸಾಮಿನರ್' ಪತ್ರಿಕೆಯಲ್ಲಿ ಲೇಖನವೊಂದನ್ನು ಬರೆದಿದ್ದರು. ಈಅಖಂ ಕಾಯ್ದೆಗೆ ತರಲು ಉದ್ದೇಶಿಸಿರುವ ಹೊಸ ತಿದ್ದುಪಡಿಗಳ ಕುರಿತು ಭಾರತದ ಎದುರು ಕಳವಳ ವ್ಯಕ್ತಪಡಿಸುವಂತೆ ಅವರು ಅಮೆರಿಕದ ವಿದೇಶಾಂಗ ಇಲಾಖೆಯನ್ನು ಒತ್ತಾಯಿಸಿದ್ದಾರೆ. ಪ್ರಸ್ತಾವಿತ ಕಾನೂನು ಜಾರಿಗೆ ಬಂದರೆ, ವಿದೇಶಿ ಅನುದಾನ ಪಡೆಯುವ ಸರ್ಕಾರೇತರ ಸಂಸ್ಥೆಗಳ (ಓಉಔ) ಆಡಳಿತಾತ್ಮಕ ಪರವಾನಗಿಗಳು ರದ್ದಾದರೆ ಅಥವಾ ನವೀಕರಣಗೊಳ್ಳದೆ ಅವಧಿ ಮುಗಿದರೆ, ಅವರ ಶಾಲೆಗಳು, ಆಸ್ಪತ್ರೆಗಳು ಮತ್ತು ಆಸ್ತಿಗಳನ್ನು ಹಿಂದಿನ ದಿನಾಂಕದಿಂದಲೇ ಜಾರಿಗೆ ಬರುವಂತೆ ವಶಪಡಿಸಿಕೊಳ್ಳಲು ಮೋದಿ ಸರ್ಕಾರಕ್ಕೆ ವ್ಯಾಪಕ ಅಧಿಕಾರ ಸಿಗಲಿದೆ ಎಂದು ಸ್ಮಿತ್ ಎಚ್ಚರಿಸಿದ್ದಾರೆ.

ಮಾರ್ಕೊ ರುಬಿಯೋ ಅವರ ಗಮನ ಸೆಳೆಯಲು ಸ್ಮಿತ್ ಅವರು ಮಿಷನರೀಸ್ ಆಫ್ ಚಾರಿಟಿ ಸಂಸ್ಥೆಯನ್ನೇ ಪ್ರಮುಖ ಉದಾಹರಣೆಯಾಗಿ ನೀಡಿದ್ದಾರೆ. "ಒಂದು ವೇಳೆ ಈ ಹೊಸ ನಿಯಮಗಳು 2021ರಲ್ಲೇ ಜಾರಿಯಲ್ಲಿದ್ದಿದ್ದರೆ, ಆ ವರ್ಷ ಪರವಾನಗಿ ನವೀಕರಣದ ವೇಳೆ ಎದುರಾದ ಬಿಕ್ಕಟ್ಟಿನ ಸಂದರ್ಭದಲ್ಲೇ ಈ ಸಂಸ್ಥೆಯ ಕೋಟ್ಯಂತರ ರೂಪಾಯಿ ಮೌಲ್ಯದ ಇಡೀ ಮೂಲಸೌಕರ್ಯ ಮತ್ತು ಆಸ್ತಿಪಾಸ್ತಿಗಳನ್ನು ಸರ್ಕಾರವು ಶಾಶ್ವತವಾಗಿ ರಾಷ್ಟ್ರೀಕರಣಗೊಳಿಸಿ ತನ್ನ ವಶಕ್ಕೆ ಪಡೆದುಕೊಳ್ಳುತ್ತಿತ್ತು," ಎಂದು ಅವರು ಉಲ್ಲೇಖಿಸಿದ್ದಾರೆ.

ಕಳೆದ 2021ರ ಡಿಸೆಂಬರ್ 25ರಂದು, ಕೇಂದ್ರ ಗೃಹ ಸಚಿವಾಲಯವು ಕೆಲವು 'ಪ್ರತಿಕೂಲ ಅಂಶಗಳನ್ನು' ಕಾರಣವಾಗಿ ನೀಡಿ ಈ ಸಂಸ್ಥೆಯ ಈಅಖಂ ಪರವಾನಗಿಯನ್ನು ನವೀಕರಿಸಲು ನಿರಾಕರಿಸಿತ್ತು. ಈ ನಿರ್ಧಾರದಿಂದಾಗಿ ಚಾರಿಟಿಯ ವಿದೇಶಿ ಧನಸಹಾಯದ ಬ್ಯಾಂಕ್ ಖಾತೆಗಳು ಸ್ಥಗಿತಗೊಂಡು, ದೇಶಾದ್ಯಂತ ಇರುವ ನೂರಾರು ಆಶ್ರಯ ತಾಣಗಳು ಮತ್ತು ಚಿಕಿತ್ಸಾಲಯಗಳಿಗೆ ಸಿಗುತ್ತಿದ್ದ ಪ್ರಮುಖ ಸಂಪನ್ಮೂಲಗಳು ಸಂಪೂರ್ಣವಾಗಿ ಸ್ಥಗಿತಗೊಂಡಿದ್ದವು. ನಂತರ ಉಂಟಾದ ಭಾರಿ ಅಂತರರಾಷ್ಟ್ರೀಯ ಒತ್ತಡ ಮತ್ತು ದೇಶೀಯ ಟೀಕೆಗಳಿಗೆ ಮಣಿದ ಮೋದಿ ಸರ್ಕಾರವು, 2022ರ ಜನವರಿ 7ರಂದು ಸಂಸ್ಥೆಯ ಈಅಖಂ ಮಾನ್ಯತೆಯನ್ನು ಮರುಸ್ಥಾಪಿಸಿತ್ತು.

ಪ್ರಸ್ತುತ ವಾಷಿಂಗ್ಟನ್ನಲ್ಲಿ ವ್ಯಕ್ತವಾಗುತ್ತಿರುವ ಆತಂಕಗಳೆಲ್ಲವೂ ಮೋದಿ ಸರ್ಕಾರದ ಪ್ರಸ್ತಾವಿತ ಕಠಿಣ ನಿಯಂತ್ರಣ ವ್ಯವಸ್ಥೆಯ ಮೇಲೆಯೇ ಇವೆ. ಸಣ್ಣ ಆಡಳಿತಾತ್ಮಕ ತಪ್ಪುಗಳು ಅಥವಾ ನವೀಕರಣದಲ್ಲಿ ಆಗುವ ವಿಳಂಬಗಳು ಸಹ ಇಂತಹ ಸಂಸ್ಥೆಗಳ ಆಸ್ತಿಯನ್ನು ಸರ್ಕಾರವು ಶಾಶ್ವತವಾಗಿ ವಶಪಡಿಸಿಕೊಳ್ಳಲು ಕಾರಣವಾಗಬಹುದು ಎಂಬ ಆತಂಕ ಅವರಿಗಿದೆ. ಅಂತರರಾಷ್ಟ್ರೀಯ ಸಂಸ್ಥೆಗಳ ದೇಶೀಯ ಚಟುವಟಿಕೆಗಳನ್ನು ಮೇಲ್ವಿಚಾರಣೆ ಮಾಡಲು ಮತ್ತು ನಿರ್ಬಂಧಿಸಲು ಈಅಖಂ ಕಾಯ್ದೆಯನ್ನು ಹೆಚ್ಚಾಗಿ ಒಂದು ಆಡಳಿತಾತ್ಮಕ ಅಸ್ತ್ರವಾಗಿ ಬಳಸಲಾಗುತ್ತಿದೆ. ಇದು ನಾಗರಿಕ ಹಕ್ಕುಗಳು, ಮಾನವೀಯ ನೆರವು ಮತ್ತು ಧಾರ್ಮಿಕ ಸ್ವಾತಂತ್ರ್ಯದ ಮೇಲೆ ಪ್ರಭಾವ ಬೀರುತ್ತಿದೆ ಎಂದು ಲೇಖನದಲ್ಲಿ ಹೇಳಲಾಗಿದೆ.

ಆದರೆ, ರಾಷ್ಟ್ರೀಯ ಹಿತಾಸಕ್ತಿಗಳಿಗೆ ಧಕ್ಕೆ ತರುವಂತಹ ಚಟುವಟಿಕೆಗಳಿಗೆ ವಿದೇಶಿ ಹಣ ಬಳಕೆಯಾಗುವುದನ್ನು ತಡೆಯಲು ಈಅಖಂ ನಿಯಮಾವಳಿಗಳು ಅತ್ಯಗತ್ಯ ಎಂದು ಮೋದಿ ಸರ್ಕಾರವು ತನ್ನ ಕಠಿಣ ಕಾನೂನು ಚೌಕಟ್ಟನ್ನು ನಿರಂತರವಾಗಿ ಸಮರ್ಥಿಸಿಕೊಳ್ಳುತ್ತಾ ಬಂದಿದೆ.

ನಿಗದಿತ ವೇಳಾಪಟ್ಟಿಯ ಪ್ರಕಾರ, ರುಬಿಯೋ ಅವರು ಮೇ 23ರಿಂದ 26ರವರೆಗೆ ಭಾರತದ ಅಧಿಕೃತ ಪ್ರವಾಸ ಕೈಗೊಂಡಿದ್ದು, ಪ್ರವಾಸದ ಕಾರ್ಯಸೂಚಿಯು ಕೋಲ್ಕತ್ತಾ, ಆಗ್ರಾ, ಜೈಪುರ ಮತ್ತು ಹೊಸದಿಲ್ಲಿಯನ್ನು ಒಳಗೊಂಡಿದೆ. ಈ ಉನ್ನತ ಮಟ್ಟದ ಭೇಟಿಯ ಸಂದರ್ಭದಲ್ಲಿ ನಡೆಯಲಿರುವ ದ್ವಿಪಕ್ಷೀಯ ಮಾತುಕತೆಗಳು ಮುಖ್ಯವಾಗಿ ವ್ಯಾಪಾರ ವಹಿವಾಟು, ಇಂಧನ ಭದ್ರತೆ ಮತ್ತು ರಕ್ಷಣಾ ಸಹಕಾರದ ಸುತ್ತಲೇ ಕೇಂದ್ರೀಕೃತವಾಗಿರಲಿವೆ ಎಂದು ನಿರೀಕ್ಷಿಸಲಾಗಿದೆ.