ವೀರಪ್ಪನ್ ಸಂದರ್ಶನ ಪ್ರಕರಣ: ʼಸನ್ ಟಿವಿʼ ವಿರುದ್ಧದ 30 ವರ್ಷಗಳ ಸುದೀರ್ಘ ಕಾನೂನು ಹೋರಾಟದಲ್ಲಿ ನಟಿ ಸುಕನ್ಯಾ ಗೆದ್ದಿದ್ದು ಹೇಗೆ?

ಚೆನ್ನೈ : ಚೆನ್ನೈನ ವಿವಿಧ ನ್ಯಾಯಾಲಯಗಳಲ್ಲಿ ಕಳೆದ ಮೂರು ದಶಕಗಳಿಂದ ನಡೆಯುತ್ತಿದ್ದ ಸುದೀರ್ಘ ಕಾನೂನು ಹೋರಾಟದಲ್ಲಿ ಖ್ಯಾತ ನಟಿ ಆರ್. ಸುಕನ್ಯಾ ಅವರಿಗೆ ಕೊನೆಗೂ ಜಯ ಸಿಕ್ಕಿದೆ. 1996ರಲ್ಲಿ ಕಾಡುಗಳ್ಳ ವೀರಪ್ಪನ್ ನೀಡಿದ್ದ ಸಂದರ್ಶನದಲ್ಲಿ ತಮ್ಮ ವಿರುದ್ಧ ಮಾಡಲಾಗಿದ್ದ ಮಾನಹಾನಿಕರ ಆರೋಪಗಳಿಗೆ ಸಂಬಂಧಿಸಿದಂತೆ ಮದ್ರಾಸ್ ಹೈಕೋರ್ಟ್ ನಟಿಗೆ 10 ಲಕ್ಷ ರೂಪಾಯಿ ಪರಿಹಾರ ಧನವನ್ನು ಮಂಜೂರು ಮಾಡಿ ಆದೇಶಿಸಿದೆ. 

ಈ ವಿವಾದಾತ್ಮಕ ಸಂದರ್ಶನವನ್ನು ಪ್ರಸಾರ ಮಾಡಿದ್ದ ಪ್ರಮುಖ ತಮಿಳು ವಾಹಿನಿ 'ಸನ್ ಟಿವಿ'ಗೆ ಈ ಮೊತ್ತವನ್ನು ಪಾವತಿಸುವಂತೆ ನ್ಯಾಯಮೂರ್ತಿ ಕೆ. ಕುಮರೇಶ್ ಬಾಬು ಅವರ ಪೀಠವು ನಿರ್ದೇಶನ ನೀಡಿದೆ. ಈ ಮೂಲಕ 2015 ರಲ್ಲಿ ಸುಕನ್ಯಾ ಅವರ ಪರವಾಗಿ ವಿಚಾರಣಾ ನ್ಯಾಯಾಲಯ ನೀಡಿದ್ದ ತೀರ್ಪನ್ನು ಹೈಕೋರ್ಟ್ ಎತ್ತಿಹಿಡಿದಿದೆ.

ಹಿನ್ನೆಲೆ ಏನು?

1996ರ ಎಪ್ರಿಲ್‌ನಲ್ಲಿ ಸನ್ ಟಿವಿ ಕಾಡುಗಳ್ಳ ವೀರಪ್ಪನ್‌ನ ಸಂದರ್ಶನವೊಂದನ್ನು ಪ್ರಸಾರ ಮಾಡಿತ್ತು. ತಮಿಳು, ಮಲಯಾಳಂ, ಕನ್ನಡ ಮತ್ತು ತೆಲುಗು ಚಿತ್ರಗಳಲ್ಲಿ ನಟಿಸಿರುವ ಬಹುಭಾಷಾ ನಟಿ ಸುಕನ್ಯಾ ಅವರು, ಮಾಜಿ ಪ್ರಧಾನಿ ಪಿ.ವಿ. ನರಸಿಂಹ ರಾವ್ ಅವರ ಮಗನೊಂದಿಗೆ ಸಂಬಂಧ ಹೊಂದಿದ್ದಾರೆ ಎಂದು ವೀರಪ್ಪನ್ ಈ ಸಂದರ್ಶನದಲ್ಲಿ ಆರೋಪಿಸಿದ್ದನು.

ಪ್ರಕರಣದ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಬಾಬು ಅವರು, ಸನ್ ಟಿವಿ ಸಂಸ್ಥೆಯು ವೀರಪ್ಪನ್‌ನ ಒಟ್ಟು ಒಂಬತ್ತು ಗಂಟೆಗಳ ಸಂದರ್ಶನವನ್ನು ರೆಕಾರ್ಡ್ ಮಾಡಿಕೊಂಡಿತ್ತು. ಅದರಲ್ಲಿ ಯಾವುದೇ ಭಾಗವನ್ನು ಎಡಿಟ್ ಮಾಡಲು, ಕತ್ತರಿಸಲು, ತೆಗೆದುಹಾಕಲು ಅಥವಾ ಮಾರ್ಪಾಡು ಮಾಡಲು ವಾಹಿನಿಗೆ ಸಂಪೂರ್ಣ ಹಕ್ಕಿತ್ತು ಎಂಬುದನ್ನು ಗಮನಿಸಿದರು. ಅಷ್ಟೇ ಅಲ್ಲದೆ, ಇಂತಹ ಸೂಕ್ಷ್ಮ ವಿಷಯಗಳನ್ನು ಪ್ರಸಾರ ಮಾಡುವ ಮುನ್ನ ಅದರ ಸತ್ಯಾಸತ್ಯತೆಯನ್ನು ಪರಿಶೀಲಿಸುವುದು ಸುದ್ದಿ ವಾಹಿನಿಯ ಕರ್ತವ್ಯವಾಗಿತ್ತು ಎಂದು ನ್ಯಾಯಾಲಯ ಹೇಳಿದೆ.

"ಸಂದರ್ಶನದಲ್ಲಿರುವ ಮಾನಹಾನಿಕರ ಅಂಶಗಳನ್ನು ಪ್ರಸಾರ ಮಾಡುವ ಮುನ್ನ ವಾಹಿನಿಯು ಅದರ ಸತ್ಯಾಸತ್ಯತೆಯನ್ನು ಪರಿಶೀಲಿಸಬೇಕಾದ ಜವಾಬ್ದಾರಿಯನ್ನು ಹೊಂದಿತ್ತು" ಎಂದು ಹೈಕೋರ್ಟ್ ಅಭಿಪ್ರಾಯಪಟ್ಟಿದೆ.

ಈ ಮಾನಹಾನಿಕರ ಸಂದರ್ಶನವನ್ನು ಪ್ರಸಾರ ಮಾಡಿದ್ದಕ್ಕಾಗಿ ಸನ್ ಟಿವಿ ಸಂಸ್ಥೆಯು ಕ್ಷಮೆಯಾಚಿಸಿತ್ತಾದರೂ, ಹೈಕೋರ್ಟ್ ಆ ಕ್ಷಮಾಪಣೆಯ ಪ್ರಾಮಾಣಿಕತೆಯ ಬಗ್ಗೆ ಅನುಮಾನ ವ್ಯಕ್ತಪಡಿಸಿದೆ. ಏಕೆಂದರೆ, ವಾಹಿನಿಯು ತನ್ನದೇ ದೂರದರ್ಶನ ವಾಹಿನಿಯಲ್ಲಿ ಕ್ಷಮೆ ಕೇಳುವ ಬದಲಿಗೆ, ತಮಿಳು ನಿಯತಕಾಲಿಕೆಯೊಂದರಲ್ಲಿ ಮಾತ್ರ ಕ್ಷಮಾಪಣೆಯನ್ನು ಪ್ರಕಟಿಸಿತ್ತು.

ಸನ್ ಟಿವಿ ಸಂಸ್ಥೆಯೇ ಪರಿಹಾರ ನೀಡಬೇಕು ಎಂದು ವಿಚಾರಣಾ ನ್ಯಾಯಾಲಯ ನೀಡಿದ್ದ ತೀರ್ಪಿನಲ್ಲಿ ಯಾವುದೇ ಲೋಪದೋಷಗಳು ಕಂಡುಬಂದಿಲ್ಲ ಎಂದು ತಿಳಿಸಿದ ಹೈಕೋರ್ಟ್ ಪೀಠ, "ಒಂದು ವೇಳೆ ವಾಹಿನಿಯು ತನ್ನದೇ ಪ್ರಸಾರದಲ್ಲಿ ಕ್ಷಮೆಯಾಚಿಸಿದ್ದರೆ, ಅದು ಈ ಹಿಂದೆ ಆ ಮಾನಹಾನಿಕರ ಸಂದರ್ಶನವನ್ನು ವೀಕ್ಷಿಸಿದ್ದ ಅದೇ ಪ್ರೇಕ್ಷಕರನ್ನು ತಲುಪುತ್ತಿತ್ತು" ಎಂದು ಹೇಳಿ ವಾಹಿನಿಯ ನಡೆಗೆ ಅಸಮಾಧಾನ ವ್ಯಕ್ತಪಡಿಸಿತು.

ಕಾರ್ಯಕ್ರಮದ ಮಧ್ಯೆ ಪ್ರಸಾರವಾದ ಜಾಹೀರಾತುಗಳಿಂದ ವಾಹಿನಿಯು ಭಾರೀ ಲಾಭ ಗಳಿಸಿರಬೇಕು ಎಂಬುದನ್ನು ವಿಚಾರಣಾ ನ್ಯಾಯಾಲಯವು ತನ್ನ ಆದೇಶದಲ್ಲಿ ಉಲ್ಲೇಖಿಸಿತ್ತು. ವೀರಪ್ಪನ್ ಮಾಡಿದ್ದ ಮಾನಹಾನಿಕರ ಆರೋಪಗಳ ಬಗ್ಗೆ ವಾಹಿನಿಗೆ ಮುಂಚಿತವಾಗಿಯೇ ತಿಳಿದಿತ್ತು. ಹಾಗಿದ್ದೂ ಅದನ್ನು ಪ್ರಸಾರ ಮಾಡಲು ನಿರ್ಧರಿಸಲಾಗಿತ್ತು. ಇದು ಸನ್ ಟಿವಿ ಸಂಸ್ಥೆಯ "ದುರುದ್ದೇಶ"ವನ್ನು ಸ್ಪಷ್ಟವಾಗಿ ತೋರಿಸುತ್ತದೆ ಎಂದು ನ್ಯಾಯಾಲಯ ಹೇಳಿತ್ತು. ಅಲ್ಲದೆ, ನಟಿಯು ಸಾರ್ವಜನಿಕ ವಲಯದಲ್ಲಿ ಗುರುತಿಸಿಕೊಂಡಿರುವ ವ್ಯಕ್ತಿಯಾಗಿದ್ದರೂ, ಅವರ ವೈಯಕ್ತಿಕ ಗೌಪ್ಯತೆಯ ಹಕ್ಕನ್ನು ಇಲ್ಲಿ ಉಲ್ಲಂಘಿಸಲಾಗಿದೆ ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿತ್ತು.

1996ರ ಸಾರ್ವತ್ರಿಕ ಚುನಾವಣೆಯ ಸಂದರ್ಭದಲ್ಲಿ, ಅಂದಿನ ಕಾಂಗ್ರೆಸ್ ನಾಯಕ ಪಿ.ವಿ. ನರಸಿಂಹ ರಾವ್ ಅವರೊಂದಿಗೆ ರಾಜಕೀಯ ಒಪ್ಪಂದ ಮಾಡಿಕೊಳ್ಳಲು ಎಐಎಡಿಎಂಕೆ ಮುಖ್ಯಸ್ಥೆ ಹಾಗೂ ತಮಿಳುನಾಡಿನ ಮಾಜಿ ಮುಖ್ಯಮಂತ್ರಿ ದಿವಂಗತ ಜೆ. ಜಯಲಲಿತಾ ಅವರು ಇದೇ ವಿವಾದಾತ್ಮಕ ಸಂದರ್ಶನವನ್ನು ಬಳಸಿಕೊಂಡಿದ್ದರು ಎಂದು ನಟಿ ಸುಕನ್ಯಾ ನ್ಯಾಯಾಲಯಕ್ಕೆ ತಿಳಿಸಿದ್ದರು.

ಸುಕನ್ಯಾ ಅವರು ಸನ್ ಟಿವಿ ವಿರುದ್ಧ ಕೋರ್ಟ್ ಮೆಟ್ಟಿಲೇರಲು ಕಾರಣವೇನು?

ತಮ್ಮ ವಿರುದ್ಧ ಕೇಳಿ ಬಂದ ಆರೋಪಗಳ ವಿರುದ್ಧ ಸುಕನ್ಯಾ ಅವರು ನ್ಯಾಯಾಲಯದ ಮೊರೆ ಹೋಗಿದ್ದರು. ಇದು 2015 ರಲ್ಲಿ ವಿಚಾರಣಾ ನ್ಯಾಯಾಲಯದ ಆದೇಶಕ್ಕೆ ಕಾರಣವಾಯಿತು ಮತ್ತು ಅಂತಿಮವಾಗಿ ಈಗ ಮದ್ರಾಸ್ ಹೈಕೋರ್ಟ್ ತೀರ್ಪು ಪ್ರಕಟಿಸಿದೆ.

ವಿಚಾರಣಾ ನ್ಯಾಯಾಲಯದ ಆದೇಶವನ್ನು ಪ್ರಶ್ನಿಸಿ ಸನ್ ಟಿವಿ ಸಲ್ಲಿಸಿದ್ದ ಮೇಲ್ಮನವಿಯನ್ನು ಸುಕನ್ಯಾ ಅವರು ಹೈಕೋರ್ಟ್‌ನಲ್ಲಿ ತೀವ್ರವಾಗಿ ವಿರೋಧಿಸಿದರು. ಈ ಹಿಂದೆ ವಿಚಾರಣಾ ನ್ಯಾಯಾಲಯವು ಈ ಸಂದರ್ಶನವನ್ನು ಭವಿಷ್ಯದಲ್ಲಿ ಮತ್ತೆ ಪ್ರಸಾರ ಮಾಡದಂತೆ ವಾಹಿನಿಗೆ ನಿರ್ದೇಶನ ನೀಡಿತ್ತು. ಸಂದರ್ಶನದಲ್ಲಿದ್ದ ಮಾನಹಾನಿಕರ ಹೇಳಿಕೆಗಳು ನೇರವಾಗಿ ತಮ್ಮನ್ನೇ ಉದ್ದೇಶಿಸಿ ಮಾಡಿದ್ದಾಗಿದ್ದವು ಮತ್ತು ವೀಕ್ಷಕರಿಗೂ ಅದು ಹಾಗೆಯೇ ಅರ್ಥವಾಗಿತ್ತು ಎಂದು ಸುಕನ್ಯಾ ವಾದಿಸಿದರು.

"ಈ ಹೇಳಿಕೆಗಳು ಕೇವಲ ಆಕ್ಷೇಪಾರ್ಹ ಮಾತ್ರವಲ್ಲದೆ, ನನ್ನ ಸ್ನೇಹಿತರು, ಕುಟುಂಬಸ್ಥರು ಮತ್ತು ಸಾರ್ವಜನಿಕರ ದೃಷ್ಟಿಯಲ್ಲಿ ನನ್ನ ಘನತೆ ಹಾಗೂ ವರ್ಚಸ್ಸಿಗೆ ತೀವ್ರ ಧಕ್ಕೆ ತಂದಿವೆ" ಎಂದು ಅವರು ನ್ಯಾಯಾಲಯದಲ್ಲಿ ಹೇಳಿಕೆ ನೀಡಿದ್ದರು.

ಕೇವಲ ತಮ್ಮ ಟಿಆರ್‌ಪಿ ಹೆಚ್ಚಿಸಿಕೊಳ್ಳುವ ದುರಾಸೆಯಿಂದ, ಸುಕನ್ಯಾ ಅವರ ಘನತೆ ಮತ್ತು ಮರ್ಯಾದೆಯನ್ನು ಪಣಕ್ಕಿಟ್ಟು, ವಾಹಿನಿಯು ಉದ್ದೇಶಪೂರ್ವಕವಾಗಿ ಆ ಮಾನಹಾನಿಕರ ಭಾಗವನ್ನು ಕತ್ತರಿಸದೆ ಬೇಜವಾಬ್ದಾರಿಯಿಂದ ವರ್ತಿಸಿದೆ ಎಂದು ಅವರು ಪ್ರತಿಪಾದಿಸಿದರು.

ವೀರಪ್ಪನ್ ತಮ್ಮ ವಿರುದ್ಧ ಬಳಸಿದ್ದ ಕೆಲವು ಅವಾಚ್ಯ ಶಬ್ದಗಳನ್ನು ವಾಹಿನಿಯು 'ಮ್ಯೂಟ್' ಮಾಡಿತ್ತಾದರೂ, ತಮ್ಮ ಹೆಸರನ್ನು ಆರೋಪಕ್ಕೆ ಲಿಂಕ್ ಮಾಡುವ ನಿರ್ದಿಷ್ಟ ಭಾಗವು ಸುಳ್ಳಾಗಿದ್ದರೂ ಸಹ ಅದನ್ನು ಉದ್ದೇಶಪೂರ್ವಕವಾಗಿ ಹಾಗೇ ಉಳಿಸಿಕೊಳ್ಳಲಾಗಿತ್ತು ಎಂದು ಸುಕನ್ಯಾ ಆರೋಪಿಸಿದರು.

ಈ ಮಾನಹಾನಿಕರ ಹೇಳಿಕೆಗಳಿಂದಾಗಿ ತಮ್ಮ ಆದಾಯ ಕುಂಠಿತಗೊಂಡು ಸುಮಾರು 1 ಕೋಟಿ ರೂಪಾಯಿಗಳಷ್ಟು ನಷ್ಟವಾಗಿದೆ ಎಂದು ಸುಕನ್ಯಾ ಹೇಳಿಕೊಂಡಿದ್ದರೂ, ಅವರು ನ್ಯಾಯಾಲಯದಿಂದ ಕೇವಲ 10,00,500 ರೂಪಾಯಿಗಳ ಪರಿಹಾರವನ್ನು ಮಾತ್ರ ಕೋರಿದ್ದರು. ಇದರೊಂದಿಗೆ, ಆ ಸಂದರ್ಶನವನ್ನು ಸಂಪೂರ್ಣವಾಗಿ ತೆಗೆದುಹಾಕಲು ಮತ್ತು ವಾಹಿನಿಯು ಅದನ್ನು ಭವಿಷ್ಯದಲ್ಲಿ ಎಂದಿಗೂ ಪ್ರಕಟಿಸದಂತೆ ಶಾಶ್ವತ ತಡೆಯಾಜ್ಞೆ ನೀಡುವಂತೆಯೂ ಅವರು ನ್ಯಾಯಾಲಯವನ್ನು ವಿನಂತಿಸಿದ್ದರು.

ಈ ವಿಷಯಕ್ಕೆ ಸಂಬಂಧಿಸಿದಂತೆ ತಾವು ವಾಹಿನಿಗೆ ಕಾನೂನು ನೋಟಿಸ್‌ಗಳನ್ನು ಕಳುಹಿಸಿದ್ದರೂ, ಅವರಿಂದ ಯಾವುದೇ ಪ್ರತಿಕ್ರಿಯೆ ಬಂದಿರಲಿಲ್ಲ ಎಂದೂ ಅವರು ನ್ಯಾಯಾಲಯಕ್ಕೆ ತಿಳಿಸಿದರು.

ಸನ್ ಟಿವಿಯ ವಾದಗಳೇನು?

ಹೈಕೋರ್ಟ್‌ಗೆ ಸಲ್ಲಿಸಿದ ಮೇಲ್ಮನವಿಯಲ್ಲಿ ಸನ್ ಟಿವಿ ಸಂಸ್ಥೆಯು, ನಟಿಯ ಮಾನಹಾನಿ ಮಾಡುವ ಯಾವುದೇ ಉದ್ದೇಶ ತಮಗಿರಲಿಲ್ಲ ಎಂದು ವಾದಿಸಿತು. ಅಲ್ಲದೆ, ಸಂದರ್ಶನದಲ್ಲಿ ವೀರಪ್ಪನ್ ಹಂಚಿಕೊಂಡಿರುವ ಅಭಿಪ್ರಾಯಗಳು ಸಂಪೂರ್ಣವಾಗಿ ಅವರ ವೈಯಕ್ತಿಕವಾದವು ಮತ್ತು ಅದಕ್ಕೂ ವಾಹಿನಿಗೂ ಯಾವುದೇ ಸಂಬಂಧವಿಲ್ಲ ಎಂಬ ಸ್ಪಷ್ಟನೆಯನ್ನು ಕಾರ್ಯಕ್ರಮದ ಜೊತೆಗೆ ಪ್ರಸಾರ ಮಾಡಲಾಗಿತ್ತು ಎಂದು ಸಮರ್ಥಿಸಿಕೊಂಡಿತು.

1996 ರಲ್ಲೇ ತಮಿಳಿನ ವಾರಪತ್ರಿಕೆ 'ನಕ್ಕೀರನ್'ನಲ್ಲಿ ತಾನು ಪ್ರಕಟಿಸಿದ್ದ ಕ್ಷಮಾಪಣೆಯನ್ನು ವಾಹಿನಿಯು ನ್ಯಾಯಾಲಯದ ಗಮನಕ್ಕೆ ತಂದಿತು. ಜೊತೆಗೆ, ಈ ಸಂದರ್ಶನವನ್ನು ನಡೆಸಿದ ವ್ಯಕ್ತಿಯು ಸುಮಾರು ಏಳು ವರ್ಷಗಳ ಕಾಲ ತನಿಖಾ ಪತ್ರಕರ್ತರಾಗಿ ಕೆಲಸ ಮಾಡಿದ ಅನುಭವ ಹೊಂದಿದ್ದರು ಎಂಬುದನ್ನೂ ಉಲ್ಲೇಖಿಸಿತು.

ಈ ಸಂದರ್ಶನವನ್ನು ಪ್ರಸಾರ ಮಾಡುವ ಹಿಂದೆ ವಾಹಿನಿಗೆ ಯಾವುದೇ ರಾಜಕೀಯ ದ್ವೇಷ ಅಥವಾ ದುರುದ್ದೇಶ ಇರಲಿಲ್ಲ ಎಂದು ಪ್ರತಿಪಾದಿಸಿದ ಸನ್ ಟಿವಿ, ಕಾಡುಗಳ್ಳನ ಚಟುವಟಿಕೆಗಳ ಬಗ್ಗೆ ತನಿಖೆ ನಡೆಸುವುದು ಮತ್ತು ಅವನ ಅಪರಾಧ ಕೃತ್ಯಗಳಿಗೆ ಬ್ರೇಕ್ ಹಾಕುವುದು ಮಾತ್ರವೇ ಈ ಸಂದರ್ಶನದ ಮುಖ್ಯ ಉದ್ದೇಶವಾಗಿತ್ತು ಎಂದಿತು. ಮೇಲಾಗಿ, ಈ ಸಂದರ್ಶನವು ಯಾವುದೇ ಪೂರ್ವಸಿದ್ಧತೆ ಇಲ್ಲದೆ ಸ್ಥಳದಲ್ಲೇ ಸ್ವಾಭಾವಿಕವಾಗಿ ನಡೆದಿದ್ದೇ ಹೊರತು, ಸ್ಕ್ರಿಪ್ಟೆಡ್ ಅಲ್ಲ ಎಂದು ವಾಹಿನಿ ವಾದಿಸಿತು.

ಇದೇ ವೇಳೆ, ತಮಗೆ ಕೋಟ್ಯಂತರ ರೂಪಾಯಿ ನಷ್ಟವಾಗಿದೆ ಎಂದು ಹೇಳಿಕೊಳ್ಳುತ್ತಾ ನ್ಯಾಯಾಲಯದಲ್ಲಿ ಕೇವಲ 10 ಲಕ್ಷ ರೂಪಾಯಿ ಪರಿಹಾರ ಕೇಳುತ್ತಿರುವುದರ ಹಿಂದೆ ನಟಿಯ ವಾದದಲ್ಲಿ ಸ್ಪಷ್ಟತೆಯಿಲ್ಲ ಎಂದು ವಾಹಿನಿ ಅನುಮಾನ ವ್ಯಕ್ತಪಡಿಸಿತು.

ಹೈಕೋರ್ಟ್‌ ಹೇಳಿದ್ದೇನು?

ಪ್ರಕರಣದ ಎಲ್ಲ ಆಯಾಮಗಳನ್ನು ಪರಿಶೀಲಿಸಿದ ಹೈಕೋರ್ಟ್, 2015ರಲ್ಲಿ ವಿಚಾರಣಾ ನ್ಯಾಯಾಲಯ ನೀಡಿದ ಆದೇಶವನ್ನು ಉಲ್ಲೇಖಿಸಿತು. ವೀರಪ್ಪನ್‌ನ ಮೂಲ ರೆಕಾರ್ಡಿಂಗ್ ಒಟ್ಟು ಒಂಬತ್ತು ಗಂಟೆಗಳ ಕಾಲ ಇತ್ತು, ಅದನ್ನು ಎಡಿಟ್ ಮಾಡಿ ನಾಲ್ಕು ಗಂಟೆಗಳಿಗೆ ಇಳಿಸಲಾಗಿತ್ತು. ಇದನ್ನು ಎಂಟು ದಿನಗಳ ಕಾಲ ಪ್ರತಿದಿನ 30 ನಿಮಿಷಗಳ ಅವಧಿಯಲ್ಲಿ ಪ್ರಸಾರ ಮಾಡಲಾಗಿತ್ತು ಎಂಬುದನ್ನು ನ್ಯಾಯಾಲಯ ಗಮನಿಸಿತು.

ಸುಕನ್ಯಾ ಅವರು ನಟಿಯಾಗಿದ್ದರಿಂದ ಮತ್ತು ಸಾರ್ವಜನಿಕ ವಲಯದಲ್ಲಿ ಗುರುತಿಸಿಕೊಂಡಿದ್ದರಿಂದ, ಅವರ ವೈಯಕ್ತಿಕ ಗೌಪ್ಯತೆಯ ಹಕ್ಕನ್ನು ರಕ್ಷಿಸಬೇಕಾದುದು ಅತ್ಯಗತ್ಯ ಎಂದು ಹೈಕೋರ್ಟ್ ಹೇಳಿತು.

ಸನ್ ಟಿವಿ ಸಂಸ್ಥೆಯು ಯಾವುದೇ ವಿಷಯವನ್ನು ಪ್ರಸಾರ ಮಾಡುವ ಮುನ್ನ ವಹಿಸಬೇಕಾದ ಕನಿಷ್ಠ ಎಚ್ಚರಿಕೆ ಮತ್ತು ಜವಾಬ್ದಾರಿಯನ್ನು ಮರೆತಿದೆ. ಸತ್ಯಾಸತ್ಯತೆಯನ್ನು ಪರಿಶೀಲಿಸದೆ ತೀವ್ರ ಬೇಜವಾಬ್ದಾರಿತನ ತೋರಿದೆ ಎಂದು ಹೈಕೋರ್ಟ್ ತರಾಟೆಗೆ ತೆಗೆದುಕೊಂಡಿತು.

ತನ್ನದೇ ವಾಹಿನಿಯಲ್ಲಿ ಕ್ಷಮೆ ಕೇಳುವ ಬದಲು, ಮೂರನೇ ವ್ಯಕ್ತಿಗೆ ಸೇರಿದ ನಿಯತಕಾಲಿಕೆಯಲ್ಲಿ ಕ್ಷಮಾಪಣೆ ಪ್ರಕಟಿಸಿರುವುದು ಸನ್ ಟಿವಿಯ ದುರುದ್ದೇಶವನ್ನು ತೋರಿಸುತ್ತದೆ. ನಿಜವಾದ ಪ್ರಾಮಾಣಿಕತೆ ಇದ್ದಿದ್ದರೆ ಆ ಕ್ಷಮಾಪಣೆಯನ್ನು ಮೂಲ ಸಂದರ್ಶನ ಪ್ರಸಾರವಾದ ಅದೇ ಟಿವಿ ವಾಹಿನಿಯಲ್ಲೇ ಬಿತ್ತರಿಸಬಹುದಿತ್ತು ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿತು.

ನಟಿ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ ನಂತರವೂ ವಾಹಿನಿಯು ಆ ಕಾರ್ಯಕ್ರಮದ ಪ್ರಸಾರವನ್ನು ಮುಂದುವರಿಸಿದ್ದು, ಇದರಿಂದಾಗಿ ನಟಿಯ ಘನತೆಗೆ ಧಕ್ಕೆಯುಂಟಾಗಿ ಅವರ ಆದಾಯಕ್ಕೆ ಪೆಟ್ಟು ಬಿದ್ದಿರುವುದು ಸೇರಿದಂತೆ ಹಲವು ಪ್ರಮುಖ ಅಂಶಗಳನ್ನು ಪರಿಗಣಿಸಿದ ಹೈಕೋರ್ಟ್, ಅಂತಿಮವಾಗಿ ನಟಿ ಸುಕನ್ಯಾ ಅವರ ಪರವಾಗಿ ತೀರ್ಪು ಪ್ರಕಟಿಸಿತು.