ವಿವಾದಕ್ಕೀಡಾದ ಅರ್ಜೆಂಟೀನಾ ಆಟಗಾರರ ಗೆಲುವಿನ ಸಂಭ್ರಮಾಚರಣೆ; ಫಿಫಾದಿಂದ ಶಿಸ್ತು ಕ್ರಮ ಎದುರಿಸುವ ಸಾಧ್ಯತೆ: ವರದಿ

 ಅಟ್ಲಾಂಟಾ: 2026ರ ಫಿಫಾ ವಿಶ್ವಕಪ್ ಸೆಮಿಫೈನಲ್‌ನಲ್ಲಿ ಇಂಗ್ಲೆಂಡ್ ವಿರುದ್ಧದ ಗೆಲುವಿನ ಬಳಿಕ ಅರ್ಜೆಂಟೀನಾ ಆಟಗಾರರು ನಡೆಸಿದ ಸಂಭ್ರಮಾಚರಣೆಯು ಇದೀಗ ವಿವಾದಕ್ಕೀಡಾಗಿದೆ. ಫಾಕ್ಲ್ಯಾಂಡ್ ದ್ವೀಪಗಳ ಮೇಲಿನ ತಮ್ಮ ದೇಶದ ಹಕ್ಕನ್ನು ಬೆಂಬಲಿಸುವ ಬ್ಯಾನರ್ ಪ್ರದರ್ಶಿಸಿ ಸಂಭ್ರಮಿಸಿದ ಕಾರಣಕ್ಕೆ ಫಿಫಾದಿಂದ ಶಿಸ್ತು ಕ್ರಮ ಎದುರಿಸುವ ಸಾಧ್ಯತೆಯಿದೆ ಎಂದು TOI ವರದಿ ಮಾಡಿದೆ. 

ಅಟ್ಲಾಂಟಾದಲ್ಲಿ ನಡೆದ ಈ ರೋಚಕ ಸೆಮಿಫೈನಲ್ ಪಂದ್ಯದಲ್ಲಿ, ಇಂಗ್ಲೆಂಡ್ ತಂಡದ ವಿರುದ್ಧ ಕೊನೆಯ ಕ್ಷಣಗಳಲ್ಲಿ ಎರಡು ಗೋಲುಗಳನ್ನು ಬಾರಿಸಿದ ಹಾಲಿ ಚಾಂಪಿಯನ್ ಅರ್ಜೆಂಟೀನಾ 2-1 ಅಂತರದಲ್ಲಿ ಜಯ ಸಾಧಿಸಿತು. ಈ ಮೂಲಕ ಮುಂಬರುವ ಭಾನುವಾರ ನಡೆಯಲಿರುವ ಹೈ-ವೋಲ್ಟೇಜ್ ವಿಶ್ವಕಪ್ ಫೈನಲ್ ಪಂದ್ಯದಲ್ಲಿ ಸ್ಪೇನ್ ವಿರುದ್ಧ ಹೋರಾಡಲು ಅರ್ಜೆಂಟೀನಾ ಅರ್ಹತೆ ಪಡೆದಿದೆ.

ಪಂದ್ಯದಲ್ಲಿ ವಿಜಯಿಯಾದ ಬಳಿಕ, ಅರ್ಜೆಂಟೀನಾದ ಆಟಗಾರರು "ಲಾಸ್ ಮಾಲ್ವಿನಾಸ್ ಸನ್ ಅರ್ಜೆಂಟೀನಾಸ್" ಎಂದು ಬರೆದಿದ್ದ ಬ್ಯಾನರ್‌ನೊಂದಿಗೆ ಸಂಭ್ರಮಿಸಿದರು. ಇದರ ಅರ್ಥ "ಫಾಕ್ಲ್ಯಾಂಡ್ಸ್ ಅರ್ಜೆಂಟೀನಾಗೆ ಸೇರಿದ್ದು" ಎಂದಾಗಿದೆ.

ದೀರ್ಘಕಾಲದ ಫಾಕ್ಲ್ಯಾಂಡ್ಸ್ ವಿವಾದ

ಫಾಕ್ಲ್ಯಾಂಡ್ ದ್ವೀಪಗಳು ದಕ್ಷಿಣ ಅಟ್ಲಾಂಟಿಕ್ ಮಹಾಸಾಗರದಲ್ಲಿರುವ ಬ್ರಿಟಿಷ್ ಸಾಗರೋತ್ತರ ಪ್ರಾಂತ್ಯವಾಗಿದೆ. ಆದಾಗ್ಯೂ, ಅರ್ಜೆಂಟೀನಾ ದೀರ್ಘಕಾಲದಿಂದಲೂ ಈ ದ್ವೀಪಗಳ ಮೇಲೆ ತನ್ನ ಸಾರ್ವಭೌಮತ್ವವನ್ನು ಪ್ರತಿಪಾದಿಸುತ್ತಾ ಬಂದಿದೆ.

ಈ ದ್ವೀಪಗಳಿಗಾಗಿ ಉಭಯ ದೇಶಗಳು 1982ರ ಏಪ್ರಿಲ್ ಮತ್ತು ಜೂನ್ ನಡುವೆ 74 ದಿನಗಳ ಕಾಲ ಯುದ್ಧ ನಡೆಸಿದ್ದವು. ಈ ಸಂಘರ್ಷದಲ್ಲಿ ಅರ್ಜೆಂಟೀನಾದ 655 ಸೈನಿಕರು, ಬ್ರಿಟನ್‌ನ 255 ಸೈನಿಕರು ಮತ್ತು ಮೂವರು ದ್ವೀಪವಾಸಿಗಳು ಜೀವ ಕಳೆದುಕೊಂಡಿದ್ದರು.

ಈ ವಿಷಯದಲ್ಲಿ ಅರ್ಜೆಂಟೀನಾ ಕ್ರಮ ಎದುರಿಸುತ್ತಿರುವುದು ಇದೇ ಮೊದಲೇನಲ್ಲ. 2014ರಲ್ಲಿ ಸ್ಲೊವೇನಿಯಾ ವಿರುದ್ಧದ ಸೌಹಾರ್ದ ಪಂದ್ಯಕ್ಕೆ ಮುನ್ನ ಆಟಗಾರರು ಇದೇ ಸಂದೇಶವನ್ನು ಹೊಂದಿದ್ದ ಬ್ಯಾನರ್ ಪ್ರದರ್ಶಿಸಿದ್ದಕ್ಕಾಗಿ, ಅರ್ಜೆಂಟೀನಾ ಫುಟ್ಬಾಲ್ ಸಂಸ್ಥೆಗೆ ಫಿಫಾ £20,000 ದಂಡ ವಿಧಿಸಿತ್ತು.

ಆ ಸಮಯದಲ್ಲಿ, ಈ ಕೃತ್ಯವು ರಾಜಕೀಯ ನಡೆ ಮತ್ತು ತಂಡದ ದುರ್ನಡತೆಗೆ ಸಂಬಂಧಿಸಿದ ತನ್ನ ನಿಯಮಾವಳಿಗಳನ್ನು ಉಲ್ಲಂಘಿಸಿದೆ ಎಂದು ವಿಶ್ವ ಫುಟ್ಬಾಲ್‌ನ ಆಡಳಿತ ಮಂಡಳಿ (ಈIಈಂ) ತೀರ್ಪು ನೀಡಿತ್ತು.

ಅರ್ಜೆಂಟೀನಾದ ಉಪಾಧ್ಯಕ್ಷರ ಪ್ರತಿಕ್ರಿಯೆ

ಈ ಫಲಿತಾಂಶದ ಬಗ್ಗೆ ಪ್ರತಿಕ್ರಿಯಿಸಿದ ಅರ್ಜೆಂಟೀನಾದ ಉಪಾಧ್ಯಕ್ಷೆ ವಿಕ್ಟೋರಿಯಾ ವಿಲ್ಲಾರ್ರುಯೆಲ್, "ಇದು ಕೇವಲ ಮತ್ತೊಂದು ಸಾಮಾನ್ಯ ಪಂದ್ಯವಾಗಿರಲಿಲ್ಲ" ಎಂದು ಬರೆದು ಅರ್ಜೆಂಟೀನಾದ ಸೈನಿಕರನ್ನು ತೋರಿಸುವ ವೀಡಿಯೊವನ್ನು ಹಂಚಿಕೊಂಡಿದ್ದಾರೆ.

"ಫಾಕ್ಲ್ಯಾಂಡ್ಸ್ ಅರ್ಜೆಂಟೀನಾಗೆ ಸೇರಿದ್ದು. ಅವರು ಅದನ್ನು ಕ್ರೀಡಾಂಗಣಕ್ಕೆ ತರುವುದನ್ನು ನಿಷೇಧಿಸಿದರು, ಆದರೆ ನಾವು ಅದನ್ನು ನಮ್ಮ ರಕ್ತ ಮತ್ತು ಹೃದಯದಲ್ಲಿ ಹೊತ್ತು ಸಾಗುತ್ತೇವೆ ಎಂಬುದನ್ನು ಮರೆತುಬಿಟ್ಟರು" ಎಂದು ಅವರು ಬರೆದಿದ್ದಾರೆ. ಸೆಮಿಫೈನಲ್‌ಗೂ ಮುನ್ನ ವಿಲ್ಲಾರ್ರುಯೆಲ್ ಈ ಪಂದ್ಯವನ್ನು "ಆಕ್ರಮಣಕಾರರನ್ನು ಅವರವರ ಜಾಗದಲ್ಲಿ ಇರಿಸುವುದರ ಬಗ್ಗೆ" ಎಂದು ಬಣ್ಣಿಸಿದ್ದರು.

ಇದಕ್ಕೂ ಮುನ್ನ ಈಜಿಪ್ಟ್ ವಿರುದ್ಧದ ರೋಚಕ ಪಂದ್ಯದ ಗೆಲುವಿನ ಬಳಿಕ ಅರ್ಜೆಂಟೀನಾದ ಆಟಗಾರರು ಫಾಕ್ಲ್ಯಾಂಡ್ಸ್ ಹಾಗೂ ಫುಟ್ಬಾಲ್ ದಿಗ್ಗಜರಾದ ಡಿಯಾಗೋ ಮರಡೋನಾ ಮತ್ತು ಲಿಯೋನೆಲ್ ಮೆಸ್ಸಿ ಅವರನ್ನು ಉಲ್ಲೇಖಿಸಿ ಘೋಷಣೆಗಳನ್ನು ಕೂಗಿದ್ದರು.