ಮೊದಲ ಐಎಸ್‍ಎಸ್ ಮಿಷನ್‍ಗೆ ಸಿದ್ಧರಾದ ನಾಸಾ ಗಗನಯಾತ್ರಿ ಅನಿಲ್ ಮೆನನ್

 ವಾಶಿಂಗ್ಟನ್: ಭಾರತೀಯ ಮೂಲದ ನಾಸಾ(ಅಮೆರಿಕದ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ) ಗಗನಯಾತ್ರಿ ಅನಿಲ್ ಮೆನನ್ ಅವರು ಜುಲೈ 14 ರಂದು ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಕ್ಕೆ (ಐಎಸ್‍ಎಸ್) ತಮ್ಮ ಮೊದಲ ಪ್ರಯಾಣವನ್ನು ಕೈಗೊಳ್ಳಲು ಸಿದ್ಧರಾಗಿದ್ದಾರೆ.

ಇದು ಎಂಟು ತಿಂಗಳ ಸುದೀರ್ಘ ಕಾರ್ಯಾಚರಣೆಯಾಗಿದ್ದು, ಮಾನವನ ಆರೋಗ್ಯ, ಸುಧಾರಿತ ತಂತ್ರಜ್ಞಾನಗಳು ಮತ್ತು ಭವಿಷ್ಯದ ಆಳವಾದ ಬಾಹ್ಯಾಕಾಶ ಪರಿಶೋಧನೆಯ ಸಿದ್ಧತೆಗಳ ಮೇಲೆ ಗಮನ ಕೇಂದ್ರೀಕರಿಸಲಿದೆ.

ಅನಿಲ್ ಮೆನನ್ ಅವರು ರಶ್ಯದ ಗಗನಯಾತ್ರಿಗಳಾದ ಪಯೋಟರ್ ಡುಬ್ರೊವ್ ಮತ್ತು ಅನ್ನಾ ಕಿಕಿನಾ ಅವರೊಂದಿಗೆ ಕಝಾಕಿಸ್ತಾನ್‍ನ ಬೈಕನೂರ್ ಕಾಸ್ಮೋಡ್ರೋಮ್‍ನಿಂದ ರಾಸ್‍ಕಾಸ್ಮೋಸ್ ಸೋಯುಜ್ ಎಂಎಸ್-29 ಗಗನನೌಕೆಯ ಮೂಲಕ ಉಡಾವಣೆಗೊಳ್ಳಲಿದ್ದಾರೆ. ಈ ತಂಡವು ಏಪ್ರಿಲ್ 2027 ರಲ್ಲಿ ಭೂಮಿಗೆ ಹಿಂತಿರುಗುವ ಮುನ್ನ, ಕಕ್ಷೆಯಲ್ಲಿರುವ ಬಾಹ್ಯಾಕಾಶ ಪ್ರಯೋಗಾಲಯದಲ್ಲಿ `ಅನ್ವೇಷಣೆ 74 ಮತ್ತು 75' ರ ಭಾಗವಾಗಿ ಕೆಲಸ ಮಾಡಲಿದೆ.