Mahadev betting app ಪ್ರಕರಣ | ಹೊಸದಾಗಿ 6 ದೋಷಾರೋಪ ಪಟ್ಟಿಗಳನ್ನು ಸಲ್ಲಿಸಿದ ಸಿಬಿಐ: 70 ಆರೋಪಿಗಳ ಹೆಸರು ಉಲ್ಲೇಖ

 ರಾಂಚಿ: ಮಹಾದೇವ್ ಬೆಟ್ಟಿಂಗ್ ಆಯಪ್ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕೇಂದ್ರ ತನಿಖಾ ದಳ (ಸಿಬಿಐ) ಹೊಸದಾಗಿ ಆರು ದೋಷಾರೋಪ ಪಟ್ಟಿಗಳನ್ನು ನ್ಯಾಯಾಲಯಕ್ಕೆ ಸಲ್ಲಿಸಿದೆ. ಇದರೊಂದಿಗೆ, ಈ ಪ್ರಕರಣದಲ್ಲಿ ಇದುವರೆಗೆ ಸಲ್ಲಿಸಿರುವ ಒಟ್ಟು ದೋಷಾರೋಪ ಪಟ್ಟಿಗಳ ಸಂಖ್ಯೆ 11ಕ್ಕೆ ಏರಿಕೆಯಾಗಿದೆ.  

ಈ ಎಲ್ಲ ದೋಷಾರೋಪ ಪಟ್ಟಿಗಳಲ್ಲಿ ಪ್ರಕರಣದ ಪ್ರಮುಖ ಸೂತ್ರಧಾರರೆಂದು ಪರಿಗಣಿಸಲಾದ ಸೌರಭ್ ಚಂದ್ರಶೇಖರ್ ಮತ್ತು ರವಿ ಉಪ್ಪಲ್ ಸೇರಿದಂತೆ ಒಟ್ಟು 70 ಆರೋಪಿಗಳ ಹೆಸರನ್ನು ಉಲ್ಲೇಖಿಸಲಾಗಿದೆ.

ಭಾರತದ ಅತಿ ದೊಡ್ಡ ಆನ್‌ಲೈನ್ ಬೆಟ್ಟಿಂಗ್ ಜಾಲಕ್ಕೆ ಸಂಬಂಧಿಸಿದ ಈ ಪ್ರಕರಣದ ತನಿಖೆಯನ್ನು ಸಿಬಿಐ ವಿವಿಧ ಆಯಾಮಗಳಲ್ಲಿ ಮುಂದುವರಿಸಿದ್ದು, ಹಣಕಾಸು ವ್ಯವಹಾರಗಳು, ಭ್ರಷ್ಟಾಚಾರದ ಆರೋಪಗಳು ಹಾಗೂ ಬೆಟ್ಟಿಂಗ್ ಜಾಲದ ಕಾರ್ಯವೈಖರಿಯನ್ನು ಪರಿಶೀಲಿಸುತ್ತಿದೆ.

ಭ್ರಷ್ಟಾಚಾರ ಪ್ರಕರಣಕ್ಕೆ ಸಂಬಂಧಿಸಿದಂತೆ ಅಶೀಂ ದಾಸ್, ರೋಹಿತ್ ಗುಲಾಟಿ, ವಿಕಾಸ್ ಛಪಾರಿಯಾ, ಅನಿಲ್ ಧಮ್ಮನಿ, ವಿಶಾಲ್ ಅಹುಜಾ ಮತ್ತು ಧೀರಜ್ ಅಹುಜಾ ವಿರುದ್ಧ ಸಿಬಿಐ ಆರು ಪ್ರತ್ಯೇಕ ದೋಷಾರೋಪ ಪಟ್ಟಿಗಳನ್ನು ಸಲ್ಲಿಸಿದೆ. ಆರೋಪಿಗಳ ವಿರುದ್ಧ ಭ್ರಷ್ಟಾಚಾರ ನಿಗ್ರಹ ಕಾಯ್ದೆ-1988 ಹಾಗೂ ಭಾರತೀಯ ದಂಡ ಸಂಹಿತೆಯ ವಿವಿಧ ಸೆಕ್ಷನ್‌ಗಳಡಿ ಪ್ರಕರಣ ದಾಖಲಿಸಲಾಗಿದೆ.

ಇದರ ಜತೆಗೆ, ಪ್ರಕರಣದ ಪ್ರಮುಖ ಸೂತ್ರಧಾರರಾದ ಸೌರಭ್ ಚಂದ್ರಶೇಖರ್ ಮತ್ತು ರವಿ ಉಪ್ಪಲ್ ಸೇರಿದಂತೆ, ಈ ಹಿಂದೆ ದೋಷಾರೋಪ ಪಟ್ಟಿಯಲ್ಲಿ ಹೆಸರಿಸಲಾಗಿದ್ದ ಇತರ ಆರೋಪಿಗಳ ವಿರುದ್ಧವೂ ಸಿಬಿಐ ಹೆಚ್ಚುವರಿ ದೋಷಾರೋಪ ಪಟ್ಟಿಯನ್ನು ಸಲ್ಲಿಸಿದೆ.

ಮಹಾದೇವ್ ಆಯಪ್‌ಗೆ ಸಂಬಂಧಿಸಿದ ಮತ್ತೊಂದು ಪ್ರಕರಣದಲ್ಲೂ ಸಿಬಿಐ ಪ್ರತ್ಯೇಕವಾಗಿ ಐದು ದೋಷಾರೋಪ ಪಟ್ಟಿಗಳನ್ನು ಸಲ್ಲಿಸಿದೆ. ಈ ಪ್ರಕರಣದಲ್ಲಿ ಸೌರಭ್ ಚಂದ್ರಶೇಖರ್, ರವಿ ಉಪ್ಪಲ್ ಹಾಗೂ ಬೆಟ್ಟಿಂಗ್ ಸಿಂಡಿಕೇಟ್‌ನ ಕಾರ್ಯಕಾರಿ ಸಮಿತಿಯ ಸದಸ್ಯರ ವಿರುದ್ಧ ಆರೋಪ ಹೊರಿಸಲಾಗಿದೆ. ಈ ದೋಷಾರೋಪ ಪಟ್ಟಿಗಳಲ್ಲಿ ಭಾರತೀಯ ದಂಡ ಸಂಹಿತೆಯ ವಿವಿಧ ಸೆಕ್ಷನ್‌ಗಳು ಹಾಗೂ ಛತ್ತೀಸ್‌ಗಢ ಜೂಜಾಟ ನಿಷೇಧ ಕಾಯ್ದೆಯಡಿ ಆರೋಪಗಳನ್ನು ದಾಖಲಿಸಲಾಗಿದೆ.

ಈ ಹೊಸ ಆರು ದೋಷಾರೋಪ ಪಟ್ಟಿಗಳ ಸೇರ್ಪಡೆಯೊಂದಿಗೆ, ಮಹಾದೇವ್ ಬೆಟ್ಟಿಂಗ್ ಆಯಪ್ ಪ್ರಕರಣದಲ್ಲಿ ಸಿಬಿಐ ಸಲ್ಲಿಸಿರುವ ಒಟ್ಟು ದೋಷಾರೋಪ ಪಟ್ಟಿಗಳ ಸಂಖ್ಯೆ 11ಕ್ಕೆ ತಲುಪಿದ್ದು, ತನಿಖೆ ಇನ್ನೂ ಮುಂದುವರಿದಿದೆ.