ಕಳಪೆ ಗುಣಮಟ್ಟದ ಇಂಗು: ಎವರೆಸ್ಟ್, ಲಾಲ್ಜೀ ಗೋಧೂ ಉತ್ಪನ್ನ ಮಾರಾಟಕ್ಕೆ FSSAI ನಿರ್ಬಂಧ

ನವದೆಹಲಿ:  ಪ್ರಯೋಗಾಲಯ ಪರೀಕ್ಷೆಯಲ್ಲಿ ನಿಗದಿತ ಗುಣಮಟ್ಟದ ಮಾನದಂಡಗಳನ್ನು ಪೂರೈಸದಿರುವುದು ಪತ್ತೆಯಾದ ಹಿನ್ನೆಲೆಯಲ್ಲಿ ಎವರೆಸ್ಟ್ ಫುಡ್ ಪ್ರಾಡಕ್ಟ್ಸ್ ಮತ್ತು ಲಾಲ್ಜೀ ಗೋಧೂ ತಯಾರಿಸುವ ಇಂಗು (Asafoetida) ಮಾರಾಟವನ್ನು ಭಾರತೀಯ ಆಹಾರ ಸುರಕ್ಷತೆ ಮತ್ತು ಮಾನದಂಡಗಳ ಪ್ರಾಧಿಕಾರ (FSSAI) ತಾತ್ಕಾಲಿಕವಾಗಿ ನಿಷೇಧಿಸಿದೆ.

ಉತ್ಪನ್ನಗಳಲ್ಲಿ ಕಂಡುಬಂದಿರುವ ಉಲ್ಲಂಘನೆಗಳಿಗೆ ವಿವರಣೆ ನೀಡುವಂತೆ ಹಾಗೂ ನಿಗದಿತ ಮಾನದಂಡಗಳನ್ನು ಪಾಲಿಸುವುದನ್ನು ಖಚಿತಪಡಿಸಿಕೊಳ್ಳಲು ಕೈಗೊಳ್ಳಲಿರುವ ಕ್ರಮಗಳ ವಿವರ ಒಳಗೊಂಡ ಕ್ರಿಯಾ ಯೋಜನೆಯನ್ನು ಸಲ್ಲಿಸುವಂತೆ ಎರಡೂ ಕಂಪೆನಿಗಳಿಗೆ FSSAI ಸೂಚಿಸಿದೆ.

ಮಾರುಕಟ್ಟೆಯಲ್ಲಿ ಈಗಾಗಲೇ ಇರುವ ಕಳಪೆ ಗುಣಮಟ್ಟದ ಉತ್ಪನ್ನಗಳನ್ನು ಸ್ವಯಂಪ್ರೇರಿತವಾಗಿ ಹಿಂಪಡೆಯುವಂತೆಯೂ ಸೂಚಿಸಲಾಗಿದೆ. ಕಂಪೆನಿಗಳು ನಿಗದಿತ ನಿಯಮಗಳನ್ನು ಪಾಲಿಸುವವರೆಗೆ ಇಂಗು ಮಾರಾಟದ ಮೇಲಿನ ನಿರ್ಬಂಧ ಮುಂದುವರಿಯಲಿದೆ.

ಎವರೆಸ್ಟ್‌ ನ ಎಗ್ ಕರಿ ಮಸಾಲ, ಚಿಕನ್ ಮಸಾಲ ಮತ್ತು ಗರಂ ಮಸಾಲ ಉತ್ಪನ್ನಗಳಲ್ಲಿಯೂ ನಿಯಮಾನುಸರಣೆಯಲ್ಲಿ ಲೋಪಗಳು ಕಂಡುಬಂದಿವೆ. ಆದರೆ ಈ ಮೂರು ಉತ್ಪನ್ನಗಳ ಮಾರಾಟವನ್ನು FSSAI ನಿಷೇಧಿಸಿಲ್ಲ.

ಗ್ರಾಹಕರ ದೂರಿನ ಬಳಿಕ ಪರಿಶೀಲನೆ

ಗ್ರಾಹಕರ ದೂರಿನ ಹಿನ್ನೆಲೆಯಲ್ಲಿ ಪ್ರಮುಖ ಇಂಗು ಬ್ರ್ಯಾಂಡ್‌ ಗಳ ಮೇಲೆ ಕಣ್ಗಾವಲು ಆರಂಭಿಸಲಾಗಿತ್ತು ಎಂದು FSSAI ಹೇಳಿಕೆಯಲ್ಲಿ ತಿಳಿಸಿದೆ.

ಮುಂಬೈನಲ್ಲಿರುವ ಕಂಪೆನಿಗಳ ಉತ್ಪಾದನಾ ಘಟಕಗಳು ಮತ್ತು ಗುಜರಾತ್‌ ನ ಉಂಬರ್‌ ಗಾಂವ್‌ ನಲ್ಲಿರುವ ಎವರೆಸ್ಟ್ ಘಟಕದಿಂದ ಸಂಗ್ರಹಿಸಿದ ಮಾದರಿಗಳನ್ನು ಪರೀಕ್ಷೆಗೆ ಒಳಪಡಿಸಲಾಗಿತ್ತು. ಈ ಮಾದರಿಗಳು ನಿಗದಿತ ಮಾನದಂಡಗಳನ್ನು ಪೂರೈಸಿಲ್ಲ ಎಂಬುದು ಪ್ರಯೋಗಾಲಯ ಪರೀಕ್ಷೆಯಲ್ಲಿ ಕಂಡುಬಂದಿದೆ.

ಅಸ್ತಿತ್ವದಲ್ಲಿರುವ ನಿಯಮಗಳ ಪ್ರಕಾರ, ಸಂಯುಕ್ತ ಇಂಗಿನಲ್ಲಿ ಕನಿಷ್ಠ ಶೇ. 5ರಷ್ಟು ಆಲ್ಕೋಹಾಲ್‌ ನಲ್ಲಿ ಕರಗುವ ಸಾರಾಂಶ ಇರಬೇಕು. ದೈನಂದಿನ ಬಳಕೆಗೆ ಅನುಕೂಲವಾಗುವಂತೆ ಖಾದ್ಯ ಪಿಷ್ಟ ಅಥವಾ ಹಿಟ್ಟಿನೊಂದಿಗೆ ಕಚ್ಚಾ ಇಂಗು ಬೆರೆಸಿ ತಯಾರಿಸುವ ಮಿಶ್ರ ಪುಡಿಯನ್ನು ಸಂಯುಕ್ತ ಇಂಗು ಎಂದು ಕರೆಯಲಾಗುತ್ತದೆ.

ಆದರೆ ಪರೀಕ್ಷಿಸಿದ ಮಾದರಿಗಳಲ್ಲಿ ಆಲ್ಕೋಹಾಲ್‌ ನಲ್ಲಿ ಕರಗುವ ಸಾರಾಂಶ ಶೇ. 0ರಿಂದ 3ರಷ್ಟು ಮಾತ್ರ ಇರುವುದು ಪತ್ತೆಯಾಗಿದೆ. ತಯಾರಕರು ಅಗತ್ಯ ಪ್ರಮಾಣಕ್ಕಿಂತ ಶೇ. 30ರಿಂದ 40ರಷ್ಟು ಕಡಿಮೆ ಕಚ್ಚಾ ಇಂಗು ಬಳಸಿರುವ ಸಾಧ್ಯತೆಯನ್ನು ಇದು ಸೂಚಿಸುತ್ತದೆ ಎಂದು FSSAI ತಿಳಿಸಿದೆ.

ಲಾಲ್ಜೀ ಗೋಧೂ ಘಟಕದಿಂದ ಸಂಗ್ರಹಿಸಿದ ಆರು ಬಗೆಯ ಕಚ್ಚಾ ಇಂಗು ಮಾದರಿಗಳಲ್ಲಿ ಶೇ. 15ರಿಂದ 32ರಷ್ಟು ಪಿಷ್ಟ ಇರುವುದು ಪತ್ತೆಯಾಗಿದೆ. ಆದರೆ ನಿಯಮಗಳ ಪ್ರಕಾರ ಕಚ್ಚಾ ಇಂಗಿನಲ್ಲಿ ಪಿಷ್ಟದ ಪ್ರಮಾಣ ಗರಿಷ್ಠ ಶೇ. 1ರಷ್ಟು ಮಾತ್ರ ಇರಬೇಕು.