POKಯ ಬ್ರಾಡ್ ಪೀಕ್‌ನಲ್ಲಿ ಹಿಮಪಾತ: ಖ್ಯಾತ ಪರ್ವತಾರೋಹಿ ನಿರ್ಮಲ್ 'ನಿಮ್ಸ್ ಡೈ' ಪುರ್ಜಾ ಮೃತ್ಯು

ನವದೆಹಲಿ: ಪಾಕಿಸ್ತಾನ ಆಕ್ರಮಿತ ಕಾಶ್ಮೀರ (POK)ದಲ್ಲಿರುವ ಬ್ರಾಡ್ ಪೀಕ್ ಪರ್ವತದಲ್ಲಿ ಸಂಭವಿಸಿದ ಭಾರಿ ಹಿಮಪಾತದಲ್ಲಿ ವಿಶ್ವಪ್ರಸಿದ್ಧ ನೇಪಾಳಿ ಮೂಲದ ಪರ್ವತಾರೋಹಿ ನಿರ್ಮಲ್ 'ನಿಮ್ಸ್ ಡೈ' ಪುರ್ಜಾ ಮೃತಪಟ್ಟಿದ್ದಾರೆ. ಹಿಮಪಾತದಲ್ಲಿ ಕಾಣೆಯಾಗಿದ್ದ ಪುರ್ಜಾ ಸೇರಿದಂತೆ ಪರ್ವತಾರೋಹಣ ತಂಡದ ಇತರ ಸದಸ್ಯರು ಬದುಕುಳಿಯಲಿಲ್ಲ ಎಂದು ಅವರ ಸಾಹಸ ಪರ್ವತಾರೋಹಣ ಆಯೋಜಿಸುವ ಎಲೈಟ್ ಎಕ್ಸ್‌ಪೆಡ್ ಕಂಪೆನಿ ರವಿವಾರ ಇನ್‌ಸ್ಟಾಗ್ರಾಂ ಪ್ರಕಟಣೆಯಲ್ಲಿ ತಿಳಿಸಿದೆ.

ಬ್ರಾಡ್ ಪೀಕ್‌ನಲ್ಲಿ ಹಿಮಪಾತ ಸಂಭವಿಸಿದ ಬಳಿಕ ಪುರ್ಜಾ ಮತ್ತು ಇತರ ಐವರು ಪರ್ವತಾರೋಹಿಗಳು ಶುಕ್ರವಾರದಿಂದ ನಾಪತ್ತೆಯಾಗಿದ್ದರು. ಘಟನೆಗೆ ಕೆಲವೇ ಗಂಟೆಗಳ ಮೊದಲು ಪುರ್ಜಾ ಅವರು ಓಆಖಿಗಿಯ ಪತ್ರಕರ್ತ ವಿಷ್ಣು ಸೋಮ್ ಅವರಿಗೆ ಧ್ವನಿ ಸಂದೇಶ ಕಳುಹಿಸಿದ್ದರು. ಅದು ಅವರ ಕೊನೆಯ ಸಂದೇಶವಾಗಿರಬಹುದೆಂದು ವರದಿಗಳು ತಿಳಿಸಿವೆ.

'ಇಂದು ಬ್ರಾಡ್ ಪೀಕ್‌ನಲ್ಲಿ ಸಂಭವಿಸಿದ ಹಿಮಪಾತದ ಬಳಿಕ ನಿರ್ಮಲ್ 'ನಿಮ್ಸ್ ಡೈ' ಪುರ್ಜಾ ದುರಂತದಲ್ಲಿ ಮೃತಪಟ್ಟಿರುವುದನ್ನು ತೀವ್ರ ದುಃಖ ಮತ್ತು ಹೃದಯವೇದನೆಯೊಂದಿಗೆ ದೃಢಪಡಿಸುತ್ತಿದ್ದೇವೆ. ಪರ್ವತಾರೋಹಣ ತಂಡದ ಇತರ ಸದಸ್ಯರು ಸಹ ಬದುಕುಳಿಯಲಿಲ್ಲ ಎಂಬ ದೃಢೀಕರಣವೂ ನಮಗೆ ಲಭಿಸಿದೆ' ಎಂದು ಎಲೈಟ್ ಎಕ್ಸ್‌ಪೆಡ್ ಪ್ರಕಟಣೆಯಲ್ಲಿ ತಿಳಿಸಿದೆ.

'ಈ ದುರಂತದಲ್ಲಿ ಪುರ್ಜಾ ಮಾತ್ರವಲ್ಲದೆ, ಅವರ ವಿಶ್ವಾಸಾರ್ಹ ಕ್ಲೈಂಬಿಂಗ್ ಪಾಲುದಾರ ಹಾಗೂ ಮಾರ್ಗದರ್ಶಕರಾದ ಪುರ್ ಬಹದ್ದೂರ್ ಗುರುಂಗ್ (ಯುಕ್ತ) ಮತ್ತು ನಿಮಾ ಶೆರ್ಪಾ ಸೇರಿದಂತೆ ಮೃತಪಟ್ಟ ಪ್ರತಿಯೊಬ್ಬರಿಗೂ ನಾವು ಶ್ರದ್ಧಾಂಜಲಿ ಸಲ್ಲಿಸುತ್ತೇವೆ. ಅವರ ಕುಟುಂಬಗಳು, ಸ್ನೇಹಿತರು ಹಾಗೂ ಆತ್ಮೀಯರೊಂದಿಗೆ ನಮ್ಮ ಸಂತಾಪವಿದೆ. ಈ ಊಹಿಸಲಾಗದ ನಷ್ಟದ ನೋವನ್ನು ಯಾವುದೇ ಪದಗಳಿಂದ ಕಡಿಮೆ ಮಾಡಲು ಸಾಧ್ಯವಿಲ್ಲ. ದುಃಖದಲ್ಲಿರುವ ಅವರ ಕುಟುಂಬಗಳ ಗೌಪ್ಯತೆಯನ್ನು ಗೌರವಿಸುವಂತೆ ಎಲ್ಲರಿಗೂ ಮನವಿ ಮಾಡುತ್ತೇವೆ' ಎಂದು ಕಂಪೆನಿ ಹೇಳಿದೆ.

ಬ್ರಾಡ್ ಪೀಕ್ ಕಾರಕೋರಂ ಪರ್ವತ ಶ್ರೇಣಿಯಲ್ಲಿದ್ದು, ಪಾಕಿಸ್ತಾನದ ಗಿಲ್ಗಿಟ್-ಬಾಲ್ಟಿಸ್ತಾನ್ ಮತ್ತು ಚೀನಾದ ಕ್ಸಿನ್‌ಜಿಯಾಂಗ್ ನಡುವಿನ ಗಡಿಭಾಗದಲ್ಲಿದೆ. ಕೆ2 ಪರ್ವತದಿಂದ ಕೆಲವೇ ಕಿಲೋಮೀಟರ್ ದೂರದಲ್ಲಿರುವ ಈ ಶಿಖರವು ಪಾಕಿಸ್ತಾನ ಆಕ್ರಮಿತ ಕಾಶ್ಮೀರ (POK) ವ್ಯಾಪ್ತಿಯಲ್ಲಿದೆ.

ಬ್ರಾಡ್ ಪೀಕ್‌ನ ಪ್ರಮಾಣಿತ ವೆಸ್ಟ್ ರಿಡ್ಜ್ ಮಾರ್ಗದಲ್ಲಿ 21,600ರಿಂದ 21,850 ಅಡಿ ಎತ್ತರದ ನಡುವೆ ಹಿಮಪಾತ ಸಂಭವಿಸಿದೆ ಎಂದು ತಿಳಿದುಬಂದಿದೆ.

'ಪರ್ವತಾರೋಹಣ ಕ್ಷೇತ್ರದ ಶ್ರೇಷ್ಠ ಸಾಹಸಿಗಳಲ್ಲಿ ಒಬ್ಬರನ್ನು ಜಗತ್ತು ಕಳೆದುಕೊಂಡಿದೆ. ತಮ್ಮ ಧೈರ್ಯ, ವಿನಯ ಹಾಗೂ ಮಾನವ ಸಾಮರ್ಥ್ಯದ ಮೇಲಿನ ಅಚಲ ನಂಬಿಕೆಯ ಮೂಲಕ ಅವರು ಲಕ್ಷಾಂತರ ಜನರಿಗೆ ಸ್ಫೂರ್ತಿಯಾಗಿದ್ದರು. ದೊಡ್ಡ ಕನಸು ಕಾಣಲು, ತಮ್ಮ ಮೇಲೆ ವಿಶ್ವಾಸ ಇಡಲು ಹಾಗೂ ಮಿತಿಗಳನ್ನು ಒಪ್ಪಿಕೊಳ್ಳದೆ ಸಾಧನೆ ಮಾಡಲು ಅವರು ಜನರನ್ನು ಪ್ರೇರೇಪಿಸಿದರು. ತಮ್ಮ ಸಾಧನೆಗಳ ಮೂಲಕ ಪ್ರತಿಯೊಬ್ಬರೂ ತಾವು ಭಾವಿಸಿದ್ದಕ್ಕಿಂತ ಹೆಚ್ಚಿನದನ್ನು ಸಾಧಿಸಬಹುದು ಎಂಬ ವಿಶ್ವಾಸವನ್ನು ಅವರು ಮೂಡಿಸಿದ್ದರು' ಎಂದು ಎಲೈಟ್ ಎಕ್ಸ್‌ಪೆಡ್ ತಿಳಿಸಿದೆ.

'ಅವರ ದೂರದೃಷ್ಟಿ, ನಾಯಕತ್ವ ಹಾಗೂ ದೃಢಸಂಕಲ್ಪವೇ ಎಲೈಟ್ ಎಕ್ಸ್‌ಪೆಡ್, ನಿಮ್ಸ್‌ಡೈ ಫೌಂಡೇಶನ್, ಸ್ಕೈಡೈವ್ ನಿಮ್ಸ್‌ಡೈ ಮತ್ತು ನಿಮ್ಸ್‌ಡೈ ಸ್ಟೋರ್ ಅನ್ನು ಇಂದಿನ ಮಟ್ಟಕ್ಕೆ ಬೆಳೆಸಿತು. ಅವರು ಸ್ಪರ್ಶಿಸಿದ ಅಸಂಖ್ಯಾತ ಜೀವನಗಳಲ್ಲಿ ಹಾಗೂ ತಮ್ಮದೇ ಆದ ಶಿಖರಗಳನ್ನು ಏರಲು ಅವರು ಪ್ರೇರೇಪಿಸಿದ ಜನರಲ್ಲಿ ಅವರ ಪರಂಪರೆ ಶಾಶ್ವತವಾಗಿ ಉಳಿಯಲಿದೆ' ಎಂದು ಕಂಪೆನಿ ಹೇಳಿದೆ.

ಪುರ್ಜಾ ಅವರು ಬ್ರಿಟನ್‌ನ ಗೂರ್ಖಾಗಳ ಬ್ರಿಗೇಡ್ ಮತ್ತು ರಾಯಲ್ ಮೆರೀನ್ಸ್‌ನ ವಿಶೇಷ ದೋಣಿ ಸೇವೆ (SBS)ಯ ಮಾಜಿ ಸದಸ್ಯರಾಗಿದ್ದರು. ಬಳಿಕ ಪೂರ್ಣಾವಧಿಯ ಪರ್ವತಾರೋಹಿ ಹಾಗೂ ದಂಡಯಾತ್ರೆ ಮಾರ್ಗದರ್ಶಿಯಾಗಿ ಹಲವು ವಿಶ್ವದಾಖಲೆಗಳನ್ನು ನಿರ್ಮಿಸಿದ್ದರು.

2019ರಲ್ಲಿ 'ಪ್ರಾಜೆಕ್ಟ್ ಪಾಸಿಬಲ್' ಪರ್ವತಾರೋಹಣ ತಂಡವು ಕೇವಲ ಆರು ತಿಂಗಳು ಆರು ದಿನಗಳಲ್ಲಿ 8,000 ಮೀಟರ್‌ಗಿಂತ ಎತ್ತರದ ಎಲ್ಲ 14 ಶಿಖರಗಳನ್ನು ಏರುವ ಮೂಲಕ ವಿಶ್ವದಾಖಲೆ ನಿರ್ಮಿಸಿತ್ತು. 2021ರಲ್ಲಿ ಕೆ2 ಪರ್ವತವನ್ನು ಮೊದಲ ಬಾರಿಗೆ ಚಳಿಗಾಲದಲ್ಲಿ ಯಶಸ್ವಿಯಾಗಿ ಏರಿದ 10 ಮಂದಿ ನೇಪಾಳಿ ಪರ್ವತಾರೋಹಿಗಳ ತಂಡದಲ್ಲೂ ಅವರು ಪ್ರಮುಖ ಸದಸ್ಯರಾಗಿದ್ದರು.

ಅವರ ಸಾಹಸ ಸಾಧನೆಗಳನ್ನು ಆಧರಿಸಿದ ನೆಟ್‌ಫ್ಲಿಕ್ಸ್‌ನ '14 ಪೀಕ್ಸ್: ನಥಿಂಗ್ ಈಸ್ ಇಂಪಾಬಲ್' ಸಾಕ್ಷ್ಯಚಿತ್ರವು ಅವರಿಗೆ ಜಾಗತಿಕ ಮನ್ನಣೆ ತಂದುಕೊಟ್ಟಿತ್ತು. ಆಧುನಿಕ ಪರ್ವತಾರೋಹಣ ಕ್ಷೇತ್ರದ ಅತ್ಯಂತ ಗುರುತಿಸಿಕೊಂಡ ವ್ಯಕ್ತಿಗಳಲ್ಲಿ ಒಬ್ಬರಾಗಿದ್ದ ಪುರ್ಜಾ, ಎತ್ತರದ ಪರ್ವತಾರೋಹಣದತ್ತ ವಿಶ್ವದಾದ್ಯಂತ ಹೊಸ ತಲೆಮಾರಿನ ಆಸಕ್ತಿಯನ್ನು ಮೂಡಿಸುವಲ್ಲಿ ಮಹತ್ವದ ಪಾತ್ರ ವಹಿಸಿದ್ದರು.