2026ರಲ್ಲಿ 65.25 ಲಕ್ಷ.ರೂ.ಮೌಲ್ಯದ ನಕಲಿ ನೋಟುಗಳು ಬಿಎಸ್‌ಎಫ್ ವಶಕ್ಕೆ; ಇದು 7 ವರ್ಷಗಳಲ್ಲಿಯೇ ಅತ್ಯಧಿಕ

ನವದೆಹಲಿ: ಅಧಿಕೃತ ದತ್ತಾಂಶದ ಪ್ರಕಾರ, 2026ರ ಮೊದಲ ಆರು ತಿಂಗಳಲ್ಲಿ ಗಡಿ ಭದ್ರತಾ ಪಡೆ (ಬಿಎಸ್‌ಎಫ್) ಒಟ್ಟು 65.25 ಲಕ್ಷ ರೂಪಾಯಿ ಮೌಲ್ಯದ ನಕಲಿ ನೋಟುಗಳನ್ನು ವಶಪಡಿಸಿಕೊಂಡಿದ್ದು, ಭಾರತದ ಗಡಿಗಳಲ್ಲಿ ನಕಲಿ ಭಾರತೀಯ ಕರೆನ್ಸಿ ನೋಟುಗಳ ವಶಪಡಿಸಿಕೊಳ್ಳುವಿಕೆಯು ಏಳು ವರ್ಷಗಳಲ್ಲಿಯೇ ಗರಿಷ್ಠ ಮಟ್ಟವನ್ನು ತಲುಪಿದೆ.

ಜೂನ್ 30ರವರೆಗೆ ವಶಪಡಿಸಿಕೊಂಡ ನಕಲಿ ನೋಟುಗಳ ಮೌಲ್ಯವು 2025ರ ಇಡೀ ವರ್ಷದಲ್ಲಿಯ 19.02 ಲಕ್ಷ ರೂ.ಗಿಂತ ಶೇ.243 ರಷ್ಟು ಹೆಚ್ಚಾಗಿದೆ.

2026ರ ಈ ಅಂಕಿಅಂಶವು ಕೇವಲ ವರ್ಷದ ಮೊದಲ ಅರ್ಧಭಾಗವನ್ನು ಮಾತ್ರ ಒಳಗೊಂಡಿದ್ದರೂ ಸಹ 2020ರಿಂದೀಚೆಗೆ ಯಾವುದೇ ವರ್ಷದಲ್ಲಿ ದಾಖಲಾದ ಅತ್ಯಧಿಕ ಪ್ರಮಾಣವಾಗಿದೆ. ಇದು ಕಳೆದ ಆರು ವರ್ಷಗಳಲ್ಲಿ ಪ್ರತಿ ವರ್ಷ ವಶಪಡಿಸಿಕೊಳ್ಳಲಾದ ನೋಟುಗಳ ಒಟ್ಟು ವಾರ್ಷಿಕ ಮೌಲ್ಯವನ್ನು ಈಗಾಗಲೇ ಮೀರಿದೆ.

ನಕಲಿ ನೋಟುಗಳ ಸಾಗಣೆಯನ್ನು ತಡೆಯಲು ಬಿಎಸ್‌ಎಫ್ ದುರ್ಬಲ ಗಡಿ ಮಾರ್ಗಗಳಲ್ಲಿ ಕಣ್ಗಾವಲು ಮತ್ತು ತಪಾಸಣೆಯನ್ನು ತೀವ್ರಗೊಳಿಸಿರುವುದು ಈ ಹಠಾತ್ ಏರಿಕೆಗೆ ಕಾರಣವಾಗಿದೆ.

ಪಶ್ಚಿಮ ಬಂಗಾಳ ಮತ್ತು ಜಮ್ಮುಕಾಶ್ಮೀರ ಸೂಕ್ಷ್ಮ ಅಂತರರಾಷ್ಟ್ರೀಯ ಗಡಿಗಳನ್ನು ಹಂಚಿಕೊಂಡಿರುವುದರಿಂದ ಹಾಗೂ ಈ ಹಿಂದೆ ಭಾರತಕ್ಕೆ ನಕಲಿ ನೋಟುಗಳನ್ನು ಸಾಗಿಸಲು ಬಳಸಲ್ಪಟ್ಟಿರುವುದರಿಂದ ಅವು ನಕಲಿ ನೋಟು ಪೂರೈಕೆಯ ಪ್ರಮುಖ ಮಾರ್ಗಗಳಾಗಿ ಉಳಿದಿವೆ ಎಂದು ಹಿರಿಯ ಬಿಎಸ್‌ಎಫ್ ಅಧಿಕಾರಿಯೋರ್ವರು ತಿಳಿಸಿದರು.

ನಕಲಿ ನೋಟು ಸಂಘಟಿತ ಅಪರಾಧ ಮತ್ತು ಭಯೋತ್ಪಾದನೆ-ಹಣಕಾಸು ಜಾಲಗಳೊಂದಿಗಿನ ತನ್ನ ಸಂಬಂಧದಿಂದಾಗಿ ರಾಷ್ಟ್ರೀಯ ಭದ್ರತಾ ಕಳವಳವಾಗಿ ಮುಂದುವರೆದಿದೆ. ಪಾಕಿಸ್ತಾನದ ಗುಪ್ತಚರ ಏಜೆಂಟ್ಗಳು ದೇಶದ ಹಣಕಾಸು ವ್ಯವಸ್ಥೆಯನ್ನು ಅಸ್ಥಿರಗೊಳಿಸಲು ನಕಲಿ ನೋಟುಗಳನ್ನು ಚಲಾವಣೆಗೆ ತರಲು ಪ್ರಯತ್ನಿಸಿದ್ದಾರೆ ಎಂದು ಭಾರತೀಯ ಭದ್ರತಾ ಸಂಸ್ಥೆಗಳು ಆರೋಪಿಸಿವೆ.

2026ರ ಅರ್ಧ ಭಾಗವು ಇನ್ನೂ ಬಾಕಿಯಿದ್ದು, ಈ ದಾಖಲೆಯ ವಶಪಡಿಸಿಕೊಳ್ಳುವಿಕೆಯು ಭಾರತದ ಗಡಿ ಪ್ರದೇಶಗಳ ಮೂಲಕ ನಕಲಿ ನೋಟುಗಳ ಸಾಗಣೆಯನ್ನು ತಡೆಯಲು ಬಿಎಸ್‌ಎಫ್ ನಡೆಸುತ್ತಿರುವ ನಿರಂತರ ಪ್ರಯತ್ನಗಳನ್ನು ಒತ್ತಿಹೇಳುತ್ತದೆ.