AI ಅಭಿವೃದ್ಧಿಯ ವೇಗಕ್ಕೆ ಕಡಿವಾಣ ಅಗತ್ಯ: ಆಂಥ್ರೊಪಿಕ್‌ ನ ಸಿಇಒ ಡೇರಿಯೊ ಅಮೋಡೆ

ನವದೆಹಲಿ:  ಕೃತಕ ಬುದ್ಧಿಮತ್ತೆ (AI) ಕ್ಷೇತ್ರದಲ್ಲಿ ಮಾದರಿಗಳ ಸಾಮರ್ಥ್ಯವನ್ನು ಹೆಚ್ಚಿಸುವ ವೇಗವನ್ನು ತಗ್ಗಿಸುವ ಅಗತ್ಯವಿದೆ ಎಂದು ಆಂಥ್ರೊಪಿಕ್‌ ನ ಸಿಇಒ ಡೇರಿಯೊ ಅಮೋಡೆ ಹೇಳಿದ್ದಾರೆ. AI ಸಾಮರ್ಥ್ಯಗಳು ವೇಗವಾಗಿ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಸುರಕ್ಷತಾ ಕ್ರಮಗಳನ್ನು ಬಲಪಡಿಸಲು ಕಂಪೆನಿಗಳಿಗೆ ಹೆಚ್ಚಿನ ಸಮಯ ನೀಡಬೇಕು ಎಂದು ಅವರು ಪ್ರತಿಪಾದಿಸಿದ್ದಾರೆ.

ಈ ಸಲಹೆಗೆ OpenAI ಸಿಇಒ ಸ್ಯಾಮ್ ಆಲ್ಟ್‌ಮನ್ ಮತ್ತು xAI ಮುಖ್ಯಸ್ಥ ಎಲಾನ್ ಮಸ್ಕ್ ಬೆಂಬಲ ವ್ಯಕ್ತಪಡಿಸಿದ್ದಾರೆ.

ಶನಿವಾರ 'X'ನಲ್ಲಿ ಪ್ರಕಟಿಸಿದ ಸುದೀರ್ಘ ಪೋಸ್ಟ್ ನಲ್ಲಿ ಅಮೋಡೆ ಅವರು AI ಅಭಿವೃದ್ಧಿಯ ವೇಗವನ್ನು ನಿಯಂತ್ರಿಸಲು ಮೂರು ಹಂತದ ಕಾರ್ಯವಿಧಾನವನ್ನು ಪ್ರಸ್ತಾಪಿಸಿದ್ದಾರೆ.

ಪ್ರಮುಖ AI ಕಂಪೆನಿಗಳಲ್ಲಿ ಸ್ವತಂತ್ರ ಮೌಲ್ಯಮಾಪಕರನ್ನು ನೇಮಿಸಬೇಕು. ಕಂಪೆನಿಯ ಉದ್ಯೋಗಿಗಳಿಗೆ ಇರುವಷ್ಟೇ ಪ್ರವೇಶಾವಕಾಶವನ್ನು ಈ ಮೌಲ್ಯಮಾಪಕರಿಗೂ ನೀಡಬೇಕು. ಅವರು ಸುರಕ್ಷತಾ ಕ್ರಮಗಳನ್ನು ಪರಿಶೀಲಿಸಬೇಕು ಎಂದು ಅಮೋಡೆ ಹೇಳಿದ್ದಾರೆ.

'AI ಮಾದರಿಗಳ ಸಾಮರ್ಥ್ಯವನ್ನು ಹೆಚ್ಚಿಸುವ ವೇಗವನ್ನು ನಾವು ತಗ್ಗಿಸಬೇಕು. ಪ್ರಗತಿ ಇನ್ನೂ ವೇಗವಾಗಿಯೇ ಇರಲಿದೆ. ನಮಗೆ ದೊರೆಯುವ ಸಮಯವನ್ನು ವಿವೇಕಯುತವಾಗಿ ಬಳಸಿಕೊಳ್ಳಬೇಕು' ಎಂದು ಅವರು ಹೇಳಿದ್ದಾರೆ.

ಪ್ರಮುಖ AI ಸಂಸ್ಥೆಗಳು ಸುರಕ್ಷತಾ ಮಾನದಂಡಗಳನ್ನು ರೂಪಿಸುವಲ್ಲಿ ಪರಸ್ಪರ ಸಮನ್ವಯ ಸಾಧಿಸಬೇಕು. ಅನಿಯಂತ್ರಿತ ಅಭಿವೃದ್ಧಿಯನ್ನು ತಡೆಯುವುದರ ಜತೆಗೆ, ಹೆಚ್ಚು ಶಕ್ತಿಯುತವಾಗುತ್ತಿರುವ AI ವ್ಯವಸ್ಥೆಗಳಿಂದ ಉಂಟಾಗಬಹುದಾದ ಅಪಾಯಗಳನ್ನು ನಿರ್ವಹಿಸಲು ಅಂತರರಾಷ್ಟ್ರೀಯ ಸಹಕಾರವನ್ನೂ ಹೆಚ್ಚಿಸಬೇಕು ಎಂದು ಅವರು ಸಲಹೆ ನೀಡಿದ್ದಾರೆ.

ಆಲ್ಟ್‌ಮನ್ ಬೆಂಬಲ :

ಸ್ವತಂತ್ರ ಮೌಲ್ಯಮಾಪಕರಿಗೆ ಉದ್ಯೋಗಿಗಳಷ್ಟೇ ಪ್ರವೇಶಾವಕಾಶ ಕಲ್ಪಿಸುವ ಅಮೋಡೆ ಅವರ ಪ್ರಸ್ತಾಪವನ್ನು ಆಲ್ಟ್‌ಮನ್ ಬೆಂಬಲಿಸಿದ್ದಾರೆ.

'ಉದ್ಯೋಗಿಗಳಂತೆಯೇ ಪ್ರವೇಶಾವಕಾಶ ಹೊಂದಿರುವ ಸ್ವತಂತ್ರ ಮೌಲ್ಯಮಾಪಕರನ್ನು ನೇಮಿಸುವ ನಿರ್ಧಾರ ಅತ್ಯುತ್ತಮವಾಗಿದೆ. ನಾವೂ ಇದೇ ಕ್ರಮ ಕೈಗೊಳ್ಳುತ್ತೇವೆ' ಎಂದು ಅವರು 'X'ನಲ್ಲಿ ತಿಳಿಸಿದ್ದಾರೆ. ಈ ಕುರಿತು ಹೆಚ್ಚಿನ ವಿವರಗಳನ್ನು OpenAI ಶೀಘ್ರದಲ್ಲೇ ಪ್ರಕಟಿಸಲಿದೆ ಎಂದೂ ಹೇಳಿದ್ದಾರೆ.

ಹೆಚ್ಚಿನ ಸುರಕ್ಷತಾ ಮೇಲ್ವಿಚಾರಣೆಯ ಅಗತ್ಯವಿದೆ ಎಂಬ ಅಮೋಡೆ ಅವರ ಕರೆಯನ್ನು ಮಸ್ಕ್ ಕೂಡ ಬೆಂಬಲಿಸಿದ್ದಾರೆ.

ದುರ್ಬಳಕೆಯ ಆತಂಕ :

ತಮ್ಮ 'ಕ್ಲಾಡ್' (Claude) AI ಮಾದರಿಗಳನ್ನು ದುಷ್ಕರ್ಮಿಗಳು ಶಸ್ತ್ರಾಸ್ತ್ರಗಳ ಅಭಿವೃದ್ಧಿ, ಸೈಬರ್ ಕಾರ್ಯಾಚರಣೆ, ಕಣ್ಗಾವಲು ಮತ್ತು ವಂಚನೆಯಂತಹ ಚಟುವಟಿಕೆಗಳಿಗೆ ಬಳಸಿರುವುದನ್ನು ವಿವರಿಸುವ 'ಥ್ರೆಟ್ ಇಂಟೆಲಿಜೆನ್ಸ್' ವರದಿಯನ್ನು ಆಂಥ್ರೊಪಿಕ್ ಬಿಡುಗಡೆ ಮಾಡಿದ ಕೆಲವೇ ದಿನಗಳಲ್ಲಿ ಅಮೋಡೆ ಅವರ ಈ ಪ್ರಸ್ತಾಪ ಹೊರಬಿದ್ದಿದೆ.

AI ವ್ಯವಸ್ಥೆಗಳು ತಮ್ಮನ್ನು ತಾವೇ ಸುಧಾರಿಸಿಕೊಳ್ಳುವ ಸಾಮರ್ಥ್ಯ ಹೆಚ್ಚುತ್ತಿರುವುದನ್ನೂ ಅವರು ಉಲ್ಲೇಖಿಸಿದ್ದಾರೆ. AI ಏಜೆಂಟ್‌ ಗಳು ಬಾಹ್ಯ ವ್ಯವಸ್ಥೆಗಳನ್ನು ಪ್ರವೇಶಿಸುವ ಅಥವಾ ಅವುಗಳಿಗೆ ಹಾನಿ ಉಂಟುಮಾಡುವ ಇತ್ತೀಚಿನ ಘಟನೆಗಳ ಬಗ್ಗೆಯೂ ಅವರು ಗಮನ ಸೆಳೆದಿದ್ದಾರೆ.

AI ಸಾಮರ್ಥ್ಯಗಳು ಇದೇ ವೇಗದಲ್ಲಿ ಮುಂದುವರಿದರೆ, ಶೀಘ್ರದಲ್ಲೇ ಭಾರಿ ಅಡಚಣೆ ಅಥವಾ ಹಾನಿ ಉಂಟುಮಾಡುವ ಸಾಮರ್ಥ್ಯವಿರುವ ಸ್ವಾಯತ್ತ ವ್ಯವಸ್ಥೆಗಳ ಸಮೂಹ ಸೃಷ್ಟಿಯಾಗಬಹುದು ಎಂದು ಅಮೋಡೆ ಎಚ್ಚರಿಸಿದ್ದಾರೆ.

'AI ಸಾಮರ್ಥ್ಯದ ಅಭಿವೃದ್ಧಿಯ ವೇಗವನ್ನು ಗಮನಿಸಿದರೆ, ಮುಂದಿನ 6-12 ತಿಂಗಳಲ್ಲಿ ಇಂತಹ ವ್ಯವಸ್ಥೆಗಳ ಸಮೂಹವು ಇಡೀ ಅಂತರ್ಜಾಲದ ನಿಯಂತ್ರಣವನ್ನು ವಹಿಸಿಕೊಳ್ಳುವ ಮತ್ತು ನೂರಾರು ಶತಕೋಟಿ ಡಾಲರ್‌ ಗಳಷ್ಟು ಹಾನಿ ಉಂಟುಮಾಡುವ ಸಾಮರ್ಥ್ಯ ಪಡೆಯಬಹುದು ಎಂಬ ಆತಂಕ ನನಗಿದೆ' ಎಂದು ಅವರು ಬರೆದಿದ್ದಾರೆ.

AI ಉದ್ಯಮದಲ್ಲಿ ಸುರಕ್ಷತೆ ಕುರಿತ ಆತಂಕ ಹೆಚ್ಚುತ್ತಿರುವ ಸಂದರ್ಭದಲ್ಲೇ ಈ ಹೇಳಿಕೆ ಬಂದಿದೆ. AI ಅಭಿವೃದ್ಧಿಯಲ್ಲಿ ತೊಡಗಿರುವವರು 'ಈ ದಶಕದ ಅಂತ್ಯದ ವೇಳೆಗೆ AI ನಮ್ಮೆಲ್ಲರನ್ನೂ ಕೊಲ್ಲಬಹುದು ಎಂದು ಬಲವಾಗಿ ನಂಬುತ್ತಾರೆ' ಎಂದು ಹೇಳಿ ಆಂಥ್ರೊಪಿಕ್‌ ನ ಸಂಶೋಧಕ ಜಾಕೋಬ್ ಕಾಕ್ಸನ್ ಇತ್ತೀಚೆಗೆ ರಾಜೀನಾಮೆ ನೀಡಿದ್ದರು.

ಆದರೂ, AI ತರಬೇತಿ ಅಥವಾ ತಾಂತ್ರಿಕ ಪ್ರಗತಿಯನ್ನು ನಿಲ್ಲಿಸುವಂತೆ ತಾವು ಕರೆ ನೀಡುತ್ತಿಲ್ಲ ಎಂದು ಅಮೋಡೆ ಸ್ಪಷ್ಟಪಡಿಸಿದ್ದಾರೆ. ಹೆಚ್ಚು ಸಾಮರ್ಥ್ಯ ಪಡೆಯುತ್ತಿರುವ ಮಾದರಿಗಳನ್ನು ಸುರಕ್ಷಿತಗೊಳಿಸಲು ಮತ್ತು ಅವುಗಳನ್ನು ಸರಿಯಾದ ದಿಕ್ಕಿನಲ್ಲಿ ಅಭಿವೃದ್ಧಿಪಡಿಸಲು ಕಂಪೆನಿಗಳಿಗೆ ಸಾಕಷ್ಟು ಸಮಯ ನೀಡಬೇಕು ಎಂಬುದು ತಮ್ಮ ಉದ್ದೇಶ ಎಂದು ಅವರು ಹೇಳಿದ್ದಾರೆ. ಕೈಗೊಳ್ಳಲಾಗುತ್ತಿರುವ ಸುರಕ್ಷತಾ ಕ್ರಮಗಳು ಪರಿಣಾಮಕಾರಿಯಾಗಿವೆಯೇ ಎಂಬುದನ್ನು ಸ್ವತಂತ್ರ ಮೌಲ್ಯಮಾಪಕರು ಪರಿಶೀಲಿಸಬೇಕು ಎಂದು ಅವರು ಪ್ರತಿಪಾದಿಸಿದ್ದಾರೆ.

ಹಣಕಾಸಿನ ಒತ್ತಡವೂ ಕಾರಣ :

AI ಕ್ಷೇತ್ರದಲ್ಲಿ ಮುನ್ನಡೆ ಕಾಯ್ದುಕೊಳ್ಳಲು ಪ್ರಮುಖ ಕಂಪೆನಿಗಳು ಭಾರಿ ಆರ್ಥಿಕ ಒತ್ತಡ ಎದುರಿಸುತ್ತಿರುವ ಸಂದರ್ಭದಲ್ಲೇ ಅಮೋಡೆ ಅವರ ಎಚ್ಚರಿಕೆ ಬಂದಿದೆ.

OpenAI ಮತ್ತು ಆಂಥ್ರೊಪಿಕ್ ಎರಡೂ ಪ್ರಮುಖ ಆರಂಭಿಕ ಸಾರ್ವಜನಿಕ ಕೊಡುಗೆ (IPO) ಅಥವಾ ಷೇರು ಮಾರುಕಟ್ಟೆ ಪ್ರವೇಶಕ್ಕೆ ಸಿದ್ಧತೆ ನಡೆಸುತ್ತಿವೆ. ಹೊಸ AI ಸಾಮರ್ಥ್ಯಗಳು ಬಂಡವಾಳ ಆಕರ್ಷಿಸಲು ಮತ್ತು ಮೂಲಸೌಕರ್ಯಗಳ ಮೇಲಿನ ಭಾರಿ ಹೂಡಿಕೆಯನ್ನು ಸಮರ್ಥಿಸಿಕೊಳ್ಳಲು ನೆರವಾಗುತ್ತಿವೆ.

ಪ್ರಮುಖ AI ಕಂಪೆನಿಗಳಲ್ಲಿ ಶಾಶ್ವತ ಮೂರನೇ ವ್ಯಕ್ತಿಯ ಪರಿಶೀಲಕರನ್ನು ನೇಮಿಸಬೇಕು. ಅವರಿಗೆ ಸಂಬಂಧಿತ ಸಾಧನಗಳು ಮತ್ತು ಆಂತರಿಕ ಅಪಾಯ-ಮೌಲ್ಯಮಾಪನ ಪ್ರಕ್ರಿಯೆಗಳಿಗೆ ಪ್ರವೇಶಾವಕಾಶ ಇರಬೇಕು ಎಂದು ಅಮೋಡೆ ಹೇಳಿದ್ದಾರೆ.

ಸ್ಪರ್ಧೆಯನ್ನು ದುರ್ಬಲಗೊಳಿಸದೆ ನಿರ್ದಿಷ್ಟ ಸುರಕ್ಷತಾ ಕ್ರಮಗಳ ಕುರಿತು ಸ್ಪರ್ಧಿಗಳು ಒಟ್ಟಾಗಿ ಕೆಲಸ ಮಾಡಲು ಅಮೆರಿಕದಲ್ಲಿ ಗುರಿಪಡಿಸಿದ ಟ್ರಸ್ಟ್‌ವಿರೋಧಿ ವಿನಾಯಿತಿಗಳು ಅಗತ್ಯವಾಗಬಹುದು ಎಂದೂ ಅವರು ಹೇಳಿದ್ದಾರೆ.

ಚೀನಾದೊಂದಿಗಿನ ಸ್ಪರ್ಧೆ :

AI ಅಭಿವೃದ್ಧಿಯ ವೇಗವನ್ನು ಚೀನಾದೊಂದಿಗಿನ ಜಾಗತಿಕ ಸ್ಪರ್ಧೆಯೊಂದಿಗೆ ಅಮೋಡೆ ಲಿಂಕ್ ಮಾಡಿದ್ದಾರೆ. ಮುಂದುವರಿದ AI ಕ್ಷೇತ್ರದಲ್ಲಿ ಚೀನಾ ಮುನ್ನಡೆ ಸಾಧಿಸುವುದು ಅಮೆರಿಕಕ್ಕೆ ರಾಷ್ಟ್ರೀಯ ಭದ್ರತಾ ಅಪಾಯಗಳನ್ನು ಉಂಟುಮಾಡಬಹುದು ಎಂದು ಅವರು ಎಚ್ಚರಿಸಿದ್ದಾರೆ.

ಪ್ರಜಾಸತ್ತಾತ್ಮಕ ದೇಶಗಳಲ್ಲಿ AI ಅಭಿವೃದ್ಧಿಯನ್ನು ನಿಧಾನಗೊಳಿಸುವ ಯಾವುದೇ ಕ್ರಮವು ಚೀನಾದ ಮೇಲೆ ಅಮೆರಿಕದ AI ಕಂಪೆನಿಗಳು ಹೊಂದಿರುವ ಮುನ್ನಡೆಯನ್ನು ಕಾಪಾಡಿಕೊಳ್ಳುವ ಅಗತ್ಯದಿಂದ ಸೀಮಿತವಾಗಿರಬೇಕು ಎಂದು ಅವರು ಉಲ್ಲೇಖಿಸಿದ್ದಾರೆ.

'ಪ್ರಜಾಸತ್ತಾತ್ಮಕ ರಾಷ್ಟ್ರಗಳೊಳಗಿನ ವೇಗವು ಅಮೆರಿಕದ ಕಂಪೆನಿಗಳು ಸರ್ವಾಧಿಕಾರಿ ಆಡಳಿತಗಳ ಮೇಲೆ, ಮುಖ್ಯವಾಗಿ ಚೀನೀ ಕಮ್ಯುನಿಸ್ಟ್ ಪಕ್ಷದ ಮೇಲೆ ಹೊಂದಿರುವ ಮುನ್ನಡೆಯಿಂದ ಸೀಮಿತವಾಗಿರುತ್ತದೆ' ಎಂದು ಅಮೋಡೆ ಹೇಳಿದ್ದಾರೆ.

ಚೀನಾ ಈ ಕ್ಷೇತ್ರದಲ್ಲಿನ ಅಂತರವನ್ನು ಕಡಿಮೆ ಮಾಡುವುದನ್ನು ತಡೆಯಲು ಮುಂದುವರಿದ AI ಚಿಪ್‌ಗಳು, 'ಮಾಡೆಲ್ ಡಿಸ್ಟಿಲೇಶನ್' ಮತ್ತು 'ಮಾಡೆಲ್ ವೇಟ್ಸ್' ಕಳವು ಸೇರಿದಂತೆ ಹಲವು ವಿಷಯಗಳ ಮೇಲೆ ಕಠಿಣ ನಿಯಂತ್ರಣ ಹೇರಬೇಕು ಎಂದು ಅವರು ಕರೆ ನೀಡಿದ್ದಾರೆ.

AI ಸಾಮರ್ಥ್ಯಗಳ ಬೆಳವಣಿಗೆ ಸುರಕ್ಷತಾ ಕ್ರಮಗಳಿಗೆ ಅನುಗುಣವಾಗಿ ಸಾಗುವುದನ್ನು ಖಚಿತಪಡಿಸುವ ನಿಯಮಾವಳಿಗಳನ್ನು ರೂಪಿಸಲು ಸರ್ಕಾರಗಳೊಂದಿಗೆ ಸಹಕರಿಸುವಂತೆ 'ಫ್ರಾಂಟಿಯರ್ AI ಲ್ಯಾಬ್‌'ಗಳಿಗೆ ಅಮೋಡೆ ಕರೆ ನೀಡಿದ್ದಾರೆ. ಹೆಚ್ಚು ಶಕ್ತಿಯುತ AI ವ್ಯವಸ್ಥೆಗಳಿಂದ ಉಂಟಾಗಬಹುದಾದ ಅಪಾಯಗಳನ್ನು ನಿರಂತರವಾಗಿ ಪರಿಶೀಲಿಸಲು ಶಾಶ್ವತ 'ಎಂಬೆಡೆಡ್ ಮೌಲ್ಯಮಾಪಕರ' ವ್ಯವಸ್ಥೆಯನ್ನೂ ಸ್ಥಾಪಿಸಬೇಕು ಎಂದು ಅವರು ಹೇಳಿದ್ದಾರೆ.