ಮಮತಾ ಬ್ಯಾನರ್ಜಿ ರ‍್ಯಾಲಿಗೆ ತೆರಳುತ್ತಿದ್ದ ಕುನಾಲ್ ಘೋಷ್ ಕಾರಿಗೆ ಮೊಟ್ಟೆ ಎಸೆತ

ನವದೆಹಲಿ: ಶನಿವಾರ ಟಿಎಂಸಿ ಮುಖ್ಯಸ್ಥೆ ಮಮತಾ ಬ್ಯಾನರ್ಜಿಯವರ ರ‍್ಯಾಲಿಯಲ್ಲಿ ಭಾಗವಹಿಸಲು ಹೂಗ್ಲಿಯ ಸೇರಾಮಪುರಕ್ಕೆ ತೆರಳುತ್ತಿದ್ದ ವೇಳೆ ಪಕ್ಷದ ಶಾಸಕ ಕುನಾಲ್ ಘೋಷ್ ಅವರ ಕಾರಿನ ಮೇಲೆ ಮೊಟ್ಟೆಗಳನ್ನು ಎಸೆಯಲಾಗಿದೆ.

ಗುಂಪೊಂದು ಘೋಷ್ ಕಾರಿನ ಹಿಂದಿನ ಕಿಟಕಿ ಗಾಜನ್ನು ಒಡೆಯುತ್ತಿರುವುದನ್ನು ಮತ್ತು ಮೊಟ್ಟೆಗಳನ್ನು ತೂರುತ್ತಿರುವುದನ್ನು ವೀಡಿಯೊ ದೃಶ್ಯಾವಳಿಗಳು ತೋರಿಸಿವೆ.

ಈ ಘಟನೆಯು ಬಿಜೆಪಿಯ ಕೃತ್ಯ ಎಂದು ಟಿಎಂಸಿ ನಾಯಕರು ಆರೋಪಿಸಿದ್ದಾರೆ.

ಸೇರಾಮಪುರ ಕೋರ್ಟ್ ಮೈದಾನದಲ್ಲಿ ಆಯೋಜಿಸಲಾಗಿದ್ದ ರ‍್ಯಾಲಿಗೆ, ಸಭೆಯಲ್ಲಿ ಪಾಲ್ಗೊಳ್ಳುವವರ ಸಂಖ್ಯೆಗೆ ಮಿತಿ ಮತ್ತು ಪೊಲೀಸ್ ಭದ್ರತಾ ವ್ಯವಸ್ಥೆಗಳಂತಹ ಕೆಲವು ಷರತ್ತುಗಳೊಂದಿಗೆ ಕಲಕತ್ತಾ ಉಚ್ಚನ್ಯಾಯಾಲಯವು ಅನುಮತಿ ನೀಡುವುದಕ್ಕೂ ಮುನ್ನ ಕಾನೂನು ತೊಡಕುಗಳು ಎದುರಾಗಿದ್ದವು.

ಸಭೆಗೂ ಮುನ್ನ ಸೇರಾಮಪುರದಲ್ಲಿ ಪೊಲೀಸರು ಹಾಗೂ ಟಿಎಂಸಿ ನಡುವಿನ ರಾಜಕೀಯ ಬಿಕ್ಕಟ್ಟಿನ ನಡುವೆ ಈ ಘಟನೆ ನಡೆದಿದೆ. ಸುಲಿಗೆ ಪ್ರಕರಣಗಳಿಗೆ ಸಂಬಂಧಿಸಿದಂತೆ ಪೊಲೀಸರು ಗುರುವಾರ ಸುದೀಪ್ ಆಚಾರ್ಯ ಮತ್ತು ನೂರ್ ಇಸ್ಲಾಮ್ ಎಂಬ ಇಬ್ಬರು ಟಿಎಂಸಿ ಸ್ವಯಂಸೇವಕರನ್ನು ಬಂಧಿಸಿದ್ದರು.

ರ‍್ಯಾಲಿಗೂ ಒಂದು ದಿನ ಮುನ್ನ ಪೊಲೀಸರು ಮಹಿಳೆಯರು ಸೇರಿದಂತೆ ಜಿಲ್ಲೆಯಾದ್ಯಂತ 150ಕ್ಕೂ ಹೆಚ್ಚು ಪಕ್ಷದ ಕಾರ್ಯಕರ್ತರನ್ನು ವಶಕ್ಕೆ ತೆಗೆದುಕೊಂಡಿದ್ದರು ಎಂದು ಟಿಎಂಸಿ ಆರೋಪಿಸಿದೆ. ಈ ಕ್ರಮವನ್ನು ಖಂಡಿಸಿದ್ದ ಸೇರಾಮಪುರ ಸಂಸದ ಕಲ್ಯಾಣ್ ಬ್ಯಾನರ್ಜಿ ಅವರು, 'ಪೊಲೀಸರು ನಮ್ಮ ಕಾರ್ಯಕರ್ತರ ವಿರುದ್ಧ ಭಾರೀ ಕ್ರಮವನ್ನು ಆರಂಭಿಸಿದ್ದು, ಮಹಿಳೆಯರು ಸೇರಿದಂತೆ 150ಕ್ಕೂ ಹೆಚ್ಚು ಜನರನ್ನು ವಶಕ್ಕೆ ತೆಗೆದುಕೊಂಡಿದ್ದಾರೆ. ಇದರ ಹೊರತಾಗಿಯೂ, ದೀದಿ ಅವರ ಸಭೆಯಲ್ಲಿ ಪಾಲ್ಗೊಳ್ಳಲು ಸಾಕಷ್ಟು ಜನರು ಆಸಕ್ತಿ ಹೊಂದಿದ್ದಾರೆ' ಎಂದು ಹೇಳಿದ್ದರು.