ನೋಯೆಲ್ ಟಾಟಾ ಆಕ್ಷೇಪಣೆ ತಿರಸ್ಕರಿಸಿದ ಟಾಟಾ ಸನ್ಸ್; ಚಂದ್ರಶೇಖರನ್ ಮರುನೇಮಕ ಮಾನ್ಯ ಎಂದ ಕಂಪೆನಿ

ನವದೆಹಲಿ:   ಟಾಟಾ ಸನ್ಸ್‌ ನಲ್ಲಿನ ಆಡಳಿತ ಮಂಡಳಿ ಸಂಘರ್ಷವು ಕುಟುಂಬ ಮತ್ತು ಆಡಳಿತಕ್ಕೆ ಸಂಬಂಧಿಸಿದ ವಿವಾದದ ಹಂತವನ್ನು ಮೀರಿ ಕಾನೂನು ಹೋರಾಟದ ಹಂತಕ್ಕೆ ತಲುಪಿದೆ. ಎನ್. ಚಂದ್ರಶೇಖರನ್ ಅವರನ್ನು ಟಾಟಾ ಸನ್ಸ್ ಅಧ್ಯಕ್ಷರಾಗಿ ಮತ್ತೊಂದು ಐದು ವರ್ಷಗಳ ಅವಧಿಗೆ ಮರುನೇಮಕ ಮಾಡಿರುವುದು ಕಾನೂನುಬದ್ಧವಾಗಿದ್ದು, ಕಂಪೆನಿಯ ಆಂತರಿಕ ನಿಯಮಗಳಿಗೆ ಅನುಗುಣವಾಗಿದೆ ಎಂದು ಟಾಟಾ ಸನ್ಸ್, ಟಾಟಾ ಟ್ರಸ್ಟ್ಸ್ ಅಧ್ಯಕ್ಷ ನೋಯೆಲ್ ಟಾಟಾ ಅವರಿಗೆ ತಿಳಿಸಿದೆ. 

ನೋಯೆಲ್ ಟಾಟಾ ಅವರ ಆಕ್ಷೇಪಣೆಗಳಿಗೆ ಟಾಟಾ ಸನ್ಸ್ ನೀಡಿರುವ ಮೊದಲ ಅಧಿಕೃತ ಪ್ರತಿಕ್ರಿಯೆ ಇದಾಗಿದೆ. ಚಂದ್ರಶೇಖರನ್ ಅವರ ಮರುನೇಮಕಕ್ಕೆ ಅನುಮೋದನೆ ನೀಡುವಾಗ ಮಂಡಳಿಯು ಕಾನೂನುಬದ್ಧವಾಗಿ ಕಾರ್ಯನಿರ್ವಹಿಸಿದೆ ಎಂದು ಕಂಪೆನಿ ತಿಳಿಸಿದೆ. ಈ ಪತ್ರದ ಕುರಿತು ನೇರ ಮಾಹಿತಿ ತಿಳಿದಿರುವ ಇಬ್ಬರು ವ್ಯಕ್ತಿಗಳು ರಾಯಿಟರ್ಸ್‌ಗೆ ಈ ಮಾಹಿತಿ ನೀಡಿದ್ದಾರೆ.

ತನ್ನ ನಿಲುವನ್ನು ಸಮರ್ಥಿಸಿಕೊಳ್ಳಲು ವಕೀಲರು ಮತ್ತು ಸುಪ್ರೀಂ ಕೋರ್ಟ್‌ ನ ಮಾಜಿ ನ್ಯಾಯಾಧೀಶರು ಸೇರಿದಂತೆ ಮೂವರು ಕಾನೂನು ತಜ್ಞರ ಅಭಿಪ್ರಾಯಗಳನ್ನು ಟಾಟಾ ಸನ್ಸ್ ಉಲ್ಲೇಖಿಸಿದೆ ಎಂದು ಮೂಲಗಳು ತಿಳಿಸಿವೆ.

158 ವರ್ಷಗಳ ಇತಿಹಾಸ ಹೊಂದಿರುವ ಟಾಟಾ ಸಮೂಹವನ್ನು ಕಳೆದ ಕೆಲವು ವರ್ಷಗಳಲ್ಲಿ ಕಾಡಿದ ಪ್ರಮುಖ ಆಡಳಿತಾತ್ಮಕ ಬಿಕ್ಕಟ್ಟಾಗಿ ಚಂದ್ರಶೇಖರನ್ ಅವರ ಮರುನೇಮಕದ ವಿವಾದ ರೂಪುಗೊಂಡಿದೆ. ಎರಡೂ ಕಡೆಯವರಿಂದ ಸಾರ್ವಜನಿಕ ಹೇಳಿಕೆಗಳು ಮತ್ತು ಸಂದರ್ಶನಗಳು ನಡೆದ ಒಂದು ವಾರದ ಬಳಿಕ ಟಾಟಾ ಸನ್ಸ್ ತನ್ನ ಪ್ರತಿಕ್ರಿಯೆ ನೀಡಿದೆ.

ಟಾಟಾ ಸನ್ಸ್‌ ನಲ್ಲಿ ಸುಮಾರು 66% ಒಡೆತನ ಹೊಂದಿರುವ ಟಾಟಾ ಟ್ರಸ್ಟ್ಸ್‌ನ ಅಧ್ಯಕ್ಷ ನೋಯೆಲ್ ಟಾಟಾ ಅವರ ವಿರೋಧದ ನಡುವೆಯೂ ಟಾಟಾ ಸನ್ಸ್ ಮಂಡಳಿಯು ಚಂದ್ರಶೇಖರನ್ ಅವರ ಮರುನೇಮಕಕ್ಕೆ ಅನುಮೋದನೆ ನೀಡಿದೆ. ಈ ನೇಮಕಕ್ಕೆ ತಮ್ಮ ನಾಮನಿರ್ದೇಶಿತ ನಿರ್ದೇಶಕರ ಬಹುಮತದ ಬೆಂಬಲ ಅಗತ್ಯವಿತ್ತು ಎಂಬುದು ಟಾಟಾ ಟ್ರಸ್ಟ್ ನ ವಾದವಾಗಿದೆ.

ಆದರೆ, ಟಾಟಾ ಸನ್ಸ್‌ ನ 'ಆರ್ಟಿಕಲ್ಸ್ ಆಫ್ ಅಸೋಸಿಯೇಷನ್' (AoA-ಕಂಪೆನಿಯ ನಿಯಮಾವಳಿಗಳು) ಕುರಿತ ಟಾಟಾ ಟ್ರಸ್ಟ್ ನ ವ್ಯಾಖ್ಯಾನವನ್ನು ಕಂಪೆನಿ ತಿರಸ್ಕರಿಸಿದೆ.

ಸೆಪ್ಟೆಂಬರ್ 24ರಂದು ನೋಯೆಲ್ ಟಾಟಾ ಅವರಿಗೆ ಬರೆದ ಪತ್ರದಲ್ಲಿ, ಅನ್ವಯವಾಗುವ ಕಾನೂನು ಮತ್ತು ಕಂಪೆನಿಯ ನಿಯಮಾವಳಿಗಳಿಗೆ ಅನುಗುಣವಾಗಿ, ' ಎನ್. ಚಂದ್ರಶೇಖರನ್ ಅವರ ಪ್ರಸ್ತುತ ಅಧಿಕಾರಾವಧಿ ಮುಗಿದ ಬಳಿಕ ಅವರನ್ನು ಅಧ್ಯಕ್ಷರಾಗಿ ಮರುನೇಮಕ ಮಾಡಲು ಮಂಡಳಿಯು ಮಾನ್ಯವಾದ ನಿರ್ಣಯವನ್ನು ಕೈಗೊಂಡಿದೆ' ಎಂದು ಟಾಟಾ ಸನ್ಸ್ ಹೇಳಿದೆ.

ಮರುನೇಮಕಕ್ಕೆ ಅನುಮೋದನೆ ನೀಡುವಾಗ ನಿರ್ದೇಶಕರು ಟಾಟಾ ಸನ್ಸ್‌ ನೊಂದಿಗಿನ ತಮ್ಮ ಜವಾಬ್ದಾರಿಗಳಿಗೆ ಅನುಗುಣವಾಗಿ ಕಾರ್ಯನಿರ್ವಹಿಸಿದ್ದಾರೆ ಎಂದು ಕಂಪೆನಿ ನೋಯೆಲ್ ಟಾಟಾ ಅವರಿಗೆ ತಿಳಿಸಿದೆ ಎಂದು ರಾಯಿಟರ್ಸ್ ಮೂಲಗಳು ಹೇಳಿವೆ.

ಕಂಪೆನಿಯ ಆಡಳಿತ ನಿಯಮಗಳ ಕುರಿತು ಉಭಯ ಕಡೆಯವರು ವಿಭಿನ್ನ ವ್ಯಾಖ್ಯಾನಗಳನ್ನು ನೀಡುತ್ತಿರುವ ಹಿನ್ನೆಲೆಯಲ್ಲಿ, ಮಂಡಳಿಯ ನಿರ್ಧಾರವನ್ನು ಸಮರ್ಥಿಸಿಕೊಳ್ಳಲು ಟಾಟಾ ಸನ್ಸ್ ಉಲ್ಲೇಖಿಸಿರುವ ಕಾನೂನು ಅಭಿಪ್ರಾಯಗಳು ಇದೀಗ ಪ್ರಮುಖವಾಗಿವೆ.

ಟಾಟಾ ಟ್ರಸ್ಟ್ ನ ನಾಮನಿರ್ದೇಶಿತ ನಿರ್ದೇಶಕರ ಅಗತ್ಯ ಬೆಂಬಲವಿಲ್ಲದೆ ಚಂದ್ರಶೇಖರನ್ ಅವರ ಮರುನೇಮಕ ನಡೆದಿರುವುದರಿಂದ ಅದು ಮಾನ್ಯವಾಗುವುದಿಲ್ಲ ಎಂಬುದು ನೋಯೆಲ್ ಟಾಟಾ ಅವರ ನಿಲುವಾಗಿದೆ. ಟಾಟಾ ಸನ್ಸ್‌ ನ ನಿಯಮಾವಳಿಗಳಲ್ಲಿರುವ ವಿಶೇಷ ಮತದಾನದ ನಿಬಂಧನೆಗಳನ್ನು ಮಂಡಳಿಯು ಅನುಸರಿಸಿದೆಯೇ ಎಂಬುದನ್ನು ಟಾಟಾ ಟ್ರಸ್ಟ್ ಪರಿಶೀಲಿಸುತ್ತಿದೆ.

ಈ ವಿವಾದವು ಟಾಟಾ ಸನ್ಸ್ ಮಂಡಳಿಯಲ್ಲಿರುವ ಟಾಟಾ ಟ್ರಸ್ಟ್ ನ ಪ್ರತಿನಿಧಿಗಳನ್ನೂ ವಿಭಜಿಸಿದೆ. ನೋಯೆಲ್ ಟಾಟಾ ಅವರು ಚಂದ್ರಶೇಖರನ್ ಅವರ ಮುಂದುವರಿಕೆಯನ್ನು ವಿರೋಧಿಸಿದ್ದಾರೆ ಎಂದು ರಾಯಿಟರ್ಸ್ ವರದಿ ಮಾಡಿದೆ. ಆದರೆ, ಟಾಟಾ ಟ್ರಸ್ಟ್ ನ ಮತ್ತೊಬ್ಬ ನಾಮನಿರ್ದೇಶಿತ ನಿರ್ದೇಶಕ ವೇಣು ಶ್ರೀನಿವಾಸನ್ ಅವರು ಅದನ್ನು ಬೆಂಬಲಿಸಿದ್ದಾರೆ.

ಇದು ಟಾಟಾ ಸಮೂಹದಲ್ಲಿ ಅಪರೂಪದ ಕಾರ್ಪೊರೇಟ್ ವಿರೋಧಾಭಾಸಕ್ಕೆ ಕಾರಣವಾಗಿದೆ. ಟಾಟಾ ಸನ್ಸ್‌ ನ ಸುಮಾರು ಮೂರನೇ ಎರಡರಷ್ಟು ಭಾಗವನ್ನು ನಿಯಂತ್ರಿಸುವ ಷೇರುದಾರರು ಕಂಪೆನಿಯ ಮಂಡಳಿ ಕೈಗೊಂಡ ನಿರ್ಧಾರವನ್ನು ಪ್ರಶ್ನಿಸುತ್ತಿದ್ದಾರೆ. ಮತ್ತೊಂದೆಡೆ, ಮಂಡಳಿಯು ತನ್ನ ನಿರ್ಧಾರ ಕಾನೂನುಬದ್ಧವಾಗಿದೆ ಎಂದು ಹೇಳುತ್ತಿದೆ.

'ಟಾಟಾ ಟ್ರಸ್ಟ್ಸ್‌ನ ಕಾನೂನು ತಂಡವು ಕಂಪೆನಿಯ ಪ್ರತಿಕ್ರಿಯೆಯನ್ನು ಪರಿಶೀಲಿಸುತ್ತಿದೆ' ಎಂದು ಮೂಲವೊಂದು ರಾಯಿಟರ್ಸ್‌ ಗೆ ತಿಳಿಸಿದೆ.

ಟಾಟಾ ಸನ್ಸ್ ಅಥವಾ ಟಾಟಾ ಟ್ರಸ್ಟ್ಸ್, ವ್ಯವಹಾರ ಸಮಯದ ಹೊರಗೆ ಪ್ರತಿಕ್ರಿಯೆ ನೀಡುವಂತೆ ರಾಯಿಟರ್ಸ್ ಮಾಡಿದ್ದ ಮನವಿಗೆ ತಕ್ಷಣ ಪ್ರತಿಕ್ರಿಯಿಸಿಲ್ಲ.

ಈ ವಿವಾದ ಕೇವಲ ಎನ್. ಚಂದ್ರಶೇಖರನ್ ಅವರ ಭವಿಷ್ಯಕ್ಕೆ ಸೀಮಿತವಾಗಿಲ್ಲ. ಟಾಟಾ ಸನ್ಸ್‌ ನ ಆಡಳಿತ ವ್ಯವಸ್ಥೆ ಹಾಗೂ ಕಂಪೆನಿಯನ್ನು ಷೇರು ಮಾರುಕಟ್ಟೆಯಲ್ಲಿ ಪಟ್ಟಿ ಮಾಡುವ ಪ್ರಸ್ತಾವನೆಗೆ ಸಂಬಂಧಿಸಿದ ದೊಡ್ಡ ಹೋರಾಟದೊಂದಿಗೂ ಈ ವಿವಾದ ಸೇರಿಕೊಂಡಿದೆ.