ಎಂಎಸ್‌ಸಿ ಎಲ್ಸಾ–3 ಹಡಗು ದುರಂತ: ಪರಿಹಾರ ಮೌಲ್ಯಮಾಪನ ಸಮಿತಿಗೆ ಹೈಕೋರ್ಟ್ ಅನುಮತಿ

₹1,227.62 ಕೋಟಿ ಬ್ಯಾಂಕ್ ಗ್ಯಾರಂಟಿ ಸಲ್ಲಿಕೆ; ಪರಿಸರ ಹಾನಿ ಪರಿಹಾರ ಪ್ರಕ್ರಿಯೆಗೆ ವೇಗ ಸಿಗುವ ನಿರೀಕ್ಷೆ

ಕೊಚ್ಚಿ:  ಸಮರಸ ಸುದ್ದಿ ಡಾಟ್ ಕಾಮ್

ಕೇರಳ ಕರಾವಳಿಯಲ್ಲಿ ಮುಳುಗಿದ ಎಂಎಸ್‌ಸಿ ಎಲ್ಸಾ–3 ಹಡಗಿನಿಂದ ಉಂಟಾದ ಪರಿಸರ ಹಾನಿ ಮತ್ತು ಪರಿಹಾರವನ್ನು ಮೌಲ್ಯಮಾಪನ ಮಾಡಲು ಸರ್ಕಾರ ರಚಿಸಿದ ವಿಶೇಷ ಸಮಿತಿಯು ಕಾರ್ಯ ಮುಂದುವರಿಸಲು ಕೇರಳ ಹೈಕೋರ್ಟ್ ಅನುಮತಿ ನೀಡಿದೆ. ಸಮಿತಿಯ ಚರ್ಚೆಗಳಿಗೆ ವಿಧಿಸಲಾಗಿದ್ದ ನಿರ್ಬಂಧವನ್ನೂ ತೆರವುಗೊಳಿಸಿದೆ.

ಸಮಿತಿ ರಚನೆಯಾಗಿ ಒಂದು ವರ್ಷ ಕಳೆದರೂ ಚರ್ಚೆಗಳು ಆರಂಭವಾಗಿಲ್ಲ ಎಂದು ಟಿ.ಎನ್. ಪ್ರತಾಪನ್ ಸಲ್ಲಿಸಿದ ಅರ್ಜಿಯ ವಿಚಾರಣೆ ವೇಳೆ ನ್ಯಾಯಾಲಯ ಈ ಕ್ರಮ ಕೈಗೊಂಡಿದೆ. ಹಡಗು ಕಂಪನಿ ₹1,227.62 ಕೋಟಿ ಬ್ಯಾಂಕ್ ಗ್ಯಾರಂಟಿ ಸಲ್ಲಿಸಿರುವುದನ್ನೂ ಅರ್ಜಿಯಲ್ಲಿ ಉಲ್ಲೇಖಿಸಲಾಗಿತ್ತು.

ಸಮುದ್ರದಲ್ಲಿ ಮಲ್ಟಿಬೀಮ್ ಸಮೀಕ್ಷೆ ನಡೆಸಿ ವರದಿ ಪಡೆದ ಬಳಿಕ ಪರಿಹಾರದ ಮೌಲ್ಯಮಾಪನ ಮಾಡಬಹುದು ಎಂಬುದು ರಾಜ್ಯ ಸರ್ಕಾರದ ನಿಲುವಾಗಿತ್ತು. ಹಡಗಿನ ಮಾಲೀಕರ ವೆಚ್ಚ ಮತ್ತು ಜವಾಬ್ದಾರಿಯಲ್ಲಿ ಸಮೀಕ್ಷೆ ನಡೆಸಲು ಸೀ-ಟ್ರ್ಯಾಕ್ ಸರ್ವೀಸಸ್ ಸಂಸ್ಥೆಯನ್ನು ನೇಮಿಸಲು ನಿರ್ಧರಿಸಿರುವುದಾಗಿ ಕೇಂದ್ರ ಸರ್ಕಾರ ತಿಳಿಸಿದೆ.

ಸಮರಸ ಸುದ್ದಿ ಡಾಟ್ ಕಾಮ್