ಕೇರಳ ರಾಜ್ಯೋದಯ ದಿನಾಚರಣೆ: ನಾಳಪ್ಪಾಡಂ ಪದ್ಮನಾಭನ್, ಪಿ.ಎಸ್. ಪುಣಿಂಚಿತ್ತಾಯ ಅವರಿಗೆ ಜಿಲ್ಲಾಡಳಿತದಿಂದ ಗೌರವ

ಯಕ್ಷಗಾನ ಗೊಂಬೆಯಾಟ ಕಲಾವಿದ ಕೆ.ವಿ. ರಮೇಶ್, ತೆಯ್ಯಂ ಕೋಲಧಾರಿ ಮುಕುಂದನ್ ಇಳಂಕುಟ್ಟಿ ಪೆರುಮಲಯನ್ ಅವರಿಗೆ ಸನ್ಮಾನ

ಕಾಸರಗೋಡು: ಕೇರಳ ರಾಜ್ಯ ರಚನೆಯ 70ನೇ ವಾರ್ಷಿಕೋತ್ಸವದ ಅಂಗವಾಗಿ ಜಿಲ್ಲಾ ಮಟ್ಟದ ಕೇರಳ ಪಿರವಿ ಆಚರಣೆಯು ನವೆಂಬರ್ 1ರಂದು ಕಾಸರಗೋಡು ಸರ್ಕಾರಿ ಹೈಯರ್ ಸೆಕೆಂಡರಿ ಶಾಲೆಯಲ್ಲಿ ನಡೆಯಲಿದೆ.

ಮಾಹಿತಿ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆಯ ಜಿಲ್ಲಾ ಮಾಹಿತಿ ಕಚೇರಿ, ಜಿಲ್ಲಾಡಳಿತ ಹಾಗೂ ಜಿಲ್ಲಾ ಸಾಕ್ಷರತಾ ಮಿಷನ್ ಸಹಯೋಗದಲ್ಲಿ ಕಾರ್ಯಕ್ರಮ ಆಯೋಜಿಸಲಾಗಿದೆ. ಬೆಳಗ್ಗೆ 11 ಗಂಟೆಗೆ ನಡೆಯುವ ಸಮಾರಂಭವನ್ನು ಜಿಲ್ಲಾ ಪಂಚಾಯತ್ ಅಧ್ಯಕ್ಷ ಸಾಬು ಅಬ್ರಹಾಂ ಉದ್ಘಾಟಿಸಲಿದ್ದಾರೆ. ಜಿಲ್ಲಾಧಿಕಾರಿ ಶ್ರೀಧನ್ಯಾ ಸುರೇಶ್ ಕೇರಳ ಪಿರವಿ ದಿನದ ಸಂದೇಶ ನೀಡಲಿದ್ದಾರೆ.

ಸಮಾರಂಭದಲ್ಲಿ ಲೇಖಕ ಹಾಗೂ ದೃಶ್ಯಮಾಧ್ಯಮ ಪತ್ರಕರ್ತ ನಾಳಪ್ಪಾಡಂ ಪದ್ಮನಾಭನ್ ಮತ್ತು ಖ್ಯಾತ ಚಿತ್ರಕಲಾವಿದ ಪಿ.ಎಸ್. ಪುಣಿಂಚಿತ್ತಾಯ ಅವರನ್ನು ಜಿಲ್ಲಾಡಳಿತ ಗೌರವಿಸಲಿದೆ. ಯಕ್ಷಗಾನ ಗೊಂಬೆಯಾಟ ಕಲಾವಿದ ಕೆ.ವಿ. ರಮೇಶ್ ಹಾಗೂ ಪ್ರಸಿದ್ಧ ತೆಯ್ಯಂ ಕೋಲಧಾರಿ ಮುಕುಂದನ್ ಇಳಂಕುಟ್ಟಿ ಪೆರುಮಲಯನ್ ಅವರನ್ನು ಅಭಿನಂದಿಸಲಾಗುವುದು.

ಕಾಸರಗೋಡು ನಗರಸಭೆ ಅಧ್ಯಕ್ಷೆ ಶಾಹಿನಾ ಸಲೀಂ ಅಧ್ಯಕ್ಷತೆ ವಹಿಸಲಿದ್ದಾರೆ. ಖ್ಯಾತ ಸಾಹಿತಿ ಅಂಬಿಕಾಸುತನ್ ಮಾಙ್ಗಾಡ್ ಮುಖ್ಯ ಅತಿಥಿಯಾಗಿರುತ್ತಾರೆ. ಹಿರಿಯ ಪತ್ರಕರ್ತ ವಿ.ವಿ. ಪ್ರಭಾಕರನ್, ರಾಧಾಕೃಷ್ಣನ್ ಒಳಿಯತ್ತಡ್ಕ, ಹಜೂರ್ ಶಿರಸ್ತೇದಾರ್ ಪಿ. ನಸೀಮುದ್ದೀನ್, ಜಿಲ್ಲಾ ಸಾಕ್ಷರತಾ ಮಿಷನ್ ಸಂಯೋಜಕ ಕೆ.ವಿ. ರತೀಶ್ ಹಾಗೂ ಜಿಲ್ಲಾ ಮಕ್ಕಳ ಕಲ್ಯಾಣ ಸಮಿತಿ ಕಾರ್ಯದರ್ಶಿ ಟಿ.ಎಂ.ಎ. ಕರೀಂ ಮಾತನಾಡಲಿದ್ದಾರೆ.

ಗೌರವಕ್ಕೆ ಪಾತ್ರರಾಗುವವರನ್ನು ಜಿಲ್ಲಾ ಮಾಹಿತಿ ಕಚೇರಿಯ ಸಹಾಯಕ ಸಂಪಾದಕಿ ಎ.ಪಿ. ದಿಲ್ನಾ ಹಾಗೂ ಸಾಂಸ್ಕೃತಿಕ ಕಾರ್ಯಕರ್ತ ಸತ್ಯನಾರಾಯಣ ತಂತ್ರಿ ಪರಿಚಯಿಸಲಿದ್ದಾರೆ. ಜಿಲ್ಲಾ ಮಾಹಿತಿ ಅಧಿಕಾರಿ ಎಂ. ಮಧುಸೂದನನ್ ಸ್ವಾಗತಿಸಲಿದ್ದು, ಸಹಾಯಕ ಮಾಹಿತಿ ಅಧಿಕಾರಿ ಎ.ಪಿ. ನೌಶಾದ್ ವಂದಿಸಲಿದ್ದಾರೆ.

ಆಡಳಿತ ಭಾಷಾ ಸಪ್ತಾಹದ ಅಂಗವಾಗಿ ವಿವಿಧ ಸ್ಪರ್ಧೆಗಳು, ಉಪನ್ಯಾಸಗಳು ಹಾಗೂ ಭಾಷಾ ಪೋಷಣಾ ಕಾರ್ಯಕ್ರಮಗಳನ್ನೂ ಆಯೋಜಿಸಲಾಗುತ್ತದೆ.

ನಾಳಪ್ಪಾಡಂ ಪದ್ಮನಾಭನ್

ಕವಿ, ಕಾದಂಬರಿಕಾರ ಹಾಗೂ ದೃಶ್ಯಮಾಧ್ಯಮ ಪತ್ರಕರ್ತರಾಗಿರುವ ನಾಳಪ್ಪಾಡಂ ಪದ್ಮನಾಭನ್ ಅವರು ಮಲಯಾಳ ಸಾಹಿತ್ಯ ಮತ್ತು ಸಾಂಸ್ಕೃತಿಕ ಕ್ಷೇತ್ರಕ್ಕೆ ಮಹತ್ವದ ಕೊಡುಗೆ ನೀಡಿದ್ದಾರೆ. 1967ರ ಮೇ 31ರಂದು ಜನಿಸಿದ ಅವರು ಮಲಯಾಳದಲ್ಲಿ ಎಂ.ಎ., ಬಿ.ಎಡ್. ಹಾಗೂ ಎಲ್‌ಎಲ್‌ಬಿ ಪದವಿಗಳನ್ನು ಪಡೆದಿದ್ದಾರೆ.

ಶೈಕ್ಷಣಿಕ ಸಂಶೋಧನೆ, ಸಾಹಿತ್ಯ ರಚನೆ ಮತ್ತು ದೃಶ್ಯಮಾಧ್ಯಮ ಪತ್ರಿಕೋದ್ಯಮದಲ್ಲಿ ಸಕ್ರಿಯರಾಗಿದ್ದಾರೆ. ಕೇರಳ ಸಾಹಿತ್ಯ ಅಕಾಡೆಮಿಯ ಸಂಶೋಧನಾ ವಿದ್ಯಾರ್ಥಿವೇತನದ ನೆರವಿನಿಂದ ಮಹಾಕವಿ ಪಿ. ಅವರ ಸಮಗ್ರ ಜೀವನದ ಕುರಿತು ಹಾಗೂ ಕೇಂದ್ರ ಸಂಸ್ಕೃತಿ ಇಲಾಖೆಯ ಹಿರಿಯ ಫೆಲೋಶಿಪ್‌ನಡಿ ಮಲಯಾಳ ಸಾಹಿತ್ಯದ ಮೇಲೆ ಮಹಾಕಾವ್ಯಗಳ ಪ್ರಭಾವದ ಕುರಿತು ಸಂಶೋಧನೆ ನಡೆಸಿದ್ದಾರೆ.

ಆರು ಕವನ ಸಂಕಲನಗಳು ಸೇರಿದಂತೆ ಸುಮಾರು 30 ಕೃತಿಗಳು ಪ್ರಕಟಗೊಂಡಿವೆ. ವೈಲೊಪ್ಪಿಳ್ಳಿ ಪ್ರಶಸ್ತಿ, ಚಂಗಂಪುಳ ಪ್ರವಾಸಿ ಪ್ರಶಸ್ತಿ, ವೆಣ್ಮಣಿ ಪ್ರಶಸ್ತಿ, ಫೋಕಾನ ಕವಿತಾ ಪ್ರಶಸ್ತಿ, ಸುಕುಮಾರ್ ಅಳೀಕೋಡ್ ತತ್ತ್ವಮಸಿ ಪ್ರಶಸ್ತಿ, ತಿರುನಲ್ಲೂರು ಕವಿತಾ ಪ್ರಶಸ್ತಿ ಹಾಗೂ ಪದ್ಮರಾಜನ್ ಪ್ರಶಸ್ತಿ ಸೇರಿದಂತೆ ಹಲವು ಗೌರವಗಳು ಅವರಿಗೆ ಲಭಿಸಿವೆ. ಭಾಷೆ ಮತ್ತು ಸಂಸ್ಕೃತಿಗೆ ನೀಡಿದ ಸಮಗ್ರ ಕೊಡುಗೆಗಾಗಿ ಜಿಲ್ಲಾಡಳಿತ ಅವರನ್ನು ಗೌರವಿಸುತ್ತಿದೆ.

ಪಿ.ಎಸ್. ಪುಣಿಂಚಿತ್ತಾಯ

ದಕ್ಷಿಣ ಭಾರತದ ಪ್ರಸಿದ್ಧ ಜಲವರ್ಣ ಚಿತ್ರಕಲಾವಿದರಾದ ಪಿ.ಎಸ್. ಪುಣಿಂಚಿತ್ತಾಯ ಅವರು ಕೇರಳ ಮತ್ತು ಕರ್ನಾಟಕ ಲಲಿತಕಲಾ ಅಕಾಡೆಮಿಗಳ ಸದಸ್ಯರಾಗಿ ಕಾರ್ಯನಿರ್ವಹಿಸಿದ್ದಾರೆ.

ಕಾಸರಗೋಡಿನಿಂದ ಸುಮಾರು 18 ಕಿ.ಮೀ. ದೂರದ ಕಾರಡ್ಕದ ಶಾಂತಿನಗರ ಸಮೀಪದಲ್ಲಿ ‘ಕಾಂಚನಜಂಗ ಕಲಾಗ್ರಾಮ’ ಎಂಬ ಗ್ರಾಮೀಣ ಕಲಾ ಗ್ಯಾಲರಿಯನ್ನು ಸ್ಥಾಪಿಸಿದ್ದಾರೆ. ಇಲ್ಲಿ ಕಲಾವಿದರು ವಾಸ್ತವ್ಯ ಹೂಡಿ ಚಿತ್ರಕಲೆ ಅಭ್ಯಾಸ ಮಾಡಲು ವ್ಯವಸ್ಥೆಯಿದೆ.

1997ರಲ್ಲಿ ಕರ್ನಾಟಕ ಲಲಿತಕಲಾ ಅಕಾಡೆಮಿಯ ಹಿರಿಯ ಕಲಾವಿದ ಪ್ರಶಸ್ತಿ ಪಡೆದಿದ್ದಾರೆ. ತಿರುವನಂತಪುರಂ, ಮುಂಬೈ, ಮಂಗಳೂರು ಮತ್ತು ಮೈಸೂರು ನಗರಗಳ ವಸ್ತುಸಂಗ್ರಹಾಲಯಗಳಲ್ಲಿ ಅವರ ಚಿತ್ರಗಳು ಪ್ರದರ್ಶನಗೊಂಡಿವೆ. 2017ರಲ್ಲಿ ಕೇರಳ ಸರ್ಕಾರದಿಂದ ಕಲಾ-ಸಾಂಸ್ಕೃತಿಕ ಕ್ಷೇತ್ರದ ಸಾಧನೆಗಾಗಿ ಗೌರವ ಪಡೆದಿದ್ದು, 2022ರಲ್ಲಿ ಸಮಗ್ರ ಕೊಡುಗೆಗಾಗಿ ಕೇರಳ ಲಲಿತಕಲಾ ಅಕಾಡೆಮಿ ಪ್ರಶಸ್ತಿಗೆ ಭಾಜನರಾಗಿದ್ದಾರೆ. ಸಾಂಸ್ಕೃತಿಕ ಕ್ಷೇತ್ರಕ್ಕೆ ನೀಡಿದ ಕೊಡುಗೆಗಾಗಿ ಜಿಲ್ಲಾಡಳಿತ ಅವರನ್ನು ಸನ್ಮಾನಿಸಲಿದೆ.

ಕೆ.ವಿ. ರಮೇಶ್

ಕೇರಳದ ಉತ್ತರದ ತುದಿಯಾದ ಕಾಸರಗೋಡಿನ ಸಮೃದ್ಧ ಜನಪದ ಕಲಾ ಪರಂಪರೆಯನ್ನು ರಾಷ್ಟ್ರೀಯ ಮತ್ತು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಪರಿಚಯಿಸುತ್ತಿರುವ ಕಲಾವಿದ ಕೆ.ವಿ. ರಮೇಶ್. ಯಕ್ಷಗಾನ ಗೊಂಬೆಯಾಟ ಕ್ಷೇತ್ರದಲ್ಲಿ ನಾಲ್ಕು ದಶಕಗಳಿಗೂ ಹೆಚ್ಚು ಕಾಲ ಸಕ್ರಿಯರಾಗಿರುವ ಅವರು, ಅಳಿವಿನಂಚಿನಲ್ಲಿರುವ ಸಾಂಪ್ರದಾಯಿಕ ಕಲೆಯನ್ನು ಉಳಿಸಿ ಮುಂದಿನ ಪೀಳಿಗೆಗೆ ಪರಿಚಯಿಸುವ ಕಾರ್ಯದಲ್ಲಿ ತೊಡಗಿಸಿಕೊಂಡಿದ್ದಾರೆ.

1965ರ ಜನವರಿ 11ರಂದು ಜನಿಸಿದ ಕೆ.ವಿ. ರಮೇಶ್ ಅವರು ಕೆ. ವೆಂಕಟಕೃಷ್ಣಯ್ಯ ಮತ್ತು ಗಿರಿಜಾ ಕೆ.ವಿ. ದಂಪತಿಯ ಪುತ್ರ. 43 ವರ್ಷಗಳಿಗೂ ಹೆಚ್ಚು ಕಾಲ ಕಲಾಸೇವೆಯಲ್ಲಿ ತೊಡಗಿರುವ ಅವರು ದೇಶ-ವಿದೇಶಗಳಲ್ಲಿ 3,000ಕ್ಕೂ ಅಧಿಕ ಗೊಂಬೆಯಾಟ ಪ್ರದರ್ಶನಗಳನ್ನು ನೀಡಿದ್ದಾರೆ.

2014ರಲ್ಲಿ ಕೇರಳ ಫೋಕ್‌ಲೋರ್ ಅಕಾಡೆಮಿ ಪ್ರಶಸ್ತಿ ಪಡೆದಿದ್ದಾರೆ. ಯಕ್ಷಗಾನ ಗೊಂಬೆಯಾಟದ ಇತಿಹಾಸ ಮತ್ತು ಸಾಂಸ್ಕೃತಿಕ ಮಹತ್ವವನ್ನು ವಿದ್ಯಾರ್ಥಿಗಳು ಹಾಗೂ ಸಾರ್ವಜನಿಕರಿಗೆ ಪರಿಚಯಿಸುವ ಅವರ ಪ್ರಯತ್ನಗಳನ್ನು ಗುರುತಿಸಿ ಜಿಲ್ಲಾಡಳಿತ ಗೌರವಿಸಲಿದೆ.

ಮುಕುಂದನ್ ಇಳಂಕುಟ್ಟಿ ಪೆರುಮಲಯನ್

ಉತ್ತರ ಕೇರಳದ ಸಾಂಪ್ರದಾಯಿಕ ಆಚರಣಾ ಕಲೆಯಾದ ತೆಯ್ಯಂ ಪ್ರದರ್ಶನದಲ್ಲಿ ಅರ್ಧ ಶತಮಾನಕ್ಕೂ ಹೆಚ್ಚು ಕಾಲ ಪರಿಣತಿ ಮೆರೆದಿರುವ ವಿಶಿಷ್ಟ ಕಲಾವಿದ ಮುಕುಂದನ್ ಇಳಂಕುಟ್ಟಿ ಪೆರುಮಲಯನ್.

1946ರಲ್ಲಿ ಇಳಂಕುಟ್ಟಿ ಪೆರುಮಲಯನ್ ಕುಟುಂಬದ ಕರಿಚೇರಿ ಕಣಾರನ್ ಪಣಿಕ್ಕರ್ ಮತ್ತು ಅಡೋಟ್ ಕಣ್ಣನ್ ಉದಯವರ್ಮನ್ ಪೆರುಮಲಯನ್ ಅವರ ಪುತ್ರಿ ಮಾಣಿ ದಂಪತಿಗೆ ಜನಿಸಿದರು. ಒಂಬತ್ತನೇ ವಯಸ್ಸಿನಲ್ಲಿ ‘ಆಡಿವೇಡನ್’ ವೇಷ ಧರಿಸುವ ಮೂಲಕ ತಮ್ಮ ಆಚರಣಾ ಕಲಾ ಜೀವನ ಆರಂಭಿಸಿದರು. ಮನಯೋಲ ಮತ್ತು ಚಾಯಿಲ್ಯಂ ಬಣ್ಣಗಳನ್ನು ಬಳಿದು, ಗೆಜ್ಜೆ ಧರಿಸಿ ಕೆಂಡದ ಮೇಲೆ ನಡೆಯುವ ಆಚರಣೆಯಲ್ಲಿಯೂ ಪಾಲ್ಗೊಂಡರು.

13ನೇ ವಯಸ್ಸಿನಲ್ಲಿ ಬಾವಿಕ್ಕರ ನಗರಸಭೆಯಿಂದ ಪರದೇವತೆಯ ಕೋಲ ಧರಿಸಿ ಪಟ್ಟು ಮತ್ತು ಬಳೆಗಳನ್ನು ಸ್ವೀಕರಿಸಿದರು. 2012ರಲ್ಲಿ ಕಳಕಸ್ಥಾನಿಕರು ಮತ್ತು ಆಚಾರಪಾಲಕರ ಸಮ್ಮುಖದಲ್ಲಿ ಚಿರಕ್ಕಲ್ ಕೋವಿಲಕದಿಂದ ಕುಟುಂಬದ ಸಂಪ್ರದಾಯದಂತೆ ‘ಇಳಂಕುಟ್ಟಿ ಪೆರುಮಲಯನ್’ ಎಂಬ ಗೌರವ ಬಿರುದನ್ನು ಪಡೆದರು.

72ನೇ ವಯಸ್ಸಿನಲ್ಲಿ ತಲಪ್ಪಾಳಿ ಮತ್ತು ಗೆಜ್ಜೆಗಳನ್ನು ಬದಿಗಿಟ್ಟು ವಿಶ್ರಾಂತ ಜೀವನಕ್ಕೆ ಪ್ರವೇಶಿಸಿದರು. ನಾಡು ಮತ್ತು ಸಂಸ್ಕೃತಿಗೆ ನೀಡಿದ ಕೊಡುಗೆಗಾಗಿ ಜಿಲ್ಲಾಡಳಿತ ಅವರನ್ನು ಗೌರವಿಸಲಿದೆ.