ಅವೈಜ್ಞಾನಿಕ ತ್ಯಾಜ್ಯ ವಿಲೇವಾರಿ: ವಿವಿಧ ಸಂಸ್ಥೆಗಳಿಗೆ ದಂಡ

 ಪೈವಳಿಕೆ ಪಂಚಾಯತ್‌ನ ಬಾಯಾರು ಸಂಸ್ಥೆಗೆ ₹25,000 ದಂಡ; ಪಡನ್ನ ಕಯಲ್ ಪ್ರದೇಶದ ತಟ್ಟೆ ಅಂಗಡಿಗಳಿಗೆ ₹15,000 ದಂಡ

ಕಾಸರಗೋಡು: ಮಲಿನ ನೀರನ್ನು ವೈಜ್ಞಾನಿಕವಾಗಿ ಸಂಸ್ಕರಿಸದೆ ಹೊರಬಿಡುವುದು ಹಾಗೂ ಪ್ಲಾಸ್ಟಿಕ್ ಸೇರಿದಂತೆ ವಿವಿಧ ತ್ಯಾಜ್ಯಗಳನ್ನು ಹರಿತ ಕರ್ಮಸೇನೆಗೆ ಹಸ್ತಾಂತರಿಸದೆ ಸುಡುವ ಮೂಲಕ ಅವೈಜ್ಞಾನಿಕವಾಗಿ ತ್ಯಾಜ್ಯ ವಿಲೇವಾರಿ ಮಾಡಿದ ಪೈವಳಿಕೆ ಗ್ರಾಮ ಪಂಚಾಯತ್ ವ್ಯಾಪ್ತಿಯ ಬಾಯಾರಿನಲ್ಲಿರುವ ಸಂಸ್ಥೆಯೊಂದಕ್ಕೆ ಜಿಲ್ಲಾ ಎನ್‌ಫೋರ್ಸ್‌ಮೆಂಟ್ ಸ್ಕ್ವಾಡ್ ₹25,000 ದಂಡ ವಿಧಿಸಿದೆ.

ಮಲಿನ ನೀರಿನ ಸಂಸ್ಕರಣೆಗಾಗಿ ಎಸ್‌ಟಿಪಿ (ಕೊಳಚೆ ನೀರು ಸಂಸ್ಕರಣಾ ಘಟಕ) ಸ್ಥಾಪಿಸಬೇಕು ಮತ್ತು ಅಜೈವಿಕ ತ್ಯಾಜ್ಯಗಳನ್ನು ಹರಿತ ಕರ್ಮಸೇನೆಗೆ ಹಸ್ತಾಂತರಿಸಬೇಕು ಎಂದು ಅಧಿಕಾರಿಗಳು ಸೂಚಿಸಿದ್ದಾರೆ. ಮುಂದಿನ ಪರಿಶೀಲನೆಯ ಜವಾಬ್ದಾರಿಯನ್ನು ಗ್ರಾಮ ಪಂಚಾಯತ್ ಕಾರ್ಯದರ್ಶಿಗೆ ವಹಿಸಲಾಗಿದೆ.

ಪಡನ್ನ ಕಯಲ್ ಪ್ರದೇಶದ ಸಮೀಪದ ತಟ್ಟೆ ಅಂಗಡಿಗಳಿಂದ ಮಲಿನ ನೀರನ್ನು ತೆರೆದ ಪ್ರದೇಶಕ್ಕೆ ಹರಿಬಿಟ್ಟಿದ್ದಕ್ಕಾಗಿ ₹15,000 ದಂಡ ವಿಧಿಸಲಾಗಿದೆ.

ಇದಲ್ಲದೆ, ಅವೈಜ್ಞಾನಿಕ ತ್ಯಾಜ್ಯ ನಿರ್ವಹಣೆ ನಡೆಸಿದ ಕಾರಡ್ಕ ಮತ್ತು ಕುಂಡಾರ ಪ್ರದೇಶಗಳ ಶಾಲಾ ಮುಖ್ಯಸ್ಥರಿಗೂ ದಂಡ ವಿಧಿಸಲಾಗಿದೆ.

ಪರಿಶೀಲನಾ ತಂಡ

ಜಿಲ್ಲಾ ಎನ್‌ಫೋರ್ಸ್‌ಮೆಂಟ್ ಸ್ಕ್ವಾಡ್‌ನ ಮುಖ್ಯಸ್ಥ ಕೆ.ವಿ. ಮೊಹಮ್ಮದ್ ಮದನಿ, ತಂಡದ ಸದಸ್ಯ ವಿ.ಎಂ. ಜೋಸ್ ಹಾಗೂ ಆರೋಗ್ಯ ನಿರೀಕ್ಷಕರಾದ ವಿ.ಪಿ. ಜಯಶ್ರೀ, ಕೆ. ರಜಿಷಾ, ಪಿ. ಜಯಶ್ರೀ ಮತ್ತು ಪಿ. ಶಾರದಾ ಪರಿಶೀಲನೆಗೆ ನೇತೃತ್ವ ವಹಿಸಿದ್ದರು.